ས༌འུལ༌ དང༌ ཤི༌ཁན༌ནི༌ སེམས༌ཉིད༌ལ༌ བོད༌ཁན༌ བུ༌མོ༌།
28:1 ནེ༌ 25
28
ཏེན༌ན༌ ཏུས༌ཤིག༌ག༌ ཨིས༌ར༌ཨེལ༌པ༌གུན༌ ཉམ༌པོ༌ མག༌ ཏང༌ཅེས༌ལ༌ ཕི༌ལིས༌ཏི༌པ༌གུན༌ནི༌ ཁོ༌རང༌གུན༌ནི༌ མག༌མི༌ གྲལ༌གྲིག༌ ཅོའད༌པིན༌།
གྱལ༌པོ༌ ཨ༌ཀིཤ༌ཤི༌ དཱ༌བིད༌ལ༌ ཟེརས༌,
“ཁྱོ༌རང༌ དང༌ ཁྱོ༌རང༌ངི༌ མི༌གུན༌ ང༌ ཉམ༌པོ༌ མག༌གི༌ ནང༌ང༌ ནོལ༌ལ༌ ཡོང༌གོ༌ཤེས༌པོ༌ ཁྱོ༌རང༌ང༌ ཧ༌གོ༌གོས༌།”
2 དཱ༌བིད༌དི༌ ལན༌ཏངས༌,
“མ༌གྱལ༌ལ༌ རག༌།
ཏ༌ ང༌ཞའ༌ ཅི༌ ཅོ༌ ཉན༌དུག༌ ཉེ༌རང༌ངི༌ ཐོང༌ཅེས༌ ཨིན༌ནོག༌།”
ཏེ༌ནེ༌ ཨ༌ཀིཤ༌ཤི༌ དཱ༌བིད༌ལ༌ ཟེརས༌,
“ཏ༌ནེ༌ ཕར༌ལ༌ ངའེ༌ ཁྱོ༌རང༌ ངའ༌ སྲུང༌སྐྱོབ༌ ཅོ༌ཁན༌ནི༌ མག༌མི༌ ཅོ༌ཨིན༌།”
3 ཏུས༌ བན༌ཤིག༌གི༌ སྔུན༌ལ༌ ས༌མུའེལ༌ ཀྲོངས༌ ཡང༌ ཨིས༌ར༌ཨེལ༌པ༌ ཚང༌མའེ༌ ཁོང༌ངི༌ ཕིའ༌ ཉ༌ངན༌ ཅོས༌ཏེ༌ ཁོང༌ངི༌ སྤུར༌ ཁོང༌ངི༌ ཁང༌པ༌ ཡོད༌སའེ༌ གྲོང༌ཁྱེར༌ ར༌མཧའེ༌ ནང༌ང༌ སུབས༌ཏེ༌ ཨིན༌པིན༌།
ཡང༌ ས༌འུལ༌ལི༌ ཨིས༌ར༌ཨེལ༌ གང༌པོའེ༌ ནང༌ནེ༌ མོ༌ ཏབ༌ཁན༌ དང༌ ཤི༌ཁན༌ནི༌ སེམས༌ཉིད༌ བོད༌ཁན༌ ཚང༌མའ༌ ཕིངས༌ཏེ༌ ཨིན༌པིན༌།
4 ཕི༌ལིས༌ཏི༌པ༌གུན༌ནི༌ མག༌མི༌ ཛོམས༌ ཡང༌ ཁོང༌གུན༌ ཤུ༌ནེམ༌ གྲོང༌ཁྱེར༌རི༌ ནང༌ང༌ ཡོངས༌ཏེ༌ ཀུར༌ ཙུགས༌ཏེ༌ དུགས༌།
ས༌འུལ༌ལི༌ ཨིས༌ར༌ཨེལ༌ལི༌ མག༌མི༌ ཚང༌མ༌ ལྡུས༌ཏེ༌ གིལ༌བོའེ༌ རི༌ཀ༌ ཀུར༌ ཙུགས༌ཏེ༌ དུགས༌།
5 ས༌འུལ༌ལི༌ ཕི༌ལིས༌ཏི༌པ༌གུན༌ནི༌ མག༌མི༌ མང༌པོ༌ ཐོང༌ང༌ཅིག༌ ཁོ༌ མ༌སྲན༌ཏྲེ༌ ཇིགས༌ཏེ༌ ཁོའེ༌ སྙིང༌ སྲན༌ཏྲེ༌ ཕར༌།
6 ཁོའེ༌ ཡ༌ཝའ༌ ཏྲིས༌ ཨིན༌ནའང༌ ཡ༌ཝའེ༌ ཉི༌ལམ༌ ཡ༌ ཨུ༌རིམ༌ ཡ༌ ལུང༌སྟོན༌པ༌གུན༌ གྱུད༌ཏེ༌ ཁོའ༌ ལན༌ མ༌སལས༌།
7 ཏེ༌ནེ༌ ས༌འུལ༌ལི༌ ཁོའེ༌ ཡ༌ཏོ༌གུན༌ལ༌ ཟེརས༌,
“ཤི༌ཁན༌ནི༌ སེམས༌ཉིད༌ལ༌ སྤེ༌ར༌ ཏང༌ཁན༌ནི༌ བུ༌མོ༌ ཙོལ༌ ཏེ༌ནེ༌ ང༌ སོང༌ཏེ༌ ཁོའ༌ ཅི༌ ཆ༌ཅེས༌ ཨིན༌ནོག༌ ཟེར༌ཏེ༌ ཏྲི༌ཨིན༌།
ཁོང༌གུན༌ནི༌ ལན༌ཏངས༌ “ཨེན༌གྲོར༌ གྲོང༌ཁྱེར༌རི༌ ནང༌ང༌ ཏེ༌ ཙོགས༌ བུ༌མོ༌ཞིག༌ ཡོད༌ཏེ༌ ཨིན༌ནོག༌།”
8 ཏེ༌ནེ༌ ས༌འུལ༌ ཀོས༌ལག༌ པས༌མོ༌ གོན༌ཏེ༌ འམ༌ མི༌ཞིག༌གི༌ ཚུལ༌ལ༌ ཁོ༌ དང༌ ཞན༌མི༌ ཉིས༌ ཏེ༌ བུ༌མོའེ༌ ཁང༌པ༌ ཚན༌ལ༌ སོང༌།
ས༌འུལ༌ལི༌ ཟེརས༌,
“ངའེ༌ ཕིའ༌ མི༌ ཤི༌ཁན༌ནི༌ སེམས༌ཉིད༌ ངའེ༌ ཟེར༌ཁན༌བོ༌ བོད༌།”
9 བུ༌མོའེ༌ ཟེརས༌,
“ས༌འུལ༌ལི༌ བཀའ༌ ཏང༌ཁན༌གུན༌ ཁྱོ༌རང༌ང༌ ཏན༌ཏན༌ གྱུས༌ ཡོད༌གྲོ༌།
ཁོང༌ངི༌ ཤི༌ཁན༌ནི༌ སེམས༌ཉིད༌ བོད༌ཁན༌གུན༌ འི༌ ས༌ཀྱད༌ནེ༌ ཕིངས༌ཏེ༌ ཨིན༌ནོག༌།
ཉེ༌རང༌ངི༌ ང༌ ཤི༌ཅུག༌ཅེས༌སི༌ ཅུས༌ངན༌ ལྡིངས༌ཏེ༌ ཨིན༌ན༌?”
10 ཨིན༌ནའང༌ ས༌འུལ༌ལི༌ ཡ༌ཝའེ༌ སྐུན༌དུན༌ལ༌ ནའ༌ ཁུར༌ཏེ༌ ཟེརས༌,
“སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ འི༌བོའེ༌ ཕིའ༌ ཁྱོ༌རང༌ང༌ ཆད༌པ༌ མ༌ནེ༌ མི༌ཕོག༌།”
11 ཏེ༌ནེ༌ བུ༌མོའེ༌ ཟེརས༌,
“ཁྱོ༌རང༌ངི༌ ཕིའ༌ ངའེ༌ སུའི༌ སེམས༌ཉིད༌པོ༌ བོད༌?”
ས༌འུལ༌ལི༌ ལན༌ཏངས༌,
“ས༌མུའེལ༌ལི༌ སེམས༌ཉིད༌པོ༌ བོད༌ཏེ༌ ཁྱོང༌།”
12 བུ༌མོའེ༌ ས༌མུའེལ༌ ཐོང༌ང༌ཅིག༌ ཀུ༌ཅོ༌ ཏངས༌ཏེ༌ ཟེརས༌,
“ཉེ༌རང༌ངི༌ ངའ༌ ཅིའ༌ གོབ༌སྐོར༌ཏེ༌ ཨིན༌,
ཉེ༌རང༌ ས༌འུལ༌ ཨིན༌ནོག༌།”
13 གྱལ༌པོའེ༌ བུ༌མོའ༌ ཟེརས༌,
“ཇིགས༌ མ༌ཇིགས༌,
ཁྱོ༌རང༌ང༌ ཅི༌ ཐོང༌?”
བུ༌མོའེ༌ ཟེརས༌,
“ངའེ༌ སེམས༌ཉིད༌ ས༌ཀྱད༌དི༌ ནང༌ནེ༌ བིངས༌ཏེ༌ ཡོང༌ཨིན༌ ཐོང༌།”
14 ས༌འུལ༌ལི༌ ཏྲིས༌,
“ཁོང༌ ཀ༌ཟུག༌ཤིག༌ ཐོང༌དུག༌?”
བུ༌མོའེ༌ ལན༌ཏངས༌,
“མི༌ རྒད༌པོ༌ ཀོས༌ རིང༌མོ༌ གོན༌ཁན༌ཞིག༌ བིངས༌ཏེ༌ ཡོང༌དུག༌།”
ས༌མུའེལ༌ ཨིན༌ཁན༌བོ༌ ས༌འུལ༌ལ༌ ཧ༌གོ༌ ཡང༌ ཁོ༌ སའེ༌ཀ༌ ཁོང༌ངི༌ དུན༌ལ༌ གྱེལ༌།
15 ས༌མུའེལ༌ལི༌ ས༌འུལ༌ལ༌ ཏྲིས༌,
“ངའེ༌ སེམས༌ཉིད༌ལ༌ བོད༌ཏེ༌ ངའེ༌ ལས༌སི༌ ནང༌ང༌ ཅིའ༌ སྒག༌ཞ༌ ཏང༌ངད༌།”
ས༌འུལ༌ལི༌ ལན༌ཏངས༌,
“ང༌ མ༌སྲན༌ཏྲེ༌ ཇིགས༌པའེ༌ ནང༌ང༌ ཡོད༌,
ཕི༌ལིས༌ཏི༌པ༌གུན༌ ང༌ཞའ༌ མག༌ཏང༌ང༌ ཡོངས༌ཏེ༌ དུག༌ ཡང༌ དཀོན༌མཆོག༌གི༌ ང༌ ཕང༌ང༌ ཛད༌ཏེ༌ ལུང༌སྟོན༌པ༌ ཡ༌ ཉི༌ལམ༌ ཅི༌ཞིག༌ གྱུད༌ཏེ༌ ངའ༌ ལན༌ སལ༌ལ༌ མི༌དུག༌།
ཏེན༌ན༌བོའེ༌ཕིའ༌ ངའ༌ ཅོ༌གོས༌ཤེས༌པོ༌ ཤད༌ད༌ལ༌ ངའེ༌ ཉེ༌རང༌ང༌ བོད༌པིན༌།”
16 ས༌མུའེལ༌ལི༌ ལན༌ཏངས༌,
“ཡ༌ཝའེ༌ ཁྱོ༌རང༌ ཕངས༌ཏེ༌ ཁྱོ༌རང༌ངི༌ གྲ༌འོ༌ གྱུར༌ཏེ༌ ཨིན༌ པ༌སང༌ ངའ༌ ཅིའ༌ ཏྲིའད༌?
17 ཡ༌ཝའེ༌ ང༌ གྱུད༌ཏེ༌ ལུང༌སྟན༌ མོལ༌ཁན༌བོ༌ ཛད༌ཏེ༌ ཨིན༌ནོག༌།
ཁོང༌ངི༌ ཁྱོ༌རང༌ངི༌ ལག༌ནེ༌ གྱལ༌སྲིད༌པོ༌ ཁྱེར༌ཏེ༌ ཁྱོ༌རང༌ང༌ ཞབས༌ཏོག༌ ཅོ༌ཁན༌ དཱ༌བིད༌ལ༌ སལ༌ལ༌ ཛད༌ཏེ༌ ཨིན༌ནོག༌།
18 ཁྱོ༌རང༌ངི༌ ཡ༌ཝའེ༌ ཁའ༌ ཉན༌ཏེ༌ ཨ༌མ༌ལིཀ༌པ༌གུན༌ནི༌ གྱབ༌གལ༌ལ༌ ཁོང༌ངི༌ ཐུགས༌སྲོ༌ ཀྲག༌པོ༌ མ༌སྟན༌ པ༌སང༌ དི༌རིང༌ ཡ༌ཝའེ༌ འི༌བོ༌ ཁྱོ༌རང༌ང༌ ཛད༌ཏེ༌ ཨིན༌ནོག༌།
19 ཏ༌ ཡ༌ཝའེ༌ ཁྱོ༌རང༌ དང༌ ཨིས༌ར༌ཨེལ༌ལི༌ མག༌མི༌གུན༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ཨིན༌ ཡང༌ ཐོ༌རེ༌ ཁྱོ༌རང༌ དང༌ ཁྱོ༌རང༌ངི༌ བུ༌ཚ༌གུན༌ ང༌ ཡོད༌ས༌ ཡོང༌ཨིན༌།
ཡ༌ཝའེ༌ ཕི༌ལིས༌ཏི༌པ༌གུན༌ གྱུད༌ཏེ༌ ཨིས༌ར༌ཨེལ༌ལི༌ མག༌མི༌ གང༌པོའ༌ ཕམ༌ཕོག༌ཅུག༌ག༌ ཛད༌ཨིན༌།”
20 ས༌མུའེལ༌ལི༌ སྤེ༌ར༌གུན༌ ཚོར༌ཏེ༌ ས༌འུལ༌ སྲན༌ཏྲེ༌ ཇིགས༌ ཡང༌ ཁོའེ༌ ས༌ཀྱད༌དི༌ཀ༌ རྗར༌གྱེལ༌།
ཁོའེ༌ ཟུགས༌པོ༌ ཤེད༌མེད༌ ཡོད༌པིན༌ ཅིའ༌ཟེར༌ན༌ ཁོའེ༌ ཚན༌ཉིན༌ གང༌པོ༌ ཅའང༌ མ༌ཟའ༌ ཨིན༌པིན༌།
21 ས༌འུལ༌ སྲན༌ཏྲེ༌ ཇིགས༌ཏེ༌ ཡོད༌ཁན༌བོ༌ ཐོང༌ང༌ཅིག༌ བུ༌མོའེ༌ ཟེརས༌ “སྤོན༌བོ༌ལེ༌ ངའེ༌ ང༌རང༌ངི༌ སྲོག༌པོ༌ ཙུགས༌ཏེ༌ ཉེ༌རང༌ངི༌ མོལ༌ཁན༌བོ༌ ཅོས༌པིན༌།
22 ཏ༌ ངའེ༌ ཟེར༌ཁན༌བོ༌ ཉེ༌རང༌ངི༌ ཅོའ༌ ཛད༌།
ངའ༌ ཉེ༌རང༌ངི༌ ཕིའ༌ ཟན༌ ཉུ༌ངུན༌ཞིག༌ ཁྱོང༌ཅུག༌ག༌ ཛད༌,
ཏེ༌བོ༌ ཟའ༌ན༌ ཉེ༌རང༌ང༌ ལོགས༌ཏེ༌ ཆ༌ཅེས༌ལ༌ ཤེད༌ ཐོབ༌ཨིན༌།”
23 ཨིན༌ནའང༌ ས༌འུལ༌ལི༌ ཟན༌ མ༌ཟོས༌།
ཁོང༌ ཉམ༌པོ༌ ཡོད༌ཁན༌གུན༌ནིའང༌ ཁོའ༌ ཟན༌ ཟའ༌ཅེས༌ལ༌ སྲན༌ཏྲེ༌ ཞུ༌ཝ༌ ཕུལས༌ ཏེ༌ནེ༌ ཁོ༌ སའེ༌ཀ༌ནེ༌ ལངས༌ཏེ༌ མལ༌ཙེ༌ཀ༌ དུགས༌།