ས༌འུལ༌ དཱ༌བིད༌དི༌ཀ༌ ཚིགས༌།
18:1 ནེ༌ 16
18
དཱ༌བིད༌ དང༌ ས༌འུལ༌ སྤེ༌ར༌ ཏང༌ ཚར༌ཏེ༌ སྟིང༌ནེ༌,
དཱ༌བིད༌ལ༌ ཡོ༌ན༌ཐན༌ ཐུག༌ ཡང༌ ཁོང༌ ཉིས༌ཀོ༌ སེམས༌སི༌ ཐོག༌ནེ༌ ཙོགས༌ ཡོད༌ཅེས༌པའེ༌ ཁོང༌གུན༌ ཛ༌འོ༌ གྱལ༌ལ༌ གྱུར༌ ཡང༌ ཡོ༌ན༌ཐན༌ནི༌ དཱ༌བིད༌ལ༌ སྙིང༌ནེ༌ ཅམས༌པ༌ ཅོའད༌པིན༌།
2 ཏེན༌ན༌ ཞག༌ནེ༌ ཕར༌ལ༌ ས༌འུལ༌ལི༌ དཱ༌བིད༌,
ཁོ༌རང༌ངི༌ ཨ༌བའེ༌ ཁང༌པ༌ ལོགས༌ཏེ༌ ཆ༌ མ༌ཅུག༌ག༌ ཁོ༌རང༌ ཉམ༌པོ༌ བོརས༌།
3 ཡོ༌ན༌ཐན༌ནི༌ དཱ༌བིད༌ ཉམ༌པོ༌ ཁ༌ཆད༌ ཤིག༌ ཅོས༌ ཅིའ༌ཟེར༌ན༌ ཁོའེ༌ དཱ༌བིད༌ལ༌ མ༌སྲན༌ཏྲེ༌ ཅམས༌པ༌ ཅོའད༌པིན༌།
4 ཡོ༌ན༌ཐན༌ནི༌ དཱ༌བིད༌ལ༌ ཁོ༌རང༌ གོན༌ཁན༌ནི༌ ཁེ༌ཐོག༌གི༌ ཀོས༌,
མག༌ཆ༌,
ར༌འི༌,
ཞུ༌,
དའ༌ དང༌ སྐྱེ༌རགས༌ གུན༌ ཏངས༌ཏེ༌ ཁོ༌རང༌ངི༌ ཁ༌ཆད༌པོ༌ སྟན༌པོ༌ ཅོས༌།
5 ས༌འུལ༌ལི༌ དཱ༌བིད༌ ཀ༌ཟུག༌ ལས༌ ཤིག༌ག༌ ལམ༌ཅུག༌ནའང༌ ཁོའེ༌ ཏེ༌བོ༌ ཁྲངས༌པོ༌ ཉམ༌པོ༌ ཅོའད༌པིན༌།
ཏེན༌ན༌བོའེ༌ ཞས༌ཏེ༌ ས༌འུལ༌ལི༌ ཁོའ༌ མག༌མི༌ ནང༌ང༌ ཀོ༌ས༌ ཐོན༌པོ༌ ཏངས༌།
ཏེ༌བོའ༌ ས༌འུལ༌ལི༌ སྤོན༌བོ༌གུན༌ ཐེས༌ཏེ༌ མི༌ཚང༌མ༌ ཐད༌།
6 དཱ༌བིད༌དི༌ ཕི༌ལིས༌ཏི༌པ༌ གོ༌ལི༌ཡཱཐ༌ སད༌ཏེ༌ མག༌མི༌གུན༌ ཁང༌པ༌ ལོགས༌ཏེ༌ ཡོང༌ ཟ༌ནེ༌ ཨིས༌ར༌ཨེལ༌ལི༌ གྲོང༌ཁྱེར༌ ཚང༌མ༌ནེ༌ བུ༌མོ༌གུན༌ བིངས༌ཏེ༌ ལུ༌ དང༌ རྩེས༌ ཏང༌ཨིན༌ གྱལ༌པོ༌ ས༌འུལ༌ལ༌ ཐུག༌ག༌ ཡོངས༌།
ཁོང༌གུན༌ནི༌ ཀྲམ༌བུ༌རིན༌ དང༌ ཀོ༌པོང༌ ཕུ༌ཨིན༌ སྟོད༌པའེ༌ ལུ༌གུན༌ ཏངས༌།
7 ཁོང༌གུན༌ནི༌ རྩེ༌ཨིན༌ འི༌ ལུ༌ ཏངས༌,
ས༌འུལ༌ལི༌ སྟོང༌ མང༌པོ༌ སདས༌,
ཨིན༌ནའང༌ དཱ༌བིད༌དི༌ ཏེ༌བོའེ༌ རྕུ༌ལྡབ༌པོ༌ སདས༌།”
8 ས༌འུལ༌ འི༌བོའ༌ མ༌ཐད༌ ཡང༌ ཁོའ༌ མ༌སྲན༌ཏྲེ༌ སྲོ༌ ཡོངས༌ཏེ༌ ཟེརས༌,
“ཁོང༌གུན༌ནི༌ ངའེ༌ སྟོང༌ མང༌པོ༌ སདས༌ ཨིན༌ནའང༌ དཱ༌བིད༌དི༌ ཏེ༌བོའེ༌ རྕུ༌ལྡབ༌ སདས༌ ཟེར༌དུག༌།
ངའེ༌ གྱལ༌སྲིད༌པོ༌ མ༌སྟོགས༌ ཁོའེ༌ ལག༌ག༌ ཅི༌ ཚང༌མ༌ དུག༌།”
9 ཏེན༌ན༌ ཏུས༌ནེ༌ ཕར༌ལ༌ ས༌འུལ༌ལི༌ དཱ༌བིད༌ལ༌ ཕྲག༌དོག༌ཅན༌ནི༌ མིག༌ནེ༌ ལྟས༌།
10 སྟིང༌མ༌ ཞག༌པོ༌ དཀོན༌མཆོག༌གི༌ སེམས༌ཉིད༌ ངན༌པ༌ ཤེད༌ཅན༌ ཞིག༌ ས༌འུལ༌ལི༌ཀ༌ བབས༌ཅུག༌ག༌ ཛདས༌པ༌ ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ ཉོན༌བ༌ ཙོགས༌ལ༌ ཁའ༌ལོབ༌ ཤད༌ཅེས༌ གོ༌ཟུག༌ ཡང༌ སྔུན༌ ཙོགས༌ལ༌ དཱ༌བིད༌དི༌ ཁོའེ༌ ཕིའ༌ ཧརྦ༌ རོལ༌མོ༌ ཕུད༌པིན༌།
ཏེ༌ཏུས༌ ས༌འུལ༌ལི༌ ལག༌པའེ༌ ནང༌ང༌ དུང༌ཞིག༌ ཡོད༌པིན༌།
11 ཁོའེ༌ སྙིང༌ངི༌ ནང༌ང༌ སམ༌,
“ངའེ༌ དཱ༌བིད༌ རྩིག༌པ༌ ཇར༌ ཅུག༌ཨིན༌།”
ཡང༌ དུང༌བོ༌ དཱ༌བིད༌ལ༌ གྱབས༌ ཨིན༌ནའང༌ དཱ༌བིད༌ གྱུར༌པ༌ མ༌ཕོག༌,
ལན༌ཉིས༌ ཏེན༌ན༌ ཙོགས༌ སོང༌།
12 ས༌འུལ༌ དཱ༌བིད༌ལ༌ ཇིགས༌ ཅིའ༌ཟེར༌ན༌ ཡ༌ཝ༌ དཱ༌བིད༌ ཉམ༌པོ༌ ཞུགས༌ས༌ ཛདས༌ ཨིན༌ནའང༌ ས༌འུལ༌ ཕངས༌ཏེ༌ སྐྱོདས༌།
13 ཏེ༌བོའེ༌ཕིའ༌ ཁོའེ༌ དཱ༌བིད༌ མག༌སྟོང༌ངི༌ སྤོན༌བོའ༌ སྐོས༌ཏེ༌ ཁོ༌རང༌ནེ༌ ཐག༌རིང༌ང༌ ལམ༌ ཅུགས༌ ཡང༌ དཱ༌བིད༌དི༌ ཁོ༌རང༌ངི༌ མག༌མི༌ མག༌གི༌ ནང༌ང༌ ཁྲིདས༌།
14 དཱ༌བིད༌དི༌ ཅོ༌ཁན༌ ཚང༌མའེ༌ ནང༌ང༌ ཁོའ༌ གྱལ༌ཁ༌ ཆེན༌མོ༌ ཐོབ༌ ཅིའ༌ཟེར༌ན༌ ཡ༌ཝ༌ ཁོ༌ ཉམ༌པོ༌ ཞུགས༌ཏེ༌ ཡོད༌པིན༌།
15 ས༌འུལ༌ལི༌ དཱ༌བིད༌ ཅི༌ཚང༌མའེ༌ ནང༌ང༌ ཁྲངས༌པོ༌ ལུས༌ཁན༌བོ༌ ཐོང༌ང༌ཅིག༌ ཁོ༌ མ༌སྲན༌ཏྲེ༌ ཇིགས༌།
16 ཨིན༌ནའང༌ ཨིས༌ར༌ཨེལ༌པ༌ དང༌ ཡ༌ཧུ༌ད༌པ༌ གང༌པོའེ༌ དཱ༌བིད༌ལ༌ ཅེས༌པ༌ ཅོའད༌པིན༌ ཅིའ༌ཟེར༌ན༌ ཁོ༌ མག༌སྤོན༌ ཁྲངས༌པོ༌ ཞིག༌ ཡོད༌པིན༌།
དཱ༌བིད༌དི༌ ས༌འུལ༌ལི༌ བུ༌མོའ༌ ན༌མ༌ ཅོས༌།
18:17 ནེ༌ 30
17 ས༌འུལ༌ལི༌ དཱ༌བིད༌ལ༌ ཟེརས༌ “འི༌ཀ༌ནེ༌ ངའེ༌ བུ༌མོ༌ ཆེན༌མོ༌ མེ༌རབ༌,
ཡ༌ཝའེ༌ མག༌གུན༌ ནོལ༌ཏེ༌ ངའ༌ ཞབས༌ཏོག༌ སྟོབས༌ཤུགས༌ ཉམ༌པོ༌ ཞུ༌ན༌ ངའེ༌ ཁོ༌ ཁྱོ༌རང༌ང༌ ན༌མ༌ ཏང༌ཨིན༌།”
ས༌འུལ༌ལི༌ སམ༌,
“ངའེ༌ ང༌རང༌ངི༌ ཁོ༌ མ༌སད༌ད༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ ནོལ༌ལ༌ ཀལ༌ཏེ༌ ཁོང༌གུན༌ལ༌ ཁོ༌ སད༌ཅུག༌ཨིན༌།”
18 ཨིན༌ནའང༌ དཱ༌བིད༌དི༌ ས༌འུལ༌ལ༌ ཟེརས༌,
“གྱལ༌པོའེ༌ བུ༌མོའ༌ ན༌མ༌ ཅོ༌ཉན༌ཅེས༌,
ང༌ སུ༌ ཨིན༌ནོག༌?
ཨིས༌ར༌ཨེལ༌ལི༌ ནང༌ང༌ ངའེ༌ ནང༌ཚངས༌ ཡ༌ ངའེ༌ ཨ༌བའེ༌ རིགས༌པོ༌ ཁག༌ཅན༌ ཡ༌ ཀྲག༌པོ༌ མན༌།”
19 མེ༌རབ༌,
ས༌འུལ༌ལི༌ བུ༌མོ༌ དཱ༌བིད༌ལ༌ ན༌མ༌ ཏང༌ཅེས༌སི༌ ཏུས༌པོ༌ ལེབ༌བ༌ཅིག༌,
ས༌འུལ༌ལི༌ ཁོའེ༌ ཚབས༌ལ༌ མེ༌ཧོ༌ལཧ༌པ༌ ཨད༌རིལ༌ལ༌ ཁོ༌རང༌ངི༌ བུ༌མོ༌ ན༌མ༌ ཏངས༌།
20 ཏ༌ ས༌འུལ༌ལི༌ བུ༌མོ༌ མི༌ཁལ༌,
དཱ༌བིད༌ལ༌ ཐད༌དད༌པིན༌ ཡང༌ ཏེ༌བོའེ༌ སྐོར༌ལ༌ ས༌འུལ༌ལ༌ ཚོར༌ར༌ཅིག༌ ཁོ༌ སྲན༌ཏྲེ༌ ཐད༌།
21 ཁོའེ༌ སམ༌,
“ངའེ༌ ང༌རང༌ངི༌ བུ༌མོ༌ མི༌ཁལ༌ ཁོའ༌ ན༌མ༌ ཏང༌ཨིན༌,
ཡང༌ ཁོ༌ གྱུད༌ཏེ༌ ངའ༌ ཡང༌སྐྱར༌ དཱ༌བིད༌ ཕི༌ལིས༌ཏི༌པ༌གུན༌ནི༌ ལག༌ནེ༌ སད༌ ཉན༌ཨིན༌།”
ཏེ༌བོའེ༌ཕིའ༌ ས༌འུལ༌ལི༌ དཱ༌བིད༌ལ༌ ཟེརས༌,
“ཏ༌ ཁྱོ༌རང༌ང༌ ངའེ༌ བུ༌མོའེ༌ མག༌པ༌ གྱུར༌ཅེས༌སི༌ སྐབས༌ ཉིས༌པ༌ ཐོབ༌ཏེ༌ ཨིན༌ནོག༌།”
22 ཏེ༌ནེ༌ ས༌འུལ༌ལི༌ ཁོ༌རང༌ངི༌ ཡ༌ཏོའ༌ བཀའ༌ ཏངས༌,
“དཱ༌བིད༌ལ༌ སུའང༌ མེད༌ས༌ སྤེ༌ར༌ ཏངས༌ཏེ༌ ཟེར༌ ‘གྱལ༌པོ༌ ཉེ༌རང༌ངི༌ཀ༌ ཐུགས༌ཐད༌ཏེ༌ དུག༌ ཡང༌ ཁོང༌ངི༌ ཡ༌ཏོ༌ ཚང༌མའེ༌ ཉེ༌རང༌ང༌ ཅམས༌པ༌ ཅོ༌དུག༌།
ཏ༌ ཁོང༌ངི༌ བུ༌མོ༌ ཉམ༌པོ༌ བག༌སྟོན༌ ཅོའ༌ ཛད༌།’”
23 ཁོང༌གུན༌ནི༌ ཏེན༌ན༌ སྤེ༌ར༌གུན༌ དཱ༌བིད༌ལ༌ ཟེརས༌ ཨིན༌ནའང༌ ཁོའེ༌ ལན༌ཏངས༌,
“ཅི༌ ཁྱོ༌རང༌གུན༌ནི༌ གྱལ༌པོའེ༌ བུ༌མོ༌ ཉམ༌པོ༌ བག༌སྟོན༌ ཅོ༌ཅེས༌པོ༌ ལ༌མོ༌ཞིག༌ ཨིན༌ནོག༌ སམ༌མ༌རག༌ག༌?
ང༌ ཉལ༌བ༌ཅན༌ ཡང༌ ང༌ ཁག༌ཅན༌ མི༌ཞིག༌ མན༌།”
24 ཡོག༌པོ༌གུན༌ནི༌ དཱ༌བིད༌དི༌ ཟེར༌ཁན༌གུན༌ ས༌འུལ༌ལ༌ ཤདས༌,
25 ས༌འུལ༌ལི༌ ཁོང༌གུན༌ལ༌ ཟེརས༌,
“དཱ༌བིད༌ལ༌ ཟེར༌,
‘ཁྱོ༌རང༌ངི༌ ཕི༌ལིས༌ཏི༌པ༌ 100 སད༌ཏེ༌ ཁོང༌གུན༌ནི༌ བུ༌ཚའེ༌ སྟགས༌པོ༌ ཅད༌ཏེ༌ ཁྱོང༌ཉན༌ན༌ གྱལ༌པོའེ༌ བུ༌མོའེ༌ མག༌པ༌ གྱུར༌ ཉན༌ན༌ནོག༌།
ཏེ༌ཟུག༌ ཅོས༌ཏེ༌ གྱལ༌པོའ༌ ཁོ༌རང༌ངི༌ གྲ༌འོ༌གུན༌ལ༌ ལན༌ཏང༌ཉན༌ཨིན༌།’”
ས༌འུལ༌ལི༌ དཱ༌བིད༌ ཕི༌ལིས༌ཏི༌པ༌གུན༌ གྱུད༌ཏེ༌ སད༌ ཅུག༌ཅེས༌སི༌ ཐབས༌ ཙལ༌ཏེ༌ ཨིན༌པིན༌།
26 ཡོག༌པོ༌གུན༌ནི༌ དཱ༌བིད༌ལ༌ ཏེ༌གུན༌ ཤད༌ད༌ཅིག༌ ཁོང༌ གྱལ༌པོའེ༌ བུ༌མོའེ༌ མག༌པ༌ གྱུར༌ཅེས༌ལ༌ ཐད༌།
ཏུས༌ ཏང༌ཁན༌བོ༌ བུད༌དི༌སའང༌ སྔུན༌ལ༌,
27 དཱ༌བིད༌ དང༌ ཁོའེ༌ མག༌མི༌གུན༌ སོང༌ཏེ༌ ཕི༌ལིས༌ཏི༌པ༌ མག༌མི༌ 200 སད༌།
ཁོང༌གུན༌ སད༌ཁན༌ སྟན༌པོ༌ ཅོ༌ཅེས༌ལ༌ ཁོའེ༌ ཁོང༌གུན༌ནི༌ བུ༌ཚའེ༌ སྟགས༌པོ༌ ཅད༌ཏེ༌ གྱལ༌པོའ༌ ཏང༌ང༌ལ༌ ཁྱོངས༌།
ཏེ༌ནེ༌ གྱལ༌པོའེ༌ ཁོ༌རང༌ངི༌ བུ༌མོ༌ མི༌ཁལ༌ ཁོའ༌ ན༌མའ༌ ཏངས༌།
28 ཡ༌ཝ༌ དཱ༌བིད༌ ཉམ༌པོ༌ ཞུགས༌ཏེ༌ ཡོད༌ཁན༌ ཡང༌ ཁོའེ༌ བུ༌མོ༌ མི༌ཁལ༌ལི༌ དཱ༌བིད༌ལ༌ ཅེས༌པ༌ ཅོ༌ཁན༌བོ༌ ས༌འུལ༌ལ༌ ཧ༌གོའ༌ཅིག༌,
29 ས༌འུལ༌ དཱ༌བིད༌ལ༌ མང༌ང༌ སྲན༌ཏྲེ༌ ཇིགས༌ ཡང༌ ཁོ༌ སོན༌ཏེའ༌ ལུས༌ལུས༌ ཚག༌པ༌ དཱ༌བིད༌དི༌ གྲ༌འོ༌ ལུས༌།
30 ཕི༌ལིས༌ཏི༌པ༌ མག༌མི༌གུན༌ ལན༌ མང༌པོ༌ ཨིས༌ར༌ཨེལ༌པ༌གུན༌ ཉམ༌པོ༌ ནོལ༌ལ༌ ཡོངས༌ ཡང༌ ས༌འུལ༌ལི༌ མག༌མི༌ སྤོན༌བོ༌ ཚང༌མའེ༌ སང༌ མང༌ང༌ དཱ༌བིད༌ལ༌ གྱལ༌ཁ༌ ཐོབ༌ ཡང༌ ཁོ༌ མིང༌ཅན༌ གྱུར༌།