3
Kita weꞌi! Nabete mpuꞌu towe Alatala ka kita sampe kita nipangakuna anana. Pade mpuꞌu-mpuꞌu kita anana mami! Etu sampe bali-bali Alatala ri dunia eꞌi daꞌa nosinjani ante kita, sabana ira daꞌa nosinjani ante Alatala.
2 Sampesuwu-sampesuwu to nipotoweku, weꞌi-weꞌi kita ana nu Alatala. Daꞌapa ninjanita iwenumo katuwuta ri jaꞌi Alatala banepiana. Tapi ninjanitamo tempo i Pue Yesus marata bali ri dunia kita kana majadi nasimbayu ewa Iꞌa mboto, sabana kita kana manggita lenjena mpuꞌu.
3 Isema-sema to naria panjarumaka etu ri jaꞌi Pue mombajagai korona nggari silaka ala iꞌa mpuꞌu-mpuꞌu magasa nasimbayu ewa i Pue Yesus.
4 Tau-tau nompowia silaka nombaliunaka Atura-atura Alatala, sabana pura-pura powia to nombaliunaka Atura-atura Alatala, etumo to niuli silaka.
5 Ninjani komimo patuju karata i Pue Yesus ri dunia, etumo ala mompakalipo pura-pura silaka. Pade Iꞌa mboto daꞌa ntoto nasilaka.
6 Jadi isema-sema to natuwu nosaongu rara ante Iꞌa, mana nompowia silaka. Tapi tau to nompowia silaka, daꞌapa ninjanina i Pue Yesus ante nanoto, pade daꞌa ntoto nosinjani ante Iꞌa.
7 Ana-anaku, neꞌe komi mompaloga tau manggeni komi mantuki pepatuduki to nasalana. Toramo! Isema-sema nompowia to nanoana, tau etumo to nireke Alatala nanoa nasimbayu ewa i Pue Yesus woꞌu nanoa.
8 Tapi tau to nompowia silaka, iꞌa etumo ana nu Magau nu Seta, sabana Magau nu Seta nompowia silaka mamimo nggari lamba pamulana. Patuju Ana nu Alatala narata ri dunia etumo ala mompakaropu powia Magau nu Seta etu.
9 Tau to najadi ana nu Alatala daꞌa nompowia silaka, sabana inggu Alatala mboto naria riara ntaꞌina. Iꞌa mana mamala mompowia silaka sabana iꞌa mboto najadi ana nu Alatala.
10 Tapi isema-sema daꞌa nompowia to nanoana daꞌa ana nu Alatala. Waꞌa woꞌu tau to daꞌa nompotowe roana. Etumo posisalana ana nu Alatala bo ana nu Magau nu Seta.
Tau to najadi ana nu Alatala kana mosipotowe
11 Iweꞌimo kareba to niepe komi nggari pamulana komi nomparasaya i Pue Yesus: Kita kana mosipotowe sambaꞌa bo sambaꞌa.
12 Neꞌe kita mompasiala inggu i Kain. Iꞌa ana nu Magau nu Seta pade iꞌa nompatesi tuaꞌina mboto. Nuapa sabana i Kain nompatesi tuaꞌina mboto? Sabana powia i Kain nadenggo tapi powia tuaꞌina nanoa. a
13 Jadi sampesuwu-sampesuwuku, neꞌe komi matekaja ane tau-tau to daꞌa nomparasaya Alatala nomporau rara komi.
14 Tapi kita eꞌi daꞌa nomporau rara roa-roata. Kita eꞌi nompotowe roa-roata. Etumo tandaina kita nikabasakamo nggari pesuku Alatala pade niratatamo katuwua nabelo sampe ri kasae-saena. Aga tau daꞌa nepotowe damasipato rasuku Alatala sampe ri kasae-saena.
15 Isema-sema nomporau rara sampesuwuna, iꞌa etu topepatesi. Pade ninjani komi mbotomo daꞌa ria sambaꞌa topepatesi mombarata katuwua mabelo sampe ri kasae-saena.
16 Nggari jonjo i Pue Yesus kita nangginjani batuana towe. Iꞌa namate ala mompakasalama kita. Jadi kita woꞌu masipato mantulungi roa-roata nau sampe kita mamate.
17 Ane rapana maria sambaꞌa tau to nagana katuwuna manggita roana nakabu tapi iꞌa daꞌa madota mantulungi roana etu, natantumo daꞌa ntoto ria towe Alatala riara ntaꞌina!
18 Ana-anaku, neꞌe kita mompotowe roata aga ri sumba bara aga ante tesata. Kita kana mompotowe ante mpuꞌu-mpuꞌu rarata pade mompopokita towe etu ante powiata to nabelona.
Ane kita mosipotowe mabia kita mantingayo Alatala
19 Ane kita mompotowe roata ante rarata mpuꞌu-mpuꞌu etumo tandaina kita mpuꞌu-mpuꞌu ana nu Alatala, pade masana rarata ri ngayo Umata Pue Alatala.
20 Naupa kita rapakasala pekiri rara ntaꞌita mboto, danamalapa masana rarata sabana Alatala daꞌa nompakasala kita. Ninjanina pura-pura katuwuta pade Iꞌa neliu nggakuasa nggari rara ntaꞌita to nompakasala kita.
21 Jadi sampesuwu-sampesuwu to nipotoweku, ane kita daꞌa nipakasala pekiri rara ntaꞌita mboto, mabia kita mantingayo Alatala.
22 Pade nuapa to raperapita nggari jaꞌina natantumo kana rawaina ka kita, sabana kita natundu riara parenta-parentana pade kita nompowia to nompakadamba rarana.
23 Iweꞌimo to niparentana ka kita: Kita kana momparasaya Anana Yesus Kristus. Pade kita kana mosipotowe sambaꞌa bo sambaꞌa ewa to niparenta i Pue Yesus mboto ka kita.
24 Isema-sema to natundu riara parenta-parenta nu Alatala, ira natuwu nosaongu rara ante Iꞌa, pade Alatala woꞌu natuwu nosaongu rara ante ira. Pade tandaina Alatala natuwu nosaongu rara ante kita etumo naria Nosa Nagasana riara ntaꞌita to niwaina ka kita.