ས༌མུའེལ༌ལི༌ སྟིང༌ཇུག༌གི༌ ལབ༌ཞ༌།
12:1 ནེ༌ 25
12
ས༌མུའེལ༌ལི༌ ཨིས༌ར༌ཨེལ༌པ༌ ཚང༌མ༌ལ༌ མོལས༌,
“ངའེ༌ ཁྱོ༌ཞའེ༌ ཟེར༌ཁན༌བོའ༌ ཉན༌ཏེ༌ ཁྱོ༌ཞ༌གུན༌ནི༌ ཕིའ༌ གྱལ༌པོ༌ ཞིག༌ ལྡམས༌པིན༌།
2 ཏ༌ ཁྱོ༌ཞའེ༌ གྱལ༌པོ༌ ཁྱོ༌ཞ༌གུན༌ནི༌ སྤོན༌བོ༌ ཨིན༌ནོག༌།
ངའེ༌ སྲ༌ ཀར༌པོ༌ སོང༌ཏེ༌ ང༌ སྒས༌ ཡང༌ ངའེ༌ བུ༌ཚ༌གུན༌ ཁྱོ༌ཞ༌ ཉམ༌པོ༌ ཡོད༌ཏེ༌ ཨིན༌ནོག༌།
ངའེ༌,
ཞུ༌ནུ༌ནེ༌ ཏངས༌ཏེ༌ དག༌ས༌ ཚོག༌པ༌ ཁྱོ༌ཞའེ༌ སྤོན༌བོའེ༌ ཚུལ༌ལ༌ ཞབས༌ཏོག༌ ཞུས༌པིན༌།
3 ཏ༌ ཡ༌ཝ༌ དང༌ ཁོང༌ངི༌ ལྡམས༌ཁན༌ གྱལ༌པོའེ༌ དུན༌ལ༌ ངའེ༌ གྱབ༌གལ༌ལ༌ ཉད༌གལ༌ ཀལ༌ཅེས༌ ཡོད༌ན༌ ཀོལ༌།
སུའི༌ ལང༌ཏོ༌ ཡ༌ བུང༌བུ༌ ངའེ༌ ཁྱེརས༌?
སུའ༌ ངའེ༌ སྐྱོན༌ ཏངས༌ཏེ༌ གོབ༌སྐོརས༌ ཡ༌ གོབ༌ནོན༌ ཏངས༌?
ངའེ༌ ཕག༌སུབ༌ ལེན༌ཏེ༌ སུའ༌ ཁྲིམས༌ཅད༌ ཀྲང༌པོ༌ མ༌ཅོས༌?
ང༌ ཤོད༌དའང༌ ངའེ༌ ནོར༌ཁྲུལ༌ ཅོ༌ཁན༌གུན༌ མེད༌ཁན༌ ཅོ༌ཅེས༌ལ༌ ཅི༌ ཅོ༌གོས༌ནའང༌ ཅོ༌ཨིན༌།”
4 ཁོང༌གུན༌ནི༌ ལན༌ཏངས༌,
“ཉེ༌རང༌ངི༌ ང༌ཞ༌གུན༌ལ༌ མ༌ནེ༌ གོབ༌ མ༌སྐོརས༌ ཡ༌ གོབ༌ནོན༌ མ༌ཏངས༌ ཡང༌ ཉེ༌རང༌ངི༌ ཕག༌སུབ༌ མ༌ནེ༌ མ༌ལེནས༌།”
5 ས༌མུའེལ༌ལི༌ ཟེརས༌,
“ངའ༌ ནོངས༌མེད༌ ཨིན༌ཁན༌ནི༌ སྤང༌པོ༌ ཡ༌ཝ༌ དང༌ ཁོང༌ངི༌ ལྡམ༌མ༌ ཛད༌ཁན༌བོའེ༌ ཏང༌ང༌ ཛད༌ད༌ནོག༌།”
མི༌གུན༌ནི༌ ལན༌ཏངས༌,
“འོ༌ན༌ ཁོང༌ སྤང༌པོ༌ ཞུགས༌ཏེ༌ ཨིན༌།”
6 ས༌མུའེལ༌ལི༌ ཟེརས༌,
“མོ༌ཟེས༌ དང༌ ཨ༌རོན༌ ལྡམ༌མ༌ ཛད༌ཁན༌ ཡ༌ཝ༌ ཞུགས༌ཏེ༌ ཨིན༌ནོག༌,
ཁོང༌ངི༌ ཁྱོ༌ཞ༌གུན༌ནི༌ ཕ༌མེས༌པོ༌གུན༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཁྱོང༌ང༌ ཛདས༌།
7 ཏ༌ འི༌ཀ༌ ཡ༌ཝའེ༌ སྐུན༌དུན༌ལ༌ ལངས༌ཏེ༌ དུག༌,
ངའེ༌ ཁྱོ༌ཞ༌གུན༌ནི༌ ཕ༌མེས༌པོ༌ དང༌ ཁྱོ༌ཞ༌གུན༌ནི༌ ཕིའ༌ ཡ༌ཝའེ༌ ཛད༌ཁན༌ ཀྲང༌པོ༌ ཆག༌ལས༌ ཚང༌མ༌ ཨིད༌ཏུ༌ སྐུལ༌ཏེ༌ ཁྱོ༌ཞའེ༌ ཡ༌ཝའེ༌ཀ༌ ཨིད༌ཤེས༌ མ༌ཅོའ༌ གྱལ༌པོའེ༌ ཕིའ༌ ཞུ༌ཝ༌ ཕུལ༌ཅེས༌པོའ༌ སྐྱོན༌རྗོད༌ ཅོ༌ཨིན༌།”
8 “ཡ༌ཀོབ༌ ཨི༌ཇིབ༌བི༌ ནང༌ང༌ དུགས༌ཏེ༌ ལོ༌ མང༌པོ༌ སྟིང༌ནེ༌,
ཨིས༌ར༌ཨེལ༌པ༌གུན༌ནི༌ ཨི༌ཇིབ༌བི༌ ནང༌ང༌ ངུ༌ཨིན༌ རོགས༌ ཛད༌ཅེས༌ལ༌ ཡ༌ཝའ༌ མོས༌ལམ༌ ཞུས༌པ༌ ཁོང༌ངི༌ མོ༌ཟེས༌ དང༌ ཨ༌རོན༌ ལམ༌ཅུག༌ག༌ ཛདས༌ ཡང༌ ཁོང༌གུན༌ནི༌ ཁྱོ༌ཞའ༌ ཨི༌ཇིབ༌པ༌གུན༌ནི༌ ཀ༌ནེ༌ ཐར༌ཅུགས༌ཏེ༌ འི༌ ས༌ཀྱད༌དི༌ ནང༌ང༌ ཁྱོངས༌།”
9 ཨིན༌ནའང༌ ཁོང༌གུན༌ནི༌ ཡ༌ཝ༌,
ཁོང༌རང༌གུན༌ནི༌ དཀོན༌མཆོག༌ གྱོགས༌པ༌ རྗེད༌ པ༌སང༌ ཁོང༌ངི༌ ཁོང༌གུན༌ སི༌སེ༌རའེ༌ ལག༌ག༌ སྟདས༌,
ཀ༌བོ༌ ཧ༌ཟོར༌རི༌ མག༌མི༌ སྤོན༌བོ༌ ཨིན༌པིན༌ ཡང༌ ཕི༌ལིས༌ཏི༌པ༌གུན༌ དང༌ མོ༌འབ༌བི༌ གྱལ༌པོ༌གུན༌ནི༌ ཁོང༌གུན༌ནི༌ གྱབ༌གལ༌ལ༌ ནོལས༌།
10 ཏེ༌ནེ༌ ཁོང༌གུན༌ནི༌ ཡང༌སྐྱར༌ ཡ༌ཝའ༌ ཞུ༌ཝ༌ ཕུལ༌ཏེ༌ ཟེརས༌,
‘ང༌ཞ༌གུན༌ ཉེ༌རང༌ནེ༌ ཐག༌རིང༌ང༌ སོང༌ཏེ༌ བའལ༌ དང༌ ཨཤ༌ཏོ༌རེཐ༌དི༌ སྐུན༌དྲའ༌ གུན༌ལ༌ ཅོལ༌ཨིན༌ ཞབས༌ཏོག༌ ཞུས༌ཏེ༌ སྡིག༌པ༌ ཅོས༌ཏེ༌ ཨིན༌ནོག༌།
ཏ༌ ཉེ༌རང༌ངི༌ ང༌ཞའ༌,
ང༌ཞའེ༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛད༌དའང༌ ཏེ༌ནེ༌ ང༌ཞ༌གུན༌ནི༌ ཉེ༌རང༌ ཅིག༌པོའ༌ ཅོལ༌ཏེ༌ ཞབས༌ཏོག༌ ཞུ༌ཉན༌ཨིན༌།’
11 ཡ༌ཝའེ༌ གི༌དི༌འོན༌,
བ༌རག༌,
ཡེཕ༌ཐཧ༌ དང༌ ང༌ ལམ༌ཅུག༌ག༌ ཛད༌ཏེ༌ ཁོང༌ངི༌ ཁྱོ༌ཞའ༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛདས༌ ཏེ༌ནེ༌ ཁྱོ༌ཞ༌གུན༌ ཇིགས༌ནང༌ མེད༌པ༌ དུགས༌ཉན༌།”
12 “ཨིན༌ནའང༌ ཨེམ༌མོན༌ནི༌ གྱལ༌པོ༌ ན༌ཧཤ༌ཤི༌ ཁྱོ༌ཞའེ༌ གྱབ༌གལ༌ལ༌ མག༌ ཏང༌ང༌ གྲལ༌གྲིག༌ ཅོའ༌ ཐོང༌ང༌ཅིག༌ ཁྱོ༌ཞ༌གུན༌ནི༌ དཀོན༌མཆོག༌ ཡ༌ཝ༌ ཁྱོ༌ཞའེ༌ གྱལ༌པོ༌ ཞུགས༌ཏེ༌ ཨིན༌ཨིན༌ནའང༌ ཁྱོ༌ཞ༌གུན༌ ང༌ ཡོད༌ས༌ ཡོངས༌ཏེ༌ ཟེརས༌ ‘ང༌ཞའ༌,
ང༌ཞ༌གུན༌ནི༌ཀ༌ ཝང༌ སྲུལ༌ཁན༌ གྱལ༌པོ༌ ཞིག༌ གོས༌སད༌།’
13 ལྟོས༌ ཏ༌,
འི༌ཀ༌ནེ༌ ཁྱོ༌ཞ༌གུན༌ནི༌ ལྡམ༌ཁན༌ནི༌ གྱལ༌པོ༌,
ཁྱོ༌ཞ༌གུན༌ནི༌ ཁོའེ༌ ཕིའ༌ ཞུ༌ཝ༌ ཕུལས༌ ཡང༌ ཡ༌ཝའེ༌ ཁྱོ༌ཞའེ༌ ཞུ༌ཝ༌ ཕུལ༌ཁན༌བོ༌ སལ༌ལ༌ ཛདས༌།
14 ཏ༌ ཀལ༌ཏེས༌ ཁྱོ༌ཞ༌གུན༌ ཡ༌ཝའེ༌ ཇིགས༌སི༌ ནང༌ང༌ ཁོང༌ངི༌ ཁའ༌ཉན༌ཏེ༌ ཁོང༌ང༌ ཞབས༌ཏོག༌ ཞུ༌ན༌ ཡང༌ ཁོང༌ངི༌ བཀའ༌རྒྱ༌གུན༌ནི༌ གྱབ༌གལ༌ མ༌ཅོ༌ན༌,
ཁྱོ༌ཞའེ༌ གྱལ༌པོ༌ དང༌ ཁྱོ༌ཞ༌གུན༌ ཡ༌ཝའེ༌ མོལ༌ཁན༌ནི༌ ལམ༌མི༌ཀ༌ གྲུལ༌ན༌,
ཅི༌ ཚང༌མ༌ གྱལ༌ལ༌ ཆེན༌།
15 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཡ༌ཝའེ༌ བཀའ༌རྒྱ༌གུན༌ནི༌ གྱབ༌གལ༌ ཅོས༌ཏེ༌ ཁོང༌ངི༌ ཞལ༌ཏ༌ ཁའ༌ མ༌ཉན༌ན༌ ཏེ༌ནེ༌ ཁོང༌ངི༌ ཆག༌ ཁྱོ༌ཞའེ༌ཀ༌ མ༌ ལྕིན༌ཏྲེ༌ བབས༌ཨིན༌ ཀ༌ཟུག༌ ཁྱོ༌ཞ༌གུན༌ནི༌ ཕ༌མེས༌པོ༌གུན༌ནི༌ཀ༌ བབས༌ཏེ༌ ཨིན༌པིན༌།”
16 “ཏ༌ ལངས༌ཏེ༌ ཡ༌ཝའེ༌ ཧ༌ལས༌ཤེས༌སི༌ ཆག༌ལས༌ ཛད༌ཅེས༌ཅན༌གུན༌ལ༌ ལྟོས༌།
17 ཀྲོའེ༌ རྔབ༌སའེ༌ ཏུས༌ལ༌ ཆར༌པ༌ མི༌ བབས༌ཤེས༌པོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
ཨིན༌ནའང༌ ངའེ༌ ཡ༌ཝའ༌ བྲུག༌ལྡིར༌ཏེ༌ ཆར༌པ༌ སལ༌ཅེས༌ལ༌ ཞུ༌ཝ༌ ཕུལ༌ཨིན༌།
ཁོང༌ངི༌ ཏེ༌ཟུག༌ ཛད༌ན༌,
ཏེ༌ནེ༌ ཡ༌ཝའ༌ གྱལ༌པོ༌ གོས༌སད༌ ཟེར༌ཏེ༌ ཁྱོ༌ཞའེ༌ ཞུ༌ཝ༌ ཕུལ༌ཁན༌བོ༌ མ༌ ངན༌པ༌ ཨིན༌ཁན༌ ཁྱོ༌ཞ༌གུན༌ལ༌ ཧ༌གོ༌ཨིན༌།”
18 ཏེ༌ནེ༌ ས༌མུའེལ༌ལི༌ ཞུ༌ཝ༌ ཕུལ༌པ༌ ཡ༌ཝའེ༌ བྲུག༌ལྡིར༌ ཅུག༌ག༌ ཛད༌ཏེ༌ ཆར༌པ༌ སལ༌ལ༌ ཛདས༌།
ཡང༌ མི༌ཚང༌མ༌ ཡ༌ཝ༌ དང༌ ས༌མུའེལ༌ལ༌ མ༌སྲན༌ཏྲེ༌ ཇིགས༌།
19 མི༌ཚང༌མའེ༌ ས༌མུའེལ༌ལ༌ ཟེརས༌,
“ཉེ༌རང༌ངི༌ ང༌ཞའེ༌ ཕིའ༌ ཡ༌ཝ༌ དཀོན༌མཆོག༌ག༌ མོས༌ལམ༌ ཞུའ༌ ཛད༌,
ཏེ༌ནེ༌ ང༌ཞ༌གུན༌ ཤི༌ མ༌ཤིའ༌ སོན༌ཏེའ༌ ལུས༌ཨིན༌།
ང༌ཞ༌གུན༌ནི༌ གྱལ༌པོའེ༌ ཕིའ༌ ཞུ༌ཝ༌ ཕུལ༌ཏེ༌ སྡིག༌པ༌གུན༌ནི༌ཀ༌ ནན༌མ༌ སྡིག༌པ༌ ཅོས༌ཏེ༌ ཨིན༌ནོག༌།”
20 “ཇིགས༌ མ༌ཇིགས༌ཤིག༌།”
ས༌མུའེལ༌ལི༌ ཁོང༌གུན༌ལ༌ ཟེརས༌,
“ཁྱོ༌ཞ༌གུན༌ནི༌ ཏན༌ཏན༌ ནོར༌ཁྲུལ༌ ཅོས༌ཏེ༌ ཨིན༌ནོག༌,
ཏ༌ ཡ༌ཝའེ༌ ལམ༌ནེ༌ གྱུར༌ཏེ༌ ཐག༌རིང༌ང༌ མ༌ཆའ༌ ཁྱོ༌ཞའེ༌ སྙིང༌ངི༌ ཐིལ༌ནེ༌ ཁོང༌ ཅིག༌པོའ༌ ཅོལ༌ཅེས༌པོ༌ ཏན༌ཏན༌ ཅོས༌།
21 རིན༌མེད༌དི༌ སྐུན༌དྲ༌གུན༌ལ༌ ཅོལ༌ཅེས༌ལ༌ ལོགས༌ཏེ༌ མ༌ཆ༌།
ཏེ༌གུན༌ནི༌ ཁྱོ༌ཞའ༌ རོགས༌ ཡ༌ ཐར༌ཅུག༌ ཉན༌ན༌ མ༌ནོག༌,
ཏེ༌གུན༌ ཕན༌མི༌ཐོགས༌ ཨིན༌ནོག༌།
22 ཁོང༌ངི༌ རྩི༌ཝ༌ཅན༌ནི༌ ཚན༌ ཟང༌པོ༌ ཏོན༌ལ༌ ཡ༌ཝའེ༌ ཁོང༌རང༌ངི༌ མི༌གུན༌ ཕང༌ང༌ མི༌ཛད༌,
ཅིའ༌ཟེར༌ན༌ ཡ༌ཝ༌ དཀོན༌མཆོག༌ ཁྱོ༌ཞའ༌ ཁོང༌རང༌ངི༌ མི༌གུན༌ ཛད༌ཅེས༌ལ༌ ཐུག༌ཉེས༌ས༌ ཛད༌ད༌ནོག༌།
23 ངའེ༌ སྐོར༌ལ༌ ཟེར༌ན༌,
ངའེ༌ ཁྱོ༌ཞ༌གུན༌ནི༌ ཕིའ༌ མོས༌ལམ༌ ཞུ༌ཅེས༌ ཕངས༌ཏེ༌ ཡ༌ཝའེ༌ གྱབ༌གལ༌ལ༌ སྡིག༌པ༌ མི༌ཅོ༌ ཡང༌ ངའེ༌ ཏ༌རུང༌ངའང༌ ཁྱོ༌ཞའ༌ ཀྲང༌པོ༌ དང༌ འོས༌པ༌ གུན༌ནི༌ སྐོར༌ལ༌ ལབ༌ཞ༌ ཏང༌ཨིན༌།
24 ཨིན༌ནའང༌ ཡ༌ཝའེ༌ ཇིགས༌སི༌ ནང༌ང༌ ཨིད༌ཤེས༌ ཉམ༌པོ༌ ཁོང༌ང༌ སྙིང༌ངི༌ ཐིལ༌ནེ༌ ཞབས༌ཏོག༌ ཞུ༌ཅེས༌པོ༌ ཏན༌ཏན༌ ཅོས༌།
ཁོང༌ངི༌ ཁྱོ༌ཞའེ༌ ཕིའ༌ ཧ༌ལས༌ཤེས༌སི༌ ཆག༌ལས༌ ཛད༌ཁན༌གུན༌ མ༌རྗེད༌ཤིག༌།
25 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ སྡིག༌པ༌ ཅོ༌ཨིན༌ དུག༌ན༌ ཁྱོ༌ཞ༌གུན༌ དང༌ ཁྱོ༌ཞའེ༌ གྱལ༌པོ༌ མེད༌ཁན༌ ཛད༌ཨིན༌།”