དཱ༌བིད༌དི༌ ས༌འུལ༌ མ༌སདས༌།
24:1 ནེ༌ 22
24
ཕི༌ལིས༌ཏི༌པ༌གུན༌ལ༌ ནོལ༌ཏེ༌ སྟིང༌ནེ༌ ས༌འུལ༌ དང༌ ཁོའེ༌ མག༌མི༌གུན༌ ལོགས༌ཏེ༌ ཡོངས༌ ཡང༌ མི༌ཞིག༌གི༌ དཱ༌བིད༌ ཨེན༌ གི༌གྲིའེ༌ ཐང༌སྟོང༌ངི༌ ནང༌ང༌ དུག༌ ཟེར༌ཏེ༌ ཁོའ༌ ལོན༌ ཁྱོངས༌།
2 ཏེ༌ནེ༌ ས༌འུལ༌ལི༌ ཨིས༌ར༌ཨེལ༌ གང༌པོའེ༌ ནང༌ནེ༌ གྱལ༌ཤོག༌ མག༌མི༌ སྟོང༌ སུམ༌ ལྡམས༌ཏེ༌ ཁོང༌གུན༌ མ༌སྲལ༌ཁན༌ ར༌མའེ༌ བྲག༌ ཟེར༌ཁན༌ནི༌ ནས༌ས༌ དཱ༌བིད༌ དང༌ ཁོའེ༌ མི༌གུན༌ ཙལ༌ལ༌ལ༌ སོང༌།
3 ལམ༌ནེ༌ ཆེན༌ ཡོད༌ ཟ༌ནེ༌ ཁོང༌གུན༌ ལུག༌རའེ༌ ཉེ༌མོའ༌ ཡོད༌ཁན༌ བྲག༌ཕུགས༌ ཤིག༌ག༌ ལེབ༌ ཡང༌ ས༌འུལ༌ ཏེ༌ ནང༌ང༌ ཕིས༌ཏ༌ ཏང༌ང༌ སོང༌།
ཏེན༌ན༌ བྲག༌ཕུགས༌སི༌ ཐིལ༌ ནང༌ཀུག༌ག༌ དཱ༌བིད༌ དང༌ ཁོའེ༌ མི༌གུན༌ ཨིབས༌ཏེ༌ ཡོད༌ཁན༌བོ༌ ཁོའ༌ གྱུས༌ མེད༌པིན༌།
4 དཱ༌བིད༌དི༌ མི༌གུན༌ནི༌ ཁོའ༌ ཟེརས༌,
“ཡ༌ཝའེ༌ ཉེ༌རང༌ང༌ ‘ངའེ༌ ཁྱོ༌རང༌ངི༌ གྲ༌འོ༌ ཁྱོ༌རང༌ངི༌ ལག༌ག༌ ཁྱོ༌རང༌ ཐད༌ཁན༌ ཅོ༌ཅེས༌ལ༌ ཏང༌ངད༌’ མོལ༌ཁན༌ ཞག༌པོ༌ དི༌རིང༌ ཨིན༌ནོག༌།”
ཏེ༌ནེ༌ དཱ༌བིད༌ ཇབས༌ཏེ༌ ས༌འུལ༌ལི༌ དུན༌ལ༌ སོང༌ ཡང༌ ཁོའེ༌ ཀོས༌སི༌ ཀྲུ༌ཞིག༌ ཆད༌ཏེ༌ ཁྱོངས༌།
5 སྟིང༌ནེ༌ ཏེ༌ཟུག༌ ཅོ༌ཅེས༌པོའ༌ དཱ༌བིད༌ སེམ༌མི༌ ནང༌ང༌ གྱོདས༌ ཡང༌ ཟེརས༌,
6 “ཡ༌ཝའེ༌ ལྡམ༌མ༌ ཛད༌ཁན༌ གྱལ༌པོ༌ ཉམ༌པོ༌ ཡང༌སྐྱར༌ ཏེ༌ཙོགས༌ མི༌ཅོ༌ཅེས༌ལ༌ ངའེ༌ ནའ༌ ཁུར༌རད༌།
ངའེ༌ ཁོང༌ངི༌ཀ༌ ལག༌པ༌ ཀོལ༌ཅེས༌པོ༌ འོས༌པ༌ མ༌ནོག༌ ཅིའ༌ཟེར༌ན༌ ཁོང༌ ཡ༌ཝའེ༌ ལྡམ༌མ༌ ཛད༌ཏེ༌ ཨིན༌ནོག༌།”
7 ཏེ༌ཟུག༌ སྤེ༌ར༌ ཟེར༌ཏེ༌ དཱ༌བིད༌དི༌ ཁོ༌རང༌ངི༌ མི༌གུན༌ལ༌ ཁའ༌སྐྱེས༌ ཡང༌ གྱལ༌པོ༌ ས༌འུལ༌ སད༌ མ༌ཅུགས༌།
ཏེ༌ནེ༌ ས༌འུལ༌ བྲག༌ཕུགས༌ནེ༌ བིངས༌ཏེ༌ ཁོ༌རང༌ངི༌ ལམ༌མ༌ སོང༌།
8 དཱ༌བིད༌ བྲག༌ཕུགས༌ནེ༌ ཕི༌ལོག༌ག༌ བིང༌ཏེ༌ ཡོངས༌ ཡང༌ ས༌འུལ༌ལ༌ ཀུ༌ཅོ༌ ཏངས༌ཏེ༌ ཟེརས༌,
“གྱལ༌པོ༌ ཁྱེན༌།”
ས༌འུལ༌ལི༌ གྱུར༌ཏེ༌ ལྟའ༌ཅིག༌ དཱ༌བིད༌དི༌ པུག༌དོང༌ ཙུགས༌ཏེ༌ གོ༌ སྒུས༌།
9 ཡང༌ ཁོའེ༌ ས༌འུལ༌ལ༌ ཟེརས༌,
“ངའེ༌ ཉེ༌རང༌ང༌ ནོད༌པ༌ སྐྱལ༌ཅེས༌ དུག༌ ཟེར༌ཁན༌ནི༌ མི༌གུན༌ལ༌ ཉེ༌རང༌ངི༌ ཅིའ༌ ཉན༌ནད༌?
10 དི༌རིང༌རང༌ བྲག༌ཕུགས༌སི༌ ནང༌ང༌ ཡ༌ཝའེ༌ ཉེ༌རང༌ ངའེ༌ ལག༌ག༌ སྟད༌ད༌ ཛད༌ཁན༌བོ༌ ཉེ༌རང༌ངི༌ མིག༌ནེ༌ ཐོང༌ཏེ༌ ཨིན༌ནོག༌།
ངའེ༌ མི༌ ཁ༌ཅིག༌གི༌ ཉེ༌རང༌ སོད༌ ཟེར༌ར༌རག༌ ཨིན༌ནའང༌ ངའེ༌ ཉེ༌རང༌ མ༌སད༌ད༌ ཟེར༌པིན༌,
‘ཡ༌ཝའེ༌ ལྡམ༌མ༌ ཛད༌ཁན༌ནི༌ གྱལ༌པོའ༌ ངའེ༌ མ༌ནེ༌ ནོད༌པ༌ མི༌སྐྱལ༌།’
11 ངའེ༌ ཨ༌བ༌,
ངའེ༌ ལག༌པའེ༌ ནང༌ང༌ ཡོད༌ཁན༌བོའ༌ ཟིགས༌།
ཉེ༌རང༌ངི༌ ཀོས༌སི༌ ཀྲུ༌ ཅད༌ ཟ༌ནེ༌ ངའེ༌ ཉེ༌རང༌ མ༌སད༌པིན༌།
ཏེ༌བོའེ༌ ངའེ༌ ཉེ༌རང༌ང༌ ནོད༌པ༌ མི༌སྐྱལ༌ཅེས༌སི༌ སྤང༌པོ༌ ཏང༌ང༌ནོག༌ ཡང༌ ངའེ༌ ཉེ༌རང༌ང༌ ངན༌པ༌ ཅའང༌ ཅོས༌ཏེ༌ མེད༌ནའང༌ ཉེ༌རང༌ངི༌ ང༌ སད༌ད༌ལ༌ ཙལ༌དུག༌།
12 ཡ༌ཝའེ༌ ང༌དང༌ ཉིས༌ཀོའེ༌ པར༌ལ༌ ཐག༌ཅད༌ ཛད༌ཤིག༌,
ངའ༌ ངན༌པ༌ ཅོ༌ཁན༌བོའེ༌ ཕིའ༌ ཡ༌ཝའེ༌ ཉེ༌རང༌ང༌ ཆད༌པ༌ སལ༌ཨིན༌ ཨིན༌ནའང༌ ངའེ༌ ཉེ༌རང༌ང༌ མ༌ནེ༌ ནོད༌པ༌ མི༌སྐྱལ༌།
13 སྔུན༌མའེ༌ ཟེར༌ལོ༌ཞིག༌ ཨིན༌ནོག༌,
‘མི༌ ངན༌པ༌གུན༌ནི༌ ལས༌ ངན༌པ༌ ཅོའ༌ནོག༌’ ཏེ༌བོའེ༌ཕིའ༌ ངའེ༌ ཉེ༌རང༌ང༌ ནོད༌པ༌ མ༌ནེ༌ མི༌སྐྱལ༌།”
14 “ཨིས༌ར༌ཨེལ༌ལི༌ གྱལ༌པོའེ༌ སུ༌ ཟུམ༌ཅེས༌ལ༌ ཏེད༌ད༌ནོག༌།
ཉེ༌རང༌ངི༌ ཏེད༌ཨིན༌ ཡོད༌ཁན༌བོ༌ ཁྱི༌ ཤི༌ཁན༌ ཡ༌ ཁྱི༌ཤིག༌ ཙོགས༌ ནོད༌པ༌ སྐྱལ༌ མི༌ཉན༌ཁན༌ ཨིན༌།
15 ཏེ༌བོའེ༌ཕིའ༌ ཡ༌ཝའེ༌ ང༌དང༌ ཉིས༌ཀོའེ༌ པར༌ལ༌ ཐག༌ཅད༌ ཛད༌ཤིག༌།
ཡ༌ཝ༌ ངའེ༌ ཁྲིམ༌སྤོན༌ ཞུགས༌ཏེ༌ ཨིན༌ ཡང༌ ཁོང༌ངི༌ ང༌ ཉེ༌རང༌ངི༌ ཀ༌ནེ༌ སྐྱོབ༌བ༌ ཛད༌ཨིན༌།”
16 དཱ༌བིད༌དི༌ སྤེ༌ར༌ ཟེར༌ ཚར༌ཏེ༌ སྟིང༌ནེ༌ ས༌འུལ༌ལི༌ ཁོའ༌ བོད༌ཏེ༌ ཟེརས༌,
“ངའེ༌ བུ༌ཚ༌ དཱ༌བིད༌,
འི༌ སྐད༌པོ༌ ཏན༌ཏན༌ ཁྱོ༌རང༌ངི༌ ཨིན༌ན༌?”
ཏེ༌ནེ༌ ས༌འུལ༌ ཤེད༌ཅན༌ ངུས༌།
17 ཡང༌ ཁོའེ༌ དཱ༌བིད༌ལ༌ ཟེརས༌,
“ང༌ སང༌ ཁྱོ༌རང༌ མང༌ང༌ ཀྲང༌པོ༌ ཨིན༌ནོག༌ ཅིའ༌ཟེར༌ན༌ ཁྱོ༌རང༌ངི༌ ངའེ༌ ངན༌པ༌ ཅོ༌ཁན༌གུན༌ནི༌ ཚབས༌ལ༌ ཟང༌པོ༌ ཅོས༌།
18 དི༌རིང༌ ཁྱོ༌རང༌ངི༌ ངའ༌ ཟང༌པོ༌ ཅོ༌ཁན༌བོ༌ ཧ༌ལས༌ཤེས༌ ཨིན༌ནོག༌།
ཡ༌ཝའེ༌ ང༌ ཁྱོ༌རང༌ངི༌ ལག༌ག༌ སྟད༌ད༌ ཛད༌ནའང༌ ཁྱོ༌རང༌ངི༌ ང༌ མ༌སདས༌།
19 མི༌ཞིག༌གི༌ ལག༌ག༌ ཁོ༌རང༌ངི༌ གྲ༌འོ༌ ལེབ༌ན༌ ཁོའེ༌ གྲ༌འོ༌ མ༌སད༌ད༌ ཕུད༌ ཨིན༌ན༌?
ཁྱོ༌རང༌ངི༌ ངའ༌ སྙིང༌རྗེ༌ སྟན༌ཅེས༌པོའ༌ ཡ༌ཝའེ༌ ཁྱོ༌རང༌ང༌ ཅིན༌ལབས༌ སལ༌ཤིག༌།
20 ཏ༌ ང༌ ཧ༌གོ༌ ཁྱོ༌རང༌ ཏན༌ཏན༌ལ༌ གྱལ༌པོ༌ གྱུར༌ཅེས༌ ཨིན༌ནོག༌ ཡང༌ ཨིས༌ར༌ཨེལ༌ལི༌ གྱལ༌སྲིད༌པོ༌ ཁྱོ༌རང༌ངི༌ ཝང༌ངི༌ ཡོག༌ག༌ ལྡན༌ཨིན༌།
21 ཏེ༌བོ༌ ཇུང༌ ཟ༌ནེ༌ ཁྱོ༌རང༌ངི༌ ངའེ༌ ནང༌ཚངས༌ སད༌ཏེ༌ ངའེ༌ པུར༌གྱུད༌གུན༌ མེད༌ཁན༌ མི༌ཅོ༌ཅེས༌ལ༌ ཡ༌ཝའེ༌ སྐུན༌དུན༌ལ༌ ནའ༌ ཁུར༌།”
22 དཱ༌བིད༌དི༌ ནའ༌ ཁུར༌ཏེ༌ ས༌འུལ༌ལ༌ ཁ༌ཆད༌ ཅོས༌།
ཏེ༌ནེ༌ ས༌འུལ༌ ལོགས༌ཏེ༌ ཁང༌པ༌ སོང༌ ཡང༌ དཱ༌བིད༌ དང༌ ཁོའེ༌ མི༌གུན༌ ཨིབ༌སའེ༌ ནས༌ས༌ ལོགས༌ཏེ༌ སོང༌།