7
ཏེ༌ནེ༌ ཀི༌རི༌འཐ༌ ཡེ༌རིམ༌པ༌གུན༌ ཡ༌ཝའེ༌ ཆད༌དོན༌ནི༌ སྒམ༌ ལེན༌ན༌ལ༌ ཡོངས༌།
ཁོང༌གུན༌ནི༌ ཏེ༌བོ༌ རི༌ཀ༌ ཡོད༌ཁན༌ ཨ༌བི༌ན༌དབ༌བི༌ ཁང༌པའ༌ ཁྱེརས༌ ཡང༌ ཁོའེ༌ བུ༌ཚ༌ ཨེ༌ལི༌འ༌ཟར༌ ཏེ༌བོའེ༌ སྟ༌སྟོག༌ ཅོ༌ཅེས༌ དང༌ སྲུང༌ཅེས༌ལ༌ སྐོས༌།
མིཟ༌པཧའེ༌ ནང༌ང༌ ཕི༌ལིས༌ཏི༌པ༌གུན༌ལ༌ ཕམ༌ཕོགས༌།
7:2 ནེ༌ 17
2 ཏུས༌ རིང༌མོ༌,
ལྡོམ༌ ལོ༌ ཉི༌ཤུ༌ ཆད༌དོན༌ནི༌ སྒམ༌ ཀི༌རི༌འཐ༌ ཡེ༌རིམ༌མི༌ ནས༌སའེ༌ ནང༌ང༌ ལུས༌,
ཏེ༌ཏུས༌ གང༌པོ༌ ཡ༌ཝའེ༌ ཨིས༌ར༌ཨེལ༌པ༌གུན༌ ཕང༌ང༌ ཛད༌ཅེས༌པོའེ༌ ཁོང༌གུན༌ནི༌ ཉ༌ངན༌ ཅོས༌ཏེ༌ རོགས༌ ཛད༌ཅེས༌ལ༌ ཡ༌ཝའ༌ མོས༌ལམ༌ ཞུའད༌པིན༌།
3 ཏེ༌ནེ༌ ས༌མུའེལ༌ལི༌ ཨིས༌ར༌ཨེལ༌པ༌གུན༌ལ༌ ཟེརས༌,
“ཀལ༌ཏེས༌ ཁྱོ༌རང༌གུན༌ནི༌ སྙིང༌ནེ༌ དེན༌བའ༌ ཡ༌ཝའེ༌ཀ༌ ལོགས༌ཏེ༌ ཡོང༌ཨིན༌ སམ༌མད༌ན༌,
ཁྱོ༌ཞའེ༌ ཕྲོ༌ནེ༌ ཞན༌ཡུལ༌ལི༌ ལྷ༌ལྷ༌མོ༌ དང༌ ཨཤ༌ཏོ༌རེཐ༌དི༌ སྐུན༌དྲ༌གུན༌ མེད༌ཁན༌ ཅོས༌།
ཡ༌ཝ༌ ཆོགས༌ལ༌ སྙིང༌ ཏངས༌ཏེ༌ ཁོང༌ ཅིག༌པོའ༌ ཞབས༌ཏོག༌ ཞུས༌།
ཏེ༌ནེ༌ ཁོང༌ངི༌ ཁྱོ༌ཞ༌གུན༌ལ༌ ཕི༌ལིས༌ཏི༌པ༌གུན༌ནི༌ ཀ༌ནེ༌ ཐར༌པ༌ སལ༌ལ༌ ཛད༌ཨིན༌།”
4 ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ནི༌,
བའལ༌ དང༌ ཨཤ༌ཏོ༌རེཐ༌དི༌ སྐུན༌དྲ༌གུན༌ མེད༌ཁན༌ ཅོས༌ཏེ༌ ཡ༌ཝ༌ ཅིག༌པོའ༌ ཅོལས༌།
5 ས༌མུའེལ༌ལི༌ ཁོང༌གུན༌ལ༌ ཟེརས༌,
“ཨིས༌ར༌ཨེལ༌པ༌ ཚང༌མ༌ མིཟ༌པཧའེ༌ ནང༌ང༌ ཛོམ༌ཤིག༌ ཏེ༌ནེ༌ ངའེ༌ ཁྱོ༌རང༌གུན༌ནི༌ ཕིའ༌ ཡ༌ཝའ༌ མོས༌ལམ༌ ཞུ༌ཨིན༌།”
6 ཁོང༌ ཚང༌མ༌ མིཟ༌པཧའེ༌ ནང༌ང༌ ཛོམ༌མ༌ཅིག༌ ཁོང༌གུན༌ནི༌ ཆུ༌ ཕིངས༌ཏེ༌ ཡ༌ཝའེ༌ སྐུན༌དུན༌ལ༌ ལུགས༌ ཡང༌ ཁོང༌གུན༌ ཏེ༌ ཞག༌ག༌ ཉེ༌ནས༌ལ༌ དུགས༌ཏེ༌ ཡ༌ཝའེ༌ གྱབ༌གལ༌ལ༌ སྡིག༌པ༌ ཅོ༌ཁན༌གུན༌ ངོས༌ལེན༌ ཅོས༌ ༼མིཟ༌པཧའེ༌ ནང༌ང༌ ས༌མུའེལ༌ ཨིས༌ར༌ཨེལ༌པ༌གུན༌ནི༌ ཝང༌སྲུལ༌པ༌ གྱུར༌༽།
7 ཕི༌ལིས༌ཏི༌པ༌གུན༌ནི༌ ཨིས༌ར༌ཨེལ༌པ༌གུན༌ མིཟ༌པཧའེ༌ ནང༌ང༌ ཛོམས༌ཁན༌བོ༌ ཚོར༌ར༌ཅིག༌ ཁོང༌གུན༌ ཨིས༌ར༌ཨེལ༌པ༌གུན༌ལ༌ ནོལ༌ལ༌ བིང༌།
ཏེ༌བོ༌ ཚོར༌ར༌ཅིག༌ ཨིས༌ར༌ཨེལ༌པ༌གུན༌ མ༌སྲན༌ཏྲེ༌ ཇིགས༌།
8 ཁོང༌གུན༌ནི༌ ས༌མུའེལ༌ལ༌ ཟེརས༌,
“ང༌དང༌གུན༌ ཕི༌ལིས༌ཏི༌པ༌གུན༌ནི༌ ཀ༌ནེ༌ སྐྱོབ༌བ༌ ཛད༌ཅེས༌ལ༌ ཡ༌ཝ༌ ང༌དང༌གུན༌ནི༌ དཀོན༌མཆོག༌ག༌ ཆད༌མེད༌ལ༌ མོས༌ལམ༌ ཞུའ༌ ཛད༌།”
9 ཏེ༌ནེ༌ ས༌མུའེལ༌ལི༌ འོ༌མ༌ ཐུང༌ཁན༌ནི༌ ལུ༌གུ༌ཞིག༌ ཁྱོངས༌ ཡང༌ ཏེ༌བོ༌ གང༌པོ༌ མེའ༌ སྲགས༌ཏེ༌ ཡ༌ཝའ༌ ཆོད༌པའ༌ ཕུལས༌།
ཁོའེ༌ ཡ༌ཝའ༌,
ཨིས༌ར༌ཨེལ༌པ༌གུན༌ལ༌ རོགས༌ ཛད༌ཅེས༌ལ༌ ཞུ༌ཝ༌ ཕུལས༌ ཡང༌ ཡ༌ཝའེ༌ ཁོའ༌ ལན༌ སལས༌།
10 ས༌མུའེལ༌ལི༌ མེའ༌ སྲག༌ཏེ༌ ཆོད༌པ༌ ཕུལ༌ ཟ༌ནེ༌ སྤུང༌གོལ༌ ཅོ༌ཅེས༌ལ༌ ཕི༌ལིས༌ཏི༌པ༌གུན༌ ཨིས༌ར༌ཨེལ༌པ༌གུན༌ནི༌ ཉེ༌མོའ༌ ཡོངས༌།
ཨིན༌ནའང༌ ཡ༌ཝའེ༌ བྲུག༌ལྡིར༌ཁན༌ ཙོགས༌ སྐད༌ ཆེན༌མོའེ༌ ནང༌ང༌ ཞལ༌ཏ༌ སལ༌ཏེ༌ ཕི༌ལིས༌ཏི༌པ༌གུན༌ནི༌ ནང༌ང༌ ཐེ༌ཚོམས༌ སྐྱེ༌ཅུག༌ག༌ ཛད༌ པ༌སང༌ ཕི༌ལིས༌ཏི༌པ༌གུན༌ ཤོར༌ཏེ༌ སོང༌།
11 ཏེ༌ནེ༌ ཨིས༌ར༌ཨེལ༌པ༌གུན༌ མིཟ༌པཧ༌ནེ༌ བིང༌ཏེ༌ བེཐ༌ཀར༌ ཚག༌པ༌ ཁོང༌གུན༌ལ༌ ཏེད༌ཏེ༌ ཁྱེརས༌ ཡང༌ ལམ༌མ༌ ཕི༌ལིས༌ཏི༌པ༌ མང༌པོ༌ སད༌།
12 ས༌མུའེལ༌ལི༌ རྡོའ༌ ཆེན༌མོ༌ཞིག༌ ཁུར༌ཏེ༌ མིཟ༌པཧ༌ དང༌ ཤེན༌ གྲོང༌ཁྱེར༌ གུན༌ནི༌ སྐྱིལ༌ལ༌ བོརས༌ ཡང༌ ཏེ༌བོའེ༌ མིང༌ང༌ ཨེ༌བི༌ནེ༌ཟེར༌a ཏགས༌ཏེ༌ ཟེརས༌,
“འི༌ ཚག༌པ༌ ཡ༌ཝའེ༌ ང༌དང༌གུན༌ལ༌ རོགས༌ ཅོའ༌ ཛདས༌།”
13 ཏེ༌ནེ༌ ཕི༌ལིས༌ཏི༌པ༌གུན༌ལ༌ ཕམ༌ཕོགས༌ཏེ༌ སྟིང༌ནེ༌ ཁོང༌གུན༌ནི༌ སྤུང༌གོལ༌ ཡང༌སྐྱར༌ མ༌ནེ༌ མ༌ཅོས༌།
ས༌མུའེལ༌ལི༌ མི༌ཚེ༌ གང༌པོ༌ ཡ༌ཝའེ༌ ཁོང༌རང༌ངི༌ ཆག༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ སྐྱང༌ང༌ ཛདས༌།
14 ཕི༌ལིས༌ཏི༌པ༌གུན༌ནི༌ ང༌ཡོག༌ག༌ ཁྱོངས༌ཁན༌,
ཨིས༌ར༌ཨེལ༌ལི༌ གྲོང༌ཁྱེར༌ ཨེཀ༌རོན༌ནེ༌ ཏངས༌ཏེ༌ གཱད༌ ཚག༌པ༌ ཁོང༌གུན༌ལ༌ ལོགས༌ཏེ༌ ཏངས༌།
ཨིས༌ར༌ཨེལ༌པ༌གུན༌ནི༌ ཕི༌ལིས༌ཏི༌པ༌གུན༌ནི༌ ཀོགས༌ཏེ༌ ཁྱེར༌ཁན༌ནི༌ ས༌ཀྱད༌གུན༌ ལོགས༌ཏེ༌ ལེནས༌ ཡང༌ ཏེ༌ཏུས༌ གང༌པོ༌ ཨིས༌ར༌ཨེལ༌ དང༌ ཨ༌མོར༌པ༌གུན༌ནི༌ ཕར༌ལ༌ ཞི༌དེ༌ ལུས༌།
15 མི༌ཚེ༌ གང༌པོ༌ ས༌མུའེལ༌ ཨིས༌ར༌ཨེལ༌པ༌གུན༌ནི༌ ཝང༌སྲུལ༌ དང༌ ཁྲིམ༌སྤོན༌ ཨིན༌པིན༌།
16 ལོ༌ཞུང༌ ཁོ༌ བེ༌ཐེལ༌,
གིལ༌གལ༌ དང༌ མིཟ༌པཧ༌ གྱལ༌ས༌གུན༌ནི༌ ནང༌ང༌ ཨིས༌ར༌ཨེལ༌པ༌གུན༌ནི༌ ཛིང༌མོ༌གུན༌ལ༌ ཁྲིམས༌ ཅད༌ད༌ལ༌ ཆའད༌པིན༌།
17 ཨིན༌ནའང༌ ས༌མུའེལ༌ ཏུས༌གྱུན༌ ཁོ༌རང༌ངི༌ ཁང༌པ༌ ར༌མཧའེ༌ ནས༌ས༌ ལོགས༌ཏེ༌ ཆའད༌པིན༌།
ཁོའེ༌ ཏེ༌རུའང༌ ཨིས༌ར༌ཨེལ༌པ༌གུན༌ནི༌ ཛིང༌མོ༌གུན༌ལ༌ ཁྲིམས༌ ཅད༌དད༌པིན༌ ཡང༌ ས༌མུའེལ༌ལི༌ ཡ༌ཝའེ༌ ཕིའ༌ ར༌མའེ༌ ནང༌ང༌ ཆོད༌ཁྲི༌ རྩིགས༌།