Todea Israel nompangaku silaka ira
9
Ri eo karompulu bo ampana wula papitu etu woꞌu todea Israel nasiromu bo napuasa. Ira nompake pakea nggari karu bo nombadika sowu ri balengga ira tandaina nasusa rara. 2 Ira to najadi muli nto Israel mana nosigalo ka pura-pura tau daꞌa to Yahudi, pade ira nenggore nompangaku silaka ira bo kasala ntotuꞌa ira. 3 Tolongu jaa kasaena ira nenggore ri petoꞌo, nangepe tau nombabasa tesa nggari Buku Atura-atura agama nggari PUE Alatala ira. Pade toluongu jaapa woꞌu ira nompangaku silaka-silaka ira bo notimbakotu nombasomba i PUE Alatala ira. 4 Naria tau-tau to Lewi nenggore ri tangga to nipakatantu ka ira nekakai ante suara nagai ka i PUE Alatala ira. Ira etumo Yesua, i Bani, i Kadmiel, i Sebanya, i Buni, i Serebya, Bani bo i Kenani. 5 Pade nangulimo tau to Lewi, etumo Yesua, i Kadmiel, i Bani, i Hasabneya, i Serebya, i Hodia, Sebanya bo i Petahya, “Pekanggoremo, toiyamo i PUE, Alatalamu to naria sampe ri kasae-saena!”Pade nosambayamo ira, “O PUE, ratoiyamo sanga-Mu to nibila, to nipogumaa bo nibila neliu nggari pura-pura sanga!
6 Aga Komimo Alatala! Komimo to nompajadi langi to neliu nggalanga ante eo, wula bo pura-pura betuꞌe, dunia bo pura-pura isina, tasi bo pura-pura isina. Komimo to nompiara pura-pura isi dunia bo isi nu tasi etu. Pade eo, wula bo betuꞌe ri langi nombasomba Komi.
7 Komimo PUE Alatala to nompelisi Abram pade nanggeni iꞌa nesuwu nggari ngata Ur ri Tana Babilonia, pade nompoposanga iꞌa Abraham. 8 Nikita-Mu iꞌa natutu nantuki Komi pade nipowia-Mu pojanji ante iꞌa ala mombawai ka mulina tana nto Kanaan, to Het, to Amori, to Feris, to Yebus bo to Girgasi. Pade nipakadupa-Mu tesa-Mu, sabana Komi nanoa.
9 Komi nanggita kasusa bo kapari ntotuꞌa kami ri Tana Masir nggaulu, pade niepe-Mu pekakai ira ri wiwi Tasi Lei.a 10 Komi nompowia tandai-tandai to nipogumaa bo kabaraka-kabaraka ri ngayo magau Masir, pura-pura pangga betena bo pura-pura todea Masir, sabana ninjani-Mu ira noinggu nasombo-sombo nompandasa totuꞌa kami nggaulu. Ante iwetu Komi nompakabete sanga-Mu sampe weꞌi-weꞌi. 11 Komi nombabingga tasi ri ngayo todea-Mu sampe ira nolumako nombawote tasi ri tana to nangau. Tapi tau-tau to nombaraga ira nitijaka-Mu mpaka ri ue to nandalana nasimbayu ewa watu nirempe ri ue to naramboso. 12 Komi nombanini ira ante kulimu nolenje mpotinja tempo eona bo apu nolenje mpotinja tempo nggawengina ala mompakareme jala to ratuki ira.
13 Komi nanaꞌu ri bunggu Bulu Sinai bo notesa ka ira nggari langi. Niwai-Mu ka ira atura-atura to nanoa, atura-atura to nakonona, atura-atura to nipakatantu, bo parenta-parenta to nabelona. 14 Komi nompopanjani ka ira Eo Mpenonto-Mu to nagasa, bo nombawai ka ira parenta-parenta, atura-atura to nipakatantu, bo atura-atura. Pura-pura etu nipapola batua-Mu i Musa ka ira. 15 Tempo ira naoro taꞌi Komi nombawai ka ira roti nggari langi, bo tempo ira nabai tambolo Komi nompopoili ue nggari bulu watu. Komi nompakau ira mesua mombakuasai tana to nijanji-Mu ka ira ante nojanji.
16 Tapi ira, totuꞌa kami nggaulu etu, noinggu nasombo, nompakakoꞌo rara, bo daꞌa nadota nangepe parenta-parenta-Mu. 17 Ira daꞌa nadota matundu ri jaꞌi-Mu bo daꞌa nantora powia-powia to nabaraka to nipowia-Mu ri tatongo ira. Ira nompakakoꞌo rara nangewa Komi, bo ante nasombo ira nompelisi sambaꞌa topanggeniaka manggeni ira matingguli mpaka ri petoꞌo ira nipobatua ri Tana Masir. Tapi Komi Alatala to nadota nombaampungi, nabelo rara bo naꞌasi mata, nandate posabara bo neliu mpuꞌu towe-Mu to daꞌa ria kaopu-opuna, sampe Komi daꞌa nompalasi ira. 18 Komi woꞌu daꞌa nompalasi ira tempo ira nompowia parantau nolenje mpoana japi pade nanguli, ‘Eꞌimo Alatala kami to nanggeni kami nalai nggari Tana Masir!’ Pade Komi daꞌa woꞌu nompalasi ira tempo ira nanguli sinjaꞌi komi ante tesa to najaꞌa mpuꞌu.
19 Nantuki kabete towe-Mu, Komi daꞌa nompalasi ira ri karawa baina. Kulimu nolenje mpotinja batena nompakanoto jala ira tempo eona. Pade apu nolenje mpotinja batena nombawanta jala to ratuki ira tempo nggawengina. 20 Komi nombawai ka ira Nosa Nagasa-Mu to nabelo ala mompatuduki ira. Komi batena nompopanaꞌu ka ira roti manna, bo nombawai ka ira ue tempo nabai tambolo. 21 Patampulu mpae kasaena Komi nompakagana ka ira nuapa to niparaluu ira ri karawa baina. Ira daꞌa nakura nuapa-nuapa. Pakea ira daꞌa naranta, bo kada ira daꞌa sanggani nebangga.
22 Komi nombawai ka todea-Mu kuasa nombadagi magau-magau bo todea ira, pade nombabagi tana ira ka todea-Mu sampe ri pantaꞌana to nakawao. Ira nangala bo nombakuasai tana Magau Sihon nggari Hesbon bo tana Magau Og nggari Basan. 23 Komi nompakadea ana-ana bo makumpu ira nasimbayu ewa betuꞌe ri langi, pade Komi nanggeni ira mpaka ri tana to nijanji-Mu ka totuꞌa ira rapesua bo rapetoꞌo. 24 Naopu etu naratamo muli ira nombakuasai tana etu. Komi nantulungi ira nompakaropu to Kanaan, pue ngata etu. Pade todea ri setu bo magau-magau ira niwai-Mu riara mpale todea-Mu ala rapowia nantuki dota ira mboto. 25 Ira nombadagi bo nangala ngata-ngata to naria tembo pekalenduna bo tana to naboyana. Niala ira sapo-sapo to naponu ante mpengele-ngele anu to nabelona, buwu-buwu, pampa-pampa nipotuja anggur, pampa-pampa nipotuja zaitun bo nadea mpuꞌu kayu-kayu to nowua. Nanggonimo ira sampe nabosu bo najadi naboya. Ira natuwu nasana sabana kabelo-Mu to neliu mpuꞌu.
26 Tapi ira daꞌa natundu ri jaꞌi-Mu bo nangewa Komi. Ira nanjapuaka Atura-atura-Mu pade nompatesi nabi-nabi-Mu to nompopatora ka ira ala matingguli ri jaꞌi-Mu. Ira nanguli sinjaꞌi Komi ante najaꞌa mpuꞌu. 27 Sabana etu Komi nombawai ira riara mpale nu bali-bali to nompandasa ira. Tapi tempo ira nipandasa, ira nekakai nerapi tulungi ri jaꞌi-Mu, pade Komi nangepe ira nggari suruga. Komi nompakau bara sakuya mbaꞌa tau to nanggabasaka ira nggariara mpale nu bali-bali ira, sabana nabete mpuꞌu asi mata-Mu.
28 Tapi tempo katuwu ira nasanamo, ira nowia to najaꞌa riara mpanggita-Mu. Jadi Komi nombawai ira riara mpale nu bali-bali to nompatundu bo nompandasa ira. Tapi tempo ira nekakai bali merapi tulungi ri jaꞌi-Mu, Komi nangepe ira nggari suruga, pade mpanggani-ngganimo Komi nantulungi ira, sabana nabete mpuꞌu asi mata-Mu.
29 Komi nompopatora ira ala matingguli mantuki Atura-atura-Mu. Tapi ira aga noinggu nasombo bo daꞌa nadota nantuki parenta-parenta-Mu. Ira nasilaka bo nangewa Atura-atura-Mu, naupa tau to nantuki Atura-atura etu kana matuwu mabelo. Ira nanjapuaka bo nangewa Komi, ira nompakakoꞌo rara, bo daꞌa nadota nangepe. 30 Nompae-mpaemo Komi nosabara ri jaꞌi ira. Pade ante pekeniaka Nosa Nagasa-Mu nabi-nabi-Mu nompopatora ira. Tapi ira daꞌa nadota nangepe. Jadi Komi nombawai ira riara mpale tau-tau nggari ngata-ngata ntanina. 31 Tapi naupa iwetu, nggari kabete asi mata-Mu, Komi daꞌa nompakaropu ira bara nompalasi ira, sabana Komi Pue to natowe bo naꞌasi mata.
32 O Alatala, Alatala kami to nabete bo nakuasa bo nipogumaa. Komi batena nompakadupa pojanji-Mu bo batena nompakanoto towe-Mu to daꞌa ria kaopu-opuna. Neꞌe rakalinga kasusa-kasusa to nawela kami, magau-magau kami, topanggeniaka-topanggeniaka kami, topanggeni-topanggeni agama kami, nabi-nabi kami, totuꞌa-totuꞌa kami nggaulu, bo pura-pura todea-Mu, nompamula nggari tempo magau-magau to Asyur nompandasa kami sampe ri eo eꞌi. 33 Riara pura-pura to najadi ri jaꞌi kami, Komi batena nanoa. Komi namala raparasaya, tapi kami eꞌi nompowia to najaꞌana. 34 Magau-magau kami, topanggeniaka-topanggeniaka kami, topanggeni-topanggeni agama kami, bo totuꞌa-totuꞌa kami daꞌa natutu nantuki Atura-atura-Mu. Ira daꞌa nadota nangepe parenta-parenta-Mu bo pepatora-pepatora-Mu to niwai-Mu ka ira. 35 Tempo ira daniparenta magau-magau ira mboto, ira daꞌa nadota nepue ka Komi. Naupa ira nombarasai kabelo-Mu to nabete bo netoꞌo ri tana to naluo bo naboya to niwai-Mu ka ira, ira daꞌa najea nggari pokainggu-pokainggu to najaꞌa.
36 Kitamo, eo eꞌi kami najadi batua. Kami najadi batua ri tana to niwai-Mu ka totuꞌa kami ala mombarasai aselena bo mpengele-ngele to nabelo riarana. 37 Tapi asele ntana to nadea kana rawai kami ka magau-magau to nipakatantu-Mu moparenta kami sabana silaka-silaka kami. Ira nombakuasai koro kami bo pompatuwu kami nantuki dota rara ira mboto, sampe kami riara kasusa bete.”
Janji todea ka Alatala
38 Nantora pura-pura silaka kami etu, kami nowia pojanji to naroso. Pojanji etu nitulisi kami pade topanggeniaka-topanggeniaka kami, tau-tau to Lewi bo topanggeni-topanggeni agama kami noteke sura pojanji etu.b