ས༌འུལ༌ལི༌ ཨེམ༌མོན༌པ༌གུན༌ལ༌ ཕམ༌ ཀལས༌།
11:1 ནེ༌ 15
11
ཧ༌ལམ༌ ཟླ༌ཝ༌ ཅིག༌གི༌ སྟིང༌ནེ༌ ཨེམ༌མོན༌ནི༌ གྱལ༌པོ༌ ན༌ཧཤ༌ ཁོ༌རང༌ངི༌ མག༌མི༌གུན༌ ཁྲིད༌ཏེ༌ གི༌ལེད༌དི༌ ཡུལ༌ཇོངས༌སི༌ ནང༌ང༌ ཨིས༌ར༌ཨེལ༌པའེ༌ གྱལ༌ས༌ ཡ༌བེཤ༌ལ༌ སྤུང༌གོལ༌ ཅོས༌།
ཡ༌བེཤ༌པ༌ ཚང༌མའེ༌ ཞུ༌ཝ༌ ཕུལ༌ཏེ༌ ཟེརས༌,
“ང༌ཞའ༌ ཉམ༌པོ༌ ཆད༌དོན༌ ཅོས༌ ཏེ༌ནེ༌ ང༌ཞའ༌ ཉེ༌རང༌ངི༌ ང༌ཡོག༌ག༌ དུག༌ཨིན༌།”
2 ཨིན༌ནའང༌ ན༌ཧཤ༌ཤི༌ ཟེརས༌,
“ཀལ༌ཏེས༌ ངའ༌ ཁྱོ༌ཞའ༌ ཚང༌མའེ༌ མིག༌ ཡས༌པ༌ བྲུས༌ཏེ༌ ཕིང༌ཅུག༌ན༌ ངའེ༌ ཁྱོ༌ཞ༌གུན༌ ཉམ༌པོ༌ ཆད༌དོན༌ ཅོ༌ཨིན༌ ཡང༌ ཏེ༌ཟུག༌ ཅོས༌ཏེ༌ ངའེ༌ ཨིས༌ར༌ཨེལ༌པ༌ ཚང༌མའེ༌ཀ༌ ཁྲེལ༌པ༌ ཁྱོང༌ཨིན༌།”
3 ཡ༌བེཤ༌ཤི༌ འུ༌སྐྱོང༌གུན༌ནི༌ ལན༌ཏངས༌,
“ཨིས༌ར༌ཨེལ༌ གང༌པོའེ༌ ནང༌ང༌ ལོན༌ ཀལ༌ཅེས༌ལ༌ ང༌ཞའ༌ ཞག༌པོ༌ རྡུན༌ སལ༌,
ཀལ༌ཏེས༌ ང༌ཞ༌གུན༌ སྐྱོབ༌བ༌ སུ༌ཞིག༌གའང༌ མ༌ཡོང༌ན༌ ཏེ༌ནེ༌ ང༌ཞའེ༌ ང༌ཞ༌རང༌གུན༌ ཉེ༌རང༌ངི༌ ལག༌ག༌ སྟད༌ཨིན༌།”
4 ཏ༌ ལོན༌ ཁྱོང༌ཁན༌བོ༌ གི༌བེའཧའེ༌ ནང༌ང༌ ས༌འུལ༌ལི༌ཀ༌ ལེབས༌ཏེ༌ མི༌གུན༌ལ༌ ནས༌ལུག༌གི༌ སྐོར༌ ཤད༌ད༌ཅིག༌,
ཚང༌མ༌ སྲན༌ཏྲེ༌ ངུས༌།
5 ས༌འུལ༌ ཞིང༌ རྔོ༌ ཚར༌ཏེ༌ ལང༌ཏོ༌གུན༌ ཉམ༌པོ༌ ལོགས༌ཏེ༌ ཁང༌པ༌ ཡོང༌ངད༌པིན༌,
ཁོའེ༌ ཏྲིས༌,
“ཅི༌ སོང༌,
ཅི༌ཕིའ༌ མི༌ཚང༌མ༌ ངུའ༌ནོག༌?”
ཏེ༌ནེ༌ ཁོང༌གུན༌ནི༌ ཁོའ༌ ཡ༌བེཤ༌པ༌གུན༌ནི༌ ཀལ༌ཁན༌ནི༌ ལོན༌བོ༌ ཤདས༌།
6 ཏེ༌བོ༌ ཚོར༌ར༌ཅིག༌ དཀོན༌མཆོག༌གི༌ ཐུག༌ཉིད༌ ས༌འུལ༌ལི༌ཀ༌ སྟོབས༌ ཉམ༌པོ༌ ཕེབས༌ ཡང༌ ཁོའ༌ མ༌སྲན༌ཏྲེ༌ སྲོ༌ ཡོངས༌།
7 ཁོའེ༌ ལང༌ཏོ༌ ཉིས༌ ཁྱོངས༌,
ཏེ༌གུན༌ ཏུམ༌པ༌ཏུམ༌པ༌ ཅོས༌ཏེ༌ ཅདས༌ ཡང༌ ཏེ༌གུན༌ ཨིས༌ར༌ཨེལ༌ གང༌པོའེ༌ ནང༌ང༌ ལོན༌ ཁྱེར༌ཁན༌གུན༌ ཉམ༌པོ༌ ཀལ༌ཏེ༌ འི༌ ལོན༌བོ༌ ཟེར༌ ཟེརས༌,
“ས༌འུལ༌ དང༌ ས༌མུའེལ༌ ཉམ༌པོ༌ མ༌ ཡོང༌ཁན༌གུན༌ནི༌ ལང༌ཏོ༌གུན༌ལ༌ འིན༌ན༌ ཙོགས༌ ཅོ༌ཨིན༌།”
ཡང༌ ཡ༌ཝའེ༌ ཇིགས༌ ནང༌ངི༌ ནང༌ང༌ མི༌ཚང༌མ༌ ཅིག༌ སོང༌ཏེ༌ བིང༌།
8 ས༌འུལ༌ལི༌ བེ༌ཟེག༌གི༌ ནང༌ང༌ ཛོམས༌ཏེ༌ ཡོད༌ཁན༌ནི༌ ཨིས༌ར༌ཨེལ༌པ༌གུན༌ནི༌ ཙི༌རུག༌ ཏང༌ཅུག༌ག༌ཅིག༌ ཁོའ༌ ཏེ༌རུ༌ ཨིས༌ར༌ཨེལ༌ལི༌ ཅང༌ ཆོགས༌སི༌ ཡུལ༌ཇོངས༌ནེ༌ མི༌ 300,000 ཡང༌ ཨིས༌ར༌ཨེལ༌ལི༌ ལྷོ༌ ཆོགས༌སི༌ ཡུལ༌ཇོངས༌ ཡ༌ཧུ༌དཱ༌ སྡེ༌ནེ༌ མི༌ 30,000 ཡོད༌པིན༌།
9 ཏེ༌ནེ༌ ས༌འུལ༌ལི༌ ཡ༌བེཤ༌པ༌གུན༌ལ༌ ལོན༌ ཀལ༌ཏེ༌ ཟེརས༌,
“ཐོ༌རེ༌ ཉིང༌གུང༌ ཚག༌པ༌ ང༌ཞའེ༌ ཁྱོ༌ཞ༌གུན༌ གྲ༌འོའེ༌ ལག༌ནེ༌ ཐར༌ཅུག༌ཨིན༌།”
ཏེ༌ ལོན༌བོ༌ ལེབ༌བ༌ཅིག༌ གྱལ༌ས༌ གང༌པོའེ༌ ནང༌ང༌ མ༌སྲན༌ཏྲེ༌ གའ༌མོ༌ ཇུང༌།
10 ཏེ༌ནེ༌ ཡ༌བེཤ༌པ༌གུན༌ནི༌ ཁོང༌ངི༌ གྲ༌འོ༌གུན༌ལ༌ ཟེརས༌,
“ཐོ༌རེ༌ ང༌ཞའེ༌ ང༌ཞ༌རང༌ ཉེ༌རང༌ངི༌ ལག༌ག༌ སྟད༌ཨིན༌ ཡང༌ ཉེ༌རང༌ངི༌ ང༌ཞའ༌ ཉམ༌པོ༌ ཉེ༌རང༌ ཐད༌ཁན༌བོ༌ ཅོས༌།”
11 ཐོ༌རེ༌ཟུག༌པོ༌ ནམ༌ མ༌ ལངས༌སི༌ སྔུན༌ལ༌ ས༌འུལ༌ལི༌ ཁོ༌རང༌ངི༌ མག༌མི༌གུན༌ སྡེ༌ སུམ༌མི༌ ནང༌ང༌ གོས༌ ཡང༌ ཨེམ༌མོན༌པ༌གུན༌ནི༌ཀ༌ ཧུན༌མེད༌ལ༌ སྤུང༌གོལ༌ ཅོས༌ཏེ༌ ཉིང༌གུང༌ ལེབ༌ལེབ༌ ཚག༌པ༌ ཁོང༌གུན༌ སདས༌།
སོན༌ཏེའ༌ ལུས༌ཁན༌ནི༌ མག༌མི༌གུན༌ ཡན༌ཏེ༌ ཤོར༌,
ཁོང༌ ཅིག༌གའང༌ ཉམ༌པོ༌ མ༌ལུས༌།
12 ཏེ༌ནེ༌ མི༌གུན༌ནི༌ ས༌མུའེལ༌ལ༌ ཟེརས༌,
“ས༌འུལ༌ལི༌ ང༌དང༌གུན༌ནི༌ཀ༌ ཝང༌སྲུལ༌ ཨིན༌ན༌ ཟེར༌ཁན༌གུན༌ ཀ༌རེ༌,
ཁོང༌གུན༌ ང༌ཞའ༌ སྟོད༌ ང༌ཞའེ༌ ཁོང༌གུན༌ སད༌ཨིན༌།”
13 ཨིན༌ནའང༌ ས༌འུལ༌ལི༌ ཟེརས༌,
“དི༌རིང༌ སུ༌ཞིག༌གིའང༌ སྲོག༌ མི༌སྐྱལ༌ ཅིའ༌ཟེར༌ན༌ དི༌རིང༌ ཡ༌ཝའེ༌ ཨིས༌ར༌ཨེལ༌ལ༌ གྱལ༌ཁ༌ སལ༌ལ༌ ཛད༌ཏེ༌ ཨིན༌ནོག༌།”
14 ཏེ༌ནེ༌ ས༌མུའེལ༌ལི༌ མི༌གུན༌ལ༌ ཟེརས༌ “ཡོང༌ཤིག༌ ང༌དང༌ ཚང༌མ༌ གིལ༌གལ༌ལ༌ སོང༌ཏེ༌ ཅིག༌གྲིལ༌ ཉམ༌པོ༌ ས༌འུལ༌ ཡང༌སྐྱར༌ གྱལ༌པོ༌ སྐོ༌ཨིན༌།
15 ཏེ༌ནེ༌ མི༌ ཚང༌མ༌ གིལ༌གལ༌ལ༌ སོང༌ ཡང༌ ཡ༌ཝའེ༌ སྐུན༌དུན༌ལ༌ ས༌འུལ༌ ཁོང༌གུན༌ནི༌ གྱལ༌པོ༌ ཨིན༌ ཟེར༌ཏེ༌ ཁས༌ལེན༌ ཅོས༌།
ཁོང༌གུན༌ནི༌ ཡ༌ཝའ༌ ཞི༌དེའེ༌ ཆོད༌པ༌ ཕུལས༌ ཡང༌ ས༌འུལ༌ དང༌ ཨིས༌ར༌ཨེལ༌པ༌ ཚང༌མའེ༌ སྐྱིད༌པོ༌ ཅོས༌།