Nehemia nantulungi tau-tau nakasiasi
5
Naria sanggani todea to Yahudi nabelo ka langgai nabelo ka besi nongua-ngua ri jaꞌi roa-roa ira to Yahudi to nakalumana. 2 Naria to nanguli, “Kami eꞌi ante ana-ana kami besi bo langgai, nadea mpuꞌu. Kami paraluu gando ala kami mamala manggoni bo batena matuwu.”3 Pade naria woꞌu to nanguli, “Kami nombatagala pampa, pampa nipotuja anggur bo sapo kami rapangoli gando tempo kamateoro.”
4 Naria woꞌu to nanguli, “Kami nanginda doi rapombabayari balasitee tinalu bo pampa nipotuja anggur kami to nipakatantu magau. 5 Weꞌi-weꞌi naupa kami nosampesuwu ante tau-tau to Yahudi to nakalumana etu, bo ana-ana kami nasimbayu ewa ana-ana ira, tapi kami kana mompobalu ana-ana kami, nabelo ka langgai, nabelo ka besi majadi batua. Pade naria bara sakuya mbaꞌa ana kami besi nipobatuamo. Kami daꞌa mana nompakule mowia nuapa-nuapa, sabana pampa bo pampa nipotuja anggur kami naopu niwai ka tau ntanina majadi bagiana.”
6 Nangepe pokanggangua ira bo kareba-kareba etu, narau mpuꞌumo raraku. 7 Naopu nompekiri etu mpakabelo-belo aku nompokio totuꞌa-totuꞌa ngata bo topanggeniaka-topanggeniaka etu, pade nangontiaka ira. Niuliku ka ira, “Komi nerapi saro nggari jaꞌi sampesuwumu mboto!” Pade nipokioku todea masiromu molibu mantesa pokainggu ira etu. 8 Niuliku ka ira, “Kami nompasimbuku ante mpuꞌu-mpuꞌu nantolo sampesuwu-sampesuwuta to Israel to nipobalu ka tau-tau daꞌa to Yahudi. Tapi komi aga nompobalu sampesuwu-sampesuwumu, ala ira mamala raoli kami mpanjili.” Nangepe tesaku etu ira aga nekalino, daꞌa namala ira nesono nuapa-nuapa.
9 Pade niuliku ka ira, “Daꞌa nabelo powia komi etu! Kakonona komi kana matuwu mekou ri jaꞌi Pue, ala kita neꞌe rasalai bali-balita tau daꞌa to Yahudi! 10 Aku bo sampesuwu-sampesuwuku bo anabuaku woꞌu nompopoinda doi bo gando ka ira. Kamaimo kita mompakalipo inda ira etu. 11 Popanjili ka iramo eo eꞌi tinalu, pampa nipotuja anggur, pampa nipotuja zaitun bo sapo ira. Pade popanjili ka ira woꞌu saro nu doi, gando, ue anggur bo lana to nisungara komi ka ira!”
12 Nesonomo ira, “Kami kana mompopanjili etu ka ira pade mana mombasungara ira. Kami kana mowia nuapa to niuli komi.”
Naopu etu aku nompokio topanggeni-topanggeni agama pade nompakau totuꞌa-totuꞌa ngata bo topanggeniaka-topanggeniaka etu nojanji ri ngayo topanggani-topanggeni agama, ira kana mompakadupa janji ira etu. 13 Aku woꞌu nombawonto baju ndoeku, pade nanguli, “Iweꞌimo to majadi ri jaꞌi butu mbaꞌa tau to daꞌa mompakadupa pojanjina. Ira kana rawonto Alatala nggari sapo ira bo panggawia ira mana moasele. Iwetumo ira kana rawonto Alatala bo majadi makasiasi!”
Pade nesonomo pura-pura todea ri setu, “Nakono!” Pade ira nantoiya-toiya i PUE. Pade pura-pura todea etu nompakadupa pojanji to niuli ira etu.
Jonjo pokainggu i Nehemia
14 Aku nionggotaka najadi gubernur ri Tana Yehuda sampulu rompae kasaena, nompamula nggari mpae karompuluna sampe mpae katolumpulu bo ronguna poparenta Magau Artahsasta. Riara tempo etu daꞌa ria sanggani aku bo sampesuwu-sampesuwuku nanggoni panggoni to nipakatantu ka gubernur. 15 Tapi gubernur-gubernur nokolu ka aku bopia nompakatomo katuwu ntodea. Ira nangala nggari jaꞌi todea santongo kilo salaka saeo rapangoli panggoni bo anggur. Daꞌa aga etu tapi anabua-anabua ira woꞌu nompandasa todea. Tapi aku daꞌa nowia iwetu, sabana aku nekou ri jaꞌi Alatala. 16 Aku nompakasaongu rara mompakabelo tembo etu, bo daꞌa ria sakedi tana nirataku nombabalasi beloku, pade pura-pura anabuaku nipakauku masiromu ri saꞌa mowia pokarajaa etu.
17 Naria satu limampulu mbaꞌa tau to Israel bo topanggeniaka to nekatoko ri mejaku, daꞌa nireke tau-tau to narata ri jaꞌi kami nggari negara-negara ri ntalili kami. 18 Panggoni to nipakasadia butu-butu eo etumo saongu japi bo aono ongu bimba to nabelona, bo bara sakuya mbaꞌa tonji. Pade riara sampulu eo sanggani naria mpengele-ngele ue anggur woꞌu nipakasadia. Naupa iwetu aku daꞌa nangala nggari todea panggoni to nipakatantu ka gubernur, sabana nandasa mpuꞌumo katuwu ntodea.
19 “O Alatalaku, toramo nuapa to nipowiaku nantulungi tau-tau to Yahudi eꞌi, pade wai ka akumo rasi.”