དཱ༌བིད༌དི༌ ཀའེ༌ལཧའེ༌ གྲོང༌ཁྱེར༌ སྐྱོབས༌།
23:1 ནེ༌ 6
23
ཞག༌ཅིག༌ དཱ༌བིད༌ལ༌ ཕི༌ལིས༌ཏི༌པ༌གུན༌ ཀའེ༌ལཧའེ༌ གྲོང༌ཁྱེར༌ལ༌ སྤུང༌གོལ༌ ཅོས༌ཏེ༌ ཁོང༌གུན༌ནི༌ ཡུལ༌ཐག༌གི༌ ཀ༌ནེ༌ གྲུ༌ནས༌ རྐུས༌ཏེ༌ ཁྱེར༌དུག༌ ཟེར༌ཏེ༌ ཚོར༌།
2 དཱ༌བིད༌དི༌ ཡ༌ཝའ༌ ཏྲིའ༌ཛདས༌,
“ཅི༌ ང༌ སོང༌ཏེ༌ ཕི༌ལིས༌ཏི༌པ༌གུན༌ལ༌ སྤུང༌གོལ༌ ཅོ༌ལེ༌?”
ཡ༌ཝའེ༌ ཁོའ༌ མོལས༌,
“འོ༌ན༌ སོང༌ ཡང༌ ཀའེ༌ལཧའེ༌ གྲོང༌ཁྱེར༌ སྐྱོབ༌།”
3 ཨིན༌ནའང༌ དཱ༌བིད༌དི༌ མི༌གུན༌ནི༌ ཁོའ༌ ཟེརས༌,
“འི༌རུ༌ ཡ༌ཧུ༌དཱའེ༌ ནང༌ང༌ ང༌དང༌ང༌ ཇིགས༌པ༌ ཡོད༌ཏེ༌ ཨིན༌ནོག༌།
ཀའེ༌ལཧ༌ ཕི༌ལིས༌ཏི༌པའེ༌ མག༌མིའ༌ ནོལ༌ལ༌ ཆ༌ན༌ ང༌དང༌ངི༌ ཕིའ༌ མང༌ང༌ ཇིགས༌ནང༌ཅན༌ ཨིན༌ནོག༌།”
4 ཏེ༌བོའེ༌ཕིའ༌ དཱ༌བིད༌དི༌ ཡ༌ཝའ༌ ཡང༌སྐྱར༌ ཏྲིའ༌ཛདས༌ ཡང༌ ཁོའ༌ ཡ༌ཝའེ༌ ལན༌སལས༌,
“ཐུར༌ལ༌ ཀའེ༌ལཧ༌ ཆོགས༌ལ༌ སོང༌,
ངའེ༌ ཁྱོ༌རང༌ངི༌ ལག༌ག༌ ཕི༌ལིས༌ཏི༌པ༌གུན༌ ཏང༌ཨིན༌།”
5 ཏེ༌ནེ༌ དཱ༌བིད༌ དང༌ ཁོའེ༌ མི༌གུན༌ ཀའེ༌ལཧ༌ སོང༌ཏེ༌ ཕི༌ལིས༌ཏི༌པ༌གུན༌ལ༌ སྤུང༌གོལ༌ ཅོས༌ཏེ༌ ཕི༌ལིས༌ཏི༌པའེ༌ སྲལ༌ཁན༌ནི༌ སེམས༌ཅན༌ ཚང༌མ༌ ཀོགས༌ཏེ༌ ཁྱོངས༌།
ཁོང༌གུན༌ནི༌ ཕི༌ལིས༌ཏི༌པ༌ མང༌པོ༌ སད༌ཏེ༌ ཕམ༌ཀལས༌ ཡང༌ ཀའེ༌ལཧ༌པ༌གུན༌ སྐྱོབས༌།
6 ཏ༌ ཨ༌ཧི༌མེ༌ལེག༌གི༌ བུ༌ཚ༌ ཨ༌བིའ༌ཐར༌ དཱ༌བིད༌ ཡོད༌ས༌ ཀའེ༌ལཧ༌ ཤོར༌ཏེ༌ ཡོང༌ ཟ༌ནེ༌ ཁོའེ༌ ཁོ༌རང༌ ཉམ༌པོ༌ ཨེ༌ཕོད༌ ཁུར༌ཏེ༌ ཁྱོངས༌།
ས༌འུལ༌ལི༌ དཱ༌བིད༌ལ༌ ཏེད༌ཏེ༌ ཁྱེརས༌།
23:7 ནེ༌ 29
7 དཱ༌བིད༌ ཀའེ༌ལཧའེ༌ ནང༌ང༌ ཡོད༌ཁན༌བོ༌ ས༌འུལ༌ལ༌ ཚོར༌པ༌ ཁོའེ༌ ཟེརས༌,
“དཀོན༌མཆོག༌གི༌ ཁོ༌ ངའེ༌ ལག༌ག༌ སྟད༌ཏེ༌ ཨིན༌ནོག༌ ཅིའ༌ཟེར༌ན༌ རྩིག༌པ༌ སྐོར༌ཏེ༌ ཡོད༌ཁན༌ནི༌ གྲོང༌ཁྱེར༌རི༌ ནང༌ང༌ ཁོའེ༌ ཁོ༌རང༌ སྐར༌ཏེ༌ ཨིན༌ནོག༌།”
8 ཏེ༌བོའེ༌ཕིའ༌ ས༌འུལ༌ལི༌ ཁོ༌རང༌ངི༌ མག༌མི༌ ཚང༌མ༌ ཀའེ༌ལཧ༌ སོང༌ཏེ༌ དཱ༌བིད༌ དང༌ ཁོའེ༌ མི༌གུན༌ནི༌ཀ༌ སྤུང༌གོལ༌ ཅོ༌ཅེས༌ལ༌ བཀའ༌ ཏངས༌།
9 ཨིན༌ནའང༌ དཱ༌བིད༌ལ༌ ས༌འུལ༌ལི༌ ཐབས༌ ངན༌པ༌བོའེ༌ སྐོར༌ལ༌ ཚོར༌ར༌ཅིག༌ ཁོའེ༌ བླ༌མ༌ ཨ༌བིའ༌ཐར༌ལ༌ ཨེ༌ཕོད༌ ཁྱོང༌ཅུགས༌།
10 ཏེ༌ནེ༌ དཱ༌བིད༌དི༌ མོས༌ལམ༌ ཞུས༌ཏེ༌ ཟེརས༌,
“ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝ༌ལེ༌,
ང༌ འི༌རུ༌ ཡོད༌ པ༌སང༌ ས༌འུལ༌ ཀའེ༌ལཧའེ༌ གྲོང༌ཁྱེར༌ ཁྲེས༌ཏོར༌ ཅོ༌ཅེས༌ལ༌ ཡོང༌དུག༌ ཟེར༌ཏེ༌ ངའེ༌ ཚོར༌།
11 ཅི༌ ཀའེ༌ལཧ༌པ༌གུན༌ནི༌ ང༌ ཁོའེ༌ ལག༌ག༌ སྟད༌ཅེས༌ ཨིན༌ནོག༌ག༌?
ཡང༌ ང༌ ཚོར༌ཁན༌ ཙོགས༌ལ༌ ས༌འུལ༌ ཏན༌ཏན༌ལ༌ འི༌རུ༌ ཡོང༌ཅེས༌ ཨིན༌ནོག༌ག༌?
ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝ༌ལེ༌ ཇུ༌ཇུ༌ ངའ༌ ཤད༌ད༌ ཛད༌དའང༌།”
ཡ༌ཝའེ༌ མོལས༌,
“ཁོ༌ ཡོང༌ཨིན༌།”
12 དཱ༌བིད༌དི༌ ཡང༌སྐྱར༌ ཏྲིས༌,
“ཀའེ༌ལཧའེ༌ སྤོན༌བོ༌གུན༌ནི༌ ང༌ དང༌ ངའེ༌ མི༌གུན༌ ས༌འུལ༌ལ༌ སྟད༌ཅེས༌ ཨིན༌ནོག༌ག༌ ལེ༌?”
ཡ༌ཝའེ༌ ལན༌སལས༌,
“འོ༌ན༌ ཁོང༌གུན༌ནི༌ ཁྱོ༌རང༌ དང༌ ཁྱོ༌རང༌ངི༌ མི༌གུན༌ ས༌འུལ༌ལ༌ སྟད༌ཨིན༌།”
13 ཏེ༌བོའེ༌ཕིའ༌ དཱ༌བིད༌ དང༌ ཁོའེ༌ མི༌ ཧ༌ལམ༌ 600,
ཀའེ༌ལཧ༌ནེ༌ བིང༌ཏེ༌ སོང༌ ཡང༌ ཡུལ༌ ཅིག༌ནེ༌ ཅིག༌ག༌ ཁོར༌ཨིན༌ དུགས༌།
དཱ༌བིད༌ ཤོར༌ཏོག༌ ཟེར༌ཏེ༌ ས༌འུལ༌ལ༌ ཚོར༌པ༌ ཁོ༌ ཀའེ༌ལཧ༌ལ༌ མ༌སོང༌།
14 དཱ༌བིད༌ དང༌ ཁོའེ༌ མི༌གུན༌ ཟིབ༌བི༌ རི༌སྟོང༌ དང༌ ཞན༌ བྲོག༌སྟོང༌ གུན༌ནི༌ ནང༌ང༌ ཨིབས༌ཏེ༌ དུགས༌།
ས༌འུལ༌ལི༌ ཏུས༌གྱུན༌ ཁོ༌ ཙལ༌ལད༌པིན༌ ཨིན༌ནའང༌ དཀོན༌མཆོག༌གི༌ ཁོ༌ ས༌འུལ༌ལི༌ ལག༌ག༌ སྟད༌ད༌ མ༌ཛདས༌།
15 ཞག༌ཤིག༌ ཧོ༌རེཤ༌ཤི༌ ཉེ༌མོའ༌ ཟིབ༌བི༌ རི༌སྟོང༌ངི༌ ནང༌ང༌ དཱ༌བིད༌ལ༌,
ཁོ༌ ཙལ༌ཏེ༌ སད༌ད༌ ས༌འུལ༌ ཡོང༌དུག༌ ཟེར༌ཏེ༌ ཚོར༌།
16 ཡོ༌ན༌ཐན༌ ཧོ༌རེཤ༌ལ༌ དཱ༌བིད༌ ཡོད༌ས༌ སོང༌ཏེ༌ དཀོན༌མཆོག༌གི༌ ཁོ༌ སྐྱོབ༌བ༌ ཛད༌ཨིན༌ ཟེར༌ཏེ༌ ཁོའ༌ སྤོས༌པ༌ ཏངས༌།
17 ཡོ༌ན༌ཐན༌ནི༌ ཁོའ༌ ཟེརས༌,
“ཇིགས༌ མ༌ཇིགས༌།
ངའེ༌ ཨ༌བའེ༌ ཁྱོ༌རང༌ང༌ ནོད༌པ༌ ཏང༌ མི༌ཉན༌།
ཁྱོ༌རང༌ ཨིས༌ར༌ཨེལ༌ལི༌ གྱལ༌པོ༌ གྱུར༌ཨིན༌ ཡང༌ ངའེ༌ ཁྱོ༌རང༌ངི༌ ཡོག༌ག༌ ལས༌ ཅོ༌ཨིན༌།
ངའེ༌ ཨ༌བ༌ ས༌འུལ༌ལ༌ ཏེ༌བོ༌ གྱལ༌ལ༌ ཅོས༌ཏེ༌ གྱུས༌ ཨིན༌ནོག༌།”
18 ཏེ༌ནེ༌ ཁོང༌ ཉིས༌ཀོའེ༌ ཡ༌ཝའེ༌ སྐུན༌དུན༌ལ༌ ཁོང༌རང༌གུན༌ནི༌ དམ༌ཆ༌བོ༌ ཡང༌སྐྱར༌ ཏན༌ཏན༌ ཅོས༌།
ཡོ༌ན༌ཐན༌ ལོགས༌ཏེ༌ ཁང༌པ༌ སོང༌ ཡང༌ དཱ༌བིད༌ ཧོ༌རེཤ༌ལ༌ དུགས༌།
19 ཟིབ༌པ༌ མི༌ ཁ༌ཅིག༌ གི༌བེའཧ༌ཧའ༌ ས༌འུལ༌ ཡོད༌ས༌ སོང༌ཏེ༌ ཟེརས༌,
“དཱ༌བིད༌ ཧོ༌རེཤ༌ཤི༌ ནང༌ང༌ ཡེ༌ཤི༌མོན༌ནི༌ ལྷོ༌ ཆོགས༌ལ༌ ཡོད༌ཁན༌ ཧ༌ཀི༌ལཧ༌ རི༌ཡུལ༌ལ༌ ཨིབས༌ཏེ༌ དུག༌།
20 གྱལ༌པོ༌ ཉེ༌རང༌ ནམ༌ ཐད༌ནའང༌ ཏེ༌རུ༌ ཐུར༌ལ༌ བབས༌ཏེ༌ སྐྱོད༌ ཡང༌ ང༌ཞ༌གུན༌ནི༌ ཁོ༌ ཟུམས༌ཏེ༌ ཉེ༌རང༌ང༌ སྟད༌ཨིན༌།”
21 ས༌འུལ༌ལི༌ ཟེརས༌,
“ངའ༌ འི༌ ལོན༌ ཁྱོང༌ཅེས༌ལ༌ ཡ༌ཝའེ༌ ཁྱོ༌ཞ༌གུན༌ལ༌ ཅིན༌ལབས༌ སལ༌ཤིག༌།
22 སོང༌ ཡང༌ ཁོ༌ དུག༌སའེ༌ ནས༌ས༌ ཏན༌ཏན༌ ཅོས༌ ཡང༌ ཏེ༌རུ༌ ཁོའ༌ སུ༌ ཐུག༌ག༌ ཡོང༌དུག༌ ལྟོས༌ ཅིའ༌ཟེར༌ན༌ ཁོ༌ མ༌ སྐྱོན༌ཇན༌ ཡོད༌ཁན༌བོ༌ ང༌ གྱུས༌ཡོད༌།
23 ཁོ༌ ཨིབས༌ཏེ༌ དུག༌སའེ༌ ནས༌ས༌ ཚང༌མ༌ ཏན༌ཏན༌ གྱུས༌ ཅོས༌ཏེ༌ ངའ༌ སྟན༌པོ༌ ལོན༌ ཁྱོང༌།
ཏེ༌ནེ༌ ང༌ དང༌ ངའེ༌ མག༌མི༌ ཁྱོ༌ཞའ༌ ཉམ༌པོ༌ ཆེན༌,
ཀལ༌ཏེས༌ ཁོ༌ ཏེ༌རུ༌ ཡོད༌ན༌ ངའེ༌ ཁོ༌ ཟུམ༌ཅེས༌ལ༌ ཡ༌ཧུ༌དཱའེ༌ ཡུལ༌ཇོངས༌ གང༌པོ༌ ཙལ༌གོས༌ནའང༌ ཙལ༌ཨིན༌།”
24 ཏེ༌བོའེ༌ཕིའ༌ ཟིབ༌པ༌གུན༌ ས༌འུལ༌ལི༌ སང༌ སྔུན༌ལ༌ ལོགས༌ཏེ༌ སོང༌།
ཏེ༌ཏུས༌ དཱ༌བིད༌ དང༌ ཁོའེ༌ མི༌གུན༌ ཡེ༌ཤི༌མོན༌ནི༌ ལྷོ༌ ཆོགས༌ལ༌ ཨ༌ར༌བཧ༌ ལུང༌པའེ༌ མ༌འོན༌ནི༌ བྲོག༌སྟོང༌ངི༌ ནང༌ང༌ དུགས༌ཏེ༌ ཡོད༌པིན༌།
25 དཱ༌བིད༌ལ༌ ས༌འུལ༌ དང༌ ཁོའེ༌ མག༌མི༌གུན༌ནི༌ ཁོ༌ ཙལ༌དུག༌ ཟེར༌ཏེ༌ ཚོར༌ར༌ཅིག༌ ཁོ༌ མ༌འོན༌ནི༌ བྲོག༌སྟོང༌ངི༌ ནང༌ང༌ བྲག༌ ཆེན༌མོ༌ ཡོད༌ས༌ སོང༌ཏེ༌ དུགས༌།
ཨིན༌ནའང༌ ས༌འུལ༌ལ༌ ཏེ༌བོ༌ ཚོར༌ར༌ཅིག༌ ཁོ༌ བྲོག༌སྟོང༌ངི༌ ནང༌ང༌ ཁོའེ༌ སྟིང༌རང༌ནེ༌ སོང༌།
26 ས༌འུལ༌ འི༌ངོ༌ ཆོགས༌སི༌ རི༌ཀ༌ ཡང༌ དཱ༌བིད༌ འ༌ངོ༌ ཆོགས༌སི༌ རི༌ཀ༌ ཡོད༌པིན༌།
དཱ༌བིད༌ གྱོགས༌པ༌ ས༌འུལ༌ནེ༌ ཐག༌རིང༌ང༌ ཤོར༌ཅེས༌ ཅོའད༌པིན༌ ཅིའ༌ཟེར༌ན༌ ས༌འུལ༌ དང༌ ཁོའེ༌ མག༌མི༌ ཁོང༌གུན༌ ཟུམ༌ཅེས༌ལ༌ ཉེ༌མོའ༌ ལེབས༌ཏེ༌ ཡོད༌པིན༌།
27 ཏེན༌ན༌ ཏུས༌ལ༌ ས༌འུལ༌ལ༌,
“ཕི༌ལིས༌ཏི༌པ༌གུན༌ནི༌ ཨིས༌ར༌ཨེལ༌ལི༌ཀ༌ སྤུང༌གོལ༌ ཅོ༌དུག༌ གྱགས༌པ༌ སྐྱོད༌” ཟེར༌ཏེ༌ ལོན༌ ལེབ༌།
28 ཏེ༌བོའེ༌ཕིའ༌ ས༌འུལ༌ལི༌ དཱ༌བིད༌ལ༌ ཏེད༌ཅེས༌ ཕངས༌ཏེ༌ ཕི༌ལིས༌ཏི༌པ༌གུན༌ལ༌ ནོལ༌ལ༌ སོང༌།
ཏེན༌ན༌ ཏུས༌ནེ༌ ཕར༌ལ༌ དཱ༌བིད༌ ཨིབས༌ཏེ༌ དུག༌སའེ༌ ནས༌ས༌བོའ༌ “ཤོར༌སའེ༌ བྲག༌” ཟེར༌ར༌ནོག༌།
29 ཏེ༌ནེ༌ དཱ༌བིད༌ ཏེ༌ ནས༌ས༌ནེ༌ བིང༌ཏེ༌ ཨེན༌ གི༌གྲིའེ༌ ནས༌སའེ༌ ནང༌ང༌ ཨིབས༌ཏེ༌ དུགས༌།