Tau-tau to nompakabelo tembo Kota Yerusalema
3
Balengga Topanggeni Agama Elyasib nosanggani ante sampesuwu-sampesuwuna topanggeni agama nombabangu mpanjili Bobaa Bimba. Ira nosalama bobaa etu, bo nompataka pewobo-pewobona. Pade ira nombabangu mpanjili tembo sampe ri Petoꞌo Topojaga to nosanga ka Mea, bo Petoꞌo Topojaga to nosanga ka Hananeel, pade petoꞌo-petoꞌo etu nisalama ira. 2 Ri sinjori ira pue ngata Yerikho nombabangu mpanjili tembo. Pade ri sinjori ira i Zukur ana Imri nombabangu mpanjili tembo.3 Bobaa Bau nibangu muli Senaa. Ira nompataka baloti-balotina bo nompataka pewobo-pewobona ante polawa-polawa bo parewa-parewa rapombakunci pewobo etu. 4 Ri sinjori ira i Meremot ana Uria makumpu i Hakos nombabangu mpanjili tembo etu. Pade ri sinjorina, i Mesulam ana i Berekhya makumpu i Mesezabeel nompakabelo tembo, pade ri sinjorina i Zadok ana i Baana woꞌu nokarajaa nompakabelo tembo etu. 5 Ri sinjori i Zadok, pue ngata Tekoa nokarajaa nombabangu mpanjili tembo. Tapi topanggeniaka-topanggeniaka ira daꞌa nadota raparenta mandoro-mandoro mowia bago etu.
6 Bobaa Ntuꞌab nipakabelo Yoyada ana Paseah bo Mesulam ana i Besoja. Ira nompataka baloti-baloti bo nompataka pewobo-pewobo ante polawa-polawa bo parewa-parewa rapombakunci pewobo etu. 7 Ri sinjori ira i Melaca, nggari ngata Gibeon, bo Yadon, nggari ngata Meronot, nompakabelo tembo nosanggani ante tau-tau nggari ngata Gibeon, bo tau-tau nggari ngata Mizpa to naria riara kuasa bagia gubernur Propinsi ri sambote Binangga Efrat. 8 Ri sinjori ira Uziel ana i Harhaya, sambaꞌa pande nu bulawa, nompakabelo tembo, bo ri sinjorina woꞌu i Hananya, sambaꞌa topowia rampa-rampa, nompakabelo tembo. Ira nompakabelo tembo Kota Yerusalem sampe ri Tembo Naremba. 9 Ri sinjori Hananya, i Refaya ana i Hur to najadi topanggeniaka santongo bagia Yerusalem, nompakabelo tembo. 10 Pade ri sinjorina Yedaya ana i Harumaf nompakabelo tembo ri ngayo sapona. Pade ri sinjorina i Hatus ana i Hasabneya nompakabelo tembo. 11 Malkia ana Harim bo Hasub ana i Pahat-Moab nompakabelo bagia tembo ntanina bo petoꞌo topojaga to nosanga ka Petoꞌo Pompowia Roti. 12 Pade ri sinjori ira i Salum ana i Halohes, topanggeniaka santongo bagia Yerusalem, nompakabelo tembo etu nosanggani-nggani ante ana-anana besi.
13 Bobaa Lemba nipakabelo i Hanun bo pue ngata Zanoah. Ira nombabangu mpanjili bo nompataka pewobo-pewobo ante polawa-polawa bo parewa-parewa rapombakunci pewobo etu. Ira woꞌu nompakabelo patatu limampulu metere tembo sampe ri Bobaa Potijaka Rumpu.
14 Bobaa Potijaka Rumpu nipakabelo i Malkia ana i Rekhab, topanggeniaka Bagia Bet-Kerem. Iꞌa nombabangu mpanjili bobaa etu pade nompataka pewobo-pewobo ante polawa-polawa bo parewa-parewa rapombakunci pewobo etu.
15 Bobaa Mata Ue nibangu mpanjii i Salum ana i Kolhoze, topanggeniaka Bagia Mizpa. Iꞌa nombabangu mpanjili bobaa etu bo nompowia atana, pade nompataka pewobo-pewobo ante polawa-polawa bo parewa-parewa rapombakunci pewobo etu. Nipakabelona woꞌumo tembo namosu Kola Selah namosu ri pampa magau sampe ri tangga to notua nggari Kota Daud. 16 Ri sinjorina i Nehemia ana Azbuk, topanggeniaka santongo Bagia Bet-Zur, nompakabelo tembo sampe ri ngayo dayo Magau Daud, mpaka ri kola nipowia, bo mpaka ri sapo tadulako-tadulako.
17 Ri sinjori Nehemia ana Azbuk, tau-tau to Lewi nompakabelo tembo nikeniaka i Rehum ana i Bani. Pade ri sinjori ira i Hasabya, topanggeniaka santongo ngata Kehila, nompakabelo bagia tembo to nipakatantu ka tau-tau nggari ngata to nikeniakana. 18 Ri sinjorina sampesuwu-sampesuwu ira woꞌu nompakabelo tembo, nikeniaka i Binui ana i Henadad, topanggeniaka santongo ngata Kehila. 19 Ri sinjorina Ezer ana Yesua, topanggeniaka ngata Mizpa, nompakabelo tembo bagia ntanina ri ngayo jala mantende mpaka ri petoꞌo pomboli parewa mposibali ri sidu nu tembo. 20 Ri sinjori Ezer, i Barukh ana i Zabai nompakabelo bagia ntanina, nggari sidu nu tembo sampe ri pewobo sapo Balengga Topanggeni Agama Elyasib. 21 Ri sinjori Barukh, i Meremot ana Uria makumpu i Hakos woꞌu nompakabelo bagia ntanina, nggari pewobo sapo Elyasib sampe ri pantaꞌa nu sapo Elyasib.
22 Ri sinjori Meremot, topanggeni-topanggeni agama nggari bagia namosu Kota Yerusalem nompakabelo tembo. 23 Ri sinjori ira, Benyamin bo i Hasub nompakabelo tembo ri ngayo sapo ira mboto. Pade ri sinjori ira, Azarya ana i Maaseya makumpu Ananya nompakabelo tembo ri sinjori sapona mboto. 24 Ri sinjori Azarya, i Binui ana i Henadad nompakabelo bagia tembo ntanina, nompamula nggari sapo Azarya sampe ri soki bo sidu nu tembo. 25 Palal ana Uzai nompakabelo tembo ri ngayo sidu tembo bo ri ngayo petoꞌo topojaga to nalanga ri bagia baꞌana sapo magau, namosu lalowo topojaga. Ri sinjorina i Pedaya ana i Paros 26 bo topokarajaa-topokarajaa ri Sapo Mpepue to netoꞌo ri bagia kota Yerusalem to nosanga ka Ofel nompakabelo tembo sampe ri ngayo Bobaa Ue ri sabingga pebuluna, pade sampe ri petoꞌo topojaga to nalanga etu. 27 Ri sinjori Pedaya pue ngata Tekoa nompakabelo bagia ntanina, nompamula nggari ngayo petoꞌo topojaga to nalanga etu sampe ri tembo Ofel.
28 Ri Bobaa Jara, topanggeni-topanggeni agama nompakabelo tembo ri ngayo sapo ira sambaꞌa bo sambaꞌa. 29 Ri sinjori ira i Zadok ana Imer nompakabelo tembo ri ngayo sapona mboto. Pade ri sinjorina i Semaya ana i Sekhanya, topojaga Bobaa Pebuluna ri lalowo Sapo Mpepue woꞌu nompakabelo tembo etu. 30 Ri sinjori Semaya, i Hananya ana Selemya bo Hanun ana i Zalaf kaonombaꞌana nompakabelo tembo bagia ntanina. Ri sinjori ira Mesulam ana i Berekhya nompakabelo tembo ri ngayo sapona. 31 Pade ri sinjori Mesulam, i Malkia sambaꞌa pande nu bulawa, nompakabelo tembo sampe ri sapo topokarajaa-topokarajaa ri Sapo Mpepue bo sapo-sapo topodaga ri ngayo Bobaa Pomparesa, namosu tombi ri baꞌa tembo ri sabingga tasina nggari pebulu nu eo. 32 Pade pande-pande nu bulawa bo topodaga-topodaga nompakabelo tembo ri olo tombi ri baꞌa tembo etu sampe ri Bobaa Bimba.