Yusuf nompakanoto batuana pangipi ntau riara tarunggu
40
Naliu bara sakuya kasaena rombaꞌa batua magau Masir nowia sala ri jaꞌina, etumo tau topompakasadia panginu ka magau pade tau topompakasadia roti ka magau. 2 Jadi narau mpuꞌumo magau ka rombaꞌa batua etu, 3 pade nisuarakana riara tarunggu ri sapo balengga topanggatono sapo magau, etumo ri petoꞌo Yusuf nitarunggu. 4 Balengga topanggatono etu nomparasaya ira ka Yusuf, pade iꞌamo to nombaurusi ira ri setu.Naliu bara sakuya kasaena ira nitarunggu ri setu 5 naria sambengi tau rombaꞌa etu nangipi. Topompakasadia panginu ka magau bo topompakasadia roti ka magau mbau nangipi, tapi pangipi ira daꞌa nasimbayu batuana. 6 Naeompadondona tempo Yusuf narata ri jaꞌi ira nikitana ira rombaꞌa etu nasusa mpuꞌu rara. 7 Jadi nipekutanana ka ira rombaꞌa to nitarunggu mpasanggani ante iꞌa ri sapo madikana etu, “Nokuya komi nasusa rara eo eꞌi?”
8 Nesonomo ira, “Iwengi kami rombaꞌa nangipi, tapi daꞌa ria tau to namala mompakanoto batuana pangipi kami etu.”
Pade nangulimo Yusuf ka ira, “Aga Alatala to nakuasa mompakanoto batuana pangipi. Tesa weꞌi pangipi komi etu ka aku!”
9 Jadi topompakasadia panginu ka magau etu nombatesa pangipina ka Yusuf. Niulina, “Riara mpangipiku aku nanggita sampuꞌu walaa anggur ri ngayoku. 10 Walaa anggur etu tolumpanga ranggana. Iwetu rangga-ranggana etu lako notawa, nesuwumo sese-sesena nenggaka puramo. Pade sampalaipa natasamo wua anggur etu. 11 Tempo etu aku nanjoko gelas panginu magau ri paleku. Jadi nialaku wua anggur etu, nipeaku riara gelas magau, pade niwaiku ka magau.”
12 Nangulimo Yusuf ka iꞌa, “Iweꞌimo batuana pangipimu etu. Rangga walaa anggur tolumpanga etu batuana tolu eo. 13 Tolu eopa magau kana mombakabasaka iko pade mombaampungi iko pade mangonggotaka iko mpanjili mantui bagomu bopia. Iko kana mompakasadia woꞌumo panginu ka magau ewa bopia. 14 Tapi ane mabelomo katuwumu, tora woꞌu aku eꞌi. Popokitamo towemu ri jaꞌiku ante motesa ka magau nuapa to najadi ante aku eꞌi ala aku woꞌu rakabasaka nggariara tarunggu eꞌi. 15 Sabana aku nipelea nggari tana nto Ibrani, pade ri Tana Masir eꞌi daꞌa sanggani aku nowia kajaꞌana sampe masipato rasuaraka riara tarunggu iweꞌi.”
16 Tempo topompakasadia roti ka magau etu nangepe batuana pangipi roana nabelo mpuꞌu, iꞌa woꞌu nombatesa pangipina ka Yusuf. Niulina, “Aku woꞌu nangipi. Riara mpangipiku aku nanjuꞌumaka toluongu tonda noisi roti. 17 Riara tonda ri bungguna ntoto naria nompengele roti ka magau. Tapi tonji-tonji narata nanggoni roti nggariara tonda ri balenggaku etu.”
18 Nangulimo Yusuf, “Iweꞌimo batuana pangipimu etu. Tonda toluongu etu batuana tolu eo. 19 Riara tolu eo eꞌi magau kana mompakau tau mombatompo tambolomu, pade watabakumu kana rasumpa mpakalanga ri sampeka tinja, pade tonji-tonji kana marata manggoni isi koromu.”
20 Tolu eo kaliuna nawela eo jadi magau. Jadi nipowiana susa bete ka pura-pura pangga betena. Tempo etu nipakauna tau lau mangala topompakasadia panginu ka magau bo topompakasadia roti ka magau rakeni ri ngayo pangga-pangga bete nu magau. 21 Topompakasadia panginu ka magau nionggotaka mpanjili mantui bagona bopia mompakasadia panginu ka magau. 22 Tapi topompakasadia roti ka magau nipatesi. Pura-pura etu najadi nasimbayu ewa to nitesa Yusuf ka ira. 23 Tapi topompakasadia panginu ka magau etu daꞌa nantora pomperapi Yusuf ka iꞌa. Nikalingana ntotomo Yusuf.