ཕི༌ལིས༌ཏི༌པ༌གུན༌ནི༌ ཕྲོའ༌ དཱ༌བིད༌།
27:1 ནེ༌ 12
27
དཱ༌བིད༌དི༌ སམ༌,
“ཞག༌ཤིག༌ ས༌འུལ༌ལི༌ ང༌ ཟུམ༌ཏེ༌ སད༌ད༌ནོག༌།
ང༌ ཤོར༌ཏེ༌ ཕི༌ལིས༌ཏི༌པའེ༌ ཡུལ༌ལ༌ དུག༌ག༌ ཆ༌ཅེས༌པོ༌ ཐབས༌ གྱལ༌ལ༌ཞིག༌ རག༌།
ཏེ༌ནེ༌ ས༌འུལ༌ལི༌ ཨིས༌ར༌ཨེལ༌ལི༌ ནང༌ང༌ ང༌ ཙལ༌ཅེས༌ ཕང༌ཨིན༌ ཡང༌ ཁོའེ༌ ལག༌ནེ༌ ཤི༌ཅེས༌ནེ༌ ངའ༌ ཐར༌ཨིན༌།”
2 ཏེ༌བོའེ༌ཕིའ༌ དཱ༌བིད༌ དང༌ ཁོའེ༌ མི༌ 600 གཱད༌དི༌ གྱལ༌པོ༌ མ༌འོཁ༌གི༌ བུ༌ཚ༌ ཨ༌ཀིཤ༌ ཡོད༌ས༌ སོང༌།
3 དཱ༌བིད༌,
ཁོའེ༌ མི༌གུན༌ དང༌ ཁོང༌གུན༌ནི༌ ནང༌ཚངས༌ ཨ༌ཀིཤ༌ ཉམ༌པོ༌ གཱད༌དི༌ ནང༌ང༌ ཚུགས༌ཏེ༌ དུགས༌།
དཱ༌བིད༌དི༌ ན༌མ༌ ཡེཟ༌རེ༌འེལ༌པ༌ ཨ༌ཧི༌ནོའམ༌ དང༌ ན༌བལ༌ ཤི༌ཁན༌ནི༌ ན༌མ༌ ཀར༌མེལ༌པ༌ ཨ༌བི༌གཱའིལ༌ ཉིས༌ཀོ༌ ཁོ༌རང༌ ཉམ༌པོ༌ ཁྱེརས༌།
4 དཱ༌བིད༌ གཱད༌ལ༌ ཤོར༌ཏོག༌ ཟེར༌ཏེ༌ ས༌འུལ༌ལ༌ ཚོར༌ར༌ཅིག༌ ཁོའེ༌ དཱ༌བིད༌ མ༌ ཙལས༌།
5 ཞག༌ཤིག༌ དཱ༌བིད༌དི༌ ཨ༌ཀིཤ༌ལ༌ ཟེརས༌,
“ཀལ༌ཏེས༌ ཉེ༌རང༌ ཐད༌ན༌ ང༌ཞའ༌ དུག༌ཅེས༌ལ༌ གྲོང༌སེབ༌ ཤིག༌ སལ༌ལ༌ ཛད༌,
ང༌ཞའ༌ འི༌རུ༌ ཉེ༌རང༌ ཉམ༌པོ༌ དུགས༌ཏེ༌ ཉེ༌རང༌ང༌ འོབ༌གྱལ༌ ཅིའ༌ སྟན༌ཨིན༌།”
6 ཏེ༌ནེ༌ ཨ༌ཀིཤ༌ཤི༌ དཱ༌བིད༌ལ༌ ཟིག༌ལག༌ གྲོང༌ཁྱེར༌ ཏངས༌ ཡང༌ ཁོང༌གུན༌ ཏེ༌ནང༌ང༌ དུགས༌།
དི༌རིང༌ངའང༌ ཏེ༌ གྲོང༌སེབ༌པོ༌ ཡ༌ཧུ༌དཱའེ༌ གྱལ༌པོའེ༌ ས༌ཀྱད༌ ཨིན༌ནོག༌།
7 ཡང༌ ཁོང༌གུན༌ ཕི༌ལིས༌ཏི༌པའེ༌ ཡུལ༌ཇོངས༌སི༌ ནང༌ང༌ ལོ༌ ཅིག༌ དང༌ ཟླ༌ཝ༌ ཞི༌ དུགས༌།
8 དཱ༌བིད༌ དང༌ ཁོའེ༌ མི༌གུན༌ནི༌ གེ༌ཤུར༌པ༌,
གིར༌ཟ༌པ༌ དང༌ ཨ༌མ༌ལིཀ༌པ༌ གུན༌ལ༌ སྤུང༌གོལ༌ ཅོས༌ཏེ༌ ཅོམས༌།
ཏེ༌ མི༌གུན༌ སྔུན༌ ཏུས༌ནེ༌ པར༌ལ༌ ཤུར༌ དང༌ ཨི༌ཇིབ༌བི༌ སན༌ཚམས༌སི༌ ས༌ཀྱད༌གུན༌ནི༌ ནང༌ང༌ དུག༌གད༌པིན༌།
9 དཱ༌བིད༌དི༌ སྤུང༌གོལ༌ ཅོ༌སའེ༌ ནས༌ས༌གུན༌ནི༌ ནང༌ང༌ མི༌ ཅིག༌གའང༌ སོན༌ཏེའ༌ བོར༌ར༌ མེད༌པིན༌ ཨིན༌ནའང༌ ཁོང༌གུན༌ནི༌ ལུག༌,
ར༌མ༌,
བ༌ལང༌,
བུང༌བུ༌,
རྔ༌བོང༌ དང༌ ཀོས༌ལག༌ གུན༌ ཅོམས༌ཏེ༌ གྱལ༌པོ༌ ཨ༌ཀིཤ༌ ཡོད༌ས༌ ལོགས༌ཏེ༌ ཆའད༌པིན༌།
10 “དི༌རིང༌ ཁྱོ༌ཞའེ༌ ཀ༌རུ༌ སྤུང༌གོལ༌ ཅོས༌པིན༌?”
ཟེར༌ཏེ༌ ཨ༌ཀིཤ༌ཤི༌ ཏྲིའ༌ཅིག༌ དཱ༌བིད༌དི༌ ཡ༌ཧུ༌དཱའེ༌ ལྷོ༌ ཆོགས༌སི༌ ཡུལ༌ཇོངས༌ ཡ༌ ཡེ༌ར༌མིའིལ༌ སྡེའེ༌ ཡུལ༌ཇོངས༌ ཡ༌ ཀེན༌པ༌གུན༌ དུགས༌སའེ༌ ཡུལ༌ཇོངས༌སི༌ ནང༌ང༌ ནོལ༌ལ༌ སོང༌པིན༌ ཟེར༌ཏེ༌ ཟུན༌ ཏང༌ངད༌པིན༌།
11 གཱད༌ལ༌ ཁྱོང༌ཅེས༌ལ༌ དཱ༌བིད༌དི༌ སུ༌ཞིག༌གའང༌ སོན༌ཏེའ༌ བོར༌ར༌ མེད༌པིན༌ ཅིའ༌ཟེར༌ན༌ ཁོའེ༌ སམ༌,
ཀལ༌ཏེས༌ སོན༌ཏེའ༌ བོར༌ན༌ ཏེ༌ མི༌གུན༌ནི༌ ངའེ༌ ཅོ༌ཁན༌གུན༌ གྱལ༌པོའ༌ ཤད༌ སྲིད༌ཅེས༌ ཨིན༌ནོག༌།”
ཕི༌ལིས༌ཏི༌པ༌གུན༌ནི༌ ཕྲོའ༌ དུག༌ ཟ༌ནེ༌ དཱ༌བིད༌དི༌ ཏུས༌གྱུན༌ ཏེན༌ན༌ ཙོགས༌ ཅོའད༌པིན༌།
12 ཨ༌ཀིཤ༌ཤི༌ དཱ༌བིད༌དི༌ཀ༌ ལོ༌ཁྱེལ༌ ཅོས༌ཏེ༌ སམ༌,
“དཱ༌བིད༌དི༌ ལས༌ ཅོ༌ཁན༌གུན༌ནི༌ ཞས༌ཏེ༌ ཨིས༌ར༌ཨེལ༌པ༌གུན༌ནི༌ ཁོའ༌ མ༌སྲན༌ཏྲེ༌ ནཕ༌རད༌ ཅོའད༌གྲོ༌།
ངའེ༌ ཡོག༌པོ༌ ཅོ༌ཨིན༌ ཁོ༌ འི༌རུ༌ ཏུས༌གྱུན༌ དུག༌གོས༌ཏེ༌ ཨིན༌ནོག༌།”