Topomparasaya kana mainga ri jaꞌi guru-guru topodawa
2
Tempo nggaolu naria nabi-nabi topodawa neumba ri tatongo todea nu Alatala. Pade iwetu woꞌu weꞌi-weꞌi kana meumba guru-guru topodawa ri tatongo komi. Ira manggeni pepatuduki to nasala to mompakanawu tau, pade ira kana mombasapu i Pue to nantolo silaka ira. Nggari powia ira etumo ira masalisa rasuku.
2 Kana madea tau mompasiala pokainggu ira to nopuꞌu nggari dota rara to najaꞌa. Pade nggari ira etu sampe pepatuduki to nakonona kana rasalai ntau.
3 Guru-guru topodawa etu nadoko nu doi. Etu sampe ira aga mangelo untu nggari jaꞌi komi ante tesa-tesa to nipetowali ira mboto. Tapi pesuku ira nasaemo nipakatantu. Mana masaeka majadi.
4 Toramo! Alatala daꞌa nanggabasaka malaeka-malaekana mboto nggari pesuku tempo ira nowia silaka, tapi Iꞌa nantajiaka ira riara naraka. Ira nisuaraka riara petoꞌo narumau pade nitarunggu ri setu sampe marata Eo Mpotangara banepia.
5 Iwetu woꞌu tempo nggaolu Alatala daꞌa nanggabasaka dunia nggari pesukuna. Tapi Iꞌa nompakaropu tau-tau to daꞌa nantuki dotana ante ue nanggabuntu nompakalodo dunia. Aga i Nuh ante pitumbaꞌa tau ntanina to nipakasalama sabana i Nuh nompatolele ka tau pokainggu to nikonoa rara Alatala. a
6 Iwetu woꞌu ante ngata Sodom bo Gomora. Alatala nombasuku pue ngata to najaꞌa etu ante nompalabu ira ante apu ala majadi popatora ka tau-tau to daꞌa nantuki dota Alatala. b
7 Tapi i Lot nipakasalamana nggari pesuku etu, sabana iꞌa sambaꞌa tau to nanoa pokaingguna. Nasusa mpuꞌu rarana nanggita pokainggu to natantoru to nipowia tau-tau daꞌa ria adana etu. c
8 Sabana i Lot, tau to nanoa etu netoꞌo ri tatongo ira pade, eo-eo iꞌa nanggita pade nangepe powia ira to najaꞌa sampe nandasa mpuꞌumo pekiri rara ntaꞌina to nanoa.
9 Jadi toramo! Alatala mamala mompakasalama tau-tau to nantuki dotana ane ira mombarata pesoba-pesoba. Pade Iꞌa mamala woꞌu mombatarunggu tau-tau to najaꞌana sampe ira rasuku ri Eo Mpotangara.
10 To mpuꞌu-mpuꞌu rasukuna iwetu etumo tau-tau to nantuki dota rara ira to najaꞌa bo natantoru pade to nanjapuaka kuasa nu Alatala.
Pokainggu-pokainggu guru-guru topodawa
Nabia bo nasombo mpuꞌu guru-guru topodawa etu sampe daꞌa naeka ira nanguli sinjaꞌi malaeka-malaeka to nipogumaa.
11 Malaeka-malaeka Alatala etu neliu nggaroso bo neliu nggakuasa nggari guru-guru topodawa etu. Tapi naupa iwetu malaeka-malaeka etu daꞌa nompakasala roa-roa ira to nowia sala ante tesa-tesa njilaka ri ngayo i Pue.
12 Tapi guru-guru topodawa etu nombasalaraka anu daꞌa ninjani ira. Ira nasimbayu ewa binata to daꞌa ntoto nompekiri, aga natuwu nantuki inggu-inggu to naria ri jaꞌina. Binata etu aga niote ala rasoko bo rasambale. Jadi nggari pokainggu to najaꞌa guru-guru topodawa etu kana rapatesi nasimbayu ewa binata-binata nasoa, pade rasuku sampe ri kasae-saena.
13 Ira kana rapandasa sabana nowia pokainggu to najaꞌa. Nau tempo eona to nipodamba ira aga nompebasa nogau sala nantuki dota rara ira to najaꞌa. Ira nompakatantoru komi topomparasaya nasimbayu ewa gege nompakarangu baju. Pade nggari pokainggu ira to nepakaeya komi nisalai ntau, sabana guru-guru topodawa etu aga nompebasa nogau sala tempo ira nasiromu nanggoni mpasanggani-nggani ante komi.
14 Ira bate-batena naino mogau sala ante butu mbaꞌa besi to nikita ira. Daꞌa nabasa-basa ira nowia silaka. Ira nombaopa tau-tau to daꞌa naroso pomparasayana ala mowia silaka. Pade to najadi kabiasa ira aga nadoko nu doi. Ira mpuꞌu-mpuꞌu tau nasurukawu!
15 Nipalasi iramo jala to nakonona pade nasalanjalamo ira. Ira nompasiala pokainggu i Bileam ana i Beor nggaolu. Iꞌa aga naino ka doi to niratana nggari powiana to najaꞌana.
16 Tapi iꞌa nibunggaa sabana kajaꞌana etu. Keledai d pateke to nipesawina saongu binata to daꞌa namala notesa. Tapi keledai etu notesa ewa manusia nombatagi Bileam mompapola niana to nadoyo-doyo etu. e
17 Guru-guru topodawa etu nasimbayu ewa ulu nu ue to naotimo. Ira ewa kulimunggapu aga niburu mpoiri tapi daꞌa najadi uja. Nipakasadia ka ira petoꞌo to neliu nggarumau.
18 Sabana ante nalanga rara ira nantesa powia ira mboto, tapi tesa-tesa ira nawara. Ira nombaopa tau to lako nakabasaka nggari jaꞌi roa-roa ira to najaꞌa pokaingguna. Tau-tau etu niopa ira ante nompakapane dota rara to najaꞌa, ala ira manjili bali mantuki pokainggu to najaꞌa to lako nikabasaka ira.
19 Guru-guru etu nojanji ka tau-tau etu, “Ane komi mantuki pepatuduki kami komi kana makabasaka nggari atura-atura. Komi mamala mowia nuapa-nuapa nipodota komi.” Tapi kakonona ira mboto nipobatua pokainggu-pokainggu to nompakaropu. Sabana ane sambaꞌa tau nidagi dota rarana to najaꞌa iꞌa nipobatua dota rarana etu.
20 Nandasa mpuꞌumo guru-guru topodawa etu. Sabana bopia ira mpuꞌu-mpuꞌu nosinjani ante Pue Yesus Kristus, Magau to Mompakasalama kita sampe natekabasakamo ira nggari pokainggu to najaꞌa ri dunia eꞌi. Tapi naopu etu ira nipemala bo nipobatua bali pokainggu-pokainggu to najaꞌa etu. Kaopuna neliu nggandasa katuwu ira nggari pamulana.
21 Nabelopa tau ewa etu daꞌa sanggani nangginjani jala to nakonona pade nangginjanina tapi kaopuna nompalasi parenta-parenta Alatala to nagasa to nipatuduki ka ira.
22 To najadi ri jaꞌi ira nasimbayu ewa popata to nanguli iweꞌi: “Asu nanjili bali nanggoni luana,” pade “Wawu lako nidiu nanjili bali notompu ri gege.” f