Nehemia
Nehemia nomposambaya tau-tau to Yahudi
1
Tesa-tesa Nehemia ana i Hakhalya. Ri wula Kislew mpae karompuluna poparenta Artahsasta magau to Persia,a tempo aku naria ri sapo magau ri Kota Susan, 2 naratamo i Hanani, sambaꞌa sampesuwuku, nosanggani ante bara sakuya mbaꞌa tau nggari Bagia Yehuda. Aku nompekutana ira iwenumo to Israel ri saꞌa to daꞌa nipobatua bopia,b pade iwenumo Kota Yerusalem.3 Nangulimo ira ka aku, “Tau-tau to danaboli ri propinsi etu, to daꞌa nipobatua bopia, nawela kasusa bete bo nandasa katuwu ira. Pade tembo Kota Yerusalem nagero puramo bo bobaa-bobaa kota naopu nipalabu.”
4 Tempo aku nangepe tesa etu, nekatokomo aku notumangi, bo nasusa raraku bara sakuya mbengi kasaena. Aku napuasa bo nosambaya ri jaꞌi Alatala to Neliu Nggakuasa ri suruga. 5 Nosambayamo aku, “O PUE Alatala to Neliu Nggakuasa ri suruga, Pue to nakuasa bo nipogumaa. Komi batena namala raparasaya mompakadupa pojanji-Mu bo mompakanoto towe-Mu to daꞌa ria kaopu-opuna ka tau-tau to nompotowe Komi bo nantuki parenta-parenta-Mu. 6 Kuperapi kitamo aku bo petalingamo posambayaku to nitesaku ri jaꞌi-Mu eo wengi ka todea Israel, batua-batua-Mu. Kami to Israel, bo kami saongu njapo ante totuꞌa kami woꞌu, nowia silaka ri jaꞌi-Mu. 7 Najaꞌa mpuꞌumo pokainggu kami ri jaꞌi-Mu. Kami daꞌa natutu nantuki parenta-parenta, atura-atura to nipakatantu-Mu bo atura-atura. Pura-pura etu to nipapola batua-Mu i Musa ka kami.
8 Toramo tesa to nitewai-Mu ka batua-Mu i Musa iweꞌi: ‘Ane komi daꞌa matundu ri jaꞌi-Ku, Aku kana mompositatare komi mpaka ri tatongo tau-tau nggari ngata-ngata ntanina. 9 Tapi ane komi matingguli ri jaꞌi-Ku bo matutu mantuki parenta-parenta-Ku, naupa komi to nikeni nipobatua etu maria ri tampa nu dunia, Aku kana mompasiromu komi nggari saꞌa pade manggeni komi mpaka ri petoꞌo to nipelisi-Ku rapombasomba Aku.’
10 O Pue, kami eꞌi batua-batua-Mu, todea-Mu to nitolo-Mu ante kuasa-Mu to nabetena bo ante pale-Mu to narosona. 11 Petalingamo posambaya batua-Mu eꞌi bo posambaya batua-batua-Mu ntanina to nadamba-damba mombabila sanga-Mu. Tulungimo aku ala eo eꞌi aku mamala rapoasi mata magau.”
Tempo etu aku najadi topompakasadia panginu ka magau.