SURA PAMULANA NGGARI JAꞌI
YOHANES
Tesa Puꞌu Katuwua
1
Ri lamba pamulana nariamo sambaꞌa to niposumba Alatala manggeni tesa to nombawai katuwua. Tapi naupa Iꞌa naria nggari lamba pamulana Iꞌa niepe kami bo nikita kami ante mata kami mboto. Iꞌa nikita kami ante nanoto pade korona nisoko kami ante pale kami mboto.
2 Iꞌa nipopokita ri dunia eꞌi pade kami nanggita Iꞌa. Pade weꞌi-weꞌi kami nompakanoto ka komi nuapa to nikita kami. Kami nompatolele ka komi tesa Yesus Kristus to nombawai katuwua sampe ri kasae-saena. Ri lamba pamulana Iꞌa naria mamimo nosanggani-nggani ante Umata Pue Alatala, pade nggapurina Iꞌa nipopokita ka kami.
3 Jadi nuapa to nikita kami pade to niepe kami, etumo rapatolele kami ka komi woꞌu, ala komi mosanggani-nggani ante kami mamala masintuwu belo ante Umata Pue Alatala bo Anana Yesus Kristus.
4 Etu sampe kami nantulisi pura-pura tesa eꞌi ka komi ala mpuꞌu-mpuꞌu madamba rarata mpasanggani-nggani.
Kita kana matuwu riara reme
5 Iweꞌimo kareba to niepe kami nggari jaꞌi Yesus pade rapatolele kami ka komi: Alatala Iꞌamo reme pade daꞌa ntoto ria karumauna ri jaꞌina.
6 Ane kita manguli, “Kita eꞌi nasintuwu belo ante Alatala,” tapi kita aga matuwu riara rumau, kita nodawa, pade powiata daꞌa nantuki pepatuduki to nakonona.
7 Tapi ane kita matuwu riara reme nasimbayu ewa Alatala riara reme etu, kita masintuwu belo sambaꞌa bo sambaꞌa, pade lei Yesus, Anana, mompakagasa kita nggari pura-pura silakata.
8 Ane kita manguli, “Daꞌa ria silakata,” kita mombabagiu korota mboto. Etu tandaina daꞌa ntoto ria pepatuduki to nakonona naboli riara ntaꞌita.
9 Tapi ane kita mompangaku silakata ri jaꞌi Alatala, Iꞌa namala raparasaya mowia to nanoana, etumo Iꞌa kana mombaampungi silakata pade mompegasa kita nggari pura-pura kajaꞌana.
10 Ane kita manguli, “Kita daꞌa nowia silaka,” kita nompopodawa Alatala. Daꞌa ntoto naria tesana naboli riara ntaꞌita.