10
Eꞌimo sanga tau-tau to noteke sura pojanji etu: Gubernur Nehemia ana i Hakhalya, bo i Zedekia.2 Topanggeni-topanggeni agama: i Seraya, Azarya, Yeremia, 3 i Pashur, Amarya, i Malkia, 4 i Hatus, i Sebanya, i Malukh, 5 i Harim, i Meremot, Obaja, 6 i Daniel, i Gineton, i Barukh, 7 i Mesulam, Abia, i Miyamin, 8 i Maazya, Bilgai bo i Semaya.
9 Tau-tau to Lewi, etumo: Yesua ana Azanya, i Binui nggari muli Henadad, bo i Kadmiel. 10 Pade naria woꞌu sampesuwu-sampesuwu ira, etumo: i Sebanya, i Hodia, i Kelita, i Pelaya, i Hanan, 11 i Mikha, i Rehob, i Hasabya, 12 i Zukur, i Serebya, i Sebanya, 13 i Hodia, i Bani, bo i Beninu.
14 Topanggeniaka-topanggeniaka ngata: i Paros, i Pahat-Moab, Elam, i Zatu, i Bani, 15 i Buni, Azgad, i Bebai, 16 Adonia, i Bigwai, Adin, 17 Ater, i Hizkia, Azur, 18 i Hodia, i Hasum, i Bezai, 19 i Harif, Anatot, i Nebai, 20 i Magpias, i Mesulam, i Hezir, 21 i Mesezabeel, i Zadok, Yadua, 22 i Pelaka, i Hanan, Anaya, 23 i Hosea, i Hananya, i Hasub, 24 i Halohes, i Pilha, i Sobek, 25 i Rehum, i Hasabna, i Maaseya, 26 Ahia, i Hanan, Anan, 27 i Malukh, i Harim, bo i Baana.
28 Pade naria todea ntanina noteke sura pojanji etu. Eꞌimo ira: topanggeni-topanggeni agama, tau-tau to Lewi, topojaga-topojaga bobaa, topodade-topodade, topokarajaa-topokarajaa ri Sapo Mpepue, bo pura-pura tau to mana nosigalo ka tau-tau daꞌa to Yahudi ri tana etu ala mantuki Atura-atura Alatala, nosanggani-nggani ante rongo-rongo bo ana-ana ira, nabelo ka langgai, nabelo ka besi, to namala manginjani pojanji etu. 29 Ira pura-pura nosaongu rara ante sampesuwu-sampesuwu ira to najadi totuꞌa-totuꞌa ngata. Ira pura-pura nojanji ante netunda ira kana matuwu mantuki Atura-atura Alatala to nipasimbayu batua-Na i Musa ka ira. Ira nojanji matutu mantuki pura-pura parenta i PUE Alatala kami, ante atura-atura bo atura-atura to nipakatantu-Na.
30 Kami nojanji daꞌa mombawai ana-ana besi kami raporongo tau-tau daꞌa to Yahudi to netoꞌo ri tana eꞌi, pade kami daꞌa mangala ana-ana besi ira raporongo ana-ana langgai kami.
31 Ane tau-tau daꞌa to Yahudi nggari ngata eꞌi manggeni mbara-mbara atau gando rapobalu ri Eo Mpenonto, kami daꞌa mangoli nggari jaꞌi ira ri Eo Mpenonto bara ri eo bete ntanina.
Ri butu-butu mpae kapapituna kami daꞌa nantui panggawia kami, bo daꞌa mombasungara inda.
32 Kami woꞌu nojanji butu-butu mpae simbau mombawai ampa gram salaka rapompakagana to niparaluu riara Sapo Mpepue. 33 Doi etu rapake mompakasadia roti to rapesomba ka Alatala, pesomba nipowia nggari gando to rapesomba eo-eo, pesomba rapalabu eo-eo, pesomba to rapesomba ri Eo Mpenonto, ri eo-eo bete wula nggiki, eo-eo bete ntanina, bo pesomba mantolo silaka nto Israel. Pade doi etu woꞌu rapake mowia nuapa-nuapa to niparaluu ri Sapo Mpepue.
34 Kami, topanggeni-topanggeni agama, tau-tau to Lewi, bo todea Israel, ante nompenoa nowia nomoro nompakatantu akala mompakasadia kayu rapalabu to rakeni ri Sapo Mpepue. Kayu etu kana rakeni kami saongu-saongu njapo mpaka ri Sapo Mpepue ri tempo to nipakatantu butu-butu mpae. Kayu etu rapalabu ri petoꞌo pompalabu pesomba ka i PUE Alatala kami, ewa to nitulisi riara Buku Atura-atura agama to nipapola i Musa.a
35 Pade butu-butu mpae kami kana manggeni asele ntana kami pamulana, bo asele pamulana nggari mpengele-ngele kayu nowua mpaka ri Sapo Mpepue.
36 Nantuki atura to nitulisi riara Buku Atura-atura agama to nipapola i Musa, kami kana manggeni ana-ana ulumbua kami bo ana-ana ulumbua pompatuwu kami, nabelo ka ana japi nabelo ka ana bimba bo towau, ka topanggeni agama to nokarajaa ri Sapo Mpepue.b
37 Kami kana manggeni ka topanggeni agama sowu gando pamulana, bo pesomba-pesomba ntanina. Pade rakeni kami woꞌu wua nggari mpengele-ngele kayu, ue anggur, bo lana zaitun. Etu pura-pura kana raboli ri tombi-tombi pomboli mbara-mbara ri Sapo Mpepue. Sabagia nggari sampulu bagia asele ntana kami kana rakeni kami ka tau-tau to Lewi, sabana iramo to masipato mompasiromu pesomba sabagia nggari sampulu bagia ri pura-pura ngata pokarajaa kami. 38 Sambaꞌa topanggeni agama muli Harun kana momporoa tau-tau to Lewi tempo ira mompasiromu pesomba sabagia nggari sampulu bagia etu. Pade tau-tau to Lewi etu kana manggeni sabagia nggari sampulu bagia nggari pesomba etu mpaka ri Sapo Mpepue raboli ri tombi-tombi pomboli mbara-mbara. 39 Todea Israel bo tau-tau to Lewi kana manggeni pesomba-pesomba gando, ue anggur, bo lana mpaka ri tombi-tombi etu. Ri setu naria parewa-parewa to nipake ri Sapo Mpepue. Pade naria petoꞌo ka topanggeni-topanggeni agama to nanggeni podade, topojaga-topojaga bobaa, bo topodade-topodade.
Kami daꞌa mompalamba Sapo Mpepue kami.