ཨ༌དུལ༌ལམ༌ དང༌ མིཟ༌པཧ༌ ནང༌ང༌ དཱ༌བིད༌།
22:1 ནེ༌ 5
22
ཏེ༌ནེ༌ དཱ༌བིད༌ གཱད༌ནེ༌ ཤོར༌ཏེ༌ ཨ༌དུལ༌ལམ༌མི༌ བྲག༌ཕུགས༌ལ༌ སོང༌།
ཁོའེ༌ ཨ༌ཅོ༌གུན༌ དང༌ ཉེན༌གྲུང༌གུན༌ལ༌ ཏེ༌བོ༌ ཚོར༌ར༌ཅིག༌ ཁོང༌གུན༌ ཁོ༌ ཉམ༌པོ༌ དུག༌ག༌ ཏེ༌རུ༌ ཡོངས༌།
2 ནགས༌ ཡ༌ རྡུག༌པོ༌ ཡ༌ བུ༌ལོན༌ ཡོད༌ཁན༌ མི༌ཚང༌མ༌ དཱ༌བིད༌ ཡོད༌ས༌ ཡོང༌ཅེས༌ གོ༌ཟུག༌ ཡང༌ ཁོ༌ ཁོང༌གུན༌ནི༌ འུ༌སྐྱོང༌ གྱུར༌།
དཱ༌བིད༌ ཉམ༌པོ༌ མི༌ 400 ཟམ༌ཤིག༌ ཡོད༌པིན༌།
3 ཏེ༌ནེ༌ དཱ༌བིད༌ ཏེ༌ཀ༌ནེ༌ མོ༌འབ༌བི༌ ནས༌ས༌ མིཟ༌པཧ༌ སོང༌ ཡང༌ གྱལ༌པོའ༌ ཞུ༌ཝ༌ ཕུལ༌ཏེ༌ ཟེརས༌,
“དཀོན༌མཆོག༌གི༌ ང༌ ཉམ༌པོ༌ ཛད༌ཅེས༌པོ༌ ཧ༌གོ༌གོ༌ ཚོག༌པ༌ ཇུ༌ཇུ༌ ངའེ༌ ཨ༌བ༌ དང༌ ཨ༌མ༌ འི༌རུ༌ ཉེ༌རང༌ ཉམ༌པོ༌ དུག༌ཅུག༌ག༌ ཛད༌།”
4 དཱ༌བིད༌ དང༌ ཁོའེ༌ མི༌གུན༌ ཨིབས༌ཏེ༌ དུགས༌སའེ༌ ནས༌སའེ༌ ནང༌ང༌ དུག༌ཁན༌ནི༌ ཏུས༌ གང༌པོ༌ དཱ༌བིད༌དི༌ ཕ༌མ༌ མོ༌འབ༌བི༌ གྱལ༌པོ༌ ཉམ༌པོ༌ དུགས༌།
5 ཞག༌ཅིག༌ ལུང༌སྟོན༌པ༌ གཱད༌དི༌ དཱ༌བིད༌ལ༌ ཟེརས༌,
“ཨིབ༌སའེ༌ ནས༌ས༌ནེ༌ བིང༌ཏེ༌ ཡ༌ཧུ༌དཱའེ༌ ནས༌ས༌ ལོགས༌ཏེ༌ སོང༌།”
ཏེ༌བོའེ༌ཕིའ༌ དཱ༌བིད༌ ཏེ༌ ནས༌ས༌ནེ༌ བིང༌ཏེ༌ ཧེ༌རེད༌དི༌ ནག༌ཚོགས༌ལ༌ སོང༌།
ས༌འུལ༌ལི༌ ནོབ༌བི༌ ནང༌ང༌ བླ༌མ༌གུན༌ སདས༌།
22:6 ནེ༌ 23
6 དཱ༌བིད༌ ཡ༌ཧུ༌དཱ༌ ལོགས༌ཏེ༌ ཡོང༌ཁན༌ནི༌ ནས༌ཚུལ༌ ས༌འུལ༌ལ༌ ཚོར༌།
ཏེ༌ཏུས༌ ས༌འུལ༌ གི༌བེའཧའེ༌ རི༌ཀ༌ ཀྲ༌མ༌རིག༌གི༌ ལྕང༌མའེ༌ ཡོག༌ག༌ དུགས༌ཏེ༌ ཡོད༌པིན༌ ཁོའེ༌ ལག༌པའེ༌ ནང༌ང༌ དུང༌ ཁུར༌ཏེ༌ ཡང༌ ཁོའེ༌ གོ༌སྐྱོང༌གུན༌ ཁོའ༌ སྐོར༌ཏེ༌ ལངས༌ཏེ༌ ཡོད༌པིན༌།
7 ནས༌ཚུལ༌ ཚོར༌ར༌ཅིག༌ ས༌འུལ༌ལི༌ གོ༌སྐྱོང༌གུན༌ལ༌ ཟེརས༌,
“བེན༌ཡཱ༌མིན༌པ༌གུན༌ ང༌ ཉོན༌ཤིག༌,
ཡེ༌ཤེའེ༌ བུ༌ཚའེ༌,
ཁྱོ༌ཞའ༌ ཞིང༌ དང༌ རྒུན༌ཚས༌ ཏང༌ཅེས༌སི༌ ཁ༌ཆད༌ ཅོས༌ས༌?
ཁོའེ༌ ཁྱོ༌ཞའ༌ ཚང༌མ༌ མག༌མི༌ སྟོང༌ ཡ༌ རྒྱའེ༌ འུ༌སྐྱོང༌ ཅོས༌ས༌?
8 ཁོའེ༌ ཕིའ༌ ཁྱོ༌ཞ༌གུན༌ནི༌ ངའེ༌ གྱབ༌གལ༌ལ༌ ཐབས༌ ངན༌པ༌ ལྡིངས༌ཏེ༌ ཨིན༌ན༌?
ངའེ༌ བུ༌ཚའེ༌ ཡེ༌ཤེ༌ བུ༌ཚ༌ ཉམ༌པོ༌ ཆད༌དོན༌ ཅོས༌ཁན༌བོ༌ ཁྱོ༌ཞའ༌ ཅིག༌གིའང༌ ངའ༌ ཤད༌ད༌ མེ༌རག༌།
ཁྱོ༌ཞ༌གུན༌ནི༌ ང༌ ཆོག༌སྐྱོར༌ ཅོའ༌ མི༌དུག༌,
སམ༌བ༌ ཏོང༌ངའང༌ ང༌རང༌ངི༌ བུ༌ཚའེ༌ ཁོའ༌ ངའ༌ སད༌ཅེས༌ལ༌ སྤོས༌པ༌ ཏངས༌ཏེ༌ ཨིན༌ནོག༌ ཡང༌ ཁོ༌ དག༌ས༌ ཨིབས༌ཏེ༌ ཏེན༌ན༌ སྐབས༌པོའེ༌ ཕིའ༌ སྲུངས༌ཏེ༌ ཨིན༌ནོག༌།”
9 ཏེ༌ནེ༌ ཏེ༌ཀ༌ ས༌འུལ༌ལི༌ གོ༌སྐྱོང༌གུན༌ ཉམ༌པོ༌ ལངས༌ཏེ༌ ཡོད༌ཁན༌ ཨི༌དོམ༌པ༌ གྲོ༌འེག༌གི༌ ཟེརས༌,
“ནོབ༌བི༌ ནང༌ང༌ ངའེ༌ ཡེ༌ཤེ༌ བུ༌ཚ༌,
ཨ༌ཧི༌ཏུབ༌བི༌ བུ༌ཚ༌ བླ༌མ༌ ཨ༌ཧི༌མེ༌ལེག༌ ཡོད༌ས༌ ཡོངས༌ཏེ༌ སྤེ༌ར༌ ཏང༌ཨིན༌ ཐོང༌།
10 དཱ༌བིད༌ལ༌ ལམ༌སྟན༌ ཛད༌ཅེས༌ལ༌ ཨ༌ཧི༌མེ༌ལེག༌གི༌ ཡ༌ཝའ༌ ཞུ༌ཝ༌ ཕུལས༌ ཡང༌ བླ༌མའེ༌ ཁོའ༌ ཟའ༌ཅེས༌ དང༌ ཕི༌ལིས༌ཏི༌པ༌ གོ༌ལི༌ཡཱཐ༌ཐི༌ ར༌འི༌ ཏངས༌།”
11 ཏེན༌ན༌མལ༌ལ༌ ས༌འུལ༌ལི༌ ཨ༌ཧི༌མེ༌ལེག༌ དང༌ ཁོའེ༌ ཨ༌བའེ༌ ནང༌ཚངས༌ ཚང༌མ༌ ཁྱོང༌ཅེས༌ལ༌ མག༌མི༌ ལམ༌ཅུགས༌,
ཁོང༌གུན༌ ནོབ༌བི༌ བླ༌མ༌གུན༌ ཨིན༌པིན༌།
ཁོང༌ ཚང༌མ༌ ལེབ༌བ༌ཅིག༌
12 ས༌འུལ༌ལི༌ ཟེརས༌,
“ཨ༌ཧི༌ཏུབ༌བི༌ བུ༌ཚ༌ ངའ༌ ཉོན༌།
ཨ༌ཧི༌མེ༌ལེག༌གི༌ ཟེརས༌,
“ཅི༌ སྐྱོད༌ གྱལ༌པོ༌ལེ༌?”
13 ས༌འུལ༌ལི༌ ཟེརས༌,
“ཅི༌ཕིའ༌ ཁྱོ༌རང༌ དང༌ ཡེ༌ཤེ༌ བུ༌ཚའེ༌ ངའེ༌ གྱབ༌གལ༌ལ༌ ཐབས༌ ངན༌པ༌ ལྡིངས༌པིན༌།
ཅིའ༌ ཁྱོ༌རང༌ངི༌ ཁོའ༌ ཟའ༌ཅེས༌ དང༌ ར༌འི༌ ཏངས༌པིན༌།
ཅི༌ཕིའ༌ ཁྱོ༌རང༌ངི༌ ཁོའ༌ ལམ༌སྟོན༌ ཛད༌ཅེས༌ལ༌ ཡ༌ཝ༌ ཞུ༌ཝ༌ ཕུལ༌པིན༌།
ཁྱོ༌རང༌ངི༌ ཁོའ༌ ངའ༌ སད༌ཅེས༌ལ༌ སྤོས༌པ༌ ཅིའ༌ ཏངས༌པིན༌ ཡང༌ ཁོ༌ དག༌ས༌ ཨིབས༌ཏེ༌ ཏེ༌ སྐབས༌པོའེ༌ ཕིའ༌ སྲུངས༌ཏེ༌ ཨིན༌ནོག༌།”
14 ཨ༌ཧི༌མེ༌ལེག༌གི༌ ལན༌ཏངས༌ “ཉེ༌རང༌ངི༌ མག༌མི༌ ཚང༌མའེ༌ ནང༌ནེ༌ དཱ༌བིད༌ ཙོགས༌ ཨིད༌ཤེས༌ཅན༌ སུ༌ ཡོད༌,
གྱལ༌པོའེ༌ བུ༌མོའེ༌ མག༌པ༌,
ཉེ༌རང༌ངི༌ སྲུང༌སྐྱོབ༌ ཅོ༌ཁན༌ནི༌ མག༌མི༌ འུ༌སྐྱོང༌ དང༌ ཉེ༌རང༌ངི༌ ནང༌མི༌གུན༌ནི༌ ནང༌ནེ༌ ཚང༌མའེ༌སང༌ རྩི༌ཝ༌ཅན༌།
15 ཏེ༌ ཞག༌ག༌ ངའེ༌ ཁོའེ༌ ཕིའ༌ ཡ༌ཝའ༌ ཞུའ༌ ཕུལ༌ཅེས༌པོ༌ ཏང༌པོ༌བོ༌ མན༌།
གྱལ༌པོའེ༌ འི༌ ལས༌སི༌ ཕིའ༌ ང༌ དང༌ ངའེ༌ ནང༌ཚངས༌གུན༌ གལ༌ཅན༌ ཐེའ༌ མ༌ཛད༌,
ཅིའ༌ཞུ༌ན༌ ཉེ༌རང༌ངི༌ གྱབ༌གལ༌ལ༌ ཅུས༌ངན༌ ལྡིངས༌ཁན༌བོ༌ ངའ༌ ཅའང༌ གྱུས༌མེད༌།”
16 གྱལ༌པོའེ༌ ཟེརས༌,
“ཨ༌ཧི༌མེ༌ལེག༌,
ཁྱོ༌རང༌ ཏན༌ཏན༌ ཤི༌ཨིན༌ མ༌ཚད༌ ཁྱོ༌རང༌ དང༌ ཁྱོ༌རང༌ངི༌ ཨ༌བའེ༌ ནང༌ཚངས༌ ཚང༌མའང༌ ཤི༌ཨིན༌།”
17 ཏེ༌ནེ༌ གྱལ༌པོའེ༌ ཁོ༌ སྲུལ༌ཁན༌ མག༌མི༌གུན༌ལ༌ བཀའ༌ ཏངས༌,
“འི༌ ཡ༌ཝའེ༌ བླ༌མ༌གུན༌ སོད༌ ཅིའ༌ཟེར༌ན༌ ཁོང༌གུན༌ནི༌ དཱ༌བིད༌ལ༌ ཆོག༌སྐྱོར༌ ཅོས༌ཏེ༌ ཨིན༌ནོག༌།
ཁོ༌ ཤོར༌ཏེ༌ ཆའ༌ཁན༌བོ༌ ཁོང༌གུན༌ལ༌ གྱུས༌ཡོད༌ཏེའང༌ ཁོང༌གུན༌ནི༌ ངའ༌ མ༌ཤད༌ད༌ ཨིན༌ནོག༌།”
ཨིན༌ནའང༌ ཡ༌ཝའེ༌ བླ༌མ༌གུན༌ སད༌ཅེས༌ལ༌ ས༌འུལ༌ལི༌ མག༌མི༌གུན༌ནི༌ ཁོ༌རང༌གུན༌ནི༌ ལག༌པ༌ མ༌སྟགས༌།
18 ཏེ༌ནེ༌ གྱལ༌པོའེ༌ གྲོ༌འེག༌ག༌ ཟེརས༌,
“ཁྱོ༌རང༌ངི༌ ཁོང༌གུན༌ སོད༌།”
ཏེ༌ནེ༌ ཨི༌དོམ༌པ༌ གྲོ༌འེག༌གི༌ ཁོང༌གུན༌ ར༌འི༌ ཉམ༌པོ༌ སདས༌ ཡང༌ ཏེན༌ན༌ ཞག༌ག༌ ཨེ༌ཕོད༌ ཡང༌ན༌ བླ༌མའེ༌ སྟུད༌ཏུང༌ གོན༌ ཆོག༌ཁན༌ནི༌ བླ༌མ༌ 85 སདས༌།
19 ཏེ༌ནེ༌ གྲོ༌འེག༌ བླ༌མ༌གུན༌ནི༌ གྱལ༌ས༌ ནོབ༌བ༌ སོང༌ཏེ༌ བུ༌ཚ༌ དང༌ བུ༌མོ༌,
ཕྲུ༌གུ༌ དང༌ ཕྲུ༌གུ༌ ཆུ༌ངུན༌ མང༌པོ༌ སདས༌ མ༌ཚད༌ བ༌ལང༌,
བུང༌བུ༌,
ལུག༌ དང༌ ར༌མ༌ ཚང༌མ༌ སདས༌།
20 ཨ༌ཧི༌མེ༌ལེག༌གི༌ བུ༌ཚ༌ ཨ༌བིའ༌ཐར༌ ཅིག༌པོ༌ ཤོར༌ཏེ༌ དཱ༌བིད༌ ཡོད༌ས༌ སོང༌།
21 ཁོའེ༌ དཱ༌བིད༌ལ༌ ས༌འུལ༌ལི༌ ཡ༌ཝའེ༌ བླ༌མ༌གུན༌ སད༌ ཟེར༌ཏེ༌ ཤད༌ད༌ཅིག༌,
22 དཱ༌བིད༌ ཟེརས༌,
“ཨི༌དོམ༌པ༌ གྲོ༌འེག༌ ཐོང༌ང༌ཅིག༌ ངའེ༌ སམ༌ ཁོ༌ སོང༌ཏེ༌ ས༌འུལ༌ལ༌ ཤད༌ད༌ནོག༌།
ཏ༌ ངའེ༌ ཞས༌ཏེ༌ ཁྱོ༌རང༌ངི༌ ཨ༌བའེ༌ ནང༌ཚངས༌ ཚང༌མ༌ སད༌ཏེ༌ ཨིན༌ནོག༌།
23 ང༌ ཉམ༌པོ༌ འི༌རུ༌ དུག༌།
ངའ༌ སད༌ད༌ ཙལ༌ཁན༌བོའེ༌ ཁྱོ༌རང༌ངའང༌ སད༌ཅེས༌ལ༌ ཙལ༌ཨིན༌ ཨིན༌ནོག༌།
ཇིགས༌ མ༌ཇིགས༌,
ངའེ༌ ཁྱོ༌རང༌ སྐྱོབས༌ཏེ༌ བོར༌ཨིན༌།”