Natantumo i Pue Yesus kana marata bali
3
Sampesuwu-sampesuwu to nipotoweku, eꞌimo suraku karongganina ka komi. Riara suraku karongelena aku nompasimbuku mompopatora ka komi pepatuduki to nakonona ala pekiri komi batena magasa.
2 Patujuku ala komi mantora tesa-tesa to niboto nabi-nabi nagasa nggaolu, pade ala komi mantora woꞌu parenta-parenta nggari jaꞌi Pueta, Magau to Mompakasalama to nipatolele suro-surona to narata ri jaꞌimu.
3 Tesa to neliu nggapokona ratora komi iweꞌi: Ri tempo namosu kaopu nu dunia kana meumba tau to nikuasai dota rara ira mboto to najaꞌa. Ira kana mompongei-ngei komi
4 ante manguli, “Yesus nojanji marata bali ri dunia. Tapi ri umbamo Iꞌa? Etu daꞌa ntoto majadi, sabana nggari tempo kamate totuꞌata nggaolu sampe weꞌi-weꞌi mpengele-ngele ri dunia daꞌa ria kabalina. Etu bate-batena nasimbayu ewa ri lamba pamulana tempo dunia nipajadi.”
5 Tau-tau to notesa iwetu nitunggai ira nanggalinga iwenu Alatala nompajadi langi nggaolu ante tesana, bo iwenu dunia nipajadina nggari ue, pade iwenu sampe kabatana neumba nggari tatongo ue.
6 Pade ante ue woꞌu Alatala nompakaropu dunia nggaolu, etumo ante ue bete nanggabuntu nompakalodo dunia.
7 Tapi nggari Tesa nu Alatala etu woꞌu langi bo dunia to naria weꞌi-weꞌi nipiara sampe kaopuna rapakaropu ante apu. Weꞌi-weꞌi langi bo dunia danipiara sampe Eo Mpotangara banepia tempo pura-pura tau to daꞌa nantuki dota Alatala kana rasuku.
8 Tapi sampesuwu-sampesuwu to nipotoweku, neꞌe rakalinga komi tesa eꞌi: Riara mpanggita i Pue sanjobu mpae nasimbayu ewa sambengi, pade sambengi nasimbayu ewa sanjobu mpae.
9 Pue daꞌa nompakasae kadupa nu pojanjina marata bali ri dunia naupa naria bara sakuya mbaꞌa tau nanguli iwetu. Tapi Iꞌa nosabara ri jaꞌi komi, sabana Iꞌa daꞌa madota ala maria to rasuku sampe ri kasae-saena. To nipodotana ala pura-pura tau mombarata loga majea nggari silaka-silaka ira.
10 Tapi i Pue Yesus kana marata bali ri dunia ante daꞌa ninjani-njani ntau nasimbayu ewa karata ntopangangga. Ri eo etu langi kana malipo sanggani ante guru nu apu to nagai. Pade pura-pura to naria kana maropu rakoni nu apu, bo dunia ante pura-pura isina kana malipo sanggani.
11 Jadi sampesuwu-sampesuwu, ane pura-pura to naria kana maropu iwetu, natantumo kita masipato matuwu ante pokainggu to nagasa pade to nantuki dota nu Alatala.
12 Kita eꞌi nompopea eo to nipakatantu Alatala etu. Kita kana mompasimbuku mompasara eo etu ala masasinta marata. Ri eo etu langi kana maropu rakoni nu apu, pade pura-pura to naria kana magonu ante kapanena.
13 Tapi kita mompopea nuapa to nijanji Alatala, etumo langi to nabou bo dunia nabou, petoꞌo tau-tau to nanoa pokaingguna.
Pokainggu to masipato tempo mompopea karata i Pue Yesus
14 Jadi sampesuwu-sampesuwu to nipotoweku, tempo komi mompopea kajadia-kajadia etu, komi kana mompasimbuku matuwu ante pokainggu to nagasa to daꞌa mamala rasalai bo daꞌa mepakaeya. Pasimbukumo ala ane i Pue Yesus marata bali komi mosinggabelo ante Iꞌa.
15 Toramo, nandate posabara i Pue ala mombawai loga ka tau rapakasalama. Iwetu woꞌu to nitulisi sampesuwuta i Paulus to nipotoweta riara sura-surana to nitulisina nantuki noto to niwai Alatala ka iꞌa.
16 Riara surana pura-pura iꞌa nompatuduki pepatuduki nasimbayu ewa to nitulisiku ri baꞌana. Naria woꞌu tesa i Paulus to nakaja sakedi ranjani. Tesa etu nabiasa nipakadenggo ntau to daꞌa nanoto pekiri ira bo to daꞌa naroso pomparasaya ira. Iwetu woꞌu ira nompakadenggo isi Buku Nagasa ntanina. Tapi nggari pokainggu ira etu ira kana rasuku Alatala.
17 Jadi sampesuwu-sampesuwu to nipotoweku, ninjani komi mamimo kana maria tau moinggu iwetu. Etu sampe komi kana mainga, ala neꞌe komi rakeni guru-guru topodawa mantuki pepatuduki to nasalana sampe mana ria panjarumaka komi to naroso.
18 Tapi komi kana mantambai mosinjani belo ante Pueta Yesus Kristus, Magau to Mompakasalama, bo mantambai mombarasai towe belona riara nggatuwu komi. Iꞌamo to masipato ratoiyata bo rabilata weꞌi-weꞌi pade sampe ri kasae-saena. Amin!
Tabe nggari jaꞌiku,
Petrus