ས༌མུའེལ༌ལི༌ ས༌འུལ༌ལ༌ ཁའ༌སྐྱེའ༌ ཛདས༌།
13:1 ནེ༌ 15
13
ས༌འུལ༌ལི༌ ཝང༌སྲུལ༌ གོ༌ཟུག༌ ཟ༌ནེ༌ ཁོ༌ ཁྱོག༌ཏོང༌ མན༌པ༌ ལྡན༌ཁན༌ མི༌ཞིག༌ ཨིན༌པིན༌ ཡང༌ ཁོའེ༌ ཨིས༌ར༌ཨེལ༌ལི༌ ནང༌ང༌ ལོ༌ 2 ཝང༌སྲུལས༌།a
2 ས༌འུལ༌ལི༌ ཨིས༌ར༌ཨེལ༌པ༌གུན༌ནི༌ ཕྲོ༌ནེ༌ མག༌མི༌ 3,000 ལྡམས༌ ཡང༌ ཏེ༌ ནང༌ནེ༌ 2,000 ཁོ༌རང༌ ཉམ༌པོ༌ བེ༌ཐེལ༌ལི༌ རི༌ཡུལ༌ མིཀ༌མཤ༌ལ༌ ཁྲིད༌ཏེ༌ ཁྱེརས༌།
ཞན༌ཡང༌ 1,000 ཁོ༌རང༌ངི༌ བུ༌ཚ༌ ཡོ༌ན༌ཐན༌ ཉམ༌པོ༌ བེན༌ཡཱ༌མིན༌ནི༌ ས༌ཀྱད༌ གི༌བེའཧའེ༌ ནང༌ང༌ བོརས༌ ཡང༌ ལུས༌ཁན༌གུན༌ ཁང༌པ༌ ལོགས༌ཏེ༌ ལམ༌ ཅུགས༌།
3 ཡོ༌ན༌ཐན༌ནི༌ གེ༌བའེ༌ ནང༌ང༌ ཡོད༌ཁན༌ ཕི༌ལིས༌ཏི༌པའེ༌ མག༌མི༌ དུག༌སའེ༌ ཀི༌ལའ༌ སྤུང༌གོལ༌ ཅོས༌ཏེ༌ ཕམ༌ཀལས༌ ཡང༌ ཕི༌ལིས༌ཏི༌པ༌གུན༌ནི༌ ཏེ༌ ནས༌ཚུལ༌བོ༌ ཚོར༌།
ཏེ༌ནེ༌ ས༌འུལ༌ལི༌ ཡུལ༌ གང༌པོའེ༌ ནང༌ང༌ ར༌མའེ༌ རཱ༌ཅོའེ༌ ཏུང༌ ཕུས༌ཏེ༌ ཟེརས༌,
“ཨིབ༌རི༌པ༌གུན༌ ངའེ༌ ཅོ༌ཁན༌བོ༌ ཉོན༌ཤིག༌།”
4 ཨིས༌ར༌ཨེལ༌པ༌ ཚང༌མའེ༌,
“ས༌འུལ༌ལི༌ ཕི༌ལིས༌ཏི༌པའེ༌ མག༌མི༌ དུག༌སའེ༌ ཀི༌ལའ༌ སྤུང༌གོལ༌ ཅོས༌པ༌ ཁོང༌གུན༌ནི༌ ང༌དང༌གུན༌ལ༌ སྔོན༌ནི༌ སང༌ མང༌ང༌ ནཕ༌རད༌ ཅོའ༌ནོག༌” ཟེར༌ཁན༌ནི༌ ནས༌ཚུལ༌ ཚོར༌།
ཏེ༌ནེ༌ གིལ༌གལ༌ལི༌ ནང༌ང༌ ས༌འུལ༌ ཡོད༌ས༌ ཛོམ༌ཅེས༌ལ༌ ཨིས༌ར༌ཨེལ༌ལི༌ མག༌མི༌ གང༌པོ༌ བོདས༌།
5 ཨིས༌ར༌ཨེལ༌པ༌གུན༌ལ༌ མག༌ ཏང༌ཅེས༌ལ༌ ཕི༌ལིས༌ཏི༌པ༌གུན༌ནི༌ ཤིང༌རྟ༌ 3000,
ཤིང༌རྟ༌ སྲུལ༌ཁན༌ 6000 ཡང༌ གྱ༌ཚོའེ༌ པེ༌མ༌ ཙོགས༌ མག༌མི༌ མང༌པོ༌ ཛོམ༌ ཅུགས༌།
ཏེ༌ མག༌མི༌གུན༌ བིང༌ཏེ༌ བེཐ༌ ཨ༌ཝིན༌ནི༌ ཤར༌ ཆོགས༌ལ༌ མིཀ༌མཤ༌ ནས༌སའེ༌ ནང༌ང༌ ཀུར༌ ཙུགས༌ཏེ༌ དུགས༌།
6 ཕི༌ལིས༌ཏི༌པ༌གུན༌ནི༌ སྤུང༌གོལ༌ མ༌ཀྲག༌པོ༌ ཅོས༌ ཡང༌ ཨིས༌ར༌ཨེལ༌ལི༌ མག༌མི༌གུན༌ནི༌ ཁོ༌རང༌གུན༌ནི༌ ནས༌ལུག༌ སྐྱོ༌མོ༌ ཡོད༌ད༌ ཐོང༌ང༌ཅིག༌ ཁོང༌གུན༌ བྲག༌ཕུག༌,
ནག༌ཚོགས༌,
ཕོ༌ལོས༌སི༌ ཕྲོའ༌,
བི༌གའང༌ དང༌ ཆུ༌དོང༌ གུན༌ནི༌ ནང༌ང༌ ཨིབས༌།
7 ཨིབ༌རི༌པ༌ ཁ༌ཅིག༌ ཡོར༌དཱན༌ ལྩངས༌པོ༌ རྒལ༌ཏེ༌ གཱད༌ དང༌ གི༌ལེད༌དི༌ ས༌ཆ༌གུན༌ལ༌ ཤོར༌ཏེ༌ སོང༌།
ས༌འུལ༌ གིལ༌གལ༌ལི༌ ནང༌ང༌ དུགས༌,
ཡང༌ ཁོ༌ ཉམ༌པོ༌ ཡོད༌ཁན༌ མག༌མི༌ ཚང༌མ༌ ཇིགས༌ཏེ༌ དར༌རད༌པིན༌།
8 ས༌མུའེལ༌ལི༌ ལབ༌ཞ༌ ནང༌ཞིན༌ ས༌འུལ༌ ཏེ༌རུ༌ ས༌མུའེལ༌ལི༌ ཕིའ༌ ཞག༌མ༌ རྡུན༌ སྲུངས༌ཏེ༌ དུགས༌,
ཨིན༌ནའང༌ ས༌མུའེལ༌ མ༌ལེབ༌བ༌ ས༌འུལ༌ལི༌ མག༌མི༌གུན༌ ཁོ༌ ཕངས༌ཏེ༌ ཆའད༌པིན༌།
9 ཏེ༌ནེ༌ ས༌འུལ༌ལི༌ ཟེརས༌,
“མེའ༌ སྲག༌ཅེས༌ དང༌ ཞི༌དེའེ༌ ཆོད༌པ༌ ཕུལ༌ཅེས༌ལ༌ སེམས༌ཅན༌ རེ༌རེ༌ ཁྱོང༌” ཡང༌ ཁོའེ༌ ཡ༌ཝའ༌ མེའ༌ སྲག༌ཅེས༌སི༌ ཆོད༌པ༌ ཕུལས༌།
10 ས༌འུལ༌ལི༌ མེའ༌ སྲག༌ཅེས༌སི༌ ཆོད༌པ༌ ཕུལ༌ ཚར༌ར༌ཅིག༌ ས༌མུའེལ༌ ལེབ༌,
ས༌འུལ༌ ཁོང༌ང༌ ཐུག༌ག༌ སོང༌ཏེ༌ གའ༌སུས༌ ཞུས༌།
11 ཨིན༌ནའང༌ ས༌མུའེལ༌ལི༌ ཟེརས༌,
“འི༌བོ༌ ཁྱོ༌རང༌ངི༌ ཅི༌ ཅོས༌ཏེ༌ ཨིན༌?”
ས༌འུལ༌ལི༌ ལན༌ཏངས༌,
“ངའེ༌ མི༌གུན༌ནི༌ ང༌ ཕངས༌ཏེ༌ ཆ༌ ཐོང༌ང༌ཅིག༌ ཡང༌ ཉེ༌རང༌ངི༌ མོལ༌ཁན༌ ནང༌ཞིན༌ ཉེ༌རང༌ མ༌ལེབ༌ མ༌ཚད༌ ཕི༌ལིས༌ཏི༌པའེ༌ མག༌མི༌གུན༌ མིཀ༌མཤ༌ཤི༌ ནང༌ང༌ ཛོམས༌ཏེ༌ མག༌གི༌ ཕིའ༌ གྲལ༌གྲིག༌ དུག༌པིན༌།
12 ཏེ༌བོའེ༌ཕིའ༌ ངའེ༌ སམ༌,
“ཕི༌ལིས༌ཏི༌པ༌གུན༌ ང༌ཞ༌གུན༌ནི༌ གྱབ༌གལ༌ལ༌ སྤུང༌གོལ༌ ཅོའ༌ལ༌ གིལ༌གལ༌ལ༌ ཡོང༌ ཆོག༌ཆོག༌ དུག༌ ཡང༌ ངའེ༌ ཏ༌རུང༌ ཡ༌ཝ༌ རོགས༌སི༌ ཕིའ༌ ཞུ༌ཝ༌ མ༌ཕུལ༌ལ༌ ཨིན༌ནོག༌,
ཏེ༌བོའེ༌ཕིའ༌ མེའ༌ སྲག༌ཅེས༌སི༌ ཆོད༌པ༌ ཕུལ༌ཏེ༌ ཡ༌ཝའེ༌ ཅིན༌ལབས༌ ལེན༌ཅེས༌པོ༌ ངའ༌ མ༌ ཁག༌ཅན༌ ཚོར༌།”
13 “ས༌མུའེལ༌ལི༌ ཟེརས༌,
“ཁྱོ༌རང༌ངི༌ སམ༌བ༌ མེད༌ཁན༌ནི༌ ལས༌ ཅོས༌ཏེ༌ ཨིན༌ནོག༌ ཡང༌ ཁྱོ༌རང༌ངི༌ དཀོན༌མཆོག༌,
ཡ༌ཝའེ༌ བཀའ༌ སལ༌ཁན༌བོའ༌ ཁའ༌ མ༌ཉན༌ན༌ ཨིན༌ནོག༌།
ཀལ༌ཏེས༌ ཉན༌པིན༌ན༌ ཡ༌ཝའེ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཨིས༌ར༌ཨེལ༌པ༌གུན༌ནི༌ཀ༌ ཏུས༌གྱུན༌ ཝང༌སྲུལ༌ ཅུག༌ག༌ ཛད༌ཏེ༌ ཡོད༌གྲོ༌།
14 ཨིན༌ནའང༌ ཏ༌ ཁྱོ༌རང༌ངི༌ གྱལ༌སྲིད༌ ཏུས༌གྱུན༌ མི༌ ལུས༌ ཅིའ༌ཟེར༌ན༌ ཡ༌ཝའེ༌ སྙིང༌ ཁོང༌ ཆོགས༌ལ༌ ཡོད༌ཁན༌ནི༌ མི༌ཞིག༌ ལྡམ༌མ༌ ཛདས༌ ཡང༌ ཡ༌ཝའེ༌ ཁོང༌རང༌ངི༌ མི༌གུན༌ནི༌ཀ༌ ཁོ༌ ཝང༌སྲུལ༌པ༌ སྐོའ༌ ཛདས༌ ཅིའ༌ཟེར༌ན༌ ཁྱོ༌རང༌ངི༌ ཡ༌ཝའེ༌ བཀའ༌ སལ༌ཁན༌བོ༌ ཁའ༌ མ༌ཉན༌ན༌ ཨིན༌ནོག༌།”
15 ཏེ༌ནེ༌ ས༌མུའེལ༌ གིལ༌གལ༌ནེ༌ བིང༌ཏེ༌ ཀེན༌ལ༌ བེན༌ཡཱ༌མིན༌ནི༌ ནས༌སའེ༌ ནང༌ང༌ གི༌བེའཧའ༌ སོང༌ ཡང༌ ལུས༌ཏེ༌ ཡོད༌ཁན༌ནི༌ མག༌མི༌ ས༌འུལ༌ ཉམ༌པོ༌ སོང༌།
ས༌འུལ༌ལི༌ ཁོ༌ ཉམ༌པོ༌ ཡོད༌ཁན༌ མག༌མི༌གུན༌ རྩི༌ ཅུགས༌པ༌,
མག༌མི༌ 600 ཡོད༌པིན༌།
ཨིས༌ར༌ཨེལ༌པ༌གུན༌ལ༌ ནོལ༌ཅེས༌སི༌ ཚོན༌ཆ༌ མེད༌།
13:16 ནེ༌ 22
16 ས༌འུལ༌,
ཁོའེ༌ བུ༌ཚ༌ ཡོ༌ན༌ཐན༌ དང༌ ཁོང༌ ཉམ༌པོ༌ ཡོད༌ཁན༌ནི༌ མག༌མི༌གུན༌ བེན༌ཡཱ༌མིན༌ནི༌ ས༌ཀྱད༌ གི༌བེའཧ༌ དུགས༌།
ཕི༌ལིས༌ཏི༌པའེ༌ མག༌མི༌གུན༌ མིཀ༌མཤ༌ཤི༌ ནང༌ང༌ ཀུར༌ ཙུགས༌ཏེ༌ དུགས༌ཏེ༌ ཡོད༌པིན༌།
17 ཕི༌ལིས༌ཏི༌པ༌གུན༌ དུག༌སའེ༌ ནས༌ས༌ནེ༌ སྡེ༌ སུམ༌མི༌ མག༌མི༌ སྤུང༌གོལ༌ ཅོ༌ཅེས༌ལ༌ བིངས༌།
ཅིག༌ ཤུ༌ཨལ༌ལི༌ ས༌ཀྱད༌ ཨོཕ༌རཧ༌ ཆོགས༌ལ༌ སོང༌།
18 ཉིས༌པ༌ བེཐ༌ ཧོ༌རོན༌ ཆོགས༌ལ༌ སོང༌ ཡང༌ སུམ༌པ༌ ཟེ༌བོའེམ༌མི༌ ལུང༌པའེ༌ སན༌ཚམས༌ ཆོགས༌ལ༌ སོང༌ ཀ༌བོ༌ ཐང༌སྟོང༌ངི༌ ཉེ༌མོའ༌ ཡོད༌ཏེ༌ ཨིན༌ནོག༌།
19 ཨིས༌ར༌ཨེལ༌ལི༌ ནས༌ས༌ གང༌པོའེ༌ ནང༌ང༌ ག༌རའ༌ ཅིག༌གའང༌ མེད༌པིན༌ ཅིའ༌ཟེར༌ན༌ ཕི༌ལིས༌ཏི༌པ༌གུན༌ནི༌ ཟེར༌ཏེ༌ ཨིན༌པིན༌,
“ཨིབ༌རི༌པ༌གུན༌ནི༌ ཁོ༌རང༌གུན༌ནི༌ ཕིའ༌ ར༌འི༌ དང༌ དུང༌ གུན༌ ཅོ༌ མ༌གོས༌།”
20 ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ནི༌ ཁོང༌རང༌གུན༌ནི༌ ཤོལ༌ལི༌ ལྕགས༌,
སྟོག༌ཙེ༌,
སྟ༌རི༌ དང༌ ཟོ༌ར༌ གུན༌ལ༌ ཁའ༌ ཏང༌ཅེས༌སི༌ ཕིའ༌ ཕི༌ལིས༌ཏི༌པ༌ ག༌རའ༌གུན༌ནི༌ཀ༌ ཁྱེར༌ གོས༌སད༌པིན༌།
21 ཞིང༌ ལོག༌ཅེས༌སི༌ ལྕགས༌ལ༌ ཁའ༌ ཏང༌ཅེས༌སི༌ ལ༌ཆ༌ མུལ༌ གརམ༌ 8 ཡང༌ སྟ༌རི༌ ཡ༌ ཟོ༌ར༌ ཡ༌ ལྔ༌ཏྲོ༌ སྲུལ༌ཅེས༌སི༌ ལྕགས༌སི༌ བེར༌ཀ༌ ཁའ༌ ཏང༌ཅེས༌སི༌ ལ༌ཆ༌ མུལ༌ གརམ༌ 4 ཏང༌ གོས༌སད༌པིན༌།
22 ཏེ༌བོའེ༌ཕིའ༌ མག༌གི༌ ཞག༌ག༌ ས༌འུལ༌ དང༌ ཡོ༌ན༌ཐན༌ ཉིས༌ཀོ༌ མ༌སྟོག༌ ཨིས༌ར༌ཨེལ༌པ༌ མག༌མི༌གུན༌ནི༌ ལག༌ག༌ ར༌འི༌ དང༌ དུང༌ མེད༌པིན༌།
ཡོ༌ན༌ཐན༌ ཕི༌ལིས༌ཏི༌པ༌གུན༌ལ༌ སྤུང༌གོལ༌ ཅོས༌།
13:23 ནེ༌ 14:14
23 ཕི༌ལིས༌ཏི༌པ༌གུན༌ནི༌ མག༌མིའི༌ སྡེ༌ཞིག༌ མིཀ༌མཤ༌ ཆོགས༌ལ༌ ཆ༌སའེ༌ ལ༌ སྐྱོབས༌ཏེ༌ ཨིས༌ར༌ཨེལ༌པ༌གུན༌ལ༌ ཁྱེར༌ མི༌ཅུག༌ཅེས༌ལ༌ སོང༌།