དཱ༌བིད༌ དང༌ ཡོ༌ན༌ཐན༌།
20:1 ནེ༌ 42
20
དཱ༌བིད༌ ར༌མཧའེ༌ ནས༌ས༌ ནཱའེ༌འོད༌ནེ༌ ཤོརས༌ ཡང༌ ཡོ༌ན༌ཐན༌ ཡོད༌ས༌ སོང༌ཏེ༌ ཟེརས༌,
“ངའེ༌ ཅི༌ ཅོས༌ཏོག༌?
ངའེ༌ སྐྱོན༌ ཅི༌ ཨིན༌ནོག༌?
ངའ༌ སད༌གོ༌ཤེས༌,
ངའེ༌ ཁྱོ༌རང༌ངི༌ ཨ༌བའེ༌ གྱབ༌གལ༌ལ༌ ཅི༌ ནོར༌ཁྲུལ༌ ཅོས༌ཏོག༌?”
2 ཡོ༌ན༌ཐན༌ནི༌ ལན༌ཏངས༌,
“ཁོང༌ངི༌ ཏེ༌ཟུག༌ མ༌ནེ༌ མི༌ཅོ༌།
ངའེ༌ ཨ༌བའེ༌ ལས༌ ཆུ༌ངུན༌ ཡ༌ ཆེན༌མོ༌ ཅི༌ཞིག༌གའང༌ ངའ༌ ཤད༌ཏེ༌ མ༌ནེ༌ ཅོའ༌མེད༌།
ཁོང༌ངི༌ འི༌བོ༌ ངའེ༌ ཀ༌ནེ༌ ཅིའ༌ སྦས༌ཏེ༌ བོར༌ཨིན༌།
འི༌བོ༌ དེན༌བ༌ མ༌ནོག༌།”
3 ཏེ༌ནེ༌ དཱ༌བིད༌དི༌ ཡོ༌ན༌ཐན༌ནི༌ དུན༌ལ༌ ནའ༌ ཁུརས༌ ཡང༌ ཟེརས༌ “ཁྱོ༌རང༌ངི༌ ཨ༌བའ༌ ང༌དང༌ངི༌ ཛ༌འོའེ༌ བྲེལ༌ལི༌ སྐོར༌ལ༌ གྱལ༌ལ༌ ཅོས༌ཏེ༌ གྱུས༌ ཨིན༌ནོག༌ ཏེ༌བོའེ༌ཕིའ༌ ཁོང༌ངི༌ སམས༌ཏེ༌ ཨིན༌གྲོ༌,
‘ཅི༌ ཕིའ༌ ངའེ༌ ཡོ༌ན༌ཐན༌ལ༌ འི༌བོ༌ ཤད༌ཏེ༌ ཁོ༌ ཚེར༌ ཅུག༌ཨིན༌?’
ཨིན༌ནའང༌ སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌,
ཤི༌ཅེས༌ ང༌ནེ༌ ཀོམ༌པ༌ ཅིག༌ མ༌ནེ༌ ཐག༌རིང༌ང༌ མེད༌།”
4 ཡོ༌ན༌ཐན༌ནི༌ ཏྲིས༌,
“ངའེ༌ ཁྱོ༌རང༌ང༌ རོགས༌ ཀ༌ཟུག༌ག༌ ཅོ༌?”
5 དཱ༌བིད༌དི༌ ལན༌ཏངས༌,
“ཐོ༌རེ༌ ལྫ༌ཝ༌ སོ༌མའེ༌ གའ༌སྟོན༌ ཨིན༌ནོག༌,
ཡང༌ འི༌ཏུས༌ ང༌ ཏུས༌གྱུན༌ གྱལ༌པོ༌ ཉམ༌པོ༌ ཟན༌ ཟའ༌གོས༌སད༌,
ཨིན༌ནའང༌ ང༌ ཞག༌མ༌ སུམ༌ ཚོག༌པ༌ ཞིང༌ངི༌ ནང༌ང༌ ཨིབས༌ཏེ༌ དུག༌ཅེས༌ལ༌ གོངས༌པ༌ ཏོང༌།
6 ཀལ༌ཏེས༌ ཁྱོ༌རང༌ངི༌ ཨ༌བའེ༌ ང༌ ཀ༌རུ༌ སོང༌ ཟེར༌ཏེ༌ ཏྲི༌ན༌ ཁོང༌ང༌ ཟེར༌,
‘དཱ༌བིད༌དི༌ ངའེ༌ ཀ༌ནེ༌ གོངས༌པ༌ ལེན༌ཏེ༌ ཁོའེ༌ ནང༌ཚངས༌སི༌ ལོ༌ ཞུང༌ངི༌ ཆོད༌པ༌ ཕུལ༌ཅེས༌སི༌ ནང༌ང༌ ཐུས༌ཤེས༌ལ༌ ཁོ༌རང༌ངི༌ ཁང༌པ༌ བེད༌ལེ༌ཧེམ༌མ༌ སོང༌།’
7 ཀལ༌ཏེས༌ ཁོང༌ངི༌ ‘གྱལ༌ལ༌ རག༌།’
ཟེར༌ན༌,
ཅི༌ཚང༌མ༌ གྱལ༌ལ༌ ཨིན༌ཁན༌བོ༌ ཁྱོ༌རང༌ང༌ ཤེས༌ཨིན༌།
ཨིན༌ནའང༌ ཀལ༌ཏེས༌ ཁོང༌ང༌ སྲོ༌ སྲན༌ཏྲེ༌ ཡོང༌ན༌ ཁོང༌ངི༌ ང༌ སད༌ཅེས༌སི༌ ཐབས༌པོ༌ ཁྱོ༌རང༌ང༌ ཧ༌གོ༌གོས༌།
8 ཏ༌ ཁྱོ༌རང༌ངི༌ ཡོག༌པོ༌,
ངའ༌ ཐུག༌རྗེ༌ སྟོན༌ ཅིའ༌ཟེར༌ན༌ ཡ༌ཝའེ༌ དུན༌ལ༌ ཁྱོ༌རང༌ངི༌ ང༌ ཉམ༌པོ༌ ཆད༌དོན༌ ཅོས༌ཏེ༌ ཨིན༌།
ཀལ༌ཏེས༌ ངའེ༌ ནང༌ང༌ སྐྱོན༌ ཐོང༌ན༌ ཁྱོ༌རང༌ངི༌ ང༌ སོད༌ ཨིན༌ནའང༌ ཇུ༌ཇུ༌ ང༌ ཁོང༌ངི༌ ལག༌ག༌ མ༌སྟད༌།”
9 ཡོ༌ན༌ཐན༌ནི༌ ཟེརས༌,
“ངའེ༌ ཏེ༌ཟུག༌ མ༌ནེ༌ མི༌ཅོ༌།
ཀལ༌ཏེས༌ ངའེ༌ ཨ༌བའེ༌ ཁྱོ༌རང༌ སད༌ཅེས༌ ངའ༌ གྱུས༌ ཙ༌པིག༌ ཆ༌ནའང༌ ངའེ༌ ཁྱོ༌རང༌ང༌ ཤད༌ཨིན༌།”
10 དཱ༌བིད༌དི༌ ཟེརས༌,
“ཁྱོ༌རང༌ངི༌ ཨ༌བའེ༌ ལན༌ སྲོ༌ ཉམ༌པོ༌ ཏངས༌ས༌ མ༌ཏངས༌ ང༌ ཀ༌ཟུག༌གི༌ གྱུས༌ཆེན༌?”
11 ཡོ༌ན༌ཐན༌ནི༌ ཟེརས༌,
“ཡོང༌,
ང༌དང༌ ཕི༌ལོག༌ག༌ ཞིང༌ངི༌ཀ༌ བིང༌ཏེ༌ ཆེན༌།”
ཏེ༌ནེ༌ ཁོང༌གུན༌ སོང༌།
12 ཡོ༌ན༌ཐན༌ནི༌ དཱ༌བིད༌ལ༌ ཟེརས༌,
“ངའེ༌ ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ དུན༌ལ༌ ཁ༌ཆད༌ ཅོའད༌ ངའེ༌ ང༌རང༌ངི༌ ཨ༌བའ༌ སྤེ༌ར༌ ཏངས༌ཏེ༌ ཁྱོ༌རང༌ངི༌ སྐོར༌ལ༌ ཁོང༌ངི༌ སམ༌བ༌ གྱལ༌ལ༌ དུག༌ག༌ ཡ༌ ངན༌པ༌,
གྱུས༌ ཅོས༌ཏེ༌ ཐོ༌རེ༌ མན༌པ༌ ནངས༌ལ༌ འིན༌ན༌ ཏུས༌པོའི༌ཀ༌ ཁྱོ༌རང༌ང༌ ཤད༌ཨིན༌།
13 ཀལ༌ཏེས༌ ཁོང༌ང༌ སྲོ༌ ཡོངས༌ཏེ༌ ཁྱོ༌རང༌ སད༌ཅེས༌ ཅོའད༌ན༌ ཡང༌ ངའེ༌ ཁྱོ༌རང༌ང༌ ཤང༌ སྐུལ༌ཏེ༌ ཁྱོ༌རང༌ སྐྱོབས༌ཏེ༌ ལམ༌ མ༌ཅུག༌ན༌ ཡ༌ཝའེ༌ ང༌ ཆད༌པ༌ སལ༌ཅེས༌ མ༌ཚད༌ ང༌ སད༌ཤིག༌།
ཡ༌ཝ༌ ངའེ༌ ཨ༌བ༌ ཉམ༌པོ༌ ཞུགས༌ས༌ ཛད༌ཁན༌ ཙོགས༌ལ༌ ཁྱོ༌རང༌ ཉམ༌པོ༌ ཞུགས༌ས༌ ཛད༌ཤིག༌།
14 ང༌ སོན༌ཏེའ༌ ཡོད༌ཡོད༌པོ༌ ཡ༌ཝའེ༌ ཁྱོ༌རང༌ང༌ སྙིང༌རྗེ༌ སྟན༌ན༌ ཛད༌ཁན༌ ཙོགས༌ལ༌ ཇུ༌ཇུ༌ ཁྱོ༌རང༌ངིའང༌ ངའ༌ སྙིང༌རྗེ༌ སྟོན༌།
ཨིན༌ནའང༌ ང༌ ཤི༌ཏེ༌ སྟིང༌ནེ༌
15 ཡ༌ཝའེ༌ ཁྱོ༌རང༌ངི༌ གྲ༌འོ༌ ཚང༌མ༌ ཇིག༌རྟེན༌ནེ༌ མེད༌ཁན༌ ཅོའ༌ ཛད༌ཏེ༌ སྟིང༌ནེའང༌ ཇུ༌ཇུ༌ ཁྱོ༌རང༌ངི༌ ངའེ༌ ནང༌ཚངས༌ ཉམ༌པོ༌ སྙིང༌རྗེ༌ སྟན༌ཅེས༌ མ༌ཕང༌།”
16 ཏེ༌ནེ༌ ཡོ༌ན༌ཐན༌ནི༌ དཱ༌བིད༌ ཉམ༌པོ༌ ཆད༌དོན༌ སྟན༌པོ༌ ཅོས༌ཏེ༌ ཟེརས༌,
“ཡ༌ཝའེ༌ ཁྱོ༌རང༌ངི༌ གྲ༌འོ༌ ཚང༌མ༌ མེད༌ཁན༌ ཅོའ༌ ཛད༌ཤིག༌།”
17 ཡང༌ ཡོ༌ན༌ཐན༌ནི༌ དཱ༌བིད༌ལ༌ ཡང༌སྐྱར༌ ནའ༌ ཁུར༌ཅུགས༌ཏེ༌ ཁོ༌ ཛ༌འོ༌ རིན༌ཅན༌ ཨིན༌ཁན༌བོ༌ སྟན༌པོ༌ ཅོ༌ཅུགས༌ ཅིའ༌ཟེར༌ན༌ ཡོ༌ན༌ཐན༌ནི༌ ཁོའ༌ མ༌སྲན༌ཏྲེ༌ ཅམས༌པ༌ ཅོའད༌པིན༌།
18 ཏེ༌ནེ༌ ཡོ༌ན༌ཐན༌ནི༌ ཟེརས༌ “ཐོ༌རེ༌ ང༌དང༌གུན༌ནི༌ ལྫ༌ཝ༌ སོ༌མའེ༌ གའ༌སྟོན༌ ཙི༌ཅེས༌ ཨིན༌ནོག༌ ཡང༌ ཁྱོ༌རང༌ངི༌ ནས༌ས༌ སྟོང༌པ༌ ཡོད༌ཅེས༌པའེ༌,
ངའེ༌ ཨ༌བའ༌ ཁྱོ༌རང༌ མེད༌ཁན༌བོ༌ ཧ༌གོ༌ཨིན༌།
19 ནངས༌ལ༌ ཕི༌ཏོག༌ ཁྱོ༌རང༌ ཨིབས༌ཏེ༌ དུག༌སའེ༌ ནས༌སའ༌ སོང༌ ཡང༌ རྡོའ༌ སྤུངས༌ཏེ༌ ཡོད༌སའེ༌ཀ༌ སྲུངས༌ཏེ༌ དུག༌།
20 ང༌ ཡོངས༌ཏེ༌ ཙ༌གའ༌ དའ༌ ཏང༌ཁན༌ ཙོགས༌ལ༌ རྡོའ༌ སྤུངས༌ཏེ༌ ཡོད༌སའེ༌ ལྡོའེ༌ཀ༌ དའ༌ སུམ༌ ཏང༌ཨིན༌།
21 ཏེ༌ནེ༌ ངའེ༌ ཕྲུ༌གུ༌ ཞིག༌ དའ༌ ཁྱོང༌ཅེས༌ལ༌ ལམ༌ ཅུག༌ཨིན༌།
ཀལ༌ཏེས༌ ངའེ༌ ཁོའ༌ ‘དའ༌གུན༌ འི༌ ཆོགས༌ནེ༌ དུག༌’ ཟེར༌ན༌ སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ཅི༌ཚང༌མ༌ གྱལ༌ལ༌ ཡང༌ ཅའང༌ ཇིགས༌པ༌ མེད༌ཁན༌བོ༌ ཁྱོ༌རང༌ང༌ ཧ༌གོ༌གོས༌།
22 ཨིན༌ནའང༌ ཀལ༌ཏེས༌ ངའེ༌ ཁོའ༌ ཟེར༌ན༌ ‘དའ༌གུན༌ ཁྱོ༌རང༌ངི༌ སང༌ ཐག༌རིང༌ང༌ དུག༌ སོང༌ཏེ༌ ཁྱོང༌།’
ཏེ༌ནེ༌ ཁྱོ༌རང༌ ཏེན༌ན༌མལ༌ལ༌ ཤོར༌ཏེ༌ སོང༌ ཅིའ༌ཟེར༌ན༌ ཡ༌ཝའེ༌ ཁྱོ༌རང༌ང༌ ཤོར༌ཅེས༌ལ༌ མོལ༌ཏེ༌ ཨིན༌ནོག༌།
23 ཡང༌ ང༌དང༌ ཉིས༌ཀོའེ༌ ཅོས༌ཁན༌ནི༌ ཁ༌ཆད༌གུན༌ ཡ༌ཝའེ༌ སྟན༌པོ༌ བོར༌ ཅུག༌ག༌ ཛད༌ཨིན༌ ཅིའ༌ཟེར༌ན༌ ཏུས༌གྱུན༌ ཁོང༌ ཏེ༌གུན༌ནི༌ སྤང༌པོ༌ ཞུགས༌ཏེ༌ ཨིན༌ནོག༌།”
24 ཏེ༌ནེ༌ དཱ༌བིད༌ ཞིང༌ངི༌ ནང༌ང༌ ཨིབས༌ཏེ༌ དུགས༌ ཡང༌ ལྫ༌ཝ༌ སོ༌མའེ༌ གའ༌སྟོན༌ གོ༌ཟུག༌ ཆའ༌ཅིག༌ གྱལ༌པོ༌ དོན༌ཏང༌ དོན༌ན༌ལ༌ དུགས༌།
25 ཏུས༌གྱུན༌ ཙོགས༌ལ༌ གྱལ༌པོ༌ རྩིག༌པའེ༌ དུན༌ནི༌ ཁོ༌རང༌ངི༌ ནས༌སའེ༌ཀ༌ དུགས༌,
ཡོ༌ན༌ཐན༌ ཅོག༌ཙེ༌ འ༌ངོ༌ ཆོགས༌པོའེ༌ཀ༌ ཡང༌ ཨབ༌ནེར༌ ཁོའེ༌ ལྡོའ༌ དུགས༌ ཨིན༌ནའང༌ དཱ༌བིད༌དི༌ ནས༌ས༌ སྟོང༌པ༌ ཡོད༌པིན༌།
26 ཏེ༌ ཞག༌ག༌ ས༌འུལ༌ལི༌ ཏེ༌བོའེ༌ སྐོར༌ལ༌ ཅའང༌ མ༌ཟེརས༌ ཅིའ༌ཟེར༌ན༌ ཁོའེ༌ སམ༌,
“ཏན༌ཏན༌ ཅི༌ཏོང༌ཤིག༌ སོང༌ཏེ༌ དཱ༌བིད༌ གའ༌སྟོན༌ནི༌ ནང༌ང༌ ཐུས༌ཤེས༌ལ༌ རྩང༌མ༌ མེད༌ཏེ༌ ཨིན༌ནོག༌།”
27 ཨིན༌ནའང༌ ཐོ༌རེ༌ ཟུགས༌པོ༌ དཱ༌བིད༌དི༌ ནས༌ས༌ ཡང༌སྐྱར༌ སྟོང༌པ༌ ཐོང༌ང༌ཅིག༌ ས༌འུལ༌ལི༌ ཡོ༌ན༌ཐན༌ལ༌ ཏྲིས༌,
“ཅི༌ཕིའ༌ ཡེ༌ཤེ༌ བུ༌ཚ༌ དི༌རིང༌ངའང༌ ཟན༌ ཟའ༌ལ༌ མ༌ཡོང༌ང༌ ཨིན༌ནོག༌?”
28 ཡོ༌ན༌ཐན༌ནི༌ ལན༌ཏངས༌ “དཱ༌བིད༌དི༌ བེད༌ལེ༌ཧེམ༌མ༌ ཆ༌ཅེས༌ལ༌ ངའེ༌ ཀ༌ནེ༌ གོངས༌པ༌ ལེནས༌།
29 ཁོའེ༌ ཟེརས༌,
‘ཇུ༌ཇུ༌ ང༌ ང༌རང༌ངི༌ གྲོང༌ཁྱེར༌ལ༌ ང༌ཞའེ༌ ནང༌ཚངས༌སི༌ ཆོད༌པ༌ ཕུལ༌ཅེས༌སི༌ ནང༌ང༌ ཐུས༌ཤེས༌ལ༌ ཆ༌ཅུག༌ག༌ ཛད༌,
ངའེ༌ ཨ༌ཅོའེ༌ ང༌ ཏེ༌རུ༌ ཡོང༌གོས༌ ཟེར༌ར༌རག༌།
ཏེ༌བོའེ༌ཕིའ༌ ཇུ༌ཇུ༌ ང༌ ང༌རང༌ངི༌ ཨ༌ཅོ༌གུན༌ ཐུག༌ག༌ལ༌ ཆ༌ཅུག༌ག༌ ཛད༌།’
ཏེན༌ན༌བོའེ༌ ཕིའ༌ ཁོ༌ གྱལ༌པོའེ༌ ཅོག༌ཙེ༌ཀ༌ མེད༌ཏེ༌ ཨིན༌ནོག༌།”
30 ས༌འུལ༌ལ༌ ཡོ༌ན༌ཐན༌ནི༌ཀ༌ མ༌ སྲན༌ཏྲེ༌ སྲོ༌ ཡོངས༌ཏེ༌ ཟེརས༌,
“བུང༌བུ༌,
ཁའ༌མི༌ཉན༌ དང༌ ངོ༌ལོག༌ ཅོ༌ཁན༌ནི༌ བུ༌ཚ༌།
ཁྱོ༌རང༌ དང༌ ཁྱོ༌རང༌ངི༌ ཨ༌མའ༌ ཁྲེལ༌བ༌ ཁྱོངས༌ཏེ༌ ཅི༌ ཁྱོ༌རང༌ངི༌ ཡེ༌ཤེ༌ བུ༌ཚ༌ ཆོག༌སྐྱོར༌ ཅོ༌ཁན༌བོ༌ ངའ༌ གྱུས༌ མེད༌གྲོ༌ སམ༌མ༌ རག༌ག༌?
31 ཡེ༌ཤེ༌ བུ༌ཚ༌ སོན༌ཏེའ༌ ཡོད༌ཡོད༌པོ༌ ཁྱོ༌རང༌ གྱལ༌པོ༌ མ༌ནེ༌ མི༌གྱུར༌།
ཏ༌ སུ༌ཞིག༌ ཀལ༌ཏེ༌ ཁོ༌ ང༌ ཡོད༌ས༌ ཁྱོང༌ ཏེ༌ནེ༌ ངའེ༌ ཁོ༌ སད༌ ཅུག༌ཨིན༌།”
32 ཨིན༌ནའང༌ ཡོ༌ན༌ཐན༌ནི༌ ཁོ༌རང༌ངི༌ ཨ༌བ༌ ཏྲིས༌,
“ཅི༌ ཏོན༌ལ༌ ཁོ༌ སད༌ཨིན༌?
ཁོའེ༌ ཅི༌ ཅོས༌ཏོག༌?”
33 ས༌འུལ༌ལི༌ ཁོ༌རང༌ངི༌ དུང༌བོ༌ ཡོ༌ན༌ཐན༌ལ༌ གྱབས༌ཏེ༌ ཁོ༌ སད༌ཅེས༌ ཅོས༌།
ཏེ༌ནེ༌ ཡོ༌ན༌ཐན༌ལ༌ ཁོའེ༌ ཨ༌བའེ༌ དཱ༌བིད༌ སད༌ཅེས༌ ཨིན༌ཁན༌བོ༌ ཧ༌གོ༌།
34 ཡོ༌ན༌ཐན༌ལ༌ སྲོ༌ ཡོངས༌ཏེ༌ ཏེ༌ཀ༌ནེ༌ ལངས༌ཏེ༌ སོང༌།
གའ༌སྟོན༌ནི༌ ཞག༌ ཉིས༌པའེ༌ ཞག༌ག༌ ཁོ༌ ཟན༌ མ༌ཟོས༌ ཅིའ༌ཟེར༌ན༌ ཁོའ༌ ཁོ༌རང༌ངི༌ ཨ༌བའེ༌ དཱ༌བིད༌ ཉམ༌པོ༌ ཁྲེལ༌མེད༌དི༌ ལས༌ ཅོ༌ཅེས༌པོའེ༌ཀ༌ ཁྲེལ༌བ༌ ཚེར༌ཏེ༌ རྡུག༌པོ༌ ཅོས༌།
35 ཐོ༌རེ༌ ཟུག༌པོ༌ ང༌མོ༌ ཁ༌ཆད༌ ཅོ༌ཁན༌ ནང༌ཞིན༌ ཡོ༌ན༌ཐན༌ ཞིང༌ང༌ སོང༌ ཡང༌ ཁོ༌རང༌ ཉམ༌པོ༌ ཕྲུ༌གུ༌ཞིག༌ ཁྲིད༌ཏེ༌ ཁྱེརས༌།
36 ཁོའེ༌ ཕྲུ༌གུ༌བོའ༌ ཟེརས༌,
“ངའེ༌ དའ༌ ཏང༌ཁན༌གུན༌ ཁྱོང༌ང༌ལ༌ བང༌ཏངས༌ཏེ༌ སོང༌།”
ཕྲུ༌གུ༌བོ༌ བང༌ཏངས༌ ཡང༌ ཡོ༌ན༌ཐན༌ནི༌ དའ༌ མ༌ ཐག༌རིང༌ང༌ ཏངས༌།
37 ཕྲུ༌གུ༌བོ༌ དའེ༌ ཉེ༌མོའ༌ ལེབ༌བ༌ཅིག༌ ཡོ༌ན༌ཐན༌ནི༌ ཀུ༌ཅོ༌ ཏངས༌ཏེ༌ ཟེརས༌,
“དའ༌ ཁྱོ༌རང༌ངི༌ སང༌ ཏ༌རུང༌ ཐག༌རིང༌ང༌ དུག༌།
38 གྱོགས༌པ༌ སོང༌ དུག༌ མ༌དུག༌།”
ཕྲུ༌གུའི༌ དའ༌གུན༌ ཏུས༌ཏེ༌ སྤོན༌བོ༌ ཡོད༌ས༌ ཁྱོངས༌།
39 ཡོ༌ན༌ཐན༌ དང༌ དཱ༌བིད༌ ཉིས༌ཀོའ༌ མ༌ནེ༌ ཏེ༌ སྟགས༌པོའེ༌ སྐོར༌ལ༌ ཕྲུ༌གུའ༌ ཅའང༌ གྱུས༌མེད༌པིན༌།
40 ཏེ༌ནེ༌ ཡོ༌ན༌ཐན༌ནི༌ རང༌ངི༌ ཞུ༌ དང༌ དའ༌ ཕྲུ༌གུའ༌ ཏངས༌ ཡང༌ ཏེ༌གུན༌ གྱལ༌ས༌ ལོགས༌ཏེ༌ ཁྱེར༌ཅེས༌ལ༌ ཟེརས༌།
41 ཕྲུ༌གུ༌ ཆ༌ ཚར༌ར༌ཅིག༌ དཱ༌བིད༌ རྡོའ༌ སྤུངས༌ཏེ༌ ཡོད༌སའེ༌ གྱབ༌ནེ༌ བིང༌ཏེ༌ ཡོ༌ན༌ཐན༌ནི༌ དུན༌ལ༌ ལན༌ སུམ༌ ཆག༌ཕུལ༌ཏེ༌ ཁོའ༌ ཀུས༌པ༌ སྟནས༌།
ཁོང༌ ཉིས༌ཀོ༌ ཁྲིལ༌ཏེ༌ མ༌ སྲན༌ཏྲེ༌ ངུས༌,
མང༌ཆེའ༌ དཱ༌བིད༌།
42 སྟིང༌ཇུག༌ག༌ ཡོ༌ན༌ཐན༌ནི༌ དཱ༌བིད༌ལ༌ ཟེརས༌,
“ཞི༌དེ༌ ཉམ༌པོ༌ སོང༌,
ཅིའ༌ཟེར༌ན༌ ང༌དང༌ངི༌ ཅིག༌ དང༌ ཅིག༌ག༌ ཡ༌ཝའེ༌ ཚན༌ནི༌ ནང༌ང༌ ཛ༌འོའེ༌ བྲེལ༌ སྟན༌པོ༌ བོར༌ཅེས༌ ཁ༌ཆད༌ ཅོས༌ཏེ༌ ཨིན༌།
ཏུས༌གུན༌ནི༌ ཕིའ༌ ཁྱོ༌རང༌ དང༌ ང༌ ཡང༌ ང༌དང༌ངི༌ པུར༌གྱུད༌གུན༌ནི༌ ཕར༌ལ༌ ཆད༌དོན༌ནི༌ སྤང༌པོ༌ ཡ༌ཝ༌ ཞུགས༌ཏེ༌ ཨིན༌ནོག༌།”
ཏེ༌ནེ༌ དཱ༌བིད༌ ཏེ༌ཀ༌ནེ༌ སོང༌ ཡང༌ ཡོ༌ན༌ཐན༌ ལོགས༌ཏེ༌ གྱལ༌ས༌ སོང༌།