Ane kita nosinjani ante Alatala kita mantuki parentana
2
Ana-anaku, patujuku mantulisi tesa eꞌi ka komi ala komi neꞌe mowia silaka. Tapi ane maria to mowia silaka, naria sambaꞌa topanjaliku kita, etumo Yesus Kristus to nanoa rarana. Iꞌamo to manjaliku kita ri ngayo Umana Alatala.
2 Yesus etumo to namate nisuku Alatala mombasompo silaka-silakata. Pade daꞌa aga silakata to nisompona, tapi silaka pura-pura manusia woꞌu.
3 Ane kita mantuki parenta-parenta Alatala, etumo tandaina kita nosinjani belo ante Iꞌa.
4 Tau to nanguli, “Aku nosinjani belo ante Alatala,” tapi daꞌa nantuki parenta-parentana, tau etu topodawa. Daꞌa ntoto naria pepatuduki to nakonona naboli riara ntaꞌina.
5 Tapi isema-sema nantuki parenta Alatala, tau etumo to nompotowe Alatala ante mpuꞌu-mpuꞌu rarana. Ante jala iweꞌimo nanotomo kita mpuꞌu-mpuꞌu natuwu nosaongu rara ante Alatala:
6 Isema-sema manguli iꞌa natuwu nosaongu rara ante Alatala kana mompasiala katuwu Kristus.
Kita kana mosipotowe sambaꞌa bo sambaꞌa
7 Sampesuwu-sampesuwu to nipotoweku, aku daꞌa mantulisi ka komi sangele parenta to nabouna. Tapi etu parenta to nasaemo ninjani komi, nompamula nggari pamulana komi nomparasaya i Pue Yesus. Etumo parenta to niepe komi nokolu to nanguli, “Posipotowemo komi sambaꞌa bo sambaꞌa.”
8 Tapi naupa iwetu, parenta to nitulisiku ka komi etu nireke parenta nabou woꞌu, sabana batuana to nakonona parenta etu natikita riara nggatuwu i Pue Yesus pade riara nggatuwu komi topomparasaya Iꞌa woꞌu. Etu nanoto ka kita sabana rumau nompamula nalipo nggari dunia eꞌi pade reme to nakonona nompamula newanta.
9 Isema-sema to nanguli iꞌa natuwu riara reme tapi iꞌa nomporau rara sampesuwuna, tau etu bate-batena naria riara rumau sampe weꞌi-weꞌi.
10 Tau to nompotowe sampesuwuna, tau etumo to natuwu riara reme sampe daꞌa ria sangele ri jaꞌina to mamala mompakanawu iꞌa riara silaka.
11 Tapi tau nomporau rara sampesuwuna, tau etumo batena naria riara rumau. Iꞌa nolumako riara rumau, pade daꞌa ninjanina ri umbamo jalana sabana rumau etu nompakarumau matana sampe iꞌa daꞌa mamala manggita.
12 Ana-anaku, aku mantulisi tesa eꞌi ka komi sabana silaka komi niampungimo nggari kamate i Pue Yesus.
13 Aku mantulisi tesa eꞌi ka komi, totuꞌa-totuꞌa, sabana nosinjanimo komi ante i Pue Yesus to naria mamimo nggari lamba pamulana. Aku mantulisi tesa eꞌi ka komi, kabilasa bo randoo, sabana komi naopumo nombadagi Magau nu Seta.
14 Aku nantulisi tesa eꞌi ka komi, ana-anaku, sabana nosinjanimo komi ante Umata Pue Alatala. Aku nantulisi tesa eꞌi ka komi, totuꞌa-totuꞌa, sabana nosinjanimo komi ante i Pue Yesus to naria nggari lamba pamulana. Aku nantulisi tesa eꞌi ka komi, kabilasa bo randoo, sabana narosomo pomparasaya komi. Tesa nu Alatala naria riara ntaꞌi komi, pade nidagi komimo Magau nu Seta.
15 Neꞌe komi mompotowe dunia bara kajaꞌana nuapa-nuapa to naria riarana. Ane komi nompotowe dunia komi daꞌa nompotowe Umata Pue Alatala.
16 Pura-pura kajaꞌana to naria riara dunia eꞌi daꞌa nopuꞌu nggari jaꞌi Alatala. Dota rara to najaꞌana, kario mata, pade kalanga rara nantoiya koro mboto, etu pura-pura aga nopuꞌu nggari dunia to najaꞌa eꞌi.
17 Dunia bo pura-pura to naria riarana to nipoino manusia mana masaeka malipo, tapi tau to nantuki dota nu Alatala kana matuwu mabelo sampe ri kasae-saena.
Bali Kristus
18 Ana-anaku, namosumo kaopu nu dunia. Niepe komimo Bali Kristus kana marata. Pade weꞌi-weꞌi nadeamo bali Kristus neumba. Etu tandaina namosumo kaopu nu dunia.
19 Bali-bali Kristus iramo tau-tau to nariamo ri tatongota bopia, tapi ira kakonona daꞌa saongu pomparasaya ante kita. Ane ira mpuꞌu-mpuꞌu saongu pomparasaya ante kita, natantumo ira bate-batena nosanggani-nggani ante kita. Tapi ira nompalasi kita. Etu najadi ala manoto ira pura-pura daꞌa mpuꞌu saongu pomparasaya ante kita.
20 Tapi sampesuwu-sampesuwu, komi nipesua Nosa Nagasa nu Alatala to nipopanaꞌu Yesus Kristus. Etu sampe komi pura-pura nangginjani pepatuduki to nakonona.
21 Aku nantulisi tesa eꞌi ka komi daꞌa sabana nipekiriku komi daꞌa nangginjani pepatuduki to nakonona. Tapi nitulisiku ka komi sabana pepatuduki etu mpuꞌu-mpuꞌu ninjani komimo. Pade ninjani komi woꞌumo daꞌa naria tesa dawa riara pepatuduki to nakonona.
22 Isema tau topodawa? Iꞌamo tau to nanguli Yesus daꞌa Magau to Mompakasalama to nijanji Alatala. Tau etumo bali Kristus. Iꞌa daꞌa nompangaku Umata Pue Alatala pade Anana Yesus.
23 Tau to daꞌa nompangaku Ana nu Alatala, iꞌa daꞌa ana Umata Pue Alatala. Tapi tau to nompangaku Ana nu Alatala, iꞌa woꞌu najadi ana Umata Pue Alatala.
24 Jadi sampesuwu-sampesuwuku, kana rapariara ntaꞌi komi mpakabelo-belo pepatuduki to niepe komi nggari pamulana komi nomparasaya i Pue Yesus. Ane etu mpuꞌu-mpuꞌu rapariara ntaꞌi, komi bate-batena matuwu mosaongu rara ante i Pue Yesus bo Umana Pue Alatala.
25 Iweꞌimo to nijanji i Pue Yesus mboto ka kita: Kita kana matuwu mabelo ante Iꞌa sampe ri kasae-saena.
26 Nitulisiku ka komi tesa eꞌi to nantesa tau-tau to nompasimbuku mompatuduki pepatuduki to nasalana ka komi.
27 Tapi kakonona mana paraluu tau ntanina mompatuduki komi, sabana komi nipesua Nosa Nagasa nu Alatalamo to nipopanaꞌu i Pue Yesus. Pade Nosa Nagasa etumo naria ri jaꞌi komi mompatuduki ka komi mpengele-ngele to nabelona. Pepatudukina etu nakono pura, daꞌa ria to nasalana. Sabana etu komi kana maroo matuwu mosaongu rara ante i Pue Yesus ewa to nipatuduki Nosa Nagasa ka komi.
Kita ana-ana nu Alatala