དཱ༌བིད༌ དང༌ གོ༌ལི༌ཡཱཐ༌།
17:1 ནེ༌ 58
17
ཏ༌ ཕི༌ལིས༌ཏི༌པ༌གུན༌ནི༌ ཡ༌ཧུ༌དཱ༌ ཡུལ༌ཇོངས༌སི༌ སོ༌ཀོཧ༌ ནས༌སའེ༌ ནང༌ང༌ མག༌ ཏང༌ཅེས༌ལ༌ ཁོ༌རང༌གུན༌ནི༌ མག༌མི༌ ལྡུས༌།
ཁོང༌གུན༌ སོ༌ཀོཧ༌ དང༌ ཨ༌ཟི༌ཀའེ༌ པར༌ལ༌ ཡོད༌ཁན༌ ཨེ༌ཕེས༌ དམ༌མིམ༌མི༌ ནང༌ང༌ ཀུར༌ ཙུགས༌ཏེ༌ དུགས༌།
2 ས༌འུལ༌ དང༌ ཨིས༌ར༌ཨེལ༌པའེ༌ མག༌མི༌ ཨེ༌ལཧ༌ ལུང༌པའེ༌ ནང༌ང༌ ཛོམས༌ཏེ༌ མག༌ ཏང༌ཅེས༌ལ༌ གྲལ༌གྲིག༌ ཅོས༌།
3 ཕི༌ལིས༌ཏི༌པ༌གུན༌ འ༌ངོ༌ ཆོགས༌སི༌ རི༌ ཡང༌ ཨིས༌ར༌ཨེལ༌པ༌གུན༌ འི༌ངོ༌ ཆོགས༌སི༌ རི༌ཀ༌ དུགས༌,
ཁོང༌གུན༌ནི༌ སྐྱིལ༌ལ༌ ལུང༌པ༌ ཡོད༌པིན༌།
4 ཏེ༌ནེ༌ གཱད༌པ༌ གོ༌ལི༌ཡཱཐ༌ ཟེར༌ཁན༌བོ༌ ཕི༌ལིས༌ཏི༌པ༌གུན༌ དུག༌སའེ༌ ནས༌ས༌ནེ༌ བིངས༌ཏེ༌ ཡོངས༌།
ཁོ༌ མི༌ཀྲར༌ སུམ༌མི༌ སང༌ མང༌ང༌ རིང༌མོ༌ ཡོད༌པིན༌།
5 ཁོའེ༌ གོའེ༌ཀ༌ ར༌གན༌ནི༌ ཏི༌བི༌ ཡང༌ ཟུགས༌པོའ༌ ར༌གན༌ནི༌ མག༌ཆ༌ གོན༌ཏེ༌ ཡོད༌པིན༌ ཀ༌བོ༌ ཀི༌ལོ༌ 56 ལྕིན༌ཏྲེ༌ ཡོད༌པིན༌།
6 ཁོའེ༌ རྐང༌པ༌ སྐྱོབ༌ཅེས༌ལ༌ ར༌གན༌ནི༌ མག༌ཆ༌ གོན༌ཏེ༌ ཡང༌ སྤུང༌པའེ༌ཀ༌ ར༌གན༌ནི༌ དུང༌ ཁུར༌ཏེ༌ ཡོད༌པིན༌།
7 ཁོའེ༌ དུང༌,
ཐགས༌ ཐག༌ཁན༌ནི༌ ཁྲི༌ཤའེ༌ བེར༌ཀ༌ ཙོགས༌ རོམ༌པོ༌ ཡོད༌པིན༌ ཡང༌ ཏེ༌བོའེ༌ གོ༌ ཏུམས༌ཁན༌ནི༌ ལྕགས༌སི༌ ལྕིད༌པོ༌ ཀི༌ལོ༌ རྡུན༌ ཙམ༌ཤིག༌ ཡོད༌པིན༌།
མག༌མི༌ཞིག༌ ཁོའེ༌ ཕ༌ལི༌ ཁུར༌ཏེ༌ ཁོའེ༌ སང༌ སྔུན༌ལ༌ ཆའད༌པིན༌།
8 གོ༌ལི༌ཡཱཐ༌ མ༌གྲུལ༌ལ༌ ལངས༌ཏེ༌ ཨིས༌ར༌ཨེལ༌ལི༌ མག༌མི༌ ཆོགས༌ལ༌ ཀུ༌ཅོ༌ ཏངས༌ཏེ༌ ཟེརས༌,
“ཁྱོ༌ཞའ༌ ཚང༌མ༌ མག༌ཏང༌ང༌ ཅིའ༌ བིངས༌ཏེ༌ ཨིན༌?
ང༌ ཕི༌ལིས༌ཏི༌པ༌ མ༌ནོག༌ག༌ ཡང༌ ཁྱོ༌ཞའ༌ ས༌འུལ༌ལི༌ ཡོག༌པོ༌གུན༌ མན༌ན༌?
ཁྱོ༌ཞའེ༌ ཕྲོ༌ནེ༌ ང༌ ཉམ༌པོ༌ ནོལ༌ལ༌ མི༌ཞིག༌ ལྡོམ༌།
9 ཀལ༌ཏེས༌ ནོལ༌ཏེ༌ ཁོའ༌ ང༌ སད༌ཉན༌ན༌,
ང༌ཞ༌གུན༌ ཁྱོ༌ཞའེ༌ ཡོག༌པོ༌ གྱུར༌ཨིན༌,
ཨིན༌ནའང༌ ཀལ༌ཏེས༌ ངའེ༌ ཁོའ༌ ཕམ༌ཀལ༌ཏེ༌ སད༌ན༌ ཁྱོ༌ཞའ༌ ང༌ཞ༌གུན༌ནི༌ ཡོག༌པོ༌ གྱུར༌ཏེ༌ ང༌ཞའེ༌ ཞབས༌ཏོག༌ ཞུ༌གོས༌།”
10 ཁོའེ༌ ཟེརས༌,
“དི༌རིང༌ ངའེ༌ ཨིས༌ར༌ཨེལ༌པའེ༌ མག༌མིའ༌ གྲན༌ཏེ༌ ནོལ༌ཅེས༌ལ༌ ཟེར༌རད༌,
ང༌ ཉམ༌པོ༌ ནོལ༌ལ༌ མི༌ཞིག༌ ལྡོམ༌།”
11 ཕི༌ལིས༌ཏི༌པའེ༌ ཟེར༌ཁན༌བོ༌ ཚོར༌ར༌ཅིག༌,
ས༌འུལ༌ དང༌ ཨིས༌ར༌ཨེལ༌པ༌ ཚང༌མ༌ མ༌སྲན༌ཏྲེ༌ ཇིགས༌ཏེ༌ ཐེ༌ཚོམས༌ སོང༌།
12 ཏ༌ དཱ༌བིད༌ ཨེ༌ཕེ༌རེད༌པ༌ ཡེ༌ཤེའེ༌ བུ༌ཚ༌ ཨིན༌པིན༌,
ཁོ༌ ཡ༌ཧུ༌དཱའེ༌ ནས༌ས༌ བེད༌ལེ༌ཧེམ༌ནེ༌ ཨིན༌པིན༌།
ཡེ༌ཤེའ༌ བུ༌ཚ༌ རྒྱད༌ ཡོད༌པིན༌ ཡང༌ ས༌འུལ༌ གྱལ༌པོ༌ ཨིན༌ནི༌ ཏུས༌ལ༌ ཁོ༌ རྒད༌པོ༌ ཡོད༌པིན༌།
13 ཡེ༌ཤེའེ༌ བུ༌ཚ༌ ཆེ༌ཤོག༌ ཨེ༌ལི༌འབ༌,
ཉིས༌པ༌ ཨ༌བི༌ན༌དབ༌ དང༌ སུམ༌པ༌ ཤམ༌མཧ༌ གུན༌ ས༌འུལ༌ལི༌ མག༌མི༌ ཉམ༌པོ༌ མག༌ཏང༌ང༌ སོང༌།
14 དཱ༌བིད༌ ཚང༌མའེ༌སང༌ ཆུ༌ངུན༌ ཡང༌ ཆེའ༌ སུམ༌ཀོ༌ ས༌འུལ༌ ཉམ༌པོ༌ སོང༌།
15 ཨིན༌ནའང༌ དཱ༌བིད༌ ས༌འུལ༌ དུག༌སའེ༌ ནས༌ས༌ དང༌ བེད༌ལེ༌ཧེམ༌མི༌ ནང༌ང༌ ཁོ༌རང༌ངི༌ ཨ༌བའེ༌ ལུག༌གུན༌ནི༌ སྟ༌སྟོག༌ ཅོའ༌ལ༌ ཡོང༌ཨིན༌ ཆེན༌ དུག༌གད༌པིན༌།
16 གོ༌ལི༌ཡཱཐ༌ ཞག༌པོ༌ 40,
ཞག༌ཏང༌ ང༌མོ༌ དང༌ ཕི༌ཏོག༌ བིང༌ཏེ༌ ཨིས༌ར༌ཨེལ༌པ༌ ཚང༌མ༌ལ༌ ནོལ༌ཅེས༌ལ༌ གྲན༌ཅེས༌ལ༌ ཟེར༌རད༌པིན༌།
17 ཞག༌ཤིག༌ ཡེ༌ཤེའེ༌ དཱ༌བིད༌ལ༌ ཟེརས༌,
“ངོ༌ཁན༌ གྲུའི༌ སྐང༌ཁན༌ནི༌ གི༌གུ༌ དང༌ ཏ༌གི༌ རྕུ༌,
མག༌ཏང༌སའེ༌ ནས༌ས༌ ཁྱོ༌རང༌ངི༌ ཨ༌ཅོ༌གུན༌ལ༌ གྱོགས༌པ༌ ཁྱེར༌།
18 ཡང༌ འི༌ ཆུར༌པེ༌ གྲོག༌གྲོག༌ རྕུ༌ ཁོང༌གུན༌ནི༌ མག༌སྤོན༌ལ༌ ཁྱེར༌།
ཁྱོ༌རང༌ངི༌ ཨ༌ཅོ༌གུན༌ ཁམ༌ཟང༌ དུག༌ག༌ ལྟས༌ཏེ༌ ངའ༌ ཁོང༌གུན༌ནི༌ སྐོར༌ལ༌ ནས༌ཚུལ༌ ཁྱོང༌།”
19 དཱ༌བིད༌དི༌ ཨ༌ཅོ༌གུན༌ ས༌འུལ༌ ཉམ༌པོ༌ ཡོད༌པིན༌ ཡང༌ ཨིས༌ར༌ཨེལ༌པ༌ མག༌མི༌ ཚང༌མ༌ ཨེ༌ལཧ༌ ལུང༌པའེ༌ ནང༌ང༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ ནོལ༌ལད༌པིན༌།
20 ཏེ༌ནེ༌ ཐོ༌རེ༌ ཟུག༌པོ༌ ང༌མོ༌ནེ༌ དཱ༌བིད༌དི༌ ལུག༌གུན༌,
ཞན༌ ལུག༌སྲུང༌ཁན༌ ཞིག༌ ཉམ༌པོ༌ བོར༌ཏེ༌ ཨ༌བ༌ ཡེ༌ཤེའེ༌ ལབ༌ཞའ༌ ནང༌ཞིན༌ སྐྱེས༌གུན༌ ཁུར༌ཏེ༌ ཁོ༌ སོང༌།
ཨིས༌ར༌ཨེལ༌ལི༌ མག༌མི༌ ཀུ༌ཅོ༌ ཏང༌ཨིན༌ ནོལ༌ལ༌ བིང༌ཨིན༌ ཡོད༌ཏུས༌ ཁོ༌ མག༌མི༌ དུག༌ས༌ ལེབ༌།
21 ཨིས༌ར༌ཨེལ༌པ༌ དང༌ ཕི༌ལིས༌ཏི༌པ༌ མག༌མི༌ མག༌ཐང༌ངི༌ཀ༌ ཅིག༌ དང༌ ཅིག༌ག༌ དུན༌ལ༌ ནོལ༌ཅེས༌ལ༌ བིང༌།
22 དཱ༌བིད༌དི༌ ཁར༌ཇི༌ སྟ༌སྟོག༌ ཅོ༌ཁན༌གུན༌ནི༌ ལག༌ག༌ ཁར༌ཇི༌གུན༌ བོར༌ཏེ༌ གྱོགས༌པ༌ ཁོ༌རང༌ངི༌ ཨ༌ཅོ༌གུན༌ལ༌ ཐུག༌ག༌ སོང༌།
23 ཁོའེ༌ ཁོང༌གུན༌ ཉམ༌པོ༌ སྤེ༌ར༌ ཏང༌ཨིན༌ ཡོད༌ཏུས༌ གད༌ནེ༌ ཨིན༌ཁན༌ གོ༌ལི༌ཡཱཐ༌,
ཕི༌ལིས༌ཏི༌པ༌ སྤའ༌འོ༌ ཁོང༌གུན༌ནི༌ ཕྲོ༌ནེ༌ བིངས༌ཏེ༌ ཏུས༌གྱུན༌ ཙོགས༌ལ༌ ཨིས༌ར༌ཨེལ༌ལི༌ མག༌མིའ༌ ཀུ༌ཅོ༌ ཏངས༌པ༌ དཱ༌བིད༌དི༌ ཏེ༌བོ༌ ཚོར༌།
24 ཏེ༌ མི༌བོ༌ ཐོང༌ང༌ཅིག༌ ཨིས༌ར༌ཨེལ༌པ༌ ཚང༌མ༌ མ༌སྲན༌ཏྲེ༌ ཇིགས༌ཏེ༌ ཤོར༌།
25 ཏ༌ ཨིས༌ར༌ཨེལ༌པ༌གུན༌ནི༌ ཟེརས༌,
“ང༌དང༌ང༌ ཐོང༌ང༌!
འི༌ མི༌བོ༌ ཞག༌ཏང༌ ཡོངས༌ཏེ༌ ཨིས༌ར༌ཨེལ༌པ༌གུན༌ལ༌ ཚིག༌པ༌ སྲག༌ དུག༌།
གྱལ༌པོའེ༌ ཁོ༌ སད༌ཁན༌ནི༌ མི༌བོའ༌ ནོར༌ མང༌པོ༌ ཏང༌ཨིན༌ ཟེར༌ར༌རག༌།
ཏེ༌ མི༌བོའ༌ ཁོང༌རང༌ངི༌ བུ༌མོ༌ ན༌མའ༌ ཏང༌ཅེས༌ མ༌ཚད༌ ཁོའེ༌ ཨ༌བའེ༌ ནང༌ཚངས༌ལ༌ ཨིས༌ར༌ཨེལ༌ལི༌ ནང༌ང༌ ཁྲལ༌ཤལ༌ མི༌གོ༌ཤེས༌སི༌ ཁ༌ཆད༌ ཛདས༌།
26 དུན༌ལ༌ ཡོད༌ཁན༌ མག༌མི༌གུན༌ལ༌ དཱ༌བིད༌དི༌ ཏྲིས༌,
“འི༌ ཕི༌ལིས༌ཏི༌པ༌ སད༌ཏེ༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ ཁྲེལ༌བ༌བོ༌ མེད༌ཁན༌ ཅོ༌ཁན༌ནི༌ མི༌བོའ༌ ཅི༌ ཐོབ༌ཨིན༌?
སོན༌པོ༌ དཀོན༌མཆོག༌གི༌ མག༌མི༌གུན༌ལ༌ སྨད༌གྲ༌ ཏང༌ཁན༌,
སུན༌ནད༌ མ༌ཅོ༌ཁན༌ འི༌ ཕི༌ལིས༌ཏི༌པ༌ སུ༌ ཨིན༌ནོག༌?”
27 ཏེ༌ མག༌མི༌གུན༌ནི༌ ཟེར༌ཨིན༌ ཡོད༌ཁན༌བོ༌ ལྡབས༌ཏེ༌ ཁོའ༌ ཤདས༌ ཡང༌ ཟེརས༌,
“ཁོ༌ སད༌ཁན༌བོའ༌ ཏེན༌ན༌ སོལ༌རས༌གུན༌ ཐོབ༌ཨིན༌།”
28 ཨིན༌ནའང༌ དཱ༌བིད༌དི༌ ཏེ༌ མག༌མི༌གུན༌ལ༌ སྤེ༌ར༌ ཏང༌ཨིན༌ ཡོད༌ཁན༌བོ༌ ཁོའེ༌ ཨ༌ཅོ༌ ཨེ༌ལི༌འབ༌བི༌ ཚོར༌ར༌ཅིག༌ སྲན༌ཏྲེ༌ སྲོ༌ ཡོངས༌ཏེ༌ ཟེརས༌,
“ཁྱོ༌རང༌ འི༌ཀ༌ ཅི༌ ཅོའད༌?
བྲོག༌སྟོང༌ངི༌ ནང༌ང༌ ཡོད༌ཁན༌ ཁྱོ༌རང༌ངི༌ ལུག༌ ཁ༌ཅིག༌པོའེ༌ སྟ༌སྟོག༌ སུའི༌ ཅོའད༌།
ཁྱོ༌རང༌ མ༌ ཕོ༌སོ༌ཅན༌ ཡང༌ ཁྱོ༌རང༌ངི༌ སྙིང༌ ངན༌པ༌ ཡོད༌ཁན༌བོ༌ ངའ༌ གྱུས༌ཡོད༌,
ཁྱོ༌རང༌ མག༌ཏང༌ས༌ ལྟའ༌ལ༌ ཡོངས༌ཏེ༌ ཨིན༌ནོག༌།”
29 དཱ༌བིད༌དི༌ ལན༌ཏངས༌,
“ཏ༌ ངའེ༌ ཅི༌ ཅོས༌ཏོག༌,
ངའེ༌ ཏྲི༌ཝ༌ཞིག༌ ཏྲིས༌པིན༌།”
30 ཁོ༌ ཞན༌ མག༌མི༌ཞིག༌ ཡོད༌ས༌ སོང༌ཏེ༌ ཏེན༌ན༌ ཏྲི༌ཝ༌བོ༌ ཏྲིས༌ ཡང༌ ཁོང༌གུན༌ནི༌ སྔོན༌ ཙོགས༌ ལན༌ཏངས༌།
31 ཏེ༌ནེ༌ མག༌མི༌ཞིག༌གི༌ དཱ༌བིད༌དི༌ ཟེར༌ཁན༌བོ༌ གྱལ༌པོ༌ ས༌འུལ༌ལ༌ ཤདས༌ ཡང༌ ཁོའེ༌ དཱ༌བིད༌ ཁྱོང༌ང༌ལ༌ མི༌ཞིག༌ ལམ༌ཅུགས༌།
32 དཱ༌བིད༌དི༌ ས༌འུལ༌ལ༌ ཟེརས༌,
“འི༌ ཕི༌ལིས༌ཏི༌པའེ༌ ཞས༌ཏེ༌ ཨིས༌ར༌ཨེལ༌པ༌ སུ༌ཞིག༌གའང༌ སེམ༌སྟོབས༌ མ༌ ཆག༌ཤིག༌,
ང༌ ཉེ༌རང༌ངི༌ ཡོག༌པོ༌ ཁོའ༌ ནོལ༌ལ༌ ཆེན༌།”
33 ས༌འུལ༌ལི༌ ཟེརས༌,
“ཉོས༌ཏེ༌ རག༌ག༌,
ཁྱོ༌རང༌ འི༌ ཕི༌ལིས༌ཏི༌པའེ༌ གྱབ༌གལ༌ལ༌ ཀ༌ཟུག༌གི༌ ནོལ༌ ཐུབ༌ཨིན༌,
ཁྱོ༌རང༌ ཕྲུ༌གུ༌ ཞིག༌ ཨིན༌ནོག༌ ཡང༌ ཁོ༌ ཞུ༌ནུ༌ནེ༌ ཕར༌ལ༌ ནོལ༌ཁན༌ མག༌མི༌ མ༌ ཀྲག༌པོ༌ ཨིན༌ནོག༌།”
34 ཨིན༌ནའང༌ དཱ༌བིད༌དི༌ ས༌འུལ༌ལ༌ ཟེརས༌ “ཉེ༌རང༌ངི༌ ཡོག༌པོ༌ ངའེ༌ ལོ༌ མང༌པོ༌ ང༌རང༌ངི༌ ཨ༌བའེ༌ ལུག༌ཁྱུའི༌ སྟ༌སྟོག༌ ཅོས༌པིན༌ ཡང༌ ཁྱུའི༌ ཕྲོ༌ནེ༌ སིང༌གེ༌ ཡ༌ དྲེན༌མོ༌ ལུག༌ སྐུས༌ཏེ༌ ཁྱེར༌ ཟ༌ནེ༌,
35 ང༌ གྱབ༌ནེ༌ སོང༌ཏེ༌ ཏེ༌གུན༌ལ༌ ནོལ༌ཏེ༌ སད༌ཏེ༌ ལུག༌གུན༌ སྐྱོབས༌ཏེ༌ ཁྱོངས༌པིན༌།
ཀལ༌ཏེས༌ ཏེ༌གུན༌ནི༌ ང༌ སྤུང༌གོལ༌ ཅོ༌ན༌ ངའེ༌ ཏེ༌གུན༌ ཁལ༌པག༌ནེ༌ ཟུམས༌ཏེ༌ སའ༌ གྱབས༌ཏེ༌ སད༌དད༌པིན༌།
36 ཉེ༌རང༌ངི༌ ཡོག༌པོའེ༌ སིང༌གེ༌ དང༌ དྲེན༌མོ༌ གུན༌ སད༌པིན༌,
འི༌ སུན༌ནད༌ མ༌ཅོ༌ཁན༌ནི༌ མི༌བོའང༌ ཏེ༌གུན༌ ཙོགས༌ ཨིན༌ནོག༌ ཅིའ༌ཟེར༌ན༌ ཁོའེ༌ སོན༌པོ༌ དཀོན༌མཆོག༌གི༌ མག༌མི༌གུན༌ལ༌ མ༌བེབས༌ ཅོས༌ཏེ༌ ཨིན༌ནོག༌།
37 ང༌ སིང༌གེ༌ དང༌ དྲེན༌མོ༌ གུན༌ནི༌ ཀ༌ནེ༌ སྐྱོབ༌བ༌ ཛད༌ཁན༌ནི༌ ཡ༌ཝའེ༌ ང༌ འི༌ ཕི༌ལིས༌ཏི༌པའེ༌ ཀ༌ནེའང༌ སྐྱོབ༌བ༌ ཛད༌ཨིན༌།”
ས༌འུལ༌ལི༌ ལན༌ཏངས༌,
“ཁྲིག༌རག༌ སོང༌ ཡ༌ཝ༌ ཁྱོ༌རང༌ ཉམ༌པོ༌ ཞུགས༌ཤིག༌།”
38 ས༌འུལ༌ལི༌ ཁོ༌རང༌ངི༌ མག༌ཆ༌ དཱ༌བིད༌ལ༌ གོན༌ཅུགས༌,
གོའེ༌ཀ༌ ར༌གན༌ནི༌ ཏི༌བི༌ དང༌ ཟུགས༌པོའ༌ ར༌གན༌ནི༌ ཀོས༌ སྐོནས༌།
39 དཱ༌བིད༌དི༌ ས༌འུལ༌ལི༌ ར༌འི༌ སྐྱེད༌པའེ༌ཀ༌ ཏགས༌ཏེ༌ གྲུལ༌ཅེས༌ ཅོས༌ ཨིན༌ནའང༌ མ༌ཉན༌ ཅིའ༌ཟེར༌ན ཁོའ༌ ཏེ༌གུན༌ གོན༌ ལོབས༌ མེད༌པིན༌།
ཁོའེ༌ ས༌འུལ༌ལ༌ ཟེརས༌,
“འི༌གུན༌ གོན༌ཏེ༌ ང༌ ནོལ༌ ཉན༌ཅེས༌ མེ༌རག༌,
ངའ༌ འི༌གུན༌ གོན༌ ཉོགས༌མེད༌།”
ཏེ༌བོའེ༌ཕིའ༌ ཁོའེ༌ ཏེ༌གུན༌ ཕུདས༌།
40 ཏེ༌ནེ༌ ཁོའེ༌ ལུག༌རྫི༌ བེར༌ཀ༌ ལག༌པའེ༌ ནང༌ང༌ ཁུརས༌ ཡང༌ ཀྲོག༌པོའེ༌ ནང༌ནེ༌ རྡོའ༌ ཇམ༌པོ༌ ལྔ༌ ལྡམས༌ཏེ༌ ཁོ༌རང༌ངི༌ ལུག༌རྫིའི༌ ཇོ༌ལའེ༌ ནང༌ང༌ གྱངས༌ ཡང༌ ཁོ༌རང༌ངི༌ ཞན༌ ལག༌པའེ༌ ནང༌ང༌ ཡུག༌དོ༌ ཁུར༌ཏེ༌ ཕི༌ལིས༌ཏི༌པའེ༌ ཉེ༌མོའ༌ སོང༌།
41 ཏེན༌ན༌ ཟ༌ནེ༌ ཕི༌ལིས༌ཏི༌པའེ༌ ཁོ༌རང༌ངི༌ ཟུགས༌པོ༌ ཀབ༌ཅེས༌སི༌ མག༌ཆ༌ ཁུར༌ཁན༌ནི༌ མི༌བོ༌ དུན༌ལ༌ ཏངས༌ཏེ༌ དཱ༌བིད༌དི༌ ཉེ༌མོའ༌ ཡོངས༌།
42 ཁོའེ༌ དཱ༌བིད༌ལ༌ གྱལ༌ལ༌ ཅོས༌ཏེ༌ ལྟས༌,
ཁོ༌ ངམས༌ཅན༌ དང༌ ཤེད༌ཅན༌ ཨིན༌ནའང༌ ཕྲུ༌གུ༌ ཞིག༌ ཨིན༌ཅེས༌པའེ༌ ཁོའ༌ ཁོའེ༌ཀ༌ གོད༌ཅེས༌ ཡོངས༌།
43 ཁོའེ༌ དཱ༌བིད༌ལ༌ ཟེརས༌,
“ཁྱོ༌རང༌ བེར༌ཀ༌ ཁུར༌ཏེ༌ ཡོངས༌ཏེ༌ ཅི༌ ང༌ ཁྱི༌ཞིག༌ ཨིན༌ནོག༌ག༌?”
ཡང༌ ཕི༌ལིས༌ཏི༌པའེ༌ ཁོ༌རང༌ངི༌ ལྷ༌གུན༌ནི༌ མིང༌ ཁུར༌ཏེ༌ དཱ༌བིད༌ལ༌ ངན༌ ཏབས༌།
44 ཁོའེ༌ ཟེརས༌,
“འི༌རུ༌ ཡོང༌,
ངའེ༌ ཁྱོ༌རང༌ངི༌ ཤ༌ ནམ༌ཁའེ༌ ཅི༌པ༌ དང༌ ནག༌ཚོགས༌སི༌ སེམས༌ཅན༌ གུན༌ལ༌ ཏང༌ཨིན༌།”
45 དཱ༌བིད༌དི༌ ཕི༌ལིས༌ཏི༌པ༌ ཟེརས༌,
“ཁྱོ༌རང༌ ངའེ༌ གྱབ༌གལ༌ལ༌ ར༌འི༌ དང༌ དུང༌ ཁུར༌ཏེ༌ ཡོང༌ང༌ནོག༌ ཨིན༌ནའང༌ ང༌ ཁྱོ༌རང༌ངི༌ གྱབ༌གལ༌ལ༌ ཨིས༌ར༌ཨེལ༌པའེ༌ མག༌མི༌ ཀུན༌ཝང༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ཡོང༌ངད༌།
ཁྱོ༌རང༌ངི༌ ཁོང༌ང༌ མ༌བེབས༌ ཅོས༌ཏེ༌ ཨིན༌ནོག༌།
46 འིན༌ན༌ ཞག༌ག༌ ཡ༌ཝའེ༌ ཁྱོ༌རང༌ ངའེ༌ ཝང༌ངི༌ ཡོག༌ག༌ བོར༌ར༌ ཛད༌ཨིན༌།
ངའེ༌ ཁྱོ༌རང༌ང༌ ཕམ༌ཀལ༌ཏེ༌ ཁྱོ༌རང༌ངི༌ གོ༌ ཅད༌ཨིན༌།
ངའེ༌ ཁྱོ༌རང༌ངི༌ མག༌མིའི༌ རོ༌གུན༌ ཅི༌པ༌གུན༌ དང༌ ནག༌ཚོགས༌སི༌ སེམས༌ཅན༌གུན༌ལ༌ ཟའ༌ ཏང༌ཨིན༌།
ཏེ༌ནེ༌ ཨིས༌ར༌ཨེལ༌པ༌གུན༌ ཉམ༌པོ༌ དཀོན༌མཆོག༌ ཞུགས༌ཁན༌བོ༌ ཇིག༌རྟེན༌ གང༌པོའེ༌ ཧ༌གོ༌ཨིན༌།
47 འི༌རུ༌ ཛོམས༌ཁན༌ ཚང༌མའེ༌ ཧ༌གོ༌གོས༌ ཡ༌ཝའེ༌ ར༌འི༌ ཡ༌ དུང༌ ཉམ༌པོ༌ སྐྱོབ༌བ༌ ཛད༌ད༌ མ༌ནོག༌,
འི༌ མག༌པོ༌ ཡ༌ཝའེ༌ ཨིན༌ ཡང༌ ཁོང༌ངི༌ ཁྱོ༌ཞའ༌ ཚང༌མ༌ ང༌ཞའེ༌ ལག༌ག༌ སལ༌ལ༌ ཛད༌ཨིན༌།”
48 ཕི༌ལིས༌ཏི༌པ༌ ནོལ༌ལ༌ལ༌ དཱ༌བིད༌ ཆོགས༌ལ༌ ཆའ༌ཅིག༌ དཱ༌བིད༌ ནོལ༌ལ༌ལ༌ གྱོགས༌པ༌ བང༌ཏངས༌ཏེ༌ ཁོ༌ ཆོགས༌ལ༌ ཡོངས༌།
49 ཁོ༌རང༌ངི༌ ཇོ༌ལའེ༌ ནང༌ནེ༌ རྡོའ༌ ཕིངས༌ཏེ༌ ཡུག༌དོའེ༌ ནང༌ང༌ ཅུགས༌ ཡང༌ སྐོར༌ཏེ༌ ཡུག༌དོ༌ ཏངས༌པ༌ ཕི༌ལིས༌ཏི༌པའེ༌ ཐོད༌པའེ༌ སྐྱིལ༌ལ༌ ཕོག༌།
ཐོད༌པ༌ ཆག༌ཏེ༌ རྡོའ༌ ཤའེ༌ ནང༌ང༌ ཞུགས༌ ཡང༌ ཁོ༌ ཁལ༌བུག༌ག༌ སའེ༌ཀ༌ གྱེལ༌།
50 དཱ༌བིད༌དི༌ ཡུག༌དོ༌ དང༌ རྡོའ༌ ཉམ༌པོ༌ ཕི༌ལིས༌ཏི༌པ༌བོའ༌ ཕམ༌ཀལས༌,
ཁོའེ༌ ལག༌ག༌ ར༌འི༌ མེད༌ནའང༌ ཁོའེ༌ ཕི༌ལིས༌ཏི༌པ༌བོ༌ སདས༌།
51 དཱ༌བིད༌ བང༌ཏངས༌ཏེ༌ སོང༌ ཡང༌ ཁོའེ༌ དུན༌ལ༌ ལངས༌།
ཁོའེ༌ ཕི༌ལིས༌ཏི༌པའེ༌ ར༌འི༌ ཤུབས༌སི༌ ནང༌ནེ༌ ཕིངས༌ ཡང༌ ཁོ༌ སད༌ཏེ༌ ར༌འི༌ ཉམ༌པོ༌ ཁོའེ༌ གོ༌ ཅདས༌།
ཕི༌ལིས༌ཏི༌པ༌གུན༌ནི༌ ཁོང༌གུན༌ནི༌ སྤའ༌འོ༌ ཤི༌ཏེ༌ ཐོང༌ང༌ཅིག༌ ཁོང༌གུན༌ ཤོར༌།
52 ཏེ༌ནེ༌ ཨིས༌ར༌ཨེལ༌པ༌ དང༌ ཡ༌ཧུ༌དཱ༌པ༌ གུན༌ནི༌ ཀུ༌ཅོ༌ ཏང༌ཨིན༌ ཕི༌ལིས༌ཏི༌པ༌གུན༌ལ༌ གཱད༌ དང༌ ཨེཀ༌རོན༌ནི༌ གྱས༌སྒོ༌ ཚག༌པ༌ ཏེད༌ཏེ༌ ཁྱེརས༌,
ཤའ༌ར༌འིམ༌ནེ༌ ཏངས༌ཏེ༌ གཱད༌ དང༌ ཨེཀ༌རོན༌ནི༌ གྱས༌སྒོ༌ ཚག༌པའེ༌ ལམ༌མི༌ཀ༌ ཕི༌ལིས༌ཏི༌པའེ༌ མག༌མི༌གུན༌ ཤི༌ཏེ༌ ཡོད༌པིན༌།
53 ཨིས༌ར༌ཨེལ༌པ༌གུན༌ ལོགས༌ཏེ༌ ཡོངས༌ཏེ༌ ཕི༌ལིས༌ཏི༌པ༌གུན༌ དུག༌སའེ༌ ནས༌ས༌ ཅོམས༌ཏེ༌ ཁྱེརས༌།
54 དཱ༌བིད༌དི༌ ཕི༌ལིས༌ཏི༌པ༌ གོ༌ལི༌ཡཱཐ༌ཐི༌ གོ༌ ཁུར༌ཏེ༌ ཡེ༌རུ༌ཤ༌ལེམ༌མ༌ ཁྱོངས༌ ཡང༌ ཁོའེ༌ མག༌ཆ༌གུན༌ ཁོ༌རང༌ངི༌ ཀུར༌རི༌ ནང༌ང༌ བོརས༌།
55 ས༌འུལ༌ལ༌ དཱ༌བིད༌ ཕི༌ལིས༌ཏི༌པ༌ ནོལ༌ལ༌ ཆ༌ ཐོང༌ང༌ཅིག༌ ཁོའེ༌ མག༌མི༌གུན༌ནི༌ སྤོན༌བོ༌ ཨབ༌ནེར༌ལ༌ ཟེརས༌,
“ཨབ༌ནེར༌,
འ༌ ཞུ༌ནུ༌,
སུའི༌ བུ༌ཚ༌ ཨིན༌ནོག༌?”
ཨབ༌ནེར༌རི༌ ལན༌ཏངས༌ “ཉེ༌རང༌ངི༌ ཚན༌ནི༌ ནང༌ང༌ ངའེ༌ ནའ༌ ཁུར༌རད༌,
དེན༌བ༌ ང༌ གྱུས༌མེད༌ ལེ༌།”
56 གྱལ༌པོའེ༌ ཟེརས༌,
“འི༌ ཞུ༌ནུ༌ སུའི༌ བུ༌ཚ༌ ཨིན༌ནོག༌ སར༌ཅོད༌ ཏངས༌ཏེ༌ གྱུས༌ཅོས༌།”
57 དཱ༌བིད༌ ཕི༌ལིས༌ཏི༌པ༌ སད༌ཏེ༌ ལོགས༌ཏེ༌ ཡོང༌ང༌ཅིག༌ ཨབ༌ནེར༌རི༌ ཁོ༌ ས༌འུལ༌ལི༌ ཡོད༌ས༌ ཁྱེརས༌,
ཏེ༌ཏུས༌ ཕི༌ལིས༌ཏི༌པའེ༌ གོ༌བོ༌ དཱ༌བིད༌དི༌ ལག༌པའེ༌ ནང༌ང༌ ཁུར༌ཏེ༌ ཡོད༌པིན༌།
58 ས༌འུལ༌ལི༌ ཏྲིས༌,
“ཞུ༌ནུ༌ ཁྱོ༌རང༌ སུའི༌ བུ༌ཚ༌ ཨིན༌?”
དཱ༌བིད༌དི༌ ཟེརས༌,
“ང༌ ཉེ༌རང༌ངི༌ ཡོག༌པོ༌ བེད༌ལེ༌ཧེམ༌པ༌ ཡེ༌ཤེ༌ བུ༌ཚ༌ ཨིན༌།”