Ezra nombabasa ka todea Atura-atura agama to nipapola i Musa
8
Tempo naratamo wula kapapituna pade to Israel netoꞌomo ri kota-kota ira, 2 nasiromu puramo todea ri lapanga ri ngayo Bobaa Ue. Ira nerapi Ezra, guru agama, ala iꞌa manggeni Buku Atura-Atura agama to nipapola i Musa to niparenta i PUE ka tau-tau to Israel.3 Ri eo pamulana wula papitu, Ezra topanggeni agama nanggeni Buku Atura-atura agama to nipapola i Musa ri ngayo ntodea, etumo langgai, besi, bo pura-pura tau to namala nangepe bo nanginjani. 4 Ante nantingayo mpaka ri lapanga ngata, ri ngayo Bobaa Ue, nibasana buku etu nggari mpadondona sampe ntongo eo ka langgai, besi, bo tau-tau to namala nanginjani. Pura-pura todea nangepe mpakabelo-belo Ezra nombabasa Buku Atura-atura i Musa etu.
5 Ezra, guru agama etu, nenggore ri petoꞌo ri kalangana to nipowia nggari kayu ala rapake ri kasiromu ntodea etu. Ri sabingga ngganana naria i Matica, i Sema, Anaya, Uria, i Hilkia, bo i Maaseya, pade ri sabingga njidina naria i Pedaya, i Misael, i Malkia, i Hasum, i Hasbadana, Zakharia bo i Mesulam. 6 Ezra nombabuka buku etu ri ngayo pura-pura tau. Iꞌa namala nikita ira sabana iꞌa nenggore ri petoꞌo to neliu nggalanga nggari pura-pura tau ntanina. Iwetu iꞌa nombabuka buku etu, nekanggoremo pura-pura tau. 7 Ezra nantoiya i PUE Alatala to Neliu Nggakuasa, pade nangulimo pura-pura todea, ꞌAmin, Amin,ꞌ ante nangonggotaka pale. Pade notimbakotumo ira sampe ri tana nombasomba i PUE.
8 Pade tau-tau to Lewi ri setu nantulungi todea manginjani isi buku Atura-atura i Musa etu tempo todea nenggore ri setu. Eꞌimo sanga-sanga tau to Lewi etu: Yesua, i Bani, i Serebya, Yamin, Akub, i Sabetai, i Hodia, i Maaseya, i Kelita, Azarya, Yosamad, Haman bo i Pelaya. 9 Ira nombabasa buku Atura-atura i Musa etu, bo nompakanoto batuana ala isi buku etu ranjani ntodea.
10 Nangepe tesa buku Atura-atura i Musa etu, notumangimo pura-pura todea ri setu. Jadi nangulimo i Nehemia, gubernur etu, Ezra to najadi topanggeni agama bo guru agama, ante tau-tau to Lewi to nompakanoto isi buku ka todea. Niuli ira, “Eo eꞌi eo to nagasa ka i PUE Alatala komi. Neꞌe masusa rara bara motumangi!”
11 Pade nangulimo i Nehemia ka ira, “Panjilimo, konimo panggoni to narasa-rasana ante madamba-damba, inumo panginu to namomi-momi. Pade waimo panggoni bo panginu ka tau-tau to daꞌa nariana, sabana eo eꞌi eo to nagasa ka Pueta. Neꞌe komi masusa rara, sabana kadamba nu rara nggari jaꞌi PUE etumo nompakaroso komi.”
12 Tau-tau to Lewi woꞌu nerapi ka pura-pura todea malino ante nanguli, “Pekalinomo! Eo eꞌi eo to nagasa. Neꞌe masusa rara!”
13 Naopu etu nalaumo pura-pura tau nanggoni bo nanginu, nombabagi-bagi panggoni ka tau ntanina, bo nowia posusa bete ante nadamba rara, sabana ninjani iramo batuana tesa i PUE to nibasa ka ira.
Eo Bete Mowia Pakumpa
14 Ri eo karoeona wula etu topanggeniaka ira santina nggari pura-pura todea, topanggeni-topanggeni agama, bo tau-tau to Lewi nasiromu nantingayo Ezra, guru agama etu, ala meguru isi Buku Atura-atura agama to nipapola i Musa etu. 15 Riara buku Atura-atura agama to nitesa i PUE ka i Musa etu nirata ira parenta to nanguli ri wula kapapituna tau-tau to Israel kana metoꞌo riara pakumpa mantuki Eo Bete Mowia Pakumpa.a 16 Ira kana mompatolele ri kota-kota ira bo ri Kota Yerusalem woꞌu parenta eꞌi: “Kalaumo komi mpaka ri buluna mangala tawa-tawa kayu zaitun, tawa-tawa kayu zaitun nggakayu, tawa-tawa kayu murad, tawa-tawa kaluku bo tawa-tawa kayu ntanina to nagumbu, ala komi mamala mowia pakumpa ewa to nitulisi riara Buku Atura-atura agama to nipapola i Musa.”
17 Jadi nalaumo todea nangala mpengele-ngele tawa etu. Pade nipowia ira pakumpa-pakumpa ri bunggu ata nu sapo ira sambaꞌa bo sambaꞌa, ri lalowo sapo ira, ri lalowo Sapo Mpepue, ri lapanga namosu Bobaa Ue, bo ri lapanga namosu Bobaa Efraim. 18 Pura-pura todea to nanjili nggari petoꞌo ira nipobatua etu nompowia pakumpa-pakumpa bo netoꞌo riarana. Nadamba mpuꞌu rara ira. Nompamula nggari tempo Yosua ana i Nun sampe ri eo etu daꞌapa sanggani nipowia tau-tau to Israel Posusa Mowia Pakumpa etu.
19 Butu-butu eo posusa etu, nompamula nggari eo pamulana sampe eo kaopuna, Ezra nombabasa ka todea Buku Atura-atura agama to nipapola i Musa. Pitu eo kasaena eo bete etu niposusa ira, pade ri eo kawaluna ira pura-pura nasiromu, nantuki parenta nggari buku Atura-atura agama etu.