Powia bali-bali Nehemia mombalawa pokarajaa mompakabelo tembo kota
6
Sanbalat, i Tobia, bo i Gesyem to Arab etu, bo bali-bali kami ntanina nangepe aku naopu nompakabelo tembo sampe bolo-bolona nitutu pura, naupa tempo etu pompiku bobaa-bobaa daꞌapa nipatakaku. 2 Pade Sanbalat bo i Gesyem nompakau tau mpaka ri jaꞌiku ante tewai, “Kamaimo kita mosirata mpasanggani ri saongu ngata ri Lemba Ono.” Tapi ira nonia mompakasusa aku. 3 Etumo sabana aku nompakau bara sakuya mbaꞌa tau malau mpaka ri jaꞌi ira ante pesono iweꞌi: “Aku nantui saongu pokarajaa to nabetena. Daꞌa mamala aku marata ri setu. Nokuya pokarajaa eꞌi rapopenonto ala aku mompalasi etu momai ri jaꞌi komi?” 4 Pata ngganimo ira nompakatu ka aku tewai ewa etu, tapi butu nggani aku nombawai pesono to nasimbayu ka ira.5 Naopu etu i Sanbalat nompakau sambaꞌa anabuana mpaka ri jaꞌiku kalima ngganina ante tewai nasimbayu ewa etu. Tau etu nanggeni sura to daꞌa nibungu, 6 to naria isina iweꞌi:
“Naria kareba ri tatongo tau-tau daꞌa to Yahudi ri bagia eꞌi, to nitakono i Gesyem woꞌu, nanguli iko bo tau-tau to Israel nopatuju mangewa magau Persia. Etumo sabana komi nompakabelo tembo kota etu. Nantuki kareba etu iko madota majadi magau ira, 7 sampe iko nangonggotaka nabi-nabi ala mompatolele kareba ri Kota Yerusalem, to nanguli naria sambaꞌa magau ri Tana Yehuda, i Nehemia! Natantumo kareba etu kana raepe magau. Sabana etu, kamaimo kita molibu mpasanggani-nggani.”
8 Jadi aku nompakau sambaꞌa tau mpaka ri jaꞌina ante pesono iweꞌi: “Nuapa to nitesamu etu daꞌa nakono! Tesa-tesa etu aga nipetowalimu mboto!”
9 Bali-baliku etu nompasimbuku mompareka kami. Nipekiri ira, “Tau-tau to Yahudi kana maopu rara sampe pokarajaa etu daꞌa mamala rapakaopu!”
Tapi nosambayamo aku, “O Alatala, pakarosomo aku!”
10 Naria saeo aku nalau mpaka ri sapo i Semaya ana i Delaya bo makumpu i Mehetabeel to daꞌa naloga marata ri jaꞌiku. Niulina, “Kamaimo kita rombaꞌa malau mosirata ri tombi to nagasa ri Sapo Mpepue.a Pade rapikuta pewobo-pewobo Sapo Mpepue, sabana naria tau madota mompatesi iko. Wengi eꞌi ira kana marata ala mompatesi iko.”
11 Tapi niuliku, “Masipato tau ewa aku mangowa malai? Daꞌa masipato tau biasa ewa aku eꞌi mesua riara Sapo Mpepue ala mompakasalama koroku! Aku daꞌa malau!” 12 Nanotomo ka aku tesa nabi etu daꞌa nggari jaꞌi Alatala. Iꞌa nantesa etu ka aku sabana iꞌa nibayari Tobia bo i Sanbalat. 13 Patuju ira ala aku maeka pade mantuki tesa i Semaya etu sampe aku masilaka. Ante iwetu ira mamala mompakawau sangaku sampe aku rasalai ntau.
14 Nosambayamo aku, “O Alatalaku, toramo nuapa to nipowia Tobia bo i Sanbalat, pade to nipowia nabi besi Noaja bo nabi-nabi ntanina to madota mompareka aku.”
Tembo kota Yerusalem naopu nipakabelo
15 Ri tanggal rompulu bo alima wula Elul,b tembo etu naopu nipakabelo kami riara tempo limampulu bo roeo. 16 Tempo bali-bali kami bo tau-tau ri negara-negara ri ntalili kami nangepe lele etu, naekamo rara ira. Naeya mpuꞌumo mata ira, sabana ninjani ira pokarajaa etu nikawia ante petulungi Alatala to nisomba kami.
17 Ri tempo etu woꞌu totuꞌa-totuꞌa ngata ri Bagia Yehuda nosipakatu ka sura ante i Tobia. 18 Nadea tau ri Bagia Yehuda nojanji mosabingga ka iꞌa, sabana iꞌa mania i Sekhanya ana Arah. Pade anana Yohanan nomporongo ana besi i Mesulam ana i Berekhya. 19 Ira nombatesa-tesa kabelo i Tobia ri jaꞌiku, bo tesa-tesaku nipapola ira ka iꞌa. Pade i Tobia woꞌu batena nompakatu sura ka aku ala mompareka aku.