ས༌འུལ༌ལི༌ དཱ༌བིད༌ སད༌ཅེས༌སི༌ རྩོན༌གྲུས༌ ཅོས༌།
19:1 ནེ༌ 24
19
ས༌འུལ༌ལི༌ ཁོ༌རང༌ངི༌ བུ༌ཚ༌ ཡོ༌ན༌ཐན༌ དང༌ ཁོའེ༌ ལས༌ཅེད༌པ༌ ཚང༌མ༌ལ༌ དཱ༌བིད༌ སད༌ཅེས༌ལ༌ ཟེརས༌།
ཨིན༌ནའང༌ ཡོ༌ན༌ཐན༌ནི༌ དཱ༌བིད༌ལ༌ མ༌སྲན༌ཏྲེ༌ ཅམས༌པ༌ ཅོའད༌པིན༌
2 ཏེ༌བོའེ༌ཕིའ༌ ཡོ༌ན༌ཐན༌ནི༌ དཱ༌བིད༌ལ༌ ཟེརས༌,
“ངའེ༌ ཨ༌བ༌ ས༌འུལ༌ལི༌ ཁྱོ༌རང༌ སད༌ཅེས༌སི༌ སྐབས༌ ཙལ༌དུག༌།
ཐོ༌རེ༌ ང༌མོ༌ སྟན༌པོ༌ ཉམ༌པོ༌ རང༌ སྐྱོབས༌ཏེ༌ སུ༌ཞིག༌གའང༌ མི༌ཐོབ༌སའེ༌ ནས༌ས༌ཞིག༌ག༌ སོང༌ ཡང༌ ཨིབས༌ཏེ༌ དུག༌།
3 ང༌ ཁྱོ༌རང༌ ཨིབས༌ཏེ༌ ཡོད༌སའེ༌ ཞིང༌ངི༌ཀ༌ ང༌རང༌ངི༌ ཨ༌བ༌ ཡོད༌ས༌ སོང༌ཏེ༌ ཁྱོ༌རང༌ངི༌ སྐོར༌ལ༌ སྤེ༌ར༌ ཏང༌ཨིན༌ ཡང༌ ཁོང༌ངི༌ ཟེར༌ཁན༌ ཚང༌མ༌ ངའེ༌ ཁྱོ༌རང༌ང༌ ཤད༌ཨིན༌།”
4 ཡོ༌ན༌ཐན༌ནི༌ ཁོ༌རང༌ངི༌ ཨ༌བའ༌ དཱ༌བིད༌དི༌ ཅོ༌ཁན༌ གྱལ༌ལ༌ ལས༌གུན༌ནི༌ སྐོར༌ལ༌ སྤེ༌ར༌ ཏངས༌ཏེ༌ ཟེརས༌,
“གྱལ༌པོའེ༌ རང༌ངི༌ ཡོག༌པོ༌ དཱ༌བིད༌ལ༌ མི༌འོས༌པ༌ ཅོ༌ མ༌གོས༌ ཅིའ༌ཟེར༌ན༌ ཁོའེ༌ ཉེ༌རང༌ང༌ ཅའང༌ མི༌འོས༌པ༌ མ༌ཅོའ༌ ཡང༌ ཁོའེ༌ ཅོ༌ཁན༌ནི༌ ལས༌གུན༌ ཉེ༌རང༌ངི༌ ཕིའ༌ མ༌ ཕན༌ཐོགས༌ཅན༌ ཨིན༌པིན༌།
5 ཁོའེ༌ ཁོ༌རང༌ངི༌ སྲོག༌ག༌ མ༌ལྟའ༌ ཕི༌ལིས༌ཏི༌པ༌ གོ༌ལི༌ཡཱཐ༌ལ༌ ནོལས༌ ཡང༌ ཡ༌ཝའེ༌ ཨིས༌ར༌ཨེལ༌པ༌ གང༌པོའེ༌ ཕིའ༌ གྱལ༌ཁ༌ ཆེན༌མོ༌ ཁྱོང༌ང༌ ཛད༌།
ཏེ༌བོ༌ ཐོང༌ཏེ༌ ཉེ༌རང༌ མ༌སྲན༌ཏྲེ༌ ཐདས༌ ཏེ༌ནེ༌ ཅི༌ཕིའ༌ ཉེ༌རང༌ངི༌ གྱུན༌ཚན༌ མེད༌པ༌ གལ༌མེད༌ མི༌ དཱ༌བིད༌ སད༌ཏེ༌ སྡིག༌པ༌ ཅོའད༌།”
6 ས༌འུལ༌ལི༌ ཡོ༌ན༌ཐན༌ནི༌ ཟེར༌ཁན༌གུན༌ ཉན༌ཏེ༌ ནའ༌ ཁུརས༌ ཡང༌ ཟེརས༌,
“སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ངའེ༌ དཱ༌བིད༌ མི༌སད༌།”
7 སྟིང༌ནེ༌ ཡོ༌ན༌ཐན༌ནི༌ དཱ༌བིད༌ བོད༌ཏེ༌ ཁྱོངས༌ ཡང༌ ཁོའ༌ སྤེ༌ར༌ ཚང༌མ༌ ཤདས༌།
ཁོའེ༌ ཁོ༌ ས༌འུལ༌ ཡོད༌ས༌ ཁྲིད༌ཏེ༌ ཁྱོངས༌ ཡང༌ དཱ༌བིད༌དི༌ ས༌འུལ༌ལ༌ སྔོན༌ ཙོགས༌ལ༌ ཞབས༌ཏོག༌ ཞུས༌།
8 ཡང༌སྐྱར༌ མག༌ སོང༌པ༌ དཱ༌བིད༌ ཕི༌ལིས༌ཏི༌པ༌གུན༌ལ༌ ནོལ༌ལ༌ སོང༌།
ཁོའེ༌ མག༌མི༌ ཤུགས༌ དང༌ སྟོབས༌ ཉམ༌པོ༌ ཀྲག༌པོ༌ ནོལ༌ པ༌སང༌ གྲ༌འོ༌གུན༌ ཤོར༌ཏེ༌ སོང༌།
9 ཞག༌ཤིག༌ ས༌འུལ༌ ལག༌པའེ༌ ནང༌ང༌ དུང༌ ཁུར༌ཏེ༌ ཁོ༌རང༌ངི༌ ཁང༌པའེ༌ ནང༌ང༌ དུགས༌ཏེ༌ ཡོད༌ཏུས༌ ཡ༌ཝའེ༌ ཀལ༌ལ༌ ཛད༌ཁན༌ནི༌ སེམས༌ཉིད༌ ངན༌པ༌ ཁོའེ༌ཀ༌ བབས༌ ཡང༌ དཱ༌བིད༌དི༌ ཁོའེ༌ ཕིའ༌ ཧརྦ༌ རོལ༌མོ༌ རོལ༌ལད༌པིན༌།
10 ས༌འུལ༌ལི༌ དཱ༌བིད༌ལ༌ དུང༌ གྱབས༌ཏེ༌ རྩིག༌པའེ༌ཀ༌ ཅར༌ཅེས༌ ཅོས༌ ཨིན༌ནའང༌ དཱ༌བིད༌ ལྡོའ༌ གྱུར༌ པ༌སང༌ དུང༌བོ༌ རྩིག༌པའེ༌ ནང༌ང༌ ཟུག༌།
དཱ༌བིད༌ ཏེ༌ ཚན༌ལ༌ ཤོར༌ཏེ༌ སོང༌།
11 ས༌འུལ༌ལི༌ དཱ༌བིད༌དི༌ཀ༌ ནང༌སྟག༌ བོར༌ཅེས༌ལ༌ ཁོའེ༌ ཁང༌པའ༌ མག༌མི༌ ཀལས༌ ཡང༌ ནམ༌ལངས༌ས༌ཅིག༌ ཁོ༌ སད༌ཅེས༌ལ༌ བཀའ༌ ཏངས༌།
ཨིན༌ནའང༌ དཱ༌བིད༌དི༌ ན༌མ༌ མི༌ཁལ༌ལི༌ ཁོའ༌ ཤང༌ སྐུལ༌ཏེ༌ ཟེརས༌,
“ཀལ༌ཏེས༌ དི༌རིང༌ ཚན༌ལ༌ ཉེ༌རང༌ ཤོར༌ཏེ༌ རང༌ངི༌ སྲོག༌ མ༌སྐྱོབ༌ན༌,
ཐོ༌རེ༌ ང༌མོ༌ ཉེ༌རང༌ སད༌ད༌ ནོག༌།”
12 ཏེ༌ནེ༌ མི༌ཁལ༌ལི༌ དཱ༌བིད༌ ཀར༌ཁུང༌ནེ༌ ཐུར༌ལ༌ ཕབས༌ ཡང༌ ཁོ༌ ཤོར༌ཏེ༌ སོང༌།
13 མི༌ཁལ༌ལི༌ སྐུན༌དྲ༌ཞིག༌ག༌ དཱ༌བིད༌དི༌ ཀོས༌ལག༌ སྐོན༌ཏེ༌ མལ༌ཙེ༌ཀ༌ ཉལ༌ཏེ༌ གོའེ༌ཀ༌ སྤུ༌ཅན༌ནི༌ ར༌མའེ༌ པགས༌པ༌ སྐོནས༌།
14 ས༌འུལ༌ལི༌ དཱ༌བིད༌ ཟུམ༌མ༌ལ༌ མག༌མི༌ ལམ༌ཅུག༌ཁན༌གུན༌ལ༌ མི༌ཁལ༌ལི༌ ཟེརས༌,
“ཁོང༌ང༌ ཟུ༌མོ༌ དུག༌།”
15 ཏེ༌ནེ༌ ས༌འུལ༌ལི༌ མག༌མི༌གུན༌ དཱ༌བིད༌ལ༌ ལྟའ༌ལ༌ ལོགས༌ཏེ༌ ལམ༌ ཅུགས༌ཏེ༌ ཟེརས༌,
“ཁོ༌ མལ༌ཙའ༌ ཉམ༌པོ༌ ང༌ ཡོད༌ས༌ ཁྱོང༌ ཏེ༌ནེ༌ ངའ༌ ཁོ༌ སད༌ ཉན༌ཨིན༌།”
16 ཨིན༌ནའང༌ མག༌མི༌གུན༌ ཡོངས༌ཏེ༌ ལྟའ༌ཅིག༌ མལ༌ཙེ༌ ནང༌ང༌ གོའེ༌ཀ༌ ར༌མའེ༌ སྤུ༌ གོན༌ཁན༌ནི༌ སྐུན༌དྲ༌ཞིག༌ ཐོང༌།
17 ས༌འུལ༌ལི༌ མི༌ཁལ༌ལ༌ བོད༌ཏེ༌ ཁྱོངས༌ ཡང༌ ཟེརས༌,
“ཁྱོ༌རང༌ངི༌ ངའ༌ ཅིའ༌ གོབ༌སྐོར༌ ཏངས༌ཏེ༌ ངའེ༌ གྲ༌འོ༌ ཤོར༌ཅུགས༌པིན༌?”
མི༌ཁལ༌ལི༌ ལན༌ཏངས༌,
“ཁོ༌ ཤོར༌ མ༌ཅུགས༌པིན༌ན༌ ཁོའེ༌ ང༌ སད༌ཅེས༌ དུག༌པིན༌།”
18 དཱ༌བིད༌ ཤོར༌ཏེ༌ ར༌མཧ༌ ས༌མུའེལ༌ ཡོད༌ས༌ སོང༌ ཡང༌ ས༌འུལ༌ལི༌ ཁོའ༌ ཅོས༌ཁན༌ ཚང༌མ༌ ཁོང༌ང༌ ཤདས༌།
ཏེ༌ནེ༌ ས༌མུའེལ༌ལི༌ དཱ༌བིད༌ ཁོ༌རང༌ ཉམ༌པོ༌ དུག༌ག༌ལ༌ ནཱའེ༌འོད༌དི༌ ནས༌ས༌ ཁྱེརས༌།
19 ས༌འུལ༌ལ༌ དཱ༌བིད༌ ར༌མཧའེ༌ ནས༌ས༌ ནཱའེ༌འོད༌ལ༌ དུག༌ ཟེར༌ཏེ༌ ཚོར༌ར༌ཅིག༌
20 ཁོའེ༌ ཁོ༌ ཟུམ༌མ༌ལ༌ མག༌མི༌ ལམ༌ ཅུགས༌ ཨིན༌ནའང༌ ཁོང༌གུན༌ནི༌ ས༌མུའེལ༌ གོ༌ཁྲིད༌ ཅོས༌ཏེ༌ ལུང༌སྟོན༌པ༌ མང༌པོ༌ཞིག༌གི༌ ལུང༌སྟན༌ ཤད༌ཨིན༌ ཐོང༌ང༌ཅིག༌ དཀོན༌མཆོག༌གི༌ ཐུག༌ཉིད༌ ས༌འུལ༌ལི༌ མག༌མི༌གུན༌ནི༌ཀ༌ བབས༌ ཡང༌ ཁོང༌གུན༌ནིའང༌ ལུང༌སྟན༌ ཤདས༌།
21 ས༌འུལ༌ལ༌ ཏེ༌བོའེ༌ སྐོར༌ལ༌ ཚོར༌ར༌ཅིག༌ ཁོའེ༌ ཞན༌ མག༌མི༌གུན༌ ལམ༌ཅུགས༌ ཡང༌ ཁོང༌གུན༌ནིའང༌ ལུང༌སྟནས༌ ཤདས༌།
ས༌འུལ༌ལི༌ ལན༌ སུམ༌པ༌ མག༌མི༌གུན༌ ལམ༌ ཅུགས༌ ཡང༌ ཏེ༌གུན༌ནིའང༌ ཏེན༌ན༌ ཙོགས༌ ཅོས༌།
22 སྟིང༌ཇུག༌ག༌ ཁོ༌རང༌ ར༌མཧ༌ སོང༌ ཡང༌ སི༌ཀྱུའ༌ ཆུ༌དོང༌ ཆེན༌མོའེ༌ཀ༌ ལེབས༌ཏེ༌ ཁོའེ༌ མི༌གུན༌ལ༌ ཏྲིས༌,
“ས༌མུའེལ༌ དང༌ དཱ༌བིད༌ ཀ༌ནེ༌ དུག༌?”
ཁོང༌གུན༌ནི༌ ཟེརས༌,
“ར༌མཧའེ༌ ནས༌ས༌ ནཱའེ༌འོད༌དི༌ ནང༌ང༌ ཡོད༌ཏེ༌ ཨིན༌ནོག༌།”
23 ཏེ༌ནེ༌ ས༌འུལ༌ ར༌མཧའེ༌ ནས༌ས༌ ནཱའེ༌འོད༌ལ༌ སོང༌།
ཨིན༌ནའང༌ དཀོན༌མཆོག༌གི༌ ཐུག༌ཉིད༌ ཁོའེ༌ཀའང༌ བབས༌ ཡང༌ ཁོའེ༌ གྲུལ༌ཨིན༌ ནཱའེ༌འོད༌ལ༌ ལེབ༌ལེབ༌ ཚག༌པ༌ ལུང༌སྟན༌ ཤདས༌།
24 ཁོའེང༌ ཁོང༌རང༌ངི༌ ཀོས༌ལག༌གུན༌ པུད༌ཏེ༌ ཚན༌ཉིན༌ གང༌པོ༌ ལྗེར༌ཉལ༌ལ༌ སའེ༌ཀ༌ དུགས༌ཏེ༌ ས༌མུའེལ༌ལི༌ དུན༌ལ༌ ལུང༌སྟན༌ ཤདས༌།
ཏེ༌བོའེ༌ཕིའ༌ མི༌གུན༌ནི༌ འི༌བོ༌ ཟེར༌ར༌ནོག༌,
“ཅི༌ ས༌འུལ༌ལའང༌ ལུང༌སྟོན༌པ༌ ཨིན༌ནོག༌ག༌?”