དཱ༌བིད༌དི༌ ས༌འུལ༌ ལན༌ ཉིས༌པ༌ མ༌སདས༌།
26:1 ནེ༌ 25
26
ཟིབ༌བི༌ གྲོང༌ཁྱེར༌ནེ༌ མི༌ ཁ༌ཅིག༌ ས༌འུལ༌ ཡོད༌ས༌ གི༌བེའཧ༌ཧའ༌ སོང༌ཏེ༌ ཟེརས༌,
“དཱ༌བིད༌ ཡེ༌ཤི༌མོན༌ ནས༌སའེ༌ འ༌ངོ༌ ཆོགས༌ལ༌ ཧ༌ཀི༌ལཧའི༌ རི༌ ནང༌ང༌ ཨིབས༌ཏེ༌ ཡོད༌ཏེ༌ ཨིན༌ནོག༌།”
2 ཏེ༌ནེ༌ ས༌འུལ༌ ཨིས༌ར༌ཨེལ༌ལི༌ གྱལ༌ཤོག༌ མག༌མི༌ སྟོང༌སུམ༌ ཁྲིད༌ཏེ༌ ཐུར༌ལ༌ དཱ༌བིད༌ ཙལ༌ལ༌ལ༌ ཟིབ༌བི༌ ཐང༌སྟོང༌ང༌ སོང༌།
3 ས༌འུལ༌ལི༌ ལམ༌མི༌ ཐའ༌མའ༌ ཡེ༌ཤི༌མོན༌ གྲོང༌ཁྱེར༌རི༌ འ༌ངོ༌ ཆོགས༌ལ༌ ཧ༌ཀི༌ལཧའི༌ རི༌ཀ༌ ཀུར༌ ཙུགས༌ཏེ༌ དུགས༌ ཨིན༌ནའང༌ དཱ༌བིད༌ ཐང༌སྟོང༌ངི༌ ནང༌ང༌ ཡོད༌པིན༌།
ས༌འུལ༌ ཏེ༌རུ༌ དཱ༌བིད༌ ཙལ༌ལ༌ལ༌ ཡོང༌ཁན༌བོ༌ གྱུས༌ཆའ༌ཅིག༌
4 ཏེ༌བོ༌ ཏན༌ཏན༌ ཅོ༌ཅེས༌ལ༌ ཁོའེ༌ སང༌ཝའེ༌ ཐོག༌ནེ༌ མི༌རིག༌ ལམ༌ཅུགས༌།
5 ཏེན༌ན༌ ཞག༌གི༌ ཚན༌ལ༌ ས༌འུལ༌ ཀུར༌ ཙུགས༌ཏེ༌ དུག༌ས༌ དཱ༌བིད༌ སོང༌།
ས༌འུལ༌ དང༌ ཁོའེ༌ མག༌མི༌གུན༌ནི༌ འུ༌སྐྱོང༌ ནེར༌རི༌ བུ༌ཚ༌ ཨབ༌ནེར༌ ཉིས༌ཀོ༌ ཉིད༌ལོགས༌ཏེ༌ ཡོད༌པིན༌།
ས༌འུལ༌ལི༌ ཀུར༌ ཞུང༌སྐྱིལ༌ལ༌ ཡང༌ མག༌མི༌གུན༌ནི༌ ཀུར༌ ཁོའེ༌ ཀུར༌ལ༌ སྐོར༌ཏེ༌ ཡོད༌པིན༌།
6 དཱ༌བིད༌དི༌ ཧེད༌པ༌ ཨ༌ཧི༌མེ༌ལེག༌ དང༌ ཟེ༌རུའི༌འཧའེ༌ བུ༌ཚ༌ ཡོ༌འབ༌བི༌ ནོ༌ ཨ༌བི༌ཤཱའི༌ ཏྲིས༌,
“ང༌ ཉམ༌པོ༌ ཐུར༌ལ༌ ས༌འུལ༌ ཀུར༌ ཙུགས༌ཏེ༌ དུགས༌སའེ༌ ནས༌ས༌ སུ༌ ཆའ༌ ཐད༌ད༌རག༌?”
ཨ༌བི༌ཤཱའི༌ ལན༌ཏངས༌,
“ང༌ ཉེ༌རང༌ ཉམ༌པོ༌ ཆེན༌།”
7 ཏེན༌ན༌ ཚན༌ལ༌ དཱ༌བིད༌ དང༌ ཨ༌བི༌ཤཱའི༌ ཉིས༌ཀོ༌ ས༌འུལ༌ དུག༌སའེ༌ ནས༌ས༌ སོང༌ ཡང༌ ཁོ༌ ཉིད༌ལ༌ སོང༌ཏེ༌ ཁོ༌རང༌ངི༌ དུང༌ གོའེ༌ དུན༌ལ༌ སའེ༌ ནང༌ང༌ ཙུགས༌ཏེ༌ ཐོང༌།
ཨབ༌ནེར༌ དང༌ མག༌མི༌གུན༌ ཁོའ༌ ཀྱིར༌སྐོར༌ཏེ༌ ཉིད༌ལ༌ སོང༌ཏེ༌ ཡོད༌པིན༌།
8 ཨ༌བི༌ཤཱའི༌ དཱ༌བིད༌ལ༌ ཟེརས༌,
“འི༌ ལན༌ ཏན༌ཏན༌ལ༌ དཀོན༌མཆོག༌གི༌ ཉེ༌རང༌ངི༌ གྲ༌འོ༌ ཉེ༌རང༌ངི༌ ལག༌ག༌ སྟད༌ད༌ ཛད༌ཏེ༌ ཨིན༌ནོག༌།
དུང༌ གྱབས༌ཏེ༌ ཁོ༌ སའ༌ ཇར༌ཅུག༌ཅེས༌ལ༌ ང༌ གོངས༌པ༌ སལ༌,
ང༌ ལན༌ཉིས༌ ལྡབ༌ གོས༌ མི༌ཡོང༌།”
9 དཱ༌བིད༌དི༌ ཟེརས༌,
“ཁོང༌ མ༌སད༌།
ཡ༌ཝའེ༌ ལྡམ༌མ༌ ཛད༌ཁན༌བོའེ༌ གྱབ༌གལ༌ལ༌ ལག༌པ༌ ལངས༌ཏེ༌ སུ༌ ནོངས༌མེད༌ ལུས༌ ཐུབ༌ཨིན༌?
10 སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌,
ཡ༌ཝ༌ ཁོང༌རང༌ངི༌ ས༌འུལ༌ མེད༌ཁན༌ ཛད༌ཨིན༌ ཡ༌ ཁོ༌ སྒས༌ཏེ༌ ཡ༌ མག༌གི༌ ནང༌ང༌ ཤི༌ཨིན༌།
11 ཡ༌ཝའེ༌ ལྡམ༌མ༌ ཛད༌ཁན༌ནི༌ གྱབ༌གལ༌ལ༌ ལག༌པ༌ སྟག༌ཅེས༌སི༌ ཧམ༌པ༌ ཁོང༌ངི༌ ངའ༌ ཅོ༌ཅུག༌ག༌ མ༌ཛད༌ཤིག༌།
ཨིན༌ནའང༌ ས༌འུལ༌ལི༌ གོའི༌ དུན༌ལ༌ ཡོད༌ཁན༌ དུང༌ དང༌ ཆུ༌ནོད༌ ཁུར༌ཏེ༌ ང༌དང༌ ཆེན༌།”
12 ཏེ༌ནེ༌ དཱ༌བིད༌དི༌ ས༌འུལ༌ལི༌ གོའི༌ དུན༌ལ༌ ཡོད༌ཁན༌ དུང༌ དང༌ ཆུའི༌ ནོད༌པོ༌ ཁུར༌ཏེ༌ སོང༌།
ཁོང༌གུན༌ སུའིང༌ མ༌ཐོང༌ ཡང༌ སུའང༌ ཉིད༌ མ༌ཚད༌ ཅིའ༌ཟེར༌ན༌ ཡ༌ཝའེ༌ ཁོང༌གུན༌ལ༌ ཉིད༌ མ༌སྲན༌ཏྲེ༌ ཡོང༌ ཅུག༌ག༌ ཛདས༌།
13 དཱ༌བིད༌ ས༌འུལ༌ནེ༌ མ༌ ཐག༌རིང༌ང༌ སྟན༌པོ༌ ནས༌ས༌,
ལུང༌པའེ༌ འ༌ངོ༌ ཆོགས༌སི༌ རི༌ཀ༌ སོང༌།
14 ཡང༌ མག༌མི༌གུན༌ དང༌ ནེར༌རི༌ བུ༌ཚ༌ ཨབ༌ནེར༌ལ༌ ཁོའེ༌ ཀུ༌ཅོ༌ ཏངས༌ཏེ༌ ཟེརས༌,
“ཨབ༌ནེར༌,
ངའ༌ ལན༌ ཏང༌ང༌ མེད༌ད༌?”
ཨབ༌ནེར༌རི༌ ཏྲིས༌,
“ཀུ༌ཅོ༌ ཏངས༌ཏེ༌ གྱལ༌པོའེ༌ ཉིད༌ ཚད༌ ཅུག༌ཁན༌ ཁྱོ༌རང༌ སུ༌ ཨིན༌?”
15 དཱ༌བིད༌དི༌ ཟེརས༌,
“ཏན༌ཏན༌ ཨབ༌ནེར༌ ཁྱོ༌རང༌ མག༌མི༌ ཀྲག༌པོ༌ཞིག༌ ཨིན༌ནོག༌ མན༌ན༌?
ཨིས༌ར༌ཨེལ༌ གང༌པོའེ༌ ནང༌ང༌ ཁྱོ༌རང༌ ཙོགས༌ སུ༌ ཡོད༌?
ཏེ༌ནེ༌ ཁྱོ༌རང༌ངི༌ རང༌ངི༌ སྤོན༌བོ༌ གྱལ༌པོའེ༌ སྲུང༌སྐྱོབ༌ གྱལ༌ལ༌ ཅིའ༌ མ༌ཅོས༌པིན༌ ནམ༌ སུ༌ཞིག༌ ཁོང༌ སད༌ད༌ལ༌ ཡོངས༌?”
16 ཁྱོ༌རང༌ངི༌ ཅོ༌ཁན༌ནི༌ ལས༌པོ༌ གྱལ༌ལ༌ མི༌དུག༌།
སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ཁྱོ༌རང༌ དང༌ ཁྱོ༌རང༌ངི༌ མག༌མི༌གུན༌ ཤི༌ཅེས༌ འོས༌པ༌ ཨིན༌ ཅིའ༌ཟེར༌ན༌ ཁྱོ༌ཞ༌གུན༌ ཡ༌ཝའེ༌ ལྡམ༌མ༌ ཛད༌ཁན༌ ཁྱོ༌ཞའེ༌ སྤོན༌བོ༌ སྐྱོབ༌བ༌ལ༌ ཁྲངས༌པོ༌ མ༌ལུས༌།
ལྟོས༌སའང༌ གྱལ༌པོའེ༌ གོའི༌ དུན༌ལ༌ ཡོད༌ཁན༌ནི༌ དུང༌ དང༌ ཆུ༌ནོད༌ གུན༌ ཀ༌རེ༌?”
17 ས༌འུལ༌ལི༌ དཱ༌བིད༌དི༌ སྐད༌ ཤེས༌ཏེ༌ ཟེརས༌,
“ཅི༌ འི༌བོ༌ ཁྱོ༌རང༌ངི༌ སྐད༌ ཨིན༌ན༌ ངའེ༌ བུ༌ཚ༌ དཱ༌བིད༌?”
ཡང༌ དཱ༌བིད༌དི༌ ལན༌ཏངས༌,
“ཨིན༌ལེ༌,
ངའེ༌ གྱལ༌པོ༌།
18 ངའེ༌ སྤོན༌བོ༌,
ཉེ༌རང༌ངི༌ ངའ༌ ཙལ༌ཨིན༌ ངའེ༌ གྱབ༌ནེ༌ ཅིའ༌ ཡོང༌ངད༌?
ངའེ༌ ཅི༌ ཅོས༌ཏོག༌,
ངའེ༌ ནོར༌ཁྲུལ༌ ཅི༌ ཅོས༌ཏོག༌?”
19 ཨིན༌ནའང༌ ཏ༌ ངའེ༌ གྱལ༌པོ༌ ཉེ༌རང༌ངི༌ ཡོག༌པོའེ༌ ཟེར༌ཅེས༌ཅན༌བོའ༌ ཉན༌ན༌ ཛད༌།
ཀལ༌ཏེས༌ ཡ༌ཝའེ༌ ཉེ༌རང༌ང༌ ངའེ༌ཀ༌ ཐུག༌སྲོ༌ ཡོང༌ཅུག༌ག༌ ཛད༌ཏེ༌ ཨིན༌ན༌ ཏེ༌ནེ༌ ངའེ༌ ཆོད༌པ༌ ཕུལ༌ཏེ༌ ཁོང༌ངི༌ ཀ༌ནེ༌ ཤགས༌པ༌ ཞུ༌ཨིན༌།
ཨིན༌ནའང༌ ཀལ༌ཏེས༌ འི༌བོ༌ མི༌གུན༌ནི༌ ཅོས༌ཏེ༌ ཨིན༌ན༌ ཏེ༌ནེ༌ ཁོང༌གུན༌ལ༌ ཡ༌ཝའེ༌ ངན༌ ཕོག༌ཤིག༌ ཅིའ༌ཟེར༌ན༌ ཁོང༌གུན༌ནི༌ ཡ༌ཝའེ༌ ནོར༌སྐལ༌ལི༌ ནས༌སའེ༌ ནང༌ནེ༌ ང༌ ཕིངས༌ཏེ༌ ཟེརས༌,
‘ཞན༌མི༌གུན༌ནི༌ ལྷ༌གུན༌ལ༌ ཅོལ༌ལ༌ སོང༌།’
20 ཡ༌ཝའེ༌ ཏམ༌པའེ༌ ཀུར༌ནེ༌ མ༌ ཐག༌རིང༌ང༌ ང༌ ཞན༌མའེ༌ ས༌ཀྱད༌དི༌ཀ༌ ཤི༌ ཅུག༌ག༌ མ༌ཛད༌།
ནོད༌པ༌ མ༌སྐྱལ༌ཁན༌ ང༌ ཁྱི༌ཤིག༌ ཙལ༌ལ༌ ཨིས༌ར༌ཨེལ༌ལི༌ གྱལ༌པོ༌ ཡོངས༌ཏེ༌ ཨིན༌ན༌?
ཅི༌ཕིའ༌ ཉེ༌རང༌ངི༌ ང༌ རི༌ སྲག༌པ༌ ཙོགས༌ལ༌ ཏེད༌ད༌?”
21 ཏེ༌ནེ༌ ས༌འུལ༌ལི༌ ཟེརས༌,
“ངའེ༌ སྡིག༌པ༌ ཅོས༌ཏེ༌ ཨིན༌ནོག༌།
ཁང༌པ༌ ལོགས༌ཏེ༌ ཡོང༌ ངའེ༌ བུ༌ཚ༌ ཡང༌ ངའེ༌ ཁྱོ༌རང༌ང༌ ནོད༌པ༌ མི༌སྐྱལ༌ ཅིའ༌ཟེར༌ན༌ དི༌རིང༌ ཁྱོ༌རང༌ངི༌ ངའེ༌ མི༌ཚེ༌ རིན༌ཅན༌ ཐེས༌ཏེ༌ ང༌ མ༌སད༌ ཨིན༌ནོག༌།
ང༌ བུང༌བུ༌ ཨིན༌ནོག༌ ཡང༌ ངའེ༌ ནོར༌ཁྲུལ༌ མ༌སྲན༌ཏྲེ༌ ཅོས༌ཏེ༌ ཨིན༌ནོག༌།”
22 དཱ༌བིད༌དི༌ ལན༌ཏངས༌,
“འི༌ཀ༌ནེ༌ ཉེ༌རང༌ངི༌ དུང༌བོ༌ གྱལ༌པོ༌ལེ༌།
ཞུ༌ནུ༌ ཅིག༌ ཀལ༌ཏེ༌ འི༌བོ༌ ལེན༌ ཅུག༌ག༌ ཛད༌།
23 ཡ༌ཝའེ༌ མི༌ རེ༌རེའ༌ ཁོང༌ངི༌ཀ༌ ཨིད༌ཤེས༌ ཅོས༌ཏེ༌ ཀྲང༌པོ༌ དུག༌ཅེས༌ལ༌ སོལ༌རས༌ སལ༌ལ༌ནོག༌།
ཡ༌ཝའེ༌ ཉེ༌རང༌ ངའེ༌ ཝང༌ངི༌ ཡོག༌ག༌ སལ༌ལ༌ ཛད༌ཏེའང༌ ངའེ༌ ཉེ༌རང༌ མ༌སད༌པིན༌ ཅིའ༌ཟེར༌ན༌ ཉེ༌རང༌ ཡ༌ཝའེ༌ ལྡམ༌མ༌ ཛད༌ཁན༌ནི༌ གྱལ༌པོ༌ ཨིན༌ནོག༌།
24 ཀ༌ཟུག༌ ངའེ༌ དི༌རིང༌ ཉེ༌རང༌ངི༌ མི༌ཚེ༌ རིན༌ཅན༌ ཐེའ༌ ཙོགས༌ལ ཡ༌ཝའེ༌ ངའེ༌ མི༌ཚེའང༌ རིན༌ཅན༌ ཐེའ༌ ཛད༌ཏེ༌ ནགས༌ ཚང༌མ༌ནེ༌ ང༌ སྐྱོབ༌བ༌ ཛད༌ཤིག༌།”
25 ཏེ༌ནེ༌ ས༌འུལ༌ལི༌ དཱ༌བིད༌ལ༌ ཟེརས༌,
“ཁྱོ༌རང༌ང༌ ཅིན༌ལབས༌ ཐོབ༌ཤིག༌,
ངའེ༌ བུ༌ཚ༌ དཱ༌བིད༌།
ཁྱོ༌རང༌ ལས༌ ཀྲག༌པོ༌ མང༌པོའེ༌ ནང༌ང༌ ཁྲངས༌པོ༌ ལུས༌ཨིན༌།”
ཏེ༌ནེ༌ དཱ༌བིད༌ ཁོ༌རང༌ངི༌ མི༌གུན༌ ཡོད༌ས༌ ལོགས༌ཏེ༌ སོང༌ ཡང༌ ས༌འུལ༌ ཁོ༌རང༌ངི༌ ཁང༌པ༌ སོང༌།