Sanga-sanga topanggeni-topanggeni agama bo tau-tau to Lewi to nanjili nggari Tana Babel
12
Eꞌimo sanga-sanga topanggeni-topanggeni agama bo tau-tau to Lewi to nanjili mpasanggani-nggani ante i Zerubabel ana i Sealtiel bo Yesua. To najadi topanggeni-topanggeni agama:i Seraya, Yeremia, Ezra, 2 Amarya, i Malukh, i Hatus, 3 i Sekhanya, i Rehum, i Meremot, 4 Ido, i Ginetoi, Abia, 5 i Miyamin, i Maaja, i Bilga, 6 i Semaya, Yoyarib, Yedaya, 7 i Salu, Amok, i Hilkia, bo Yedaya. Ira eꞌimo balengga-balengga topanggeni agama bo sampesuwu-sampesuwu ira tempo Yesua najadi Balengga Topanggeni Agama.a
8 Pade eꞌimo tau-tau to Lewi:
Yesua, i Binui, i Kadmiel, i Serebya, Yehuda bo i Matanya.
Matanya bo sampesuwu-sampesuwuna nanggeniaka dade posukuru. 9 Pade i Bakbukya, Uni, bo sampesuwu-sampesuwu ira nenggore nosintingayo ante topodade ntanina nosinjono nodade tempo mepue ka Alatala.
10 Eꞌimo muli-muli Yesua, Balengga Topanggeni Agama:
Yesua noana ka Yoyakim, Yoyakim noana ka Elyasib, Elyasib noana ka Yoyada, 11 Yoyada noana ka Yonatan, bo Yonatan noana ka Yadua.
12 Eꞌimo sanga-sanga balengga-balengga topanggeni agama tempo Yoyakim najadi Balengga Topanggeni Agama:b
i Meraya nggari mbira i Seraya; i Hananya nggari mbira Yeremia; 13 i Mesulam nggari mbira Ezra; Yohanan nggari mbira Amarya; 14 Yonatan nggari mbira i Melikhu; Yusuf nggari mbira i Sebanya; 15 Adna nggari mbira i Harim; i Helkai nggari mbira i Merayot; 16 i Zakharia nggari mbira Ido; i Mesulam nggari mbira i Gineton; 17 i Zikhri, nggari mbira Abia; sambaꞌa topanggeni agama nggari mbira i Minyamin;c i Piltai nggari mbira Moaja; 18 i Samua nggari mbira i Bilga; Yonatan nggari mbira i Semaya; 19 i Matnai, nggari mbira Yoyarib; Uzi, nggari mbira Yedaya; 20 i Kalai, nggari mbira i Salai; i Heber, nggari mbira Amok; 21 i Hasabya, nggari mbira i Hilkia; bo i Netaneel, nggari mbira Yedaya.
22 Sanga-sanga topanggeniaka tau-tau to Lewi ira santina bo topanggeni-topanggeni agama to naria tempo Elyasib, Yoyada, Yohanan bo Yadua najadi Balengga Topanggeni Agama, nitulisimo riara buku tuntu sampe ri tempo poparenta i Darius magau to Persia. 23 Topanggeniaka-topanggeniaka mbira ira santina tau to Lewi nitulisi riara buku tuntu sampe ri tempo Yohanan ana Elyasib najadi Balengga Topanggeni Agama. 24 Eꞌimo topanggeniaka-topanggeniaka tau-tau to Lewi: Hasabya, i Serebya, Yesua ana i Kadmiel, bo sampesuwu-sampesuwu ira. Ira nibagi najadi rolunu to nenggore nosintingayo ala mosinjono modade mantoiya bo mosukuru ka i PUE, nantuki parenta i Daud, batua Alatala etu.
25 Matana, i Bakbukya, Obaja, i Mesulam, i Talmon bo Akub najadi topojaga-topojaga bobaa Sapo Mpepue. Ira nojaga ri tombi-tombi namosu bobaa etu to najadi petoꞌo pomboli mbara-mbara to niparaluu ri Sapo Mpepue. 26 Ira natuwu ri tempo Yoyakim, ana Yesua, makumpu Yozadak, pade ri tempo Gubernur Nehemia bo Ezra to najadi topanggeni agama bo guru agama.
Tembo Kota Yerusalem nisalama
27 Tempo posalama tembo Kota Yerusalem, tau-tau to Lewi nipokio nggari pura-pura ngata to nipetoꞌo ira, pade nikeni mpaka ri Kota Yerusalem, ala mowia posalama etu ante madamba-damba. Ira nodade bo nosukuru ante nokanda goo/gimba nggedi, gambusu bo kacapi. 28 Nasiromumo topodade-topodade nggari bagia namosu Kota Yerusalem, nabelo ka nggari ngata-ngata namosu Kota Netofa, 29 nabelo ka nggari Kota Bet-Gilgal, nabelo ka nggari bagia namosu Kota Geba bo Kota Asmawet, sabana naopumo ira nombabangu ngata-ngata ri ntalili Kota Yerusalem. 30 Topanggeni-topanggeni agama bo tau-tau to Lewi nanggawia ada nompegasa koro ira,d pade nompegasa todea, pewobo-pewobo, bo tembo kota.
31 Naopu etu, aku nompakau topanggeniaka-topanggeniaka Yehuda mepone ri bunggu tembo. Aku woꞌu nowia rolunu bete topodade posukuru. Salunu nolumako ri bunggu tembo ri sabingga nggana, mpaka ri Bobaa Pantijaka Rumpu. 32 Ri taliku ira nolumako Hosaya bo sabagia nggari topanggeniaka nto Yehuda, 33 nosanggani ante Azarya, Ezra, i Mesulam, 34 Yehuda, i Benyamin, i Semaya, bo Yeremia. 35 Naria woꞌu bara sakuya mbaꞌa topanggeni agama to nantawui kololio: i Zakharia ana Yonatan, ana i Semaya, ana i Matanya, ana i Mikha, ana i Zukur, ana Asaf, 36 pade sampesuwu-sampesuwuna, i Semaya, Azareel, i Milalai, i Gilalai, i Maai, i Netaneel, Yehuda bo i Hanani. Ira pura-pura nanggeni parewa-parewa musi nasimbayu ante parewa musi to nipake Magau Daud, batua nu Alatala. Pade Ezra, guru agama nolumako ri kolu ira. 37 Ri Bobaa Mata Ue ira nompapola nantuki tangga Kota Daud sampe ri bunggu tembo, pade nombaliunaka sapo Magau Daud mpaka ri Bobaa Ue ri sabingga pebuluna.
38 Lunu topodade posukuru karonguna nolumako ri bunggu tembo ri sabingga njidi. Aku bo sabagia todea nolumako nantuki ira ri bunggu tembo nombaliunaka Menara Pompowia Roti sampe ri Tembo Naremba, 39 napola nombaliunaka Bobaa Efraim, Bobaa Ntuꞌa, Bobaa Bau, Menara Hananeel bo Menara Mea, mpaka ri Bobaa Bimba. Pade nenontomo ira ri Bobaa Topojaga.
40 Naopu etu rolunu topodade posukuru etu nenggore ri ngayo Sapo Mpepue. Aku ante santongo nggari topanggeniaka to nosanggani-nggani ante aku naria woꞌu ri setu. 41 Pade naria woꞌu topanggeni-topanggeni agama to nanggeni kololio: Elyakim, i Maaseya, i Minyamin, i Mikha, Elyoꞌenai, i Zakharia, bo i Hananya. 42 Naria woꞌu topanggeni agama ntanina, i Maaseya, i Semaya, Eleazar, Uzi, Yohanan, i Malkia, Elam bo Ezer. Pade rolunu topodade etu nodade nikeniaka topopalu dade nosanga ka Yizrahya. 43 Ri eo etu nadea mpuꞌu pesomba to nipesomba tau ka Alatala. Ira nadamba-damba sabana Alatala nompakadamba rara ira. Besi-besi bo ngana-ngana woꞌu nadamba-damba, sampe suara tau-tau to nadamba-damba ri Kota Yerusalem natiepe sampe ri petoꞌo nakawao.
Pewai ka topanggeni-topanggeni agama bo tau-tau to Lewi
44 Ri tempo etu bara sakuya mbaꞌa tau nionggotaka ala mombaurusi tombi-tombi pomboli mbara-mbara ri Sapo Mpepue. Etu petoꞌo rapomboli pesomba asele ntana pamulana, bo pesomba sabagia nggari sampulu bagia asele ntana ntodea. Ira nompasiromu pewai-pewai nggari pampa-pampa namosu ri butu-butu kota. Pewai etu najadi bagia topanggeni-topanggeni agama bo tau-tau to Lewi nantuki Atura-atura agama to nipapola i Musa. Todea ri Bagia Yehuda nadamba-damba sabana naria topanggeni-topanggeni agama bo tau-tau to Lewi nokarajaa ri Sapo Mpepue, 45 sabana iramo to nanggeni pesomba ka Alatala bo nowia ada mompegasa todea. Pade topodade-topodade bo topojaga-topojaga bobaa woꞌu nantui bago ira nantuki parenta to nipakatantu Magau Daud bo anana i Salomo. 46 Nompamula nggari tempo i Daud bo Asaf nggaulu, naria topopalu dade bo topodade to nantoiya i PUE bo nodade nosukuru ri jaꞌi-Na. 47 Ri tempo i Zerubabel bo tempo i Nehemia pura-pura tau to Israel nombawai petulungi ka topodade-topodade bo topojaga-topojaga bobaa nantuki to niparaluu ira eo-eo. Ira woꞌu nombawai pesomba to nipakatantu ka tau-tau to Lewi, bo tau-tau to Lewi nombawai sabagia ka topanggeni-topanggeni agama, muli Harun.