ཕི༌ལིས༌ཏི༌པ༌གུན༌ནི༌ ཆད༌དོན༌ནི༌ སྒམ༌ ཀོགས༌ཏེ༌ ཁྱེརས༌།
4:1 ནེ༌ 11
4
ས༌མུའེལ༌ལི༌ ཡ༌ཝའེ༌ ལོན༌གུན༌ ཨིས༌ར༌ཨེལ༌པ༌ ཚང༌མ༌ ཁྱོང༌ངད༌པིན༌།
ཏེ༌ཏུས༌ ཨིས༌ར༌ཨེལ༌པ༌གུན༌ ཕི༌ལིས༌ཏི༌པ༌གུན༌ལ༌ མག༌ཏང༌ང༌ སོང༌།
ཨིས༌ར༌ཨེལ༌ལི༌ མག༌མི༌ ཨེ༌བི༌ནེ༌ཟེར༌རི༌ ནང༌ང༌ ཡང༌ ཕི༌ལིས༌ཏི༌པ༌གུན༌ནི༌ མག༌མི༌ ཨ༌ཕེག༌གི༌ ནང༌ང༌ ཀུར༌ ཙུགས༌ཏེ༌ དུགས༌ཏེ༌ ཡོད༌པིན༌།
2 ཕི༌ལིས༌ཏི༌པ༌གུན༌ནི༌ སྤུང༌གོལ༌ ཅོས༌ ཡང༌ ཨིས༌ར༌ཨེལ༌པ༌གུན༌ལ༌ ཕམ༌ ཀལ༌ཏེ༌ ཏེན༌ན༌ ནས༌སའེ༌ཀ༌ ཁོང༌ངི༌ མག༌མི༌ སྟོང༌ ཞི༌ ཟམ༌ཤིག༌ སདས༌།
3 ཨིས༌ར༌ཨེལ༌པའེ༌ མག༌མི༌ ལུས༌ཁན༌གུན༌ ཀུར༌ ཙུགས༌ཏེ༌ ཡོད༌སའེ༌ ནས༌ས༌ ལོགས༌ཏེ༌ ཡོང༌ང༌ཅིག༌,
འུ༌སྐྱོང༌གུན༌ནི༌ ཁོང༌གུན༌ལ༌ ཟེརས༌,
“ཅི༌ཕིའ༌ ཡ༌ཝའེ༌ ཕི༌ལིས༌ཏི༌པ༌གུན༌ལ༌ གྱལ༌ཁ༌ སལ༌ལ༌ ཛད༌ཏེ༌ ཨིན༌ནོག༌?
ཤི༌ལོའེ༌ ནང༌ང༌ ཡོད༌ཁན༌ ཡ༌ཝའེ༌ ཆད༌དོན༌ནི༌ སྒམ༌བོ༌ ང༌དང༌ངི༌ ང༌དང༌ ཉམ༌པོ༌ ཁྱེར༌ཨིན༌ ཏེ༌ནེ༌ ཡ༌ཝ༌ ང༌དང༌ངི༌ ཕྲོའ༌ ཞུགས༌ཏེ༌ ང༌དང༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛད༌ཨིན༌།”
4 ཏེ༌བོའེ༌ཕིའ༌ ཁོང༌གུན༌ནི༌ མི༌རིག༌ ཤི༌ལོའ༌ ཀུན༌ཝང༌ ཡ༌ཝའེ༌ ཆད༌དོན༌ནི༌ སྒམ༌བོ༌ ཁྱོང༌ང༌ལ༌ ལམ༌ཅུགས༌,
ཡ༌ཝ༌ ཆེ༌ར༌བེམ༌མི༌a ཕར༌ལ༌ ཞུགས༌ཁྲིས༌སི༌ཀ༌ ཞུགས༌ས༌ ཛད༌ཏེ༌ ཨིན༌ནོག༌།
དཀོན༌མཆོག༌གི༌ ཆད༌དོན༌ནི༌ སྒམ༌ ཉམ༌པོ༌ ཨེ༌ལི༌ བུ༌ཚ༌ ཧོཕ༌ནི༌ དང༌ ཕི༌ནི༌ཧས༌ ཉིས༌ཀོ༌ ཡོངས༌།
5 ཡ༌ཝའེ༌ ཆད༌དོན༌ནི༌ སྒམ༌ ཀུར༌ ཙུགས༌ཏེ༌ ཡོད༌ས༌ ཆོགས༌ལ༌ ཁྱོང༌ང༌ ཨིས༌ར༌ཨེལ༌པ༌ ཚང༌མའེ༌ ཐོང༌ང༌ཅིག༌ ཁོང༌གུན༌ནི༌ ཐད༌པོའེ༌ ཀུ༌ཅོ༌ ཏངས༌ཏེ༌ ས༌ཀྱད༌ སྐུལས༌།
6 ཕི༌ལིས༌ཏི༌པ༌གུན༌ནི༌ ཀུ༌ཅོ༌ ཚོར༌ར༌ཅིག༌ ཟེརས༌,
“ཨིབ༌རི༌པ༌གུན༌ནི༌ ཀུར༌ ཙུག༌སའེ༌ ནས༌ས༌ནེ༌ ཀུ༌ཅོ༌བོ༌ ཅི༌ ཨིན༌ནོག༌?”
ཏེ༌ནེ༌ ཡ༌ཝའེ༌ ཆད༌དོན༌ནི༌ སྒམ༌ ལེབས༌ཏེ༌ ཨིན༌ཁན༌ ཁོང༌གུན༌ལ༌ ཧ༌གོ༌།
7 དཀོན༌མཆོག༌ ཨིས༌ར༌ཨེལ༌པའེ༌ ཀུར༌ ཙུག༌སའེ༌ཀ༌ ཁོང༌གུན༌ནི༌ ཕྲོའ༌ སྐྱོད༌ཏེ༌ ཨིན༌ནོག༌ སམས༌ཏེ༌ ཁོང༌གུན༌ སྲན༌ཏྲེ༌ ཇིགས༌ ཡང༌ ཟེརས༌,
“ཏ༌ ཇིགས༌པ༌ སྲན༌ཏྲེ༌ ཨིན༌ནོག༌།
དག༌ས༌ ཚག༌པ༌ ང༌དང༌གུན༌ ཉམ༌པོ༌ འི༌ ཙོགས༌ མ༌ནེ༌ མ༌ཇུང༌ང༌ ཨིན༌ནོག༌།
8 ང༌དང༌ངི༌ཀ༌ ཇིགས༌པ༌ སྲན༌ཏྲེ༌ ཨིན༌ནོག༌།
ཨིས༌ར༌ཨེལ༌པའེ༌ ཁྱུད༌ཅན༌ དཀོན༌མཆོག༌གི༌ ཀ༌ནེ༌ ང༌དང༌གུན༌ སུའི༌ སྐྱོབ༌ཨིན༌།
ཐང༌སྟོང༌ངི༌ ནང༌ང༌ ཡ༌ཝའེ༌ ཨི༌ཇིབ༌པ༌གུན༌ལ༌ ཇིགས༌ནང༌ཅན༌ནི༌ ཆད༌པ༌ སྣ༌ཚོགས༌ སལ༌ལ༌ ཛདས༌།
9 ཕི༌ལིས༌ཏི༌པ༌གུན༌,
སྟོབས༌ཅན༌ གྱུར༌ཏེ༌ ནོལ༌,
ཏེ༌མན༌ན༌ ཁོང༌གུན༌ནི༌ཀ༌ ང༌དང༌ངི༌ ཝང༌སྲུལ༌ལ༌ ཙོགས༌ལ༌ ཨིབ༌རི༌པ༌གུན༌ནི༌ ང༌དང༌གུན༌ནི༌ཀ༌ ཝང༌སྲུལ༌ཨིན༌།
བུ༌ཚ༌ ཙོགས༌ལ༌ སྤོས༌པ༌ ལེན༌ཏེ༌ ནོལ༌ཤིག༌།”
10 ཏེ༌བོའེ༌ཕིའ༌ ཕི༌ལིས༌ཏི༌པ༌གུན༌ནི༌ སྙིང༌ ཏངས༌ཏེ༌ ནོལས༌ ཡང༌ ཨིས༌ར༌ཨེལ༌པ༌གུན༌ལ༌ ཡང༌སྐྱར༌ ཕམ༌ཀལས༌།
མི༌ མང༌པོ༌ སདས༌,
ཨིས༌ར༌ཨེལ༌པ༌ མག༌མི༌ 30,000 ཤི༌།
སོན༌ཏེའ༌ ལུས༌ཁན༌གུན༌ ཁོ༌རང༌གུན༌ནི༌ ཁང༌པ༌ ཤོར༌ཏེ༌ སོང༌།
11 དཀོན༌མཆོག༌གི༌ ཆད༌དོན༌ནི༌ སྒམ༌ ཕི༌ལིས༌ཏི༌པ༌གུན༌ནི༌ ཀོགས༌ཏེ༌ ཁྱེརས༌ ཡང༌ ཁོང༌གུན༌ནི༌ ཨེ༌ལི༌ བུ༌ཚ༌ ཧོཕ༌ནི༌ དང༌ ཕི༌ནི༌ཧས༌ ཉིས༌ཀོ༌ སདས༌།
ཨེ༌ལི༌ ཤི༌།
4:12 ནེ༌ 22
12 ཏེན༌ན༌ ཞག༌ག༌ བེན༌ཡཱ༌མིན༌ནི༌ སྡེ༌ནེ༌ ཨིན༌ཁན༌ མི༌ཞིག༌ མག༌གི༌ ཐང༌ནེ༌ ཤོར༌ཏེ༌ ཤི༌ལོའ༌ ལེབ༌།
ཚེར༌ཁ༌ སྟན༌ཏེ༌ ཁོའེ༌ ཁོ༌རང༌ངི༌ ཀོས༌ལག༌ ཤགས༌ ཡང༌ གོའེ༌ཀ༌ ཐལ༌བ༌ ལུགས༌།
13 ཨེ༌ལི༌ ལམ༌མི༌ ཐའ༌མའེ༌ཀ༌ མག༌གི༌ སྐོར༌ལ༌ ནས༌ཚུལ༌ ཉན༌ཅེས༌ལ༌ སྲུངས༌ཏེ༌ ཡོད༌པིན༌ ཅིའ༌ཟེར༌ན༌ དཀོན༌མཆོག༌གི༌ ཆད༌དོན༌ནི༌ སྒམ༌བོ༌ སྟན༌པོ༌ ཡོད༌ད༌ མེད༌ སམས༌ཏེ༌ ཁོ༌ ཚེར༌རད༌པིན༌།
མི༌བོ༌ གྱལ༌སའེ༌ ནང༌ང༌ ལེབས༌ཏེ༌ ཇུང༌ཁན༌ནི༌ ནས༌ཚུལ༌ ཤད༌ད༌ཅིག༌ ཇིགས༌ནང༌ སྐྱེས༌ཏེ༌ གྱལ༌ས༌ གང༌པོའེ༌ ནང༌ང༌ ཧི༌ལིངས༌ བིང༌།
14 ཏེ༌ སྐད༌གུན༌ ཚོར༌ར༌ཅིག༌ ཨེ༌ལི༌ ཏྲིས༌,
“འི༌ ཀུ༌ཅོ༌ ཅི༌ཕིའ༌ ཨིན༌ནོག༌?”
མི༌བོ༌ ཨེ༌ལི༌ ཡོད༌ས༌ བང༌ཏངས༌ཏེ༌ ཡོངས༌ ཡང༌ ནས༌ཚུལ༌ ཤདས༌།
15 ཏ༌ ཨེ༌ལིའ༌ ལོ༌ 98 ཆའད༌པིན༌ ཡང༌ ཁོ༌ ཞ༌ར༌ གྱུད༌ཏེ༌ ཡོད༌པིན༌།
16 ཁོའེ༌ ཨེ༌ལིའ༌ ཟེརས༌,
“ང༌ དག༌ས༌རང༌ མག༌གི༌ ཐང༌ནེ༌ ཡོངས༌པིན༌,
ང༌ ཏེ༌ཀ༌ནེ༌ ཤོར༌ཏེ༌ དི༌རིང༌རང༌ ཡོངས༌པིན༌།”
ཨེ༌ལི༌ ཏྲིས༌,
“ཅི༌ སོང༌,
ངའེ༌ བུ༌ཚ༌?”
17 ལོན༌ ཁྱོང༌ཁན༌བོའེ༌ ལན༌ཏངས༌,
“ཨིས༌ར༌ཨེལ༌པ༌གུན༌ལ༌ ཕི༌ལིས༌ཏི༌པ༌གུན༌ནི༌ ཕམ༌ཀལས༌།
མག༌མི༌ མང༌པོ༌ སདས༌,
ཉེ༌རང༌ངི༌ བུ༌ཚ༌ ཧོཕ༌ནི༌ དང༌ ཕི༌ནི༌ཧས༌ ཉིས༌ཀོའང༌།
ཁོང༌གུན༌ནི༌ དཀོན༌མཆོག༌གི༌ ཆད༌དོན༌ནི༌ སྒམ༌མའང༌ ཁྱེརས༌།
18 ལོན༌ ཁྱོང༌ཁན༌ནི༌ ཆད༌དོན༌ནི༌ སྒམ༌ ཉམ༌པོ༌ ཇུང༌ཁན༌གུན༌ ཤད༌ད༌ཅིག༌,
ཨེ༌ལི༌ གྱས༌སྒོའེ༌ དུན༌ལ༌ དུག༌ཏེ༌ ཡོད༌སའེ༌ ཕོ༌སྟག༌གི༌ ཀ༌ནེ༌ གང༌སྐྱལ༌ལ༌ གྱེལ༌པ༌ ཇིང༌བའེ༌ རུས༌པ༌ ཆགས༌ཏེ༌ ཤི༌ ཅིའ༌ཟེར༌ན༌ ཁོ༌ རྒད༌པོ༌ དང༌ རོམ༌པོ༌ ལྕིན༌ཏྲེ༌ ཡོད༌པིན༌།
ཁོའེ༌ ཨིས༌ར༌ཨེལ༌ལི༌ ནང༌ང༌ ལོ༌ 40 འུ༌སྐྱོང༌ངི༌ ལས༌ ཅོས༌།
19 ཨེ༌ལིའེ༌ བུ༌ཚ༌ ཕི༌ནི༌ཧས༌སི༌ ན༌མ༌ སྐྱེ༌ཅེས༌མ༌ ཡང༌ ཕྲུ༌གུ༌ སྐྱེ༌ཅེས༌སི༌ ཏུས༌པོ༌ ཉེ༌མོ༌ ལེབ༌ཏེ༌ ཨིན༌པིན༌།
ཆད༌དོན༌ནི༌ སྒམ༌ ཁྱེར༌ཁན༌,
ཁོའེ༌ མག༌པའེ༌ ཨ༌བ༌ དང༌ ཁོའེ༌ མག༌པ༌ ཤི༌ཏོག༌ ཟེར༌ཏེ༌ ཁོའ༌ ཚོར༌ར༌ཅིག༌ ཁོའ༌ སྐྱེ༌ཟེར༌ ཏངས༌ ཡང༌ ཕྲུ༌གུ༌ ཇོར༌།
ཨིན༌ནའང༌ སྐྱེ༌ཟེར༌ མ༌སྲན༌ཏྲེ༌ ཡོང༌ཅེས༌པོའེ༌ ཁོ༌ ཤི༌།
20 ཁོ༌ ཤི༌ཨིན༌ ཡོད༌ ཟ༌ནེ༌ ཁོའ༌ ཡ༌ཏོ༌ ཅོ༌ཁན༌ བུ༌མོ༌གུན༌ནི༌ ཁོའ༌ སྤོས༌པ༌ ཏང༌ཏེ༌ ཟེརས༌,
“ཇིགས༌ མ༌ཇིགས༌,
ཁྱོ༌རང༌ང༌ བུ༌ཚ༌ཞིག༌ ཇོར༌།”
ཨིན༌ནའང༌ ཁོའེ༌ ཁོང༌གུན༌ལ༌ ལན༌ ཡ༌ ནང༌སྟག༌ མ༌ཏངས༌།
21 ཤི༌ སང༌ སྔུན༌ལ༌ ཁོའེ༌ ཕྲུ༌གུའི༌ མིང༌ང༌ ཨི༌ཀ༌བོད༌ ཏགས༌ ཀ༌བོའེ༌ ཏོན༌བོ༌ “ཟིར༌རྗིད༌ གྲལ༌ཏེ༌ སོང༌” ཨིན༌ནོག༌།
ཆད༌དོན༌ནི༌ སྒམ༌ ཀོགས༌ཏེ༌ ཁྱེར༌ཅེས༌,
ཁོའེ༌ མག༌པ༌ དང༌ མག༌པའེ༌ ཨ༌བ༌ ཤི༌ པ༌སང༌ ཁོའེ༌ ཁོ༌རང༌ངི༌ བུ༌ཚའ༌ ཏེ༌ མིང༌བོ༌ ཏགས༌།
22 ཁོའེ༌ ཟེརས༌,
“ཟིར༌རྗིད༌ ཨིས༌ར༌ཨེལ༌ ནེ༌ བེ༌ཏེ༌ སོང༌ཏེ༌ ཨིན༌ནོག༌ ཅིའ༌ཟེར༌ན༌ དཀོན༌མཆོག༌གི༌ ཆད༌དོན༌ནི༌ སྒམ༌བོ༌ ཀོགས༌ཏེ༌ ཁྱེརས༌།”
ཏེ༌ནེ༌ ཁོ༌ ཤི༌།