Nosa Nagasa nu Alatala atau nosa nggari Bali Kristus
4
Sampesuwu-sampesuwu to nipotoweku, neꞌe komi momparasaya pura-pura tau to nanguli naria Nosa Nagasa nu Alatala ri jaꞌina. Tapi uji ntanimo ruru ala ranjani ane nosa to naria ri jaꞌi ira Nosa Nagasa nu Alatala bara daꞌa. Niuliku iwetu sabana nadeamo nabi topodawa ri umba-umba ri dunia weꞌi-weꞌi.
2 Iweꞌimo akala komi mangginjani ane nosa etu Nosa Nagasa nggari jaꞌi Alatala bara daꞌa. Tau to nompangaku Yesus Kristus narata ri dunia netimbali najadi manusia, tau etumo naria Nosa Nagasa nggari jaꞌi Alatala.
3 Tapi tau daꞌa nompangaku i Pue Yesus daꞌa naria Nosa Nagasa nggari jaꞌi Alatala. Tau etu naria nosa nggari jaꞌi Bali Kristus. Niepe komimo Bali Kristus kana marata, pade weꞌi-weꞌi nariamo iꞌa riara dunia eꞌi.
4 Tapi ana-anaku, komimo ana-ana nu Alatala, pade nidagi komimo nabi-nabi topodawa etu, sabana nelabipa kuasa Nosa Nagasa to naria riara ntaꞌi komi pade kuasa Magau nu Seta to nombakuasai dunia to najaꞌa eꞌi.
5 Nabi-nabi topodawa etu nopuꞌu nggari dunia to najaꞌa eꞌi. Etu sampe ira nompatuduki pepatuduki to nopuꞌu nggari dunia, pade tau-tau nggari dunia eꞌi woꞌu madota mompetalinga ira.
6 Tapi kita nopuꞌu nggari jaꞌi Alatala. Etu sampe tau to nosinjani ante Alatala nompetalinga pepatudukita. Tapi tau-tau daꞌa nomparasaya Alatala daꞌa nompetalinga pepatudukita. Jadi nggari setu ninjanita isema to naria Nosa Nagasa nggari jaꞌi Alatala pade isema to naria nosa nggari jaꞌi Magau nu Seta. To naria nosa nggari jaꞌi Magau nu Seta etu daꞌa madota mompetalinga tesa Alatala to nakonona.
Alatalamo to natowena, jadi kita kana mosipotowe
7 Sampesuwu-sampesuwu to nipotoweku, kamaimo kita mosipotowe sambaꞌa bo sambaꞌa, sabana towe nopuꞌu nggari jaꞌi Alatala. Pade isema to nompotowe roana, etu tandaina iꞌa ana nu Alatala bo iꞌa nosinjani ante Alatala.
8 Tapi tau daꞌa nompotowe roana daꞌa nosinjani ante Alatala, sabana Alatalamo to natowena.
9 Alatala nompopokita towena ka kita ante nompakau Anana to sambaꞌa lau mpaka ri dunia ala nggari kamatena kita mamala matuwu sampe ri kasae-saena.
10 Iweꞌimo to niulika towe: Daꞌa kita to nompotowe Alatala tapi Alatala to nompotowe kita sampe Iꞌa nompakau Anana mboto rasuku majadi posompo silakata.
11 Sampesuwu-sampesuwu to nipotoweku, ane iwetumo towe Alatala ka kita, masipato woꞌu kita mosipotowe sambaꞌa bo sambaꞌa.
12 Daꞌapa naria sambaꞌa manusia nanggita Alatala. Tapi ane kita tunggai mosipotowe sambaꞌa bo sambaꞌa, Alatala naria riara ntaꞌita, pade ante iwetu towena mpuꞌu-mpuꞌu najadi nagana riara nggatuwuta.
13 Iweꞌimo tandaina sampe ninjanita kita natuwu nosaongu rara ante Alatala pade Iꞌa natuwu nosaongu rara ante kita: Naria Nosa Nagasana riara ntaꞌita.
14 Daꞌa aga iwetu, kami anaguru-anaguruna mbotomo nanggita Ana nu Alatala, pade kami nompatolele ka tau Umata Pue Alatala nompakau Anana mpaka ri dunia eꞌi ala majadi Magau to Mompakasalama manusia.
15 Isema-sema to nompangaku Yesus Ana nu Alatala, tau etumo to natuwu nosaongu rara ante Alatala, pade Alatala natuwu nosaongu rara ante iꞌa.
16 Jadi ninjanitamo towe Alatala ka kita, pade niparasayatamo towena etu.
Toramo! Alatalamo to natowena, jadi isema-sema tunggai nompotowe roana, tau etumo bate-batena natuwu nosaongu rara ante Alatala, pade Alatala bate-batena natuwu nosaongu rara ante iꞌa.
17 Ante iwetu towena najadi nagana riara nggatuwuta sampe kita mabia ri Eo Mpotangara banepia. Kita mabia ri eo etu tempo i Pue Yesus mombatangara manusia, sabana kita ri dunia eꞌi nipotowe Alatala nasimbayu ewa Iꞌa nompotowe i Pue Yesus.
18 Isema to nombarasai towe Alatala daꞌa ria eka rarana, sabana towe Alatala to nagana etu nompopalai eka rarana. Aga tau masipato rasuku to naekana. Jadi isema-sema naeka mompekiri Eo Mpotangara batuana daꞌapa nitarimana towe Alatala to naganana etu.
19 Kita nompotowe roata sabana Alatala nokolumo nompotowe kita.
20 Ane maria sambaꞌa tau manguli, “Aku nompotowe Alatala,” tapi iꞌa nomporau rara sampesuwuna mboto, tau etu topodawa. Ane iꞌa daꞌa nompotowe sampesuwuna to nikita matana mboto, natantumo daꞌa mamala iꞌa mompotowe Alatala to daꞌapa sanggani nikitana!
21 Etu sampe naria parenta nggari jaꞌi Alatala to nanguli, “Isema-sema nompotowe Alatala, iꞌa kana mompotowe sampesuwuna woꞌu.”