ནོབ༌ གྲོང༌ཁྱེར༌རི༌ ནང༌ང༌ དཱ༌བིད༌།
21:1 ནེ༌ 9
21
དཱ༌བིད༌ ནོབ༌ གྲོང༌ཁྱེར༌ལ༌ བླ༌མ༌ ཨ༌ཧི༌མེ༌ལེག༌ག༌ ཐུག༌ག༌ལ༌ སོང༌།
ཁོ༌ ཐོང༌ང༌ཅིག༌ ཨ༌ཧི༌མེ༌ལེག༌ ཇིགས༌ཏེ༌ དར༌ཨིན༌ ཏྲིས༌,
“ཅི༌ཕིའ༌ ཉེ༌རང༌ ཅིག༌པོ༌ ཨིན༌,
སུའང༌ ཉེ༌རང༌ ཉམ༌པོ༌ མེད༌ད༌?”
2 དཱ༌བིད༌དི༌ ཟེརས༌,
“གྱལ༌པོའེ༌ ང༌ སང༌ཝའེ༌ ལས༌ཞིག༌གི༌ ཕིའ༌ ལམ༌ཅུགས༌ཏེ༌ ང༌ འི༌རུ༌ གྱལ༌པོའེ༌ ལས༌སི༌ ཕིའ༌ ཡོངས༌ཁན༌བོ༌ སུའང༌ གྱུས༌ཆ༌ མི༌ཅུག༌ཅེས༌ལ༌ བཀའ༌ སལས༌།
ཡང༌ ངའེ༌ ང༌རང༌ངི༌ མག༌མི༌གུན༌ལ༌ ངའེ༌ ཟེར༌ཁན༌ནི༌ ནས༌སའེ༌ཀ༌ ཐུག༌ཅེས༌ལ༌ ཟེར༌པིན༌།
3 ཏ༌ འི༌ཀ༌ ཟའ༌ཅེས༌སི༌ ཟན༌ ཅི༌ ཡོད༌?
ངའ༌ ཏ༌གི༌ ལྔ༌ ཡ༌ འི༌ཀ༌ ཡོད༌ཁན༌བོ༌ སལ༌།”
4 བླ༌མའེ༌ ལན༌ ཏངས༌,
“འི༌ཀ༌ ཏམ༌པ༌ ཏ༌གི༌ མ༌སྟོག༌ ཡང༌ ཅའང༌ མེད༌,
ཀལ༌ཏེས༌ ཉེ༌རང༌ངི༌ མི༌གུན༌ བུ༌མོ༌ ཉམ༌པོ༌ མ༌ཛོམ༌མ༌ ཨིན༌ན༌ ཏེ༌བོ༌ ཟའ༌ནའང༌ གྲིག༌ག༌ནོག༌།”
5 དཱ༌བིད༌དི༌ ལན༌ཏངས༌,
“ཏུས༌གྱུན༌ ཙོགས༌ལ༌ ང༌ཞའ༌ ལས༌ལ༌ བིང༌ ཟ༌ནེ༌ ངའེ༌ ང༌རང༌ངི༌ མི༌གུན༌ བུ༌མོ༌ ཉམ༌པོ༌ མི༌ཛོམ༌ཅེས༌ ཏན༌ཏན༌ ཅོས༌པིན༌།
ཡང༌ ང༌ཞའེ༌ ཞག༌ཏང༌ངི༌ ལས༌སི༌ ནང༌ང༌ རྩང༌མ༌ བོར༌རད༌ན༌ ཏེ༌ནེ༌ འི༌ ལས༌ ཏམ༌པའེ༌ ཕིའ༌ མང༌ང༌ རྩང༌མ༌ མི༌བོར༌ར༌?”
6 ཏེ༌ནེ༌ ཞན༌ཡང༌ ཟའ༌ཅེས༌ མེད༌ པ༌སང༌ བླ༌མའེ༌ སོ༌མ༌ ཏ༌གི༌ ཉམ༌པོ༌ ལྡེབ༌ཅེས༌ལ༌ ཡ༌ཝའེ༌ སྐུན༌དུན༌ནེ༌ ཕབས༌ཁན༌ནི༌ ཏམ༌པ༌ ཏ༌གི༌ ཉིང༌པ༌གུན༌ ཁོའ༌ ཟའ༌ལ༌ ཏངས༌།
7 ཏ༌ ས༌འུལ༌ལི༌ ར༌ལུག༌ ཚོ༌ཁན༌གུན༌ནི༌ འུ༌སྐྱོང༌ ཨི༌དོམ༌པ༌ གྲོ༌འེག༌ ཏེ༌ ཞག༌ག༌ ཡ༌ཝའེ༌ སྐུན༌དུན༌ལ༌ ཁོ༌རང༌ རྩང༌མ༌ ཅོ༌ཅེས༌སི༌ ཕིའ༌ ཏེ༌ཀ༌ ཡོད༌པིན༌།
8 དཱ༌བིད༌དི༌ ཨ༌ཧི༌མེ༌ལེག༌ག༌ ཏྲིས༌,
“ཉེ༌རང༌ངི༌ ལག༌ག༌ དུང༌ ཡ༌ ར༌འི༌ ཡོད༌ད༌?
གྱལ༌པོའེ༌ བཀའ༌ ཏང༌ཁན༌ནི༌ ལས༌པོ༌ ཁག༌ཅན༌ ཨིན༌པ༌ ངའ༌ ར༌འི༌ ཡ༌ ཞན༌ མག༌ཆ༌ ཁུར༌ཅེས༌སི༌ ཏུས༌ མ༌ཐོབ༌།”
9 བླ༌མའེ༌ ལན༌ཏངས༌,
“ངའེ༌ ལག༌ག༌ ཉེ༌རང༌ངི༌ ཨེ༌ལ༌ ལུང༌པའེ༌ ནང༌ང༌ སད༌ཁན༌ ཕི༌ལིས༌ཏི༌པ༌ གོ༌ལི༌ཡཱཐ༌ཐི༌ ར༌འི༌ རས༌སི༌ ནང༌ང༌ ཏུམས༌ཏེ༌ ཨེ༌ཕོད༌དི༌ གྱབ༌བ༌ བོར༌ཁན༌བོ༌ མ༌ནེ༌ མེད༌།
ཀལ༌ཏེས༌ ཉེ༌རང༌ང༌ སྒོས༌དོམ༌ ཡོད༌ན༌ ཏེ༌བོ༌ ཁྱེར༌ར༌ ཛད༌།
ཏེ༌བོ༌ མན༌ནེ༌ འི༌ཀ༌ ཡང༌ ཅའང༌ མེད༌།”
དཱ༌བིད༌དི༌ ཟེརས༌,
“ཏེ༌ ར༌འི༌ སང༌ གྱལ༌ལ༌ ཅའང༌ མེད༌ ཏེ༌བོ༌ ངའ༌ སལ༌ལ༌ ཛད༌།”
གཱད༌ གྱལ༌སའེ༌ ནང༌ང༌ དཱ༌བིད༌།
21:10 ནེ༌ 15
10 དཱ༌བིད༌ གྱལ༌པོ༌ ས༌འུལ༌ལི༌ ཀ༌ནེ༌ ཤོར༌ཏེ༌ གཱད༌དི༌ གྱལ༌པོ༌ ཨ༌ཀིཤ༌ ཡོད༌ས༌ སོང༌།
11 ཨིན༌ནའང༌ ཨ༌ཀིཤ༌ཤི༌ སྤོན༌བོ༌གུན༌ ཁོ༌ ཏེ༌རུ༌ དུག༌ཅེས༌པོའ༌ མ༌ཐད༌པ༌ ཁོང༌གུན༌ནི༌ ཟེརས༌,
“འི༌ དཱ༌བིད༌ ཨིས༌ར༌ཨེལ༌པའེ༌ གྱལ༌པོ༌ མ༌ནོག༌ག༌?
ཨིས༌ར༌ཨེལ༌པ༌གུན༌ནི༌ ཁོའ༌ རྩི༌ཝ༌ ཅོས༌ཏེ༌ རྩེས༌ དང༌ ལུ༌ ཏང༌ཨིན༌ མ༌ ཟེར༌ས༌,
‘ས༌འུལ༌ལི༌ སྟོང༌ མང༌པོ༌ ཨིན༌ནའང༌ དཱ༌བིད༌དི༌ ཏེ༌བོའེ༌ རྕུ༌ལྡབ༌པོ༌ སདས༌།’”
12 ཏེ༌ཟུག༌ ཟེར༌ར༌ དཱ༌བིད༌དི༌ ཚོར༌ ཡང༌ གཱད༌དི༌ གྱལ༌པོ༌ ཨ༌ཀིཤ༌ཤི༌ ཁོའ༌ ཅི༌ ཅོས༌ ཏང༌ཨིན༌ སམ༌ཏེ༌ ཇིགས༌།
13 ཏེ༌བོའེ༌ཕིའ༌ ཁོང༌གུན༌ ཉམ༌པོ༌ ཡོད༌ ཟ༌ནེ༌ ཁོའེ༌ ཉོ༌ ཟུན༌ ཏངས༌ཏེ༌ སྒོ༌གུན༌ ཀྲདས༌ ཡང༌ ཁོང༌རང༌ངི༌ སམ༌དལ༌ནེ༌ ཐུར༌ལ༌ ཐུ༌ ཟར༌ཅུགས༌།