ཕི༌ལིས༌ཏི༌པ༌གུན༌ ཕྲོའ༌ ཆད༌དོན༌ནི༌ སྒམ༌།
5:1 ནེ༌ 12
5
དཀོན༌མཆོག༌གི༌ ཆད༌དོན༌ནི༌ སྒམ༌ ཕི༌ལིས༌ཏི༌པ༌གུན༌ནི༌ ཀོགས༌ཏེ༌ སྟིང༌ནེ༌ ཏེ༌བོ༌ ཁོང༌གུན༌ནི༌ ཨེ༌བི༌ནེ༌ཟེར༌ གྲོང༌ཁྱེར༌ནེ༌ ཨཤ༌དོད༌ གྱལ༌ས༌ ཁྱེརས༌།
2 ཏེ༌རུ༌ ཁོང༌གུན༌ནི༌ ཆད༌དོན༌ནི༌ སྒམ༌བོ༌ གྲ༌གོན༌ནི༌ ཆོད༌ཁང༌ངི༌ ནང༌ང༌ ཁྱེར༌ཏེ༌ གྲ༌གོན༌a སྐུན༌དྲའེ༌ དུན༌ལ༌ བོརས༌།
3 ཐོ༌རེ༌ཟུག༌པོ༌ ང༌མོ༌ནེ༌ ཨཤ༌དོད༌དི༌ ཡུལ༌མི༌གུན༌ ཏེ༌རུ༌ ཆའ༌ཅིག༌,
ཁོང༌གུན༌ལ༌ གྲ༌གོན༌ སྐུན༌དྲ༌ ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ ཁལ༌བུག༌ག༌ གྱེལ༌ཏེ༌ ཐོང༌།
ཏེ༌ནེ༌ ཁོང༌གུན༌ནི༌ གྲ༌གོན༌ནི༌ སྐུན༌དྲ༌ ཁུརས༌ ཡང༌ ཁོ༌རང༌ངི༌ ནས༌སའེ༌ཀ༌ ལོགས༌ཏེ༌ བོརས༌།
4 ཨིན༌ནའང༌ སྟིང༌མ༌ ཞག༌གི༌ ང༌མོ༌ ཏེན༌ན༌ ཙོགས༌ ཇུང༌,
གྲ༌གོན༌ནི༌ སྐུན༌དྲ༌ ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ ཡང༌སྐྱར༌ ཁལ༌བུག༌ག༌ གྱེལ༌ཏེ༌ གོ༌ དང༌ ལག༌པ༌ ཉིས༌ཀོ༌ ཆག༌ཏེ༌ ཆོད༌ཁང༌ངི༌ སྒོའེ༌ དུན༌ལ༌ ལེབས༌ཏེ༌ ཐོང༌ ཨིན༌ནའང༌ ཁོའེ༌ ཟུགས༌པོ༌ མ༌ ཆག༌ག༌ ཡོད༌པིན༌།
5 ཏེན༌ན༌བོའེ༌ ཞས༌ཏེ༌ དི༌རིང༌ངའང༌ ཨཤ༌དོད༌དི༌ ནས༌སའེ༌ ནང༌ང༌ གྲ༌གོན༌ནི༌ ཆོད༌ཁང༌ངི༌ ནང༌ང༌ ཅོལ༌ལ༌ ཆའ༌ཁན༌ བླ༌མ༌གུན༌ དང༌ ཞན༌ ཚང༌མའེ༌ སྒོའེ༌ དུན༌ནི༌ ནས༌སའེ༌ཀ༌ ཀོམ༌པ༌ མ༌བོར༌ར༌ གོམས༌ཏེ༌ ཆའ༌ནོག༌།
6 ཡ༌ཝའེ༌ ཨཤ༌དོད༌ དང༌ ཏེ༌ ཉེ༌ཁོར༌ལ༌ དུག༌ཁན༌གུན༌ལ༌ ཆད༌པ༌ ཅད༌ད༌ ཛད༌ཏེ༌ པགས༌པའེ༌ ཟུ༌མོ༌ རྩོག༌པོ༌ ཡོང༌ ཅུག༌ག༌ ཛདས༌།
7 ཨཤ༌དོད༌པ༌གུན༌ལ༌ ཏེ༌ ཇུང༌ཨིན༌ ཡོད༌ཁན༌གུན༌ ཧ༌གོའ༌ཅིག༌,
ཁོང༌གུན༌ནི༌ ཟེརས༌,
“ཨིས༌ར༌ཨེལ༌པའེ༌ དཀོན༌མཆོག༌གི༌ ཆད༌དོན༌ནི༌ སྒམ༌ ང༌ཞའེ༌ ནས༌སའེ༌ ནང༌ང༌ བོར༌ར༌ མེད༌ ཅིའ༌ཟེར༌ན༌ ཁོང༌ངི༌ ང༌ཞའ༌ དང༌ ང༌ཞའེ༌ ལྷ༌ གྲ༌གོན༌ལ༌ ཆད༌པ༌ སལ༌ཏེ༌ ཁྲེས༌ཏོར༌ ཛད༌ཨིན༌ ཨིན༌ནོག༌།”
8 ཏེ༌བོའེ༌ཕིའ༌ ཁོང༌གུན༌ནི༌ ཕི༌ལིས༌ཏི༌པའེ༌ ཝང༌སྲུལ༌པ༌གུན༌ བོདས༌ ཡང༌ ཏྲིས༌,
“ང༌དང༌གུན༌ནི༌ ཨིས༌ར༌ཨེལ༌པའེ༌ དཀོན༌མཆོག༌གི༌ ཆད༌དོན༌ནི༌ སྒམ༌ ཉམ༌པོ༌ ཅི༌ ཅོ༌ཨིན༌?”
གྲོས༌དུར༌ ཅོས༌ཏེ༌ ཁོང༌གུན༌ནི༌ ལན༌ཏངས༌,
“དཀོན༌མཆོག༌གི༌ ཆད༌དོན༌ནི༌ སྒམ༌ གཱད༌དི༌ གྲོང༌ཁྱེར༌ལ༌ ཁྱེར༌།”
ཏེ༌ནེ༌ ཁོང༌གུན༌ནི༌ ཏེ༌བོ༌ གཱད༌དི༌ གྱལ༌ས༌ ཁྱེརས༌།
9 ཨིན༌ནའང༌ ཆད༌དོན༌ནི༌ སྒམ༌ གཱད༌དི༌ ནང༌ང༌ བོར༌ཏེ༌ ཡོད༌ ཟ༌ནེ༌ ཏེ༌ མི༌གུན༌ནི༌ཀའང༌ ཡ༌ཝའེ༌ ཆད༌པ༌ བབས༌ཏེ༌ ཁོང༌ ཚང༌མའེ༌ ནང༌ང༌ ཇིགས༌ནང༌ སྲན༌ཏྲེ༌ སྐྱེས༌།
ཞུ༌ནུ༌ དང༌ རྒད༌པོ༌ ཚང༌མའ༌ ཁོང༌ངི༌ པགས༌པའེ༌ ཟུ༌མོ༌ རྩོག༌པོ༌ ཡོང༌ ཅུག༌ག༌ ཛདས༌།
10 ཏེ༌བོའེ༌ཕིའ༌ ཁོང༌གུན༌ནི༌ དཀོན༌མཆོག༌གི༌ ཆད༌དོན༌ནི༌ སྒམ༌ ཨེཀ༌རོན༌ནི༌ གྱལ༌ས༌ ཀལས༌།
ཨིན༌ནའང༌ ཨེཀ༌རོན༌པ༌གུན༌ནི༌ ཏེ༌བོ༌ ཁྱོང༌ང༌ ཐོང༌ང༌ཅིག༌ ཁོང༌གུན༌ནི༌ ཀུ༌ཅོ༌ ཏངས༌ཏེ༌ ཟེརས༌,
“ང༌དང༌ངའང༌ སད༌ཅེས༌ལ༌ ཁོང༌གུན༌ནི༌ ཨིས༌ར༌ཨེལ༌པའེ༌ དཀོན༌མཆོག༌གི༌ ཆད༌དོན༌ནི༌ སྒམ༌ འི༌རུ༌ ཁྱོང༌དུག༌།”
11 ཁོང༌གུན༌ནི༌ ཕི༌ལིས༌ཏི༌པའེ༌ ཝང༌སྲུལ༌པ༌གུན༌ལ༌ བོད༌ཏེ༌ ཞུ༌ཝ༌ ཕུལས༌,
“ཇུ༌ཇུ༌ ཨིས༌ར༌ཨེལ༌པའེ༌ དཀོན༌མཆོག༌གི༌ ཆད༌དོན༌ནི༌ སྒམ༌ ཁོང༌རང༌ངི༌ ཡུལ༌ལ༌ ལོགས༌ཏེ༌ ཀལ༌ལ༌ ཛད༌,
ཏེ༌ མ༌ནེ༌ ཏེ༌བོའེ༌ ང༌ཞ༌གུན༌ སད༌ད༌ནོག༌” ཅིའ༌ཟེར༌ན༌ ཤི༌ཅེས༌སི༌ ཇིགས༌ནང༌ གྱལ༌ས༌ གང༌པོའེ༌ མི༌ཚང༌མའེ༌ ནང༌ང༌ ཡོད༌པིན༌།
དཀོན༌མཆོག༌གི༌ ཁོང༌གུན༌ལ༌ སྲན༌ཏྲེ༌ ཆད༌པ༌ སལ༌ལ༌ ཛདས༌།
12 ཨེཀ༌རོན༌པ༌ མང༌པོ༌ ཤི༌ ཡང༌ མ༌ ཤི༌ཁན༌གུན༌ལ༌ པགས༌པའེ༌ ཟུ༌མོ༌ རྩོག༌པོ༌ ཡོང༌ཏེ༌ མ༌ ནགས༌ ཐོང༌ངད༌པིན༌ ཏེ༌བོའེ༌ཕིའ༌ ཁོང༌གུན༌ནི༌ ཁོ༌རང༌གུན༌ནི༌ ལྷ༌ལྷ༌མོ༌གུན༌ལ༌ རོགས༌སི༌ ཕིའ༌ ཞུ༌ཝ༌ ཕུལས༌།