Kita mamala mombadagi kajaꞌana ri dunia ante pomparasayata
5
Isema-sema to nomparasaya Yesus Magau to Mompakasalama to nijanji Alatala, tau etumo najadi ana nu Alatala. Ane iꞌa nompotowe Umana Pue Alatala, natantumo iꞌa woꞌu nompotowe roa-roana to najadi ana nu Alatala woꞌu.
2 Iweꞌimo jala sampe ranjanita kita nompotowe roa-roata to najadi ana nu Alatala: Kita nompotowe Alatala pade natundu riara parenta-parentana.
3 Natundu riara parenta-parentana etu tandaina kita nompotowe Alatala. Pade parenta-parentana daꞌa natomo ratuki,
4 sabana butu mbaꞌa to najadi ana nu Alatala nompakule mombadagi pura-pura kajaꞌana ri dunia eꞌi. Kita namala mombadagi kajaꞌana ri dunia eꞌi ante pomparasayata.
5 Isema to namala mombadagi kajaꞌana ri dunia eꞌi? Aga tau to nomparasaya Yesus Ana nu Alatala.
Tolungele to nompakanoto Yesus Kristus Ana nu Alatala
6 Yesus Kristus mbotomo Ana nu Alatala to narata ri dunia eꞌi. Iꞌa nidiu Yohanes Topediu, pade natitimo leina tempo Iꞌa namate ri kayu parika. Iꞌa daꞌa aga nidiu tapi Iꞌa woꞌu nipatesi. Nosa Nagasa nu Alatala mboto nantakono etu pura-pura. Iꞌa namala raparasaya sabana Iꞌa batena notesa to nakonona.
7 Jadi naria tolungele to nompakanoto isema Yesus,
8 etumo Nosa Nagasa nu Alatala, pombadiu Yesus, pade kamate Yesus. Anu tolungele etu pura-pura nompakanoto Yesus Ana nu Alatala.
9 Ane ri potangara kita nomparasaya tesa manusia mantakono sangele. Tapi tesa Alatala neliu nggaroso nggari tesa manusia. Jadi masipato kita momparasaya tesa nggari jaꞌi Alatala, sabana Iꞌa mboto nompakanoto isema kakonona Anana.
10 Isema-sema to nomparasaya Ana nu Alatala, nantakono tesa Alatala etu. Tapi isema-sema daꞌa nomparasaya tesa Alatala etu, ira nompopodawa Alatala, sabana ira daꞌa nomparasaya nuapa to niuli Alatala ewa Anana.
11 Iweꞌimo isi tesa Alatala etu: Niwaina ka kitamo katuwua nabelo sampe ri kasae-saena, pade Anana puꞌu katuwua etu.
12 Tau to natuwu nosaongu rara ante Ana nu Alatala nariamo katuwua nabelo etu ri jaꞌina. Tapi tau daꞌa natuwu nosaongu rara ante Iꞌa daꞌa ria katuwua nabelo etu ri jaꞌina.
Patuju Yohanes nantulisi surana eꞌi
13 Aku nantulisi pura-pura tesa eꞌi ka komi to nomparasaya Ana nu Alatala, ala ranjani komi nariamo katuwua nabelo ri jaꞌi komi sampe ri kasae-saena.
Tesa kaopuna
14 Sampesuwu-sampesuwuku, iweꞌimo panjarumakata to natantuna ri jaꞌi Alatala: Ane kita merapi nggari jaꞌina nantuki dotana mboto Iꞌa mantarima pomperapita.
15 Pade ane ninjanita pomperapita ratarimana, natantumo kita kana mombarata nuapa to niperapita nggari jaꞌina.
16 Sampesuwu-sampesuwuku, ane komi manggita sambaꞌa roa komi topomparasaya nompowia silaka to daꞌa nompopogaꞌa iꞌa nggari jaꞌi Alatala sampe ri kasae-saena, komi kana mosambaya ka roa komi etu ala iꞌa majea pade mombarata katuwua mabelo sampe ri kasae-saena. To nitesaku eꞌi tau to nompowia silaka to daꞌa nompopogaꞌa iꞌa nggari jaꞌi Alatala sampe ri kasae-saena. Naria silaka to nompopogaꞌa tau nggari jaꞌi Alatala sampe ri kasae-saena. Daꞌa tau to nompowia silaka etu to niuliku paraluu raposambaya komi.
17 Pura-pura pokainggu to najaꞌana etumo silaka. Tapi naria silaka to daꞌa nompopogaꞌa tau nggari jaꞌi Alatala sampe ri kasae-saena.
18 Ninjanita tau to najadi ana nu Alatala daꞌa tunggai nompowia silaka, sabana Ana nu Alatala mboto nombajagai iꞌa sampe iꞌa daꞌa mamala rapandasa Magau nu Seta.
19 Ninjanita woꞌu kita najadi ana nu Alatala naupa njumaongu dunia eꞌi nikuasai Magau nu Seta.
20 Ninjanita woꞌu Ana nu Alatala narata ri dunia eꞌi mompakanoto rarata ala kita mamala mosinjani ante Alatala. Kita natuwu nosaongu rara ante Iꞌa sabana kita natuwu nosaongu rara ante Anana Yesus Kristus. Iꞌa mbotomo Alatala to nakono, Iꞌamo to nombawai katuwua nabelo sampe ri kasae-saena.
21 Ana-anaku, neꞌe komi mepue ka pue-pue ntanina.