14
ཞག༌ཅིག༌ ཡོ༌ན༌ཐན༌ནི༌ ཁོའེ༌ མག༌ཆ༌ ཁུར༌ཁན༌ ཞུ༌ནུ༌བོའ༌ ཟེརས༌,
“ཡོང༌ ང༌དང༌ འ༌ངོ༌ ཆོགས༌ལ༌ ཕི༌ལིས༌ཏི༌པ༌ མག༌མི༌ དུག༌སའེ༌ ནས༌ས༌ ཆེན༌།”
ཨིན༌ནའང༌ ཡོ༌ན༌ཐན༌ནི༌ ཁོང༌རང༌ངི༌ ཨ༌བ༌ ཏེ༌བོའེ༌ སྐོར༌ལ༌ མ༌ཤདས༌།
2 ཏེ༌ཏུས༌ ས༌འུལ༌ གི༌བེའཧའེ༌ གྲོང༌ཁྱེར༌རི༌ ཕི༌ལོག༌ག༌ ཡོད༌ཁན༌ ནས༌ས༌ མིག༌རོན༌ནི༌ ནང༌ང༌ ཨ༌ནར༌རི༌ ལྕང༌མའེ༌ ཡོག༌ག༌ དུགས༌ཏེ༌ ཡོད༌པིན༌ ཡང༌ ཁོ༌ ཉམ༌པོ༌ ཁོའེ༌ མག༌མི༌ 600 ཡོད༌པིན༌།
3 ཁོང༌གུན༌ནི༌ ཕྲོའ༌ བླ༌མ༌ ཨ༌ཧི༌ཡཱ༌,
ཨེ༌ཕོད༌ ཡང༌ན༌ བླ༌མའེ༌ སྟུད༌ཏུང༌ ཁུར༌ཏེ༌ ཡོད༌པིན༌།
ཨ༌ཧི༌ཡཱ༌ ནི༌ ཨི༌ཀ༌བོད༌དི༌ ཨ༌ཅོ༌ ཨ༌ཧི༌ཏུབ༌བི༌ བུ༌ཚ༌ ཨིན༌པིན༌,
ཨ༌ཧི༌ཏུབ༌,
ཕི༌ནི༌ཧས༌སི༌ བུ༌ཚ༌ ཡང༌ ཕི༌ནི༌ཧས༌ ཨེ༌ལི༌ བུ༌ཚ༌ ཨིན༌པིན༌།
ཨེ༌ལི༌ ཤི༌ལོའེ༌ ནང༌ང༌ ཡ༌ཝའ༌ ཞབས༌ཏོག༌ ཞུས༌ཁན༌ནི༌ བླ༌མ༌ ཨིན༌པིན༌།
ཨིས༌ར༌ཨེལ༌པའེ༌ མག༌མི༌ ཀུར༌ ཙུགས༌ཏེ༌ དུགས༌སའེ༌ ནས༌ས༌ནེ༌ ཡོ༌ན༌ཐན༌ བིངས༌ཏེ༌ ཆའ༌ཁན༌བོ༌ སུའང༌ གྱུས༌ མ༌སོང༌།
4 ཕི༌ལིས༌ཏི༌པ༌ མག༌མི༌ ཡོད༌ས༌ ལེབ༌ཅེས༌སི༌ ཕིའ༌ ཡོ༌ན༌ཐན༌ལ༌ བོ༌ཟེཟ༌ དང༌ སེ༌ནེའ༌ ཟེར༌ཁན༌ ཀད༌པ༌ ཉིས༌ཀོ༌ བབས༌ཨིན༌ ཛགས༌ཨིན༌ ཆ༌གོས༌།
5 ཅང༌ ཆོགས༌ལ༌ ཡོད༌ཁན༌ནི༌ ཀད༌པ༌ མིཀ༌མཤ༌ཤི༌ ཉེ༌མོ༌ ཡང༌ ལྷོ༌ ཆོགས༌ལ༌ ཡོད༌ཁན༌ ཀད༌པ༌ གེ༌བའེ༌ ཉེ༌མོ༌ ཡོད༌པིན༌།
6 ཡོ༌ན༌ཐན༌ནི༌ ཁོང༌རང༌ངི༌ མག༌ཆ༌ ཁུར༌ཁན༌ནི༌ ཞུ༌ནུའི༌ ཟེརས༌,
“ཡོང༌,
ང༌དང༌ སུན༌ནད༌ མ༌ ཅོས༌ཁན༌ མག༌མི༌གུན༌ དུག༌སའེ༌ ས༌ཆ༌ ཆེན༌,
ཡ༌ཝའེ༌ ང༌དང༌ང༌ རོགས༌ ཛད༌ སྲིད༌ཅེས༌ ཨིན༌ནོག༌།
ང༌དང༌ མང༌པོ༌ ཡོད༌གྲོ༌ ཡ༌ ཉུ༌ངུན༌ སྐྱོབ༌བ༌ ཛད༌ཅེས༌སི༌ ནང༌ང༌ ཡ༌ཝ༌ ཅི༌ཞིག༌གིའང༌ སྒག༌སྐྱིལ༌ ཏང༌ མི༌ཉན༌།”
7 ཚོན༌ཆ༌ ཁུར༌ཁན༌ ཞུ༌ནུའི༌ ལན༌ཏངས༌,
“ཉེ༌རང༌ངི༌ གྱལ༌ལ༌ སམ༌ཁན༌བོ༌ ཅོའ༌ ཛད༌,
ཉེ༌རང༌ངི༌ ཅི༌ ཐག༌ཅད༌ ཛད༌ནའང༌ ང༌ ཉེ༌རང༌ ཉམ༌པོ༌ ཨིན༌།”
8 ཡོ༌ན༌ཐན༌ནི༌ ཁོའ༌ ཟེརས༌,
“ཁྲིག༌རག༌,
ཁོང༌གུན༌ལ༌ ཐོང༌ ཅུག༌ཅེས༌ལ༌ ང༌དང༌ ལུང༌པ༌ རྒལ༌ཏེ༌ འ༌ངོ༌ ཆོགས༌ལ༌ ཆེན༌།
9 ཀལ༌ཏེས༌ ཁོང༌གུན༌ནི༌ ང༌དང༌ང༌ ཟེར༌ན༌ ‘ཁྱོ༌ཞའ༌ ཏེན༌ནེ༌ཀ༌ དུག༌ཤིག༌ ཡང༌ ང༌ཞའ༌ ཁྱོ༌རང༌གུན༌ ཡོད༌ས༌ ཡོང༌ཨིན༌།’
ཏེ༌ནེ༌ ང༌དང༌གུན༌ ཏེན༌ནེ༌ཀ༌ དུག༌ཨིན༌ ཡང༌ ཁོང༌གུན༌ ཡོད༌ས༌ མི༌ཆ༌།
10 ཨིན༌ནའང༌ ཀལ༌ཏེས༌ ཁོང༌གུན༌ནི༌ ‘ཀེན༌ལ༌ ནོལ༌ལ༌ ཡོང༌’ ཟེར༌ན༌ ཏེ༌ནེ༌ ང༌དང༌ ཆེན༌།
ཏེ༌བོ༌ ཡ༌ཝའེ༌ རོགས༌ ཛད༌ཏེ༌ ང༌དང༌ངི༌ ཁོང༌གུན༌ལ༌ ཕམ༌ཀལ༌ཅེས༌སི༌ སྟགས༌ཤིག༌ ཨིན༌ནོག༌།”
11 ཕི༌ལིས༌ཏི༌པ༌གུན༌ནི༌ ཁོང༌གུན༌ ཡོང༌ང༌ ཐོང༌ང༌ཅིག༌ ཀུ༌ཅོ༌ ཏངས༌,
“ལྟོས༌སའང༌,
ཨིབ༌རི༌པ༌གུན༌ བང༌གོཀ༌ཨིན༌ ཁོང༌རང༌ངི༌ བི༌གང༌གུན༌ནེ༌ བིངས༌ཏེ༌ ཡོང༌ང༌ལ༌།”
12 ཏེ༌ནེ༌ མག༌མི༌ དུག༌སའེ༌ ནས༌ས༌ནེ༌ མག༌མི༌གུན༌ནི༌ ཡོ༌ན༌ཐན༌ལ༌ ཀུ༌ཅོ༌ ཏང༌ཨིན༌ ཟེརས༌,
“ཀེན༌ལ༌ འི༌རུ༌ ཡོང༌,
ང༌ཞའེ༌ ཁྱོ༌རང༌ང༌ སྟན༌ཏེ༌ ཏང༌ཨིན༌།”
ཏེ༌ནེ༌ ཡོ༌ན༌ཐན༌ནི༌ ཁོ༌རང༌ངི༌ མག༌ཆ༌ ཁུར༌ཁན༌བོའ༌ ཟེརས༌,
“ཡོང༌ ཛགས༌ཏེ༌ ངའེ༌ གྱབ༌ནེ༌ ཡོང༌ ཅིའ༌ཟེར༌ན༌ ཁོང༌གུན༌ལ༌ ཕམ༌ཀལ༌ཅེས༌ལ༌ ཡ༌ཝའེ༌ ང༌དང༌ང༌ རོགས༌ ཛད༌ཅེས༌པོ༌ ཏན༌ཏན༌ ཨིན༌ནོག༌།”
13 ཏེ༌ནེ༌ ཡོ༌ན༌ཐན༌ནི༌ ཁོ༌རང༌ངི༌ རྐང༌ལག༌གུན༌ ཀོལ༌ཨིན༌ ཀེན༌ལ༌ ཁྲིལ༌ཏེ༌ སོང༌ ཡང༌ ཁོའེ༌ ལག༌ཆ༌ ཁུར༌ཁན༌བོ༌ ཁོའེ༌ སྟིང༌རང༌ནེ༌ ཡོངས༌།
ཡོ༌ན༌ཐན༌ནི༌ ཕི༌ལིས༌ཏི༌པ༌གུན༌ སད༌ཨིན༌ སོང༌ ཡང༌ ཁོའེ༌ མག༌ཆ༌ ཁུར༌ཁན༌བོའེང༌ ཁོང༌གུན༌ སད༌ཨིན༌ ཁོའེ༌ གྱབ༌ནེ༌ ཡོངས༌།
14 ཀ༌ནལ༌ ཞི༌ ནས༌སའེ༌ ནང༌ང༌ ཁོང༌གུན༌ནི༌ ལྡོམ༌ མི༌ ཉི༌ཤུ༌ སདས༌།
ཨིས༌ར༌ཨེལ༌པ༌གུན༌ནི༌ ཕི༌ལིས༌ཏི༌པ༌གུན༌ལ༌ ཕམ༌ཀལས༌།
14:15 ནེ༌ 23
15 ཧུན༌མེད༌ལ༌ ཕི༌ལིས༌ཏི༌པ༌ མག༌མི༌གུན༌ ཀུར༌ ཏངས༌ཏེ༌ ཡོད༌ས༌,
མག༌ཐང༌,
སན༌ཚམས༌ དང༌ སྤུང༌གོལ༌ ཅོའ༌ལ༌ ཆའ༌ཁན༌ནི༌ སྡེ༌གུན༌ནི༌ ཕྲོའ༌ ཇིགས༌ནང༌ སྐྱེས༌ཏེ༌ ཁོང༌གུན༌ དྲོགས༌།
ཏེན༌ན༌ ཏུས༌ལ༌ སང༌གུལ༌ ཡོངས༌ ཡང༌ དཀོན༌མཆོག༌གི༌ ཁོང༌ ཚང༌མའེ༌ ནང༌ང༌ མ༌སྲན༌ཏྲེ༌ ཇིགས༌ནང༌ སྐྱེས༌ཏེ༌ དྲོགས༌ ཅུག༌ག༌ཛདས༌།
16 བེན༌ཡཱ༌མིན༌ སྡེ༌ ཡུལ༌ཇོངས༌སི༌ གི༌བེའཧའེ༌ ནང༌ང༌ གྲ༌འོ༌ ལྟའ༌ཁན༌ ས༌འུལ༌ལི༌ མག༌མི༌གུན༌ནི༌ ཕི༌ལིས༌ཏི༌པ༌ མག༌མི༌གུན༌ དྲོགས༌ཏེ༌ ཆོགས༌ ཚང༌མ༌ལ༌ ཤོར༌ཨིན༌ ཡོད༌ཁན༌བོ༌ ཐོང༌།
17 ཏེ༌ནེ༌ ས༌འུལ༌ལི༌ བཀའ༌ ཏངས༌,
“མག༌མི༌གུན༌ནི༌ ཀྲངས༌ཀ༌ རྩིས༌ ཡང༌ སུ༌ མི༌དུག༌ ལྟོས༌།”
ཁོང༌གུན༌ནི༌ རྩི༌རུག༌ ཏང༌ང༌ཅིག༌ ཡོ༌ན༌ཐན༌ དང༌ ཁོའེ༌ མག༌ཆ༌ ཁུར༌ཁན༌བོ༌ མེད༌པིན༌།
18 ཏེ༌ནེ༌ ས༌འུལ༌ལི༌ བླ༌མ༌ ཨ༌བི༌ཡཧའ༌ ཟེརས༌,
“ཨེ༌ཕོད༌ འི༌ཀ༌ ཁྱོང༌” ཅིའ༌ཟེར༌ན༌ ཨ༌བི༌ཡཧ༌ ཨེ༌ཕོད༌ གོན༌ཏེ༌ ཨིས༌ར༌ཨེལ༌པ༌ མག༌མི༌གུན༌ནི༌ ཕྲོའ༌ ཡོད༌པིན༌།
19 ས༌འུལ༌ལི༌ བླ༌མ༌ ཉམ༌པོ༌ སྤེ༌ར༌ ཏང༌ཨིན༌ ཡོད༌ཏུས༌,
ཕི༌ལིས༌ཏི༌པ༌གུན༌ནི༌ ཀུར༌ ཙུགས༌སའེ༌ ནས༌སའེ༌ ནང༌ང༌ ཇིགས༌ཁན༌ནི༌ སྐད༌ ཤེད༌ཅན༌ སོང༌།
ཏེ༌བོའེ༌ཕིའ༌ ས༌འུལ༌ལི༌ བླ༌མ༌ ཟེརས༌,
“དུག༌ཅུག༌,
ཡ༌ཝ༌ ཏྲི༌ཅེས༌སི༌ ཏུས༌ མེད༌ཏེ༌ ཨིན༌ནོག༌།”
20 ཏེ༌ནེ༌ ས༌འུལ༌ དང༌ ཁོའེ༌ མག༌མི༌གུན༌ བིང༌ཏེ༌ མག༌ཏང༌ང༌ སོང༌ ཡང༌ ཏེ༌ཀ༌ ལེབ༌བ༌ཅིག༌ ཕི༌ལིས༌ཏི༌པ༌ མག༌མི༌ ཚང༌མའེ༌ ཕྲོའ༌ ཐེ༌ཚོམས༌ སྲན༌ཏྲེ༌ སྐྱེས༌ཏེ༌ ཁོང༌རང༌ ཅིག༌ དང༌ ཅིག༌ སད༌ཨིན༌ ཐོང༌།
21 སྔུན༌ལ༌ ཨིབ༌རི༌པའེ༌ མག༌མི༌ གྱབ༌གལ༌ ཅོས༌ཏེ༌ ཕི༌ལིས༌ཏི༌པ༌གུན༌ ཉམ༌པོ༌ ཆའ༌ཁན༌གུན༌ནི༌ ཏ༌ ས༌འུལ༌ དང༌ ཡོ༌ན༌ཐན༌ ཉམ༌པོ༌ ཡོད༌ཁན༌ནི༌ ཨིས༌ར༌ཨེལ༌པའེ༌ མག༌མི༌གུན༌ནི༌ ཆོག༌སྐྱོར༌ལ༌ ནོལས༌།
22 ཏེན༌ན༌ ཙོགས༌ལ༌ ཨེཕ༌ར༌ཡིམ༌མི༌ རི༌ཡུལ༌ལ༌ ཨིབས༌ཏེ༌ ཡོད༌ཁན༌ ཨིས༌ར༌ཨེལ༌པའེ༌ མག༌མི༌གུན༌ནི༌ ཕི༌ལིས༌ཏི༌པ༌གུན༌ ཤོར༌ཏེ༌ ཆའ༌ལ༌ ཐོང༌ང༌ཅིག༌ ཁོང༌གུན༌ནིའང༌ ཁོང༌གུན༌ལ༌ ཏེད༌ཏེ༌ ཁྱེརས༌།
23 ཏེ༌ནེ༌ ཏེ༌ ཞག༌ག༌ ཡ༌ཝའེ༌ ཨིས༌ར༌ཨེལ༌པ༌གུན༌ སྐྱོབས༌ ཡང༌ ཨིས༌ར༌ཨེལ༌པའེ༌ མག༌མི༌གུན༌ནི༌ བེཐ༌ ཨ༌ཝིན༌ནི༌ སང༌ ཐལ༌ཏེ༌ ཕི༌ལིས༌ཏི༌པ༌གུན༌ལ༌ ཏེད༌ཏེ༌ ཁྱེརས༌།
ཡོ༌ན༌ཐན༌ནི༌ རང༌རྩི༌ ཟོས༌།
14:24 ནེ༌ 48
24 ཏེ༌ ཞག༌ག༌ ཨིས༌ར༌ཨེལ༌པ༌གུན༌ མ༌སྲན༌ཏྲེ༌ ངལ༌ཏེ༌ ཤེད༌མེད༌ གྱུར༌ཏེ༌ ཡོད༌པིན༌ ཅིའ༌ཟེར༌ན༌ ས༌འུལ༌ལི༌,
“ང༌དང༌ངི༌ གྲ༌འོ༌ ཚང༌མ༌ལ༌ ཕམ༌ཀལ༌ཏེ༌ ཕི༌ཏོག༌ ལེབ༌བི༌སང༌ སྔུན༌ལ༌ ཁར༌ཇི༌ ཟའ༌ཁན༌གུན༌ལ༌ ངན༌ ཕོག༌ཤིག༌།”
ཟེར༌ཏེ༌ ནའ༌ ཁུར༌ཅུགས༌ པ༌སང༌ ཉི༌མ༌ གང༌པོ༌ སུའིང༌ ཅའང༌ མ༌ཟོས༌།
25 མག༌མི༌ ཚང༌མའེ༌ ནག༌ཚོགས༌སི༌ ནང༌ང༌ རང༌རྩི༌ གང༌ཁན༌ནི༌ བུ༌ཉའེ༌ ཚངས༌ མང༌པོ༌ ཐོབ༌ནའང༌,
26 ཁོང༌གུན༌ནི༌ རང༌རྩིའ༌ ཟའ༌ཅེས༌སི༌ ཧམ༌པ༌ མ༌ཅོས༌ ཅིའ༌ཟེར༌ན༌ ནའ༌ ཁུར༌ཏེ༌ ཨིན༌ པ༌སང༌ ཁོང༌གུན༌ ཇིགས༌།
27 ཨིན༌ནའང༌ ཡོ༌ན༌ཐན༌ལ༌ ཁོའེ༌ ཨ༌བའེ༌ ནའ༌ ཀལ༌ཁན༌བོ༌ མ༌ཚོར༌།
ཁོའེ༌ ཁོ༌རང༌ངི༌ བེར༌ཀའེ༌ གོ༌ རང༌རྩིའི༌ ནང༌ང༌ ཅུགས༌ཏེ༌ རང༌རྩི༌ ཟོས༌།
ཏེ༌བོ༌ ཟའ༌ཅིག༌ ཁོའེ༌ ཟུགས༌པོའེ༌ ནང༌ང༌ ཤེད༌ སྐྱེས༌།
28 ཨིན༌ནའང༌ ཏེ༌བོ༌ ཐོང༌ཏེ༌ མག༌མི༌ ཞིག༌གི༌ ཁོའ༌ ཟེརས༌,
“ཉེ༌རང༌ངི༌ ཨ༌བའེ༌ ‘དི༌རིང༌ ཟན༌ ཟའ༌ཁན༌གུན༌ལ༌ ངན༌ ཕོག༌ཨིན༌’ ཟེར༌ཏེ༌ མག༌མི༌གུན༌ལ༌ ནའ༌ ཀལས༌།
ཏེན༌ན༌བོའེ༌ཕིའ༌ མག༌མི༌ ཚང༌མ༌ ཟན༌ མ༌ཟོས༌པ༌ ངལ༌ཏེ༌ ཆད༌ཏེ༌ ཨིན༌ནོག༌།”
29 ཡོ༌ན༌ཐན༌ནི༌ ཟེརས༌,
“ངའེ༌ ཨ༌བའེ༌ ང༌དང༌ ཚང༌མ༌ལ༌ ནགས༌ སྟན༌ཏེ༌ ཨིན༌ནོག༌།
ལྟོས༌སའང༌ འི༌ རང༌རྩི༌ ཙ༌པིག༌ ཟོས༌ པ༌སང༌ ངའེ༌ ཟུགས༌པོ༌ ཡང༌སྐྱར༌ སྟོབས༌ཅན༌ གྱུར༌།
30 ཀལ༌ཏེས༌ གྲ༌འོ༌གུན༌ནི༌ ཀ༌ནེ༌ ཐོབ༌ཁན༌ནི༌ ཟན༌ ང༌དང༌གུན༌ལ༌ ཟའ༌ཅེས༌སི༌ གོངས༌པ༌ ཏངས༌པིན༌ན༌,
སམ༌བ༌ ཏོང༌ངའང༌ ང༌དང༌གུན༌ནི༌ ཙམ༌ཞིག༌ མང༌ང༌ ཕི༌ལིས༌ཏི༌པ༌གུན༌ སད༌ཏེ༌ ཡོད༌གྲོ༌།”
31 མིཀ༌མཤ༌ནེ༌ ཏངས༌ཏེ༌ ཨའི༌ཡ༌ལོན༌ ཚོག༌པ༌ ཁོང༌གུན༌ནི༌ ཉི༌མ༌ གང༌པོ༌ ཕི༌ལིས༌ཏི༌པ༌གུན༌ལ༌ ཏེད༌ཏེ༌ ཁྱེརས༌ ཡང༌ སདས༌།
ཏེ༌བོའེ༌ཕིའ༌ མག༌མི༌གུན༌ མང༌ང༌ ཤུགས༌མེད༌ གྱུར༌ཨིན༌ སོང༌།
32 ཕི༌ཏོག༌ མག༌མི༌གུན༌ མག༌གི༌ ནང༌ང༌ ཅོམ༌ཁན༌གུན༌ ཟའ༌ལ༌ གྱུགས༌ཏེ༌ སོང༌ ཡང༌ ལུག༌,
རམ༌,
བ༌ལང༌ དང༌ བེ༌ཙོ༌ གུན༌ སད༌ཏེ༌ ཁྲག༌ ཉམ༌པོ༌ ཟོས༌།
33 སུ༌ཞིག༌གི༌ ས༌འུལ༌ལ༌ ལོན༌ ཁྱོངས༌,
“ཟིགས༌སའང༌ མག༌མི༌གུན༌ནི༌ ཁྲག༌ ཉམ༌པོ༌ ཤ༌ ཟོས༌ཏེ༌ ཡ༌ཝའེ༌ གྱབ༌གལ༌ལ༌ སྡིག༌པ༌ ཅོ༌དུག༌།”
ས༌འུལ༌ལི༌ ཟེརས༌,
“ཁོང༌གུན༌ནི༌ ཡ༌ཝ༌ ཅོ༌ཁན༌ནི༌ ཆད༌དོན༌བོ༌ ཅགས༌ཏེ༌ ཨིན༌ནོག༌།
ཕོ༌ལོངས༌ ཆེན༌མོ༌ ཞིག༌ རིལ༌ཏེ༌ འི༌ཀ༌ ཁྱོང༌།
34 ཏེ༌ནེ༌ མག༌མི༌གུན༌ནི༌ ཕྲོའ༌ སོང༌ཏེ༌ ཁོང༌གུན༌ལ༌ ཟེར༌,
‘བ༌ལང༌,
ལུག༌ དང༌ ར༌མ༌ གུན༌ འི༌ཀ༌ ཁྱོངས༌ཏེ༌ སོད༌ ཡང༌ ཁྲག༌ བིང༌ཅེས༌ ཚར༌ཏེ༌ མ༌ནེ༌ ཏེ༌ ཤ༌གུན༌ མ༌ཟའ༌།
ཁྲག༌ ཡོད༌ཁན༌ནི༌ ཤ༌ ཟོས༌ཏེ༌ ཡ༌ཝའེ༌ གྱབ༌གལ༌ལ༌ སྡིག༌པ༌ མ༌ཅོ༌ཤིག༌།’”
ཏེ༌ནེ༌ ཏེ༌ ཚན༌ལ༌ མག༌མི༌ ཚང༌མའེ༌ སེམས༌ཅན༌གུན༌ ཁྱོངས༌ ཡང༌ ཏེ༌ ཕོ༌ལོངས༌སི༌ཀ༌ སདས༌།
35 ས༌འུལ༌ལི༌ ཡ༌ཝའེ༌ ཕིའ༌ ཆོད༌ཁྲི༌ཞིག༌ རྩིགས༌།
ཏེ༌བོ༌ ཁོའེ༌ ཡ༌ཝའེ༌ ཕིའ༌ རྩིགས༌ཁན༌ནི༌ ཆོད༌ཁྲི༌ ཏང༌པོ༌ ཨིན༌པིན༌།
36 ཏེ༌ནེ༌ ས༌འུལ༌ལི༌ ཟེརས༌,
“ཚན༌ གང༌པོ༌ ཕི༌ལིས༌ཏི༌པ༌གུན༌ལ༌ ཏེད༌ཏེ༌ ཁྱེར༌ཨིན༌ ཡང༌ ཉི༌མ༌ ཤར༌ཤར༌ ཚོག༌པ༌ ཁོང༌ ཚང༌མ༌ སད༌ཏེ༌ ཁོང༌གུན༌ནི༌ ནོར༌ ཚང༌མ༌ ཅོམས༌ཏེ༌ ཁྱོང༌ཨིན༌།”
མག༌མི༌གུན༌ནི༌ ལན༌ཏངས༌,
“ཉེ༌རང༌ངི༌ ཅི༌ གྱལ༌ལ༌ སམ༌ནའང༌ ང༌ཞ༌གུན༌ནི༌ ཅོ༌ཨིན༌།”
ཨིན༌ནའང༌ བླ༌མའེ༌ ཟེརས༌,
“སྔུན༌ལ༌ ང༌དང༌གུན༌ནི༌ དཀོན༌མཆོག༌ག༌ ཏྲི༌གོས༌།”
37 ཏེ༌བོའེ༌ཕིའ༌ ས༌འུལ༌ལི༌ དཀོན༌མཆོག༌ག༌ ཏྲིའ༌ཛདས༌,
“ང༌ཞའ༌ ཕི༌ལིས༌ཏི༌པ༌གུན༌ནི༌ སྟིང༌རང༌ནེ༌ ཆའ༌ལེ༌,
ཉེ༌རང༌ངི༌ ང༌ཞའ༌ གྱལ༌ཁའ༌ སལ༌ ཨིན༌ན༌?”
ཨིན༌ནའང༌ ཏེ༌ ཞག༌ག༌ དཀོན༌མཆོག༌གི༌ ཁོའ༌ ལན༌ མ༌སལས༌།
38 ཏེ༌ནེ༌ ས༌འུལ༌ལི༌ ཟེརས༌,
“མག༌མི༌ སྤོན༌བོ༌ ཚང༌མ༌ འི༌ཀ༌ ཛོམ༌ཤིག༌,
དི༌རིང༌ ང༌དང༌གུན༌ནི༌ ཅི༌ སྡིག༌པ༌ ཅོས༌ཏོག༌ ཏེ༌བོ༌ ཙལ༌གོས༌།
39 ཨིས༌ར༌ཨེལ༌པ༌གུན༌ ཐར༌ ཅུག༌ག༌ ཛད༌ཁན༌ ཡ༌ཝའེ༌ ཚན༌ནི༌ ནང༌ང༌ ངའེ༌ ནའ༌ ཁུར༌རད༌,
སྡིག༌པ༌ ཅོ༌ཁན༌བོ༌ ངའེ༌ བུ༌ཚ༌ ཡོ༌ན༌ཐན༌ ཨིན༌ནའང༌,
ཁོ༌ ཏན༌ཏན༌ སད༌གོས༌།”
ཨིན༌ནའང༌ སུའིང༌ ས༌འུལ༌ལ༌ ཅའང༌ མ༌ ཤདས༌།
40 ཏེ༌ནེ༌ ས༌འུལ༌ལི༌ ཟེརས༌,
“ཡོ༌ན༌ཐན༌ དང༌ ང༌ འི༌ ཆོགས༌ལ༌ ཡང༌ ཁྱོ༌ཞའ༌ ཚང༌མ༌ འ༌ངོ༌ ཆོགས༌ལ༌ ལངས༌ཏེ༌ དུག༌།”
མི༌གུན༌ནི༌ ས༌འུལ༌ལ༌ ལན༌ཏངས༌ “ཉེ༌རང༌ངི༌ གྱལ༌ལ༌ སམ༌ཁན༌བོ༌ ཅོའ༌ ཛད༌།”
41 ཏེ༌ནེ༌ ས༌འུལ༌ལི༌ མོས༌ལམ༌ ཞུས༌,
“ཀྱེ༌ ཡ༌ཝ༌,
ཨིས༌ར༌ཨེལ༌པའེ༌ དཀོན༌མཆོག༌ ཇུ༌ཇུ༌,
སུ༌ ནོངས༌ཅན༌ ཡང༌ སུ༌ ནོངས༌མེད༌ ཨིན༌,
ང༌ཞའ༌ སྟན༌ན༌ ཛད༌དའང༌།”
ཏེ༌ནེ༌ བླ༌མའེ༌ ཏག༌རིལ༌ ཏངས༌པ༌,
ཡོ༌ན༌ཐན༌ དང༌ ས༌འུལ༌ ནོངས༌ཅན༌ ཡང༌ མི༌གུན༌ ནོངས༌མེད༌ བིང༌།
42 ས༌འུལ༌ལི༌ ཟེརས༌,
“ཏ༌ ང༌རང༌ དང༌ ཡོ༌ན༌ཐན༌ནི༌ པར༌ལ༌ ཡང༌ ལན༌ཅིག༌ ཏག༌རིལ༌ ཏོང༌།”
ཡང༌ ཡོ༌ན༌ཐན༌ ནོངས༌ཅན༌ བིང༌།
43 ཏེ༌ནེ༌ ས༌འུལ༌ལི༌ ཡོ༌ན༌ཐན༌ལ༌ ཟེརས༌,
“ངའ༌ ཤོད༌ ཁྱོ༌རང༌ངི༌ ཅི༌ ཅོས༌པིན༌།”
ཡོ༌ན༌ཐན༌ནི༌ ཟེརས༌,
“ངའེ༌ རང༌རྩི༌ ཉུ༌ངུན༌ ཞིག༌ ང༌རང༌ངི༌ བེར༌ཀའེ༌ གོའེ༌ཀ༌ ཁྱོངས༌ཏེ༌ ཟོས༌པིན༌།
ཅི༌ ཏེ༌བོའེ༌ ཕིའ༌ ང༌ ཤི༌གོས༌ས༌?”
44 ས༌འུལ༌ལི༌ ཟེརས༌,
“འོ༌ན༌ ཡོ༌ན༌ཐན༌,
ཁྱོ༌རང༌ ཤི༌གོས༌།
ཏེ༌ཟུག༌ མ༌ ཅོ༌ན༌ དཀོན༌མཆོག༌གི༌ ངའ༌ ཆད༌པ༌ སྲན༌ཏྲེ༌ སལ༌ལ༌ ཛད༌ཤིག༌།”
45 ཨིན༌ནའང༌ མི༌གུན༌ནི༌ ས༌འུལ༌ལ༌ ཟེརས༌,
“ཡོ༌ན༌ཐན༌ནི༌ ཨིས༌ར༌ཨེལ༌ལི༌ ཕིའ༌ འི༌ གྱལ༌ཁ༌ ཆེན༌མོ༌ ལེན༌ཏེ༌ ཨིན༌ནོག༌།
ཅི༌ ཁོ༌ ཤི༌གོས༌ས༌,
མ༌ནེ༌ མ༌གོས༌།
སོན༌པོ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ཁོའེ༌ གོའེ༌ སྲ༌ ཅིག༌གའང༌ ལག༌པ༌ མི༌རྩེ༌ ཅིའ༌ཟེར༌ན༌ ཁོའ༌ དི༌རིང༌ དཀོན༌མཆོག༌གི༌ ལས༌ གྱལ༌ལ༌ ཅོ༌ཅེས༌སི༌ ནང༌ང༌ རོགས༌ ཛད༌ཏེ༌ ཨིན༌ནོག༌།”
ཏེ༌ཟུག༌གི༌ མི༌གུན༌ནི༌ ཡོ༌ན༌ཐན༌ སྐྱོབས༌ཏེ༌ ཁོ༌ སད༌ མ༌ཅུགས༌།
46 ཏེ༌ནེ༌ ས༌འུལ༌ལི༌ ཕི༌ལིས༌ཏི༌པ༌གུན༌ལ༌ ཏེད༌ཏེ༌ ཁྱེར༌ཁན༌ མག༌མི༌གུན༌ ལོགས༌ཏེ༌ བོདས༌ ཡང༌ ཕི༌ལིས༌ཏི༌པ༌གུན༌ ལོགས༌ཏེ༌ ཁང༌པ༌ སོང༌།
47 ཏ༌ ས༌འུལ༌ལི༌ ཨིས༌ར༌ཨེལ༌པའེ༌ ཝང༌སྲུལ༌པའེ༌ ཀོ༌ས༌ སྟན༌པོ༌ ཅོས༌ཏེ༌ སྟིང༌ནེ༌ ཁོའེ༌ ཆོགས༌ ཚང༌མའེ༌ གྲ༌འོ༌གུན༌ ཉམ༌པོ༌ ནོལས༌།
ཁོའེ༌ མོ༌འབ༌པ༌,
ཨེམ༌མོན༌པ༌,
ཨི༌དོམ༌པ༌,
ཟོ༌བཧའེ༌ གྱལ༌པོ༌གུན༌ དང༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ ནོལས༌ ཡང༌ ཀ༌ངོ༌ ཆོགས༌ལ༌ ཆ༌ནའང༌ ཁོའ༌ གྱལ༌ཁ༌ ཐོབ༌།
48 ཁོའེ༌ མག༌མི༌གུན༌ནི༌ སྟོབས༌ཤུགས༌ ཉམ༌པོ༌ ནོལ༌ཏེ༌ ཨ༌མ༌ལིཀ༌པ༌གུན༌ལའང༌ ཕམ༌ཀལས༌ ཡང༌ ཀོག༌ཅོམ༌ ཏངས༌ཏེ༌ ཁྱེར༌ཁན༌ ཚང༌མའེ༌ ཀ༌ནེ༌ ཁོའེ༌ ཨིས༌ར༌ཨེལ༌པ༌གུན༌ སྐྱོབས༌།
ས༌འུལ༌ལི༌ ནང༌ཚངས༌།
14:49 ནེ༌ 52
49 ས༌འུལ༌ལ༌ བུ༌ཚ༌ ཡོ༌ན༌ཐན༌,
ཨིཤ༌ཝི༌ དང༌ མལ༌ཀི༌ཤུའ༌ ཡང༌ བུ༌མོ༌ མེ༌རབ༌ དང༌ མི༌ཁལ༌ ཡོད༌པིན༌,
བུ༌མོ༌ ཉིས༌ཀོའེ༌ ནང༌ནེ༌ མེ༌རབ༌ ཆེའ༌བོ༌ ཨིན༌པིན༌།
50 ས༌འུལ༌ལི༌ ན༌མ༌ ཨ༌ཧི༌མཟ༌སི༌ བུ༌མོ༌ ཨ༌ཧི༌ནོའམ༌ ཨིན༌པིན༌།
ས༌འུལ༌ལི༌ ཨ༌ཞང༌ ནེར༌ ཡང༌ ཁོའེ༌ བུ༌ཚ༌ ཨབ༌ནེར༌ ས༌འུལ༌ལི༌ མག༌མི༌གུན༌ནི༌ སྤོན༌བོ༌ ཨིན༌པིན༌།
51 ས༌འུལ༌ལི༌ ཨ༌བ༌ ཀིཤ༌ དང༌ ཨབ༌ནེར༌རི༌ ཨ༌བ༌ ནེར༌,
ཉིས༌ཀོ༌ ཨ༌བི༌འེལ༌ལི༌ བུ༌ཚ༌ ཨིན༌པིན༌།
52 ས༌འུལ༌ལི༌ མི༌ཚེ༌ གང༌པོ༌,
ཨིས༌ར༌ཨེལ༌པ༌གུན༌ ཏུས༌གྱུན༌ ཕི༌ལིས༌ཏི༌པ༌གུན༌ ཉམ༌པོ༌ ནོལ༌ཨིན༌ དུགས༌།
ཞུན༌ནུ༌ སེམ༌སྟོབས༌ དང༌ ཤེད༌ཅན༌ཞིག༌ ཐོང༌ཁན༌ ཚང༌མ༌ ས༌འུལ༌ལི༌ མག༌མི༌ ནང༌ང༌ ཅུག༌གད༌པིན༌།