Magau Daud bo Kota Sion to nipelisi PUE
132
Dade nipodade tempo nalau nantuki eo bete ri Yerusalem.O PUE, toramo i Daud,
bo pura-pura kasusana.
2 Iꞌa nojanji ka i PUE,
iꞌa nojanji ka Alatala to Neliu Nggaroso to nisomba Yakub iweꞌi:
3 “Aku daꞌa mesua ri sapoku mboto,
bara maturu ri paturuku,
4 aku daꞌa ntoto mapisi
atau maturu malumpi,
5 ane aku daꞌapa mompakasadia sapo ka i PUE,
petoꞌo ka Alatala to Neliu Nggaroso to nisomba Yakub.”
6 Niepeta mamimo ewa Peti Pojanji tempo ri Efrata,a
pade niratata ri karawa Yaar.b
7 Kamaimo kita malau mpaka ri Petoꞌo i PUE,
bo motimbakotu ri ngayo-Na mombasomba Iꞌa.”
8 O PUE, karatamo masalisa mpaka ri Sapo-Mu,
mosanggani ante Peti Pojanji tandaina Komi to nakuasana!
9 Perapi topanggeni-topanggani agama batena matuwu mantuki dota-Mu,
bo todea to nipotowe-Mu modade ante madamba-damba!
10 Toramo batua-Mu i Daud,
neꞌe rapoara magau to nipelisi-Mu.
11 Nojanjimo i PUE ka i Daud,
pade Iꞌa daꞌa nompalewa janji-Na etu.
Niuli-Na, “Sambaꞌa anamu kana Kupajadi magau
moparenta manjambei iko.
12 Ane ana-ana-mu batena momparasaya janji-Ku,
bo matundu riara pepatora-pepatora to Kupatuduki ka ira,
muli-muli ira kana mosinjambei moparenta ri poparentamu,
sampe ri kasae-saena.”
13 PUE nompelisi Sion,
majadi kota rapetoꞌo-Na.
14 Niuli-Na, “Ri seꞌimo petoꞌo-Ku sampe ri kasae-saena,
Ri seꞌimo Aku moparenta sabana etumo nipodota-Ku.
15 Pura-pura to niparaluu pue ngata Sion kana Kupakagana,
bo tau-tau nakasiasi ri setu kana Kuwai ka panggoni sampe mabosu.
16 Topanggeni-topanggeni agama kana mompakanoto ka tau to Israel,
Akumo Topompakasalama ira,
bo todea-Ku ri setu kana modade ante madamba-damba.
17 Ri setu maria muli-muli Daud Kuonggotaka majadi magau to maroso mpuꞌu,
bo ira bate-batena moparenta.
18 Poparenta ira kana majadi matolele,
tapi bali-bali ira kana Kupakaeya.”