ཆད༌དོན༌ནི༌ སྒམ༌ ལོགས༌ཏེ༌ ཀལས༌།
6:1 ནེ༌ 7:1
6
ཕི༌ལིས༌ཏི༌པ༌གུན༌ནི༌ ཡ༌ཝའེ༌ ཆད༌དོན༌ནི༌ སྒམ༌ ཁྱེར༌ཏེ༌ ཟླ༌ཝ༌ རྡུན༌ནི༌ སྟིང༌ནེ༌,
2 ཁོང༌གུན༌ནི༌ བླ༌མ༌གུན༌ དང༌ མོ༌ ཏབ༌ཁན༌གུན༌ བོདས༌ ཡང༌ ཏྲིས༌,
“ཡ༌ཝའེ༌ ཆད༌དོན༌ནི༌ སྒམ༌བོ༌ ཉམ༌པོ༌ ང༌ཞའེ༌ ཅི༌ ཅོ༌,
ང༌ཞ༌གུན༌ལ༌ ཤོད༌དའང༌ འི༌བོ༌ ཁོང༌རང༌ངི༌ ཡུལ༌ལ༌ ཀ༌ཟུག༌གི༌ ལོགས༌ཏེ༌ ཀལ༌?”
3 ཁོང༌གུན༌ནི༌ ཟེརས༌,
“ཨིས༌ར༌ཨེལ༌པའེ༌ དཀོན༌མཆོག༌གི༌ ཆད༌དོན༌ནི༌ སྒམ༌,
ལག༌པ༌ སྟོན༌པ༌ ལོགས༌ཏེ༌ མ༌ཀལ༌ལ༌ སྐྱེས༌ ཉམ༌པོ༌ ཀོལ༌།
ནོངས༌ཅན༌ ཨིན༌ཁན༌ནི༌ ཆོད༌པ༌ ཏེ༌བོ༌ ཉམ༌པོ༌ ཀོལ༌,
ཏེ༌ནེ༌ ཁྱོ༌ཞ༌གུན༌ནི༌ ཟུགས༌པའེ༌ བུ༌རུ༌ ངན༌པ༌གུན༌ ཕན༌ཅུག༌ག༌ ཛད༌ཨིན༌།
ཀལ༌ཏེས༌ ཁྱོ༌ཞ༌གུན༌ གྱལ༌ན༌,
ཁོང༌ངི༌ གྱབ༌གལ༌ལ༌ སྡིག༌པ༌ ཅོ༌ཁན༌བོ༌ ཁྱོ༌ཞ༌གུན༌ལ༌ ཧ༌གོ༌ཨིན༌།”
4 ཁོང༌གུན༌ནི༌ ཏྲིས༌,
“ནོངས༌ཅན༌ ཨིན༌ཁན༌ནི༌ ཆོད༌པ༌ ཀ༌ཟུག༌ རིག༌ ཀལ༌གོས༌?”
ཁོང༌གུན༌ནི༌ ལན༌ཏངས༌,
“ཁྱོ༌ཞའེ༌ ཝང༌སྲུལ༌པ༌ ལྔ༌ དང༌ ཁོང༌ངི༌ ཝང༌ངི༌ ཡོག༌ག༌ ཡོད༌ཁན༌ ནས༌ས༌ ལྔའེ༌ ནང༌ང༌ ནད༌ དང༌ ཆད༌པ༌ ཕོག༌ པ༌སང༌ སེར༌རི༌ བུ༌རུ༌ ལྔ༌ དང༌ སེར༌རི༌ ས༌བི༌ལིག༌ ལྔ༌ ཅོས༌ཏེ༌ ཀལ༌གོས༌།
5 ཨིས༌ར༌ཨེལ༌པའེ༌ དཀོན༌མཆོག༌ག༌ རྩི༌ཝ༌ སྟན༌ཅེས༌ལ༌ བུ༌རུ༌གུན༌ དང༌ ས༌བི༌ལིག༌གུན༌ ཅོས༌ ཀ༌གུན༌ནི༌ ཁྱོ༌ཞའེ༌ ས༌ཀྱད༌ལ༌ ནོད༌པ༌ སྐྱལས༌།
ཏེ༌ནེ༌ ཁོང༌ངི༌ ཁྱོ༌ཞ༌གུན༌,
ཁྱོ༌ཞའེ༌ ལྷ༌ལྷ༌མོ༌གུན༌ དང༌ ཁྱོ༌ཞའེ༌ ས༌ཀྱད༌ལ༌ སལ༌ཁན༌ནི༌ ཏེ༌ ཆད༌པ༌ ཐེན༌ན༌ ཛད༌ སྲིད༌ཅེས༌ ཨིན༌ནོག༌།
6 ཕེ༌རོ༌ དང༌ ཨི༌ཇིབ༌པ༌གུན༌ ཙོགས༌ལ༌ སྙིང༌ སྐྱོང༌པོ༌ མ༌ཅོ༌ཤིག༌།
ཨིས༌ར༌ཨེལ༌པའེ༌ དཀོན༌མཆོག༌གི༌ ཁོང༌གུན༌ལ༌ ཆད༌པ༌ སྲན༌ཏྲེ༌ སལ༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ ཆ༌ཅུག༌ཅེས༌ལ༌ ཁོང༌གུན༌ རིངས༌སད༌པིན༌།”
7 “ཏ༌ ཤིང༌རྟ༌ སོ༌མ༌ཞིག༌ ཅོས༌ ཡང༌ འོ༌མ༌ ཐུང༌ཁན༌ནི༌ བེ༌རྩེ༌ ཡོད༌ཁན༌ བ༌ལང༌ ཉིས༌ ཁྱོང༌,
ཏེ༌གུན༌ལ༌ ཉ༌ཤིང༌ མ༌ནེ༌ མ༌ཀལ༌ལ༌ ཨིན༌ཁན༌བོ༌ ཏན༌ཏན༌ ཅོས༌།
ཤིང༌རྟའ༌ ཀྲུད༌ཅེས༌ལ༌ བ༌ལང༌གུན༌ ཏེ༌བོའ༌ ལྡོམ༌ ཨིན༌ནའང༌ བེ༌རྩེ༌གུན༌ ཁོང༌གུན༌ནེ༌ ཐག༌རིང༌ང༌ ཁྱེར༌ཏེ༌ ཉིན༌བྲའེ༌ ནང༌ང༌ ཀོག༌།
8 ཡ༌ཝའེ༌ ཆད༌དོན༌ནི༌ སྒམ༌ ཤིང༌རྟའེ༌ཀ༌ གྱོང༌ ཡང༌ ཏེ༌བོའེ༌ དུན༌ལ༌ ཞན༌ སྒམ༌ ཞིག༌གི༌ ནང༌ང༌ ཁྱོ༌ཞ༌ ནོངས༌ཅན༌ ཨིན༌ཁན༌ནི༌ ཆོད༌པ༌,
སེར༌ལ༌ ཅོས༌ཁན༌ ས༌བི༌ལིག༌ དང༌ པགས༌པའེ༌ ནད༌དི༌ བུ༌རུ༌ གུན༌ གྱོང༌།
ཏེ༌ནེ༌ བ༌ལང༌གུན༌ ཀ༌རུ༌ ཆ༌ནའང༌ ཆ༌ཅུག༌།
9 ཏེ༌གུན༌ལ༌ ལྟེན༌ དུག༌ ཀལ༌ཏེས༌ ཏེ༌བོ༌ ཁོང༌ངི༌ ནས༌ས༌ བེཐ༌ ཤེ༌མེཤ༌ ཆོགས༌ལ༌ ཆ༌ན༌,
ཡ༌ཝའེ༌ ང༌དང༌གུན༌ནི༌ཀ༌ ཇིགས༌ནང༌ ཁྱོང༌ང༌ ཛད༌ཁན༌བོ༌ ང༌དང༌གུན༌ལ༌ ཧ༌གོ༌ཨིན༌།
ཨིན༌ནའང༌ ཏེ༌ ནས༌ས༌ ཆོགས༌ལ༌ མ༌ཆའ༌ན༌ ཏེ༌ནེ༌ ཡ༌ཝའེ༌ ང༌དང༌གུན༌ནི༌ཀ༌ ཏེ༌ ཚང༌མ༌ ཁྱོང༌ང༌ མ༌ཛད༌ད༌ ང༌དང༌ངི༌ཀ༌ ཏེ༌ ཚང༌མ༌ སྐྱེན༌ངན༌ ཞིག༌ ཇུངས༌ཏེ༌ ཨིན༌ནོག༌།”
10 ཏེ༌ ལབ༌ཞ༌ ཏང༌ཁན༌གུན༌ ཁོང༌གུན༌ནི༌ ཅོས༌།
ཤིང༌རྟའ༌ ཀྲུད༌ཅེས༌ལ༌ བ༌ལང༌ ཉིས༌ ལྡམས༌ ཡང༌ བེ༌རྩེ༌གུན༌ ཉིན༌བྲའེ༌ ནང༌ང༌ ཀགས༌།
11 ཡ༌ཝའེ༌ ཆད༌དོན༌ནི༌ སྒམ༌ ཡང༌ སེར༌རི༌ ས༌བི༌ལིག༌ དང༌ པགས༌པའེ༌ ནད༌དི༌ བུ༌རུ༌ གུན༌ གྱངས༌ཁན༌ནི༌ སྒམ༌,
ཤིང༌རྟའེ༌ཀ༌ ཀལས༌།
12 བ༌ལང༌གུན༌ འི༌ངོ༌ འ༌ངོའ༌ མ༌གྱུར༌ར༌ ཁ༌དྲང༌ང༌ བེཐ༌ ཤེ༌མེཤ༌ ཆོགས༌ལ༌ སོང༌ ཡང༌ ལམ༌ནེ༌ ཆ༌ ཟ༌ནེ༌ ཏེ༌གུན༌ནི༌ བའ༌ ཏང༌ངད༌པིན༌།
ཕི༌ལིས༌ཏི༌པ༌ ཝང༌སྲུལ༌པ༌གུན༌ ཏེ༌གུན༌ནི༌ གྱབ༌ནེ༌ བེཐ༌ ཤེ༌མེཤ༌སི༌ སན༌ཚམས༌ ཚོག༌པ༌ སོང༌།
13 བེཐ༌ ཤེ༌མེཤ༌པ༌གུན༌ནི༌ ལུང༌པའེ༌ ནང༌ང༌ ཀྲོ༌ རྔའད༌པིན༌ ཡང༌ ཤིང༌རྟའེ༌ཀ༌ ཆད༌དོན༌ནི༌ སྒམ༌བོ༌ ཐོང༌ང༌ཅིག༌ ཁོང༌གུན༌ མ༌སྲན༌ཏྲེ༌ ཐད༌།
14 ཤིང༌རྟ༌བོ༌ བེཐ༌ ཤེ༌མེཤ༌པ༌ ཡོ༌ཤུའེ༌ ཞིང༌ངི༌ཀ༌ ཡོངས༌ ཡང༌ ཕོ༌ལོངས༌ ཆེན༌མོ༌ཞིག༌གི༌ དུན༌ལ༌ དུགས༌།
ཏེ༌ནེ༌ མི༌གུན༌ནི༌ ཤིང༌རྟའ༌ ཅགས༌ ཡང༌ བ༌ལང༌གུན༌ སད༌ཏེ༌ ཏེ༌ ཤིང༌བོའེ༌ཀ༌ མེའ༌ སྲགས༌ཏེ༌ ཡ༌ཝའ༌ ཆོད༌པ༌ ཕུལས༌།
15 ལི༌ཝི༌པ༌གུན༌ནི༌ ཡ༌ཝའེ༌ ཆད༌དོན༌ནི༌ སྒམ༌ དང༌ སེར༌རི༌ ས༌བི༌ལིག༌གུན༌ དང༌ པགས༌པའེ༌ ནད༌དི༌ བུ༌རུ༌ གྱངས༌ཏེ༌ ཡོད༌ཁན༌ནི༌ སྒམ༌ གུན༌ ཤིང༌རྟའེ༌ ཀ༌ནེ༌ ཕབས༌ཏེ༌ ཕོ༌ལོངས༌ ཆེན༌མོའེ༌ཀ༌ བོརས༌།
ཏེན༌ན༌ ཞག༌ག༌ བེཐ༌ ཤེ༌མེཤ༌པ༌གུན༌ནི༌ སྲོག༌ དང༌ མེའ༌ སྲགས༌ཁན༌ནི༌ ཆོད༌པ༌ ཡ༌ཝའ༌ ཕུལས༌།
16 ཕི༌ལིས༌ཏི༌པའེ༌ ཝང༌སྲུལ༌པ༌ ལྔ༌ཀོའེ༌ ཏེ༌ ཚང༌མ༌ ཐོང༌ཏེ༌ སྟིང༌ནེ༌ ཏེན༌ན༌ ཞག༌ག༌ ཨེཀ༌རོན༌ལ༌ ལོགས༌ཏེ༌ སོང༌།
17 ཏེ༌ སེར༌རི༌ པགས༌པའེ༌ ནད༌དི༌ བུ༌རུ༌ ལྔ༌ཀོ༌ ཨཤ༌དོད༌,
ག༌ཟ༌,
ཨཤ༌ཀེ༌ལོན༌,
གཱད༌ དང༌ ཨེཀ༌རོན༌ གྱས༌ས༌ གུན༌ནི༌ ཕིའ༌ ཕི༌ལིས༌ཏི༌པ༌གུན༌ ནོངས༌ཅན༌ ཨིན༌ཁན༌ནི༌ ཆོད༌པ༌ ཡ༌ཝའ༌ ཀལ༌ཏེ༌ ཨིན༌པིན༌།
18 ཡང༌ སེར༌རི༌ ས༌བི༌ལིག༌ ལྔ༌ཀོ༌,
ཝང༌སྲུལ༌པ༌ ལྔའེ༌ ཝང༌ངི༌ ཡོག༌ག༌ ཡོད༌ཁན༌ནི༌ ཕི༌ལིས༌ཏི༌པའེ༌ གྱལ༌ས༌ ལྔ༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌པ༌ གུན༌ནི༌ ཆོགས༌ནེ༌ ཡ༌ཝའེ༌ ཕིའ༌ སྐྱེས༌ ཨིན༌ནོག༌།
ཏེ༌རུ༌ ཇུང༌ཁན༌གུན༌ནི༌ སྤང༌པོ༌ ཏང༌ཅེས༌ལ༌ ཡ༌ཝའེ༌ ཆད༌དོན༌ནི༌ སྒམ༌ བོར༌ཁན༌ བེཐ༌ ཤེ༌མེཤ༌སི༌ ཕོ༌ལོངས༌ ཆེན༌མོ༌ ཏ༌རུང༌ངའང༌ ཡོ༌ཤུའེ༌ ཞིང༌ངི༌ཀ༌ ཡོད༌ཏེ༌ ཨིན༌ནོག༌།
19 ཨིན༌ནའང༌ ཡ༌ཝའེ༌ བེཐ༌ ཤེ༌མེཤ༌པ༌ མི༌ རྡུན༌ཅུ༌ སདས༌ ཅིའ༌ཟེར༌ན༌ ཁོང༌གུན༌ནི༌ ཡ༌ཝའེ༌ ཆད༌དོན༌ནི༌ སྒམ༌ ཕེས༌ཏེ༌ ལྟས༌ ཡང༌ ཡ༌ཝའེ༌ སྲན༌ཏྲེ༌ ཆད༌པ༌ སལ༌ཁན༌བོའེ༌ཀ༌ མི༌གུན༌ནི༌ ཉ༌ངན༌ ཅོས༌།
20 ཁོང༌གུན༌ནི༌ ཟེརས༌,
“ཡ༌ཝ༌ ཏམ༌པ༌ དཀོན༌མཆོག༌གི༌ དུན༌ལ༌ སུ༌ ལངས༌ཏེ༌ དུག༌ ཐུབ༌ཨིན༌།
ང༌དང༌གུན༌ནི༌ ཆད༌དོན༌ནི༌ སྒམ༌བོ༌ འི༌ཀ༌ནེ༌ ཀ༌རུ༌ ཀལ༌ཨིན༌།”
21 ཏེ༌ནེ༌ ཁོང༌གུན༌ནི༌ ཀི༌རི༌འཐ༌ ཡེ༌རིམ༌པ༌གུན༌ལ༌ ལོན༌ ཀལ༌ཏེ༌ ཟེརས༌,
“ཡ༌ཝའེ༌ ཆད༌དོན༌ནི༌ སྒམ༌བོ༌ ཕི༌ལིས༌ཏི༌པ༌གུན༌ནི༌ ལོགས༌ཏེ༌ ཀལ༌ཏེ༌ དུག༌།
འི༌རུ༌ ཡོང༌ཏེ༌ ཏེ༌བོ༌ ཁྱེར༌།”