Bali-bali to Yahudi nangewa ira nombabangu Kota Yerusalem
4
Tempo i Sanbalat nangepe kami mombabangu mpanjili tembo etu, narau mpuꞌumo rarana, bo iꞌa nompongei-ngei tau-tau to Israel. 2 Pade niulina ri ngayo roa-roana bo tantara-tantara to Samaria, “Nuapa nipowia tau-tau to Israel to daꞌa nompakule eꞌi? Mamala ira mompakabelo tembo kota etu? Natantumo daꞌa! Mamala ira manggeni pesomba ri setu ngina? Natantumo daꞌa woꞌu! Mamala ira mompakaopu pokarajaa etu riara saeo? Natantumo daꞌa ntoto mamala! Mamala watu-watu to nolabua to nikoni nu apu etu rapake mpanjili mowia tembo? Natantumo daꞌa!” 3 Pade nangulimo i Tobia, tau to Amon to naria ri sinjorina, “Nuapa to nibangu ira daꞌa naroso! Nau aga saongu asulako mepone ri bungguna, tembo etu kana madungga!”4 Pade nosambayamo aku, “O Alatala kami, epemo iwenu kami nisauru! Perapi tesa ira nanjauru kami mawela ira mboto! Waimo ira rakeni rapatani ri petoꞌo nipobatua nasimbayu ewa mbara-mbara ntau niago nu balina. 5 Neꞌe raampungi kajaꞌa ira, neꞌe rapakalipo silaka ira, sabana ira nompakajuꞌa rara tau-tau to nompakabelo tembo!”
6 Jadi kami bate-batena nompakabelo tembo etu sampe pura-pura tembo etu nibangu santongomo kalangana, sabana todea nokarajaa ante mpuꞌu-mpuꞌu rara.
7 Tempo i Sanbalat, i Tobia, to Arab, to Amon, bo to Asdod nangepe pokarajaa mompakabelo tembo Kota Yerusalem daꞌa nenonto-nonto bo bolo-bolo tembo etu nompamula niunja ante watu, narau mpuꞌumo rara ira. 8 Ira pura-pura nasintuwu marata mombasuaki Kota Yerusalem bo mompakagado ri saꞌa. 9 Tapi kami nosambaya ka Alatala kami, bo nompakatantu topojaga-topojaga eo wengi ala kami masadia mangewa ira.
10 Tempo etu nangulimo tau to Yehuda, “Topokarajaa nompamula nalentemo. Pade danadeapa rubi-rubi nu watu. Daꞌa nompakule kami mompakabelo tembo etu!”
11 Pade notesamo bali-bali kami ka roana sambaꞌa bo sambaꞌa, “Ante daꞌa ranjani-njani tau to Yahudi bara rakita ira, kita kana maria ri tatongo ira, mompatesi ira bo mompopenonto pokarajaa etu.”
12 Pade tau-tau to Yahudi to netoꞌo namosu ri jaꞌi bali-bali kami sampulu ngganimo narata nompopatora ka kami, “Bali-bali etu kana mombasuaki kita nggari umba-umba!”
13 Jadi nipakauku tau-tau malau mojaga ri taliku bagia-bagia tembo to neliu nggaede, to danatebuka. Nipakauku ira santina-santina mojagai ante guma, tawala bo pana ira.
14 Naopu nanggita etu pura-pura, nangulimo aku ka totuꞌa-totuꞌa ngata, topanggeniaka-topanggeniaka, bo tau-tau ntanina, “Neꞌe maeka ka bali-bali etu. Toramo Pue to neliu nggakuasa bo nipogumaa. Komi kana mosibali manjaliku sampesuwumu, ana-anamu, besi bo langgai, rongomu bo komi saongu njapo!”
15 Tempo bali-bali kami nangepe nia ira ninjani kamimo, pade ninjani ira Alatala nombalawa nia ira etu, kami pura-pura namala nanjili nokarajaa nompakabelo tembo etu. 16 Nompamula nggari eo etu sabagia anabuaku nokarajaa nompakabelo tembo, bo sabagia ntanina nojaga ante nanjoko tawala, kaliawo, pana, bo baju ase. Pade topanggeniaka-topanggeniaka todea nenggore ri puri nu pura-pura to Yehuda 17 to nompakabelo tembo. Tau-tau to nanggeni parewa-parewa rapompakabelo tembo nokarajaa ante sabingga pale, pade pale ntanina nanjoko parewa mposibali. 18 Pade tau-tau to nompakabelo tembo simbau nokarajaa ante nantaka guma ri kopena. Pade ri sinjoriku naria tau to nantawui kololio mompopanjani ane bali maria marata.
19 Nangulimo aku ka totuꞌa-totuꞌa ngata, topanggeniaka-topanggeniaka bo tau-tau ntanina, “Pokarajaa eꞌi nabete bo naluo, pade kita nosinggakawaomo sambaꞌa bo sambaꞌa ri bunggu tembo etu. 20 Jadi ane komi mangepe oni kololio ri saongu petoꞌo, kana masiromu pura komi ri saꞌa mosanggani ante kami. Alatalata mboto kana mosibali manjaliku kita.”
21 Jadi iwetumo kami nompowia pokarajaa mompakabelo tembo etu. Naria santongo tau nanjoko tawala nompamula nggari pebulu nu eo sampe betuꞌe-betuꞌe nebulu. 22 Tempo etu woꞌu aku nanguli ka todea, “Butu mbaꞌa tau to nompakabelo tembo bo anabua-anabuana kana maturu riara Kota Yerusalem eꞌi ala ira mamala majadi topojaga kami tempo nggawengina bo mokarajaa tempo eona.” 23 Daꞌa ria nggari kami nakapo mombawonju baju, nabelo ka aku, sampesuwu-sampesuwuku, anabuaku, nabelo ka topojaga to nantuki aku. Butu mbaꞌa nanggeni parewa mposibali ri palena.