Nehemia nipakau mpaka ri Kota Yerusalem
2
Naria sanggani ri wula Nisan ri mpae karompuluna poparenta Magau Artahsasta,a aku nangala anggur to nipakasadia ka magau bo niwaiku ka iꞌa. Daꞌapa sanggani aku nompopokita lenje nasusa ri ngayo magau, 2 sampe magau nekutana ka aku, “Nokuya lenjemu nasusa naupa iko daꞌa najuꞌa? Natantu naria to nompakasusa raramu!”Naeka mpuꞌumo raraku. 3 Niuliku ka magau, “Perapi magau matuwu sampe ri kasae-saena! Iwenumo lenjeku daꞌa nasusa tempo kota petoꞌo dayo ntotuꞌaku nageromo bo bobaa-bobaana nipalabu mpakaopu?”
4 Nekutanamo magau ka aku, “Nuapa to mupodota?”
Aku nosambaya ka Alatala to Neliu Nggakuasa ri suruga, 5 pade nangulimo aku ka magau, “Ane mabelo riara mpanggita magau bo aku nikonoa rara magau, pakaumo aku mpaka ri Bagia Yehuda, mpaka ri kota petoꞌo dayo ntotuꞌaku, ala aku mamala mombabangu mpanjili kota etu.”
6 Nekutanamo magau ka aku tempo magau besi nekatoko ri sinjorina, “Sakuya kasaena polumakomu, bo nepia iko manjili?” Nadamba rara magau nompakau aku, jadi aku nompopanjani ka magau sakuya kasaena aku maria ri Bagia Yehuda.
7 Nangulimo aku ka magau, “Ane mabelo riara mpanggita magau, wai ka akumo sura-sura ka gubernur-gubernur ri bagia sambote Binangga Efrat, ala ira mompaloga aku moliu sampe aku marata ri Bagia Yehuda. 8 Pade tulungi wai ka aku woꞌu sura ka Asaf, topojaga pangale magau, ala iꞌa mombawai ka aku kayu rapowia baloti-baloti rapake mowia bobaa-bobaa tembo ri petoꞌo topojaga namosu Sapo Mpepue, bo tembo kota, ante sapo petoꞌoku.” Nangepe etu magau nompoiyo pomperapiku etu, sabana nabelo mpuꞌu rara Alatala nantulungi aku.
9 Pade magau woꞌu nompakau balengga-balengga tantara bo tantara-tantara topesawi jara malau mpasanggani ante aku. Tempo aku narata ri sambote Binangga Efrat, niwaiku sura-sura nggari jaꞌi magau ka gubernur-gubernur. 10 Tempo i Sanbalatb to Horon, bo i Tobia, sambaꞌa pangga bete tau to Amon, nangepe naria tau narata mompowia to nabelona ka tau to Israel, narau mpuꞌumo rara ira.
Nehemia nomparesa tembo-tembo Kota Yerusalem
11 Kaopuna, naratamo aku ri Kota Yerusalem, pade nangosaraka ri setu tolumbengi kasaena. 12 Naopu etu nalaumo aku tempo nggawengina nosanggani ante bara sakuya mbaꞌa tau. Daꞌa kamba sambaꞌa nipopanjaniku ka nia to niboli Alatala riara ntaꞌiku ewa nuapa kupowia ka Kota Yerusalem. Daꞌa woꞌu naria binata ri jaꞌiku, aga binata to nipesawiku.
13 Tempo nggawengina nesuwumo aku nggari Bobaac Lemba nantuki jala mpaka ri Mata Ue Ule Naga bo Bobaa Pantijaka Rumpu. Niparesaku tembo-tembo Kota Yerusalem to nagero puramo bo bobaa-bobaa to nipalabu mpakaopu. 14 Pade napolamo aku mpaka ri Bobaa Mata Ue bo Kola Magau, tapi daꞌa ria jala rapoliu binata nipesawiku. 15 Jadi ri wengina etu noliumo aku ri lembana ala momparesa mpakabelo-belo tembo kota etu. Naopu etu natinggulimo aku nesua ri kota nantuki Bobaa Lemba. 16 Topanggeniaka-topanggeniaka daꞌa nanginjani ri umba nikalauku bo nuapa to nipowiaku. Sampe tempo etu daꞌapa nitesaku nuapa-nuapa ka tau-tau to Israel, nabelo ka topanggeni-topanggeni agama, nabelo ka totuꞌa-totuꞌa ngata, nabelo ka topanggeniaka-topanggeniaka, nabelo ka tau-tau ntanina to mombabangu kota etu.
17 Naopu etu niuliku ka ira, “Komi nanggita kasusa to nirasaita, iwenu Kota Yerusalem nagero bo bobaa-bobaana nipalabu mpakaopu. Kamaimo kita mombabangu mpanjili tembo Kota Yerusalem ala kita mana rasalai ntau.” 18 Pade nitesaku ka ira iwenu Alatala nantulungi aku bo nuapa to nitesa magau ka aku.
Nangepe etu nangulimo ira, “Kamaimo kita mompamula!” Jadi nasadiamo ira mantui bago to nabelo etu ante mpuꞌu-mpuꞌu rara.
19 Tapi tempo i Sanbalat, tau to Horon, pade i Tobia, sambaꞌa pangga bete tau to Amon, bo i Gesyem, tau to Arab, nangepe nia kami etu, ira nompongei-ngei bo nanjalai kami. Niuli ira, “Nuapa to nipowia komi etu? Komi madota mangewa magau?”
20 Nesonomo aku ka ira, “Pue Alatala to Neliu Nggakuasa ri suruga, Iꞌamo to mompowia kami moasele. Nasadiamo kami batua-batua-Na mombabangu mpanjili tembo kota eꞌi. Tapi komi daꞌa ntoto naria bagia bara kuasa moparenta ri kota eꞌi! Bo komi daꞌa ntoto masipato ratora ri Kota Yerusalem!”