Powia i Nehemia nantulungi to Israel mantuki Atura-atura Alatala
13
Tempo buku i Musa nibasa ri ngayo ntodea, nirata tesa nitulisi riara buku etu to nanguli tau to Amon bo tau to Moab daꞌa nipaloga majadi todea nu Alatala sampe ri kasae-saena.a 2 Sabana ira daꞌa nantomunaka to Israel ante panggoni bo ue inu tempo to Israel nalai nggari Tana Masir. Tapi ira nombagaji i Bileam ala mombajanjiaka to Israel. Tapi Alatala kami nombabali pejanjiaka etu najadi rasi.b 3 Tempo todea Israel nangepe tesa nggari buku i Musa etu, ira nompatani pura-pura paranaka nggari tatongo tau to Israel.4 Tapi daꞌapa tempo etu, topanggeni agama Elyasib nionggotaka mombaurusi tombi-tombi pomboli mbara-mbara ri Sapo Mpepue. Iꞌa nowega rapa ante i Tobia, 5 sampe niwaina ka i Tobia saongu tombi to nabetena ri Sapo Mpepue. Kakonona bopia tombi etu petoꞌo tau nombaboli pesomba to nipowia nggari gando, dupa, bo parewa-parewa to nipake ri Sapo Mpepue, pade pewai-pewai sabagia nggari sampulu bagia nggari gando, ue anggur bo lana to nipakatantu rawai ka tau-tau to Lewi, topodade-topodade bo topojaga-topojaga bobaa. Pade pewai-pewai to niwai ka topanggeni-topanggeni agama woꞌu niboli ri tombi etu.
6 Tempo pura-pura etu najadi, aku daꞌa naria ri Kota Yerusalem, sabana ri mpae katolumpulu bo ronguna poparenta Artahsasta,c magau to Babel, aku nalau nantingayo magau. Naliu bara sakuya kasaena, aku nopasabi ka magau, 7 ala manjili mpaka ri Kota Yerusalem. Tempo aku narata ri setu pade ninjaniku kajaꞌa to nipowia Elyasib nombawai saongu tombi ka i Tobia riara Sapo Mpepue. 8 Nanggita etu narau mpuꞌumo raraku, pade aku nantijaka mpaka ri sawalikuna pura-pura mbara-mbara i Tobia nggari tombi etu. 9 Pade nipakauku tau mompakagasa tombi-tombi etu, pade nikeniku mpanjili mpaka gusaꞌa parewa-parewa to nipake ri Sapo Mpepue ante dupa bo pesomba to nipowia nggari gando.
10 Ninjaniku woꞌu pewai-pewai ka tau-tau to Lewi daꞌa niwai ntodea, sampe ira bo topodade-topodade to nantui bago ira ri Sapo Mpepue natingguli mpaka ri pampa ira sambaꞌa bo sambaꞌa. 11 Jadi aku nangontiaka topanggeniaka ri setu, niuliku, “Nokuya Sapo Mpepue nipalamba waꞌamo?” Pade nipokioku bali tau-tau to Lewi bo topodade-topodade etu pade nipakauku ira manjili mantui bago ira ri Sapo Mpepue.
12 Naopu etu, pura-pura tau to Yehuda nompamula woꞌumo nanggeni pesomba sabagia nggari sampulu bagia gando, ue anggur, bo lana mpaka ri petoꞌo pomboli mbara-mbara ri Sapo Mpepue. 13 Aku nangonggotaka tau-tau ala mombaurusi tombi-tombi pomboli mbara-mbara, etumo: Selemya topanggeni agama, i Zadok guru agama, pade i Pedaya tau to Lewi. Hanan ana i Zukur makumpu i Matanya nantulungi ira. Ira eꞌi nireke tau to namala raparasaya pade ira nipakakuasa mombabagi mbara-mbara etu ka roa-roa ira topanggeni agama bo tau-tau to Lewi.
14 “O Alatalaku, toramo aku sabana powiaku eꞌi. Neꞌe rakalinga powia-powia nabelo to nipowiaku ka Sapo nu Pueku bo pura-pura bago riarana.”
15 Ri tempo etu nikitaku bara sakuya mbaꞌa tau ri Bagia Yehuda nompea anggur tempo Eo Mpenonto. Pade naria woꞌu bara sakuya mbaꞌa tau nombasawiraka gando, ue anggur, wua anggur, wua ara bo panggeni-panggeni ntanina ri keledai ira. Pade pura-pura etu nikeni ira nesua ri Kota Yerusalem ri Eo Mpenonto. Nipopatorakumo ka ira neꞌe mompobalu panggoni-panggoni etu. 16 Tau-tau nggari Kota Tirus to netoꞌo ri Kota Yerusalem woꞌu nanggeni bau bo mpengele-ngele mbara-mbara mpaka ri Kota Yerusalem ri Eo Mpenonto ala rapobalu ka tau to Yahudi. 17 Jadi aku nangontiaka totuꞌa-totuꞌa ngata to Yehuda ri setu. Niuliku ka ira, “Najaꞌa mpuꞌu powiamu etu! Komi nompakatantoru Eo Mpenonto! 18 Sabana nggari silaka etumo Alatala nombasuku totuꞌata nggaulu bo nompakagero kota eꞌi! Tapi komi aga nantambai karau rara Alatala ka to Israel ante nompakatantoru Eo Mpenonto!”
19 Pade niparentaku ala bobaa-bobaa kota rapiku tempo nompamula ngguwiana daꞌapa Eo Mpenonto, bo neꞌe rabea sampe maopu Eo Mpenonto. Pade nipakauku bara sakuya mbaꞌa anabuaku nanggatono bobaa-bobaa etu ala neꞌe maria panggeni nuapa-nuapa rakeni ntau mesua ri Kota Yerusalem tempo Eo Mpenonto. 20 Tapi bara sakuya nggani naria topodaga bo topobalu-balu mpengele-ngele mbara-mbara naturu ri sawaliku Kota Yerusalem sambengi. 21 Aku nangontiaka ira ante nanguli, “Nokuya komi naturu ri ngayo tembo? Ane komi mowia iwetu sangganipa, aku kana mompandasa komi!” Jadi nompamula nggari tempo etu ira mana narata ri Eo Mpenonto. 22 Naopu etu, nipakauku tau-tau to Lewi nanggawia ada mompegasa koro ira mboto, pade malau mombajaga bobaa-bobaa kota ala pura-pura tau kana mombabila Eo Mpenonto.
“O Alatalaku, toramo aku sabana powiaku eꞌi woꞌu. Popokitamo asi mata-Mu ri jaꞌiku nantuki towe-Mu to daꞌa ria kaopu-opuna.”
23 Ri tempo etu nikitaku woꞌu bara sakuya mbaꞌa tau to Israel nomporongo besi-besi to Asdod, to Amon bo to Moab. 24 Sabagia nggari ana-ana ira notesa basa Asdod. Ira daꞌa namala notesa basa Yahudi, aga basa ntau daꞌa to Yahudi etu. 25 Jadi aku nangontiaka ira bo nombajanjiaka ira. Naria bara sakuya mbaꞌa nggari ira nibobaku, pade woꞌo ira nirebuku. Pade nipakauku ira mojanji riara sanga Alatala ira daꞌa mombawai ana-ana besi ira raporongo ana-ana langgai daꞌa to Yahudi, bo ira daꞌa mangala ana-ana besi daꞌa to Yahudi raporongo ana-ana langgai ira, bara ira mboto. 26 Niuliku ka ira, “Magau Salomo woꞌu nowia silaka sabana besi-besi daꞌa to Yahudi to niporongona. Daꞌa ria magau nasimbayu ewa iꞌa ri njumaongu dunia. Iꞌa nipotowe Alatala bo nionggotaka-Na najadi magau pura-pura to Israel. Tapi naupa iwetu iꞌa woꞌu nikeni besi-besi daꞌa to Yahudi nompowia silaka. 27 Iwenumo? Masipato kami mangepe komi nompasiala pokainggu to najaꞌa etu? Komi daꞌa natutu nomparasaya Pueta ante nomporongo besi-besi daꞌa to Yahudi! Komi aga nangewa Alatala!”
28 Yoyada ana Balengga Topanggeni Agama to nosanga ka Elyasib, tapi sambaꞌa nggari ana-ana Yoyada najadi mania i Sanbalat, tau to Horon. Sabana etu, aku nompopalai ana Yoyada etu nggari Kota Yerusalem.
29 “O Alatalaku, toramo iwenu ira nompakatantoru bago topanggeni agama bo pojanji-Mu ante topanggeni-topanggeni agama bo tau-tau to Lewi.”
30 Iwetumo aku nompakagasa tau-tau to Israel nggari pura-pura pokainggu to natantoru nggari tau-tau nggari ngata ntanina. Pade nipakatantukumo bago-bago topanggeni-topanggeni agama bo tau-tau to Lewi sambaꞌa bo sambaꞌa. 31 Nipakatantuku woꞌu akala mompakasadia kayu rapalabu ri Sapo Mpepue ri tempo to nipakatantu, bo akala todea manggeni asele ntana ira pamulana mpaka ri Sapo Mpepue.
“O Alatalaku, toramo aku bo wai ka akumo rasi.”