Yusuf ri sapo Potifar
39
Yusuf nikeni ntopodaga muli Ismael mpaka ri Tana Masir pade nipobalu ira ka sambaꞌa tadulako balengga topanggatono sapo magau to nosanga ka i Potifar.2 PUE nosanggani-nggani ante Yusuf sampe pura-pura panggawiana tunggai naria aselena to nabelo. Yusuf netoꞌo ri sapo madikana, i Potifar to Masir etu. 3 Potifar nanggita i PUE nosanggani-nggani ante Yusuf pade nantulungi iꞌa riara pura-pura pokarajaana sampe naria aselena nabelo. 4 Nadamba mpuꞌu rarana ri jaꞌi Yusuf, jadi nionggotakana Yusuf najadi topombatande madikana. Yusuf nipakakuasana mombaurusi mpengele-ngele riara njapona, pade pura-pura kakalumanana niparasayana ka Yusuf. 5 Nompamula nggari tempo etu i PUE nombagane ira saongu njapo sabana Yusuf, sampe naria rasi nggari jaꞌi PUE nawela pura-pura anu i Potifar etu, nabeloka to naria riara njapona, nabeloka to naria ri panggawiana. 6 Jadi pura-pura mbara-mbarana niparasayana ka Yusuf. Potifar mana paraluu mompekiri urusa etu nuapa-nuapa. To nipekirina aga panggonina mboto.
Yusuf etu naroso korona bo nagaya mpuꞌu lenjena. 7 Naliu bara sakuya kasaena nompamulamo rongo madikana etu nompone nasuna nanggita Yusuf. Niulina ka Yusuf, “Maimo iko mosampaturu ante aku.”
8 Tapi Yusuf daꞌa nadota. Niulina, “Neꞌe, Indo! Madikaku nomparasaya ka aku pura-pura mbara-mbarana. Iꞌa mana paraluu mompekiri nuapa-nuapa riara njapona eꞌi. 9 Daꞌa ria sambaꞌa to neliu nggakuasa nggari aku ri sapona eꞌi. Daꞌa naria sangele to daꞌa niparasayana ka aku, damo aga komi, sabana komi rongona mboto. Iwenumo aku mowia kajaꞌana iwetu pade mowia silaka ri jaꞌi Alatala?” 10 Pade naupa rongo i Potifar eo-eo nombatanara Yusuf ala mosampaturu ante iꞌa, tapi Yusuf daꞌa nasituju. Daꞌa nadota iꞌa nosanggani-nggani ante besi etu.
11 Naria saeo Yusuf nesua riara njapo mantui bagona ri setu. Tempo etu daꞌa ria sambaꞌa batua ntanina raranjapo, aga iꞌa njambaꞌana. 12 Jadi rongo i Potifar nanjoko baju Yusuf pade niulina, “Maimo kita mosampaturu.” Tapi Yusuf nenggarawemba nalai, tapi bajuna naboli ri pale besi etu. 13 Tempo besi etu nanggita baju Yusuf naboli ri palena pade Yusuf nalaimo, 14 nipokionamo batua-batua ntanina to nokarajaa riara njapona pade niulina ka ira, “Kita weꞌi! Tau to Ibrani to nikeni rongoku netoꞌo ri sapo eꞌi aga nompongei-ngei kita! Iꞌa lako nesua ri jaꞌiku ala mosampaturu ante aku. Tapi aku nongare mpakamangga. 15 Tempo iꞌa nangepe aku nongare, nalaimo iꞌa mpaka ri sawalikuna, tapi bajuna eꞌi nabolimo ri jaꞌiku.”
16 Naopu etu baju Yusuf niboli rongo i Potifar sampe rongona nanjili ri sapona. 17 Sangga naratapa i Potifar notesamo besi etu ka iꞌa, “Tau to Ibrani to nikenimu etu nesua ri jaꞌiku madota mompongei-ngei aku. 18 Tapi tempo aku nongare mpakamangga nalaimo iꞌa mpaka ri sawalikuna. Tapi eꞌimo bajuna naboli ri jaꞌiku.”
19 Nangepe tesa rongona etu narau mpuꞌumo rara i Potifar. 20 Pade nisokona Yusuf nisuarakana riara tarunggu. Tarunggu etu rapombatarunggu tau to nowia sala ri jaꞌi magau.
21 Tapi tempo Yusuf riara tarunggu i PUE nosanggani-nggani ante iꞌa pade nompotowe iꞌa sampe Yusuf nikonoa rara balengga tarunggu etu. 22 Balengga tarunggu etu nomparasaya ka Yusuf pura-pura tau riara tarunggu etu pade pura-pura panggawia riara tarunggu etu nipakakuasana ka Yusuf. 23 Balengga tarunggu etu daꞌa mana paraluu mompekiri nuapa-nuapa to niparasayana ka Yusuf, sabana i PUE nosanggani-nggani ante Yusuf sampe nuapa-nuapa to niurusina naria aselena to nabelo.