Tesa Yehuda bo Tamar
38
Ri tempo etu Yehuda nompalasi sampesuwu-sampesuwuna lau netoꞌo ri jaꞌi sambaꞌa tau nggari ngata Adulam to nosanga ka i Hira. 2 Ri ngata etu Yehuda nosintomu ante sambaꞌa besi, ana i Syua to Kanaan. Iꞌa nomporongo besi etu pade nosampaturu ante iꞌa. 3 Naopu etu natianamo besi etu pade niotena sambaꞌa ngana langgai to nipoposanga umana Er. 4 Naopu etu natiana woꞌumo besi etu pade niotena woꞌumo sambaꞌa ngana langgai to nipoposangana Onan. 5 Naliu etu iꞌa noana woꞌumo sambaꞌa ngana langgai to nipoposangana i Syela. Tempo ngana etu nesuwu Yehuda da ri ngata Kezib.6 Tempo nabetemo Er ana ulumbua Yehuda, iꞌa nipoporongo umana ka sambaꞌa besi to nosanga ka i Tamar. 7 Tapi pokainggu Er najaꞌa mpuꞌu riara mpanggita i PUE sampe i PUE nompatesi iꞌa.
8 Naopu etu nangulimo Yehuda ka Onan tuaꞌi Er, “Kalaumo iko ri jaꞌi balu ntuakamu pade mosampaturu ante iꞌa nantuki atura to nipakatantu adata ka era langgai, ala maria muli ntuakamu.” a 9 Tapi ninjani Onan ane besi balu ntuakana etu moana, ngana etu daꞌa rareke anana, aga ana ntuakana. Jadi butu nggani iꞌa nosampaturu ante balu ntuakana etu nipalambanamo manina nesuwu ri sawalikuna ala neꞌe maria muli ntuakana. 10 Tapi powia Onan etu najaꞌa riara mpanggita i PUE sampe iꞌa woꞌu nipatesi i PUE.
11 Naopu etu nangulimo Yehuda ka maniana i Tamar, “Panjilimo iko ri sapo indo umamu, pade petoꞌomo ri setu ewa tobalu sampe mabete anaku i Syela.” Niuli Yehuda iwetu sabana iꞌa naeka neꞌe-neꞌe i Syela woꞌu mamate nasimbayu ewa tuakana rombaꞌa etu. Jadi nanjilimo i Tamar mpaka ri sapo ntotuꞌana.
12 Naliu bara sakuya kasaena namatemo rongo Yehuda, ana i Syua etu. Sangga naliumo tempo kasusa rarana nantora rongona, nalaumo Yehuda mpaka ri ngata Timna nosanggani ante roana i Hira tau nggari ngata Adulam. Ira nalau manggita tau-tau to nombagunji wulu bimbana ri setu.
13 Tamar nangepe kareba to nanguli matuꞌana Yehuda malau mpaka ri ngata Timna mombagunji wulu bimbana. 14 Jadi nisambeinamo pakeana ewa pakea tobalu ante pakea ntanina, pade nisalibumbuna lenjena nalau nekatoko ri bobaa bete ngata Enaim to naria ri jala mpaka ri ngata Timna. Etu nipowia i Tamar sabana ninjaninamo naupa i Syela ana kaopuna Yehuda nabetemo, iꞌa daꞌa nipoporongo ka kabilasa etu.
15 Tempo Yehuda nanggita i Tamar ri bobaa bete ngata Enaim nipekirina iꞌa etu besi bajinga, sabana lenjena nisalibumbuna. 16 Jadi nalaumo Yehuda nompakamosu iꞌa ri wiwi jala pade niulina, “Kamaimo kita mosampaturu.” Daꞌa ninjanina besi etu maniana mboto.
Nekutanamo i Tamar, “Nuapa muwai ka aku ane kita mosampaturu?”
17 Nesonomo Yehuda, “Kana kupakatu ka iko saongu towau to namudana nggari lunu pompatuwuku.”
Pade nanguli woꞌumo i Tamar, “Mamala, ane muwai ka aku sangele majadi panjokoku sampe komi mompakatu towau etu ka aku.”
18 Nekutanamo Yehuda, “Nuapa kuwai ka iko majadi panjokomu etu?”
Nesonomo i Tamar, “Wai ka aku stempelmu ante luina bo lembau ri palemu etu.” Jadi Yehuda nombawai ka iꞌa pura-pura nuapa to niperapina etu. Pade nosampaturumo ira rombaꞌa sampe natianamo i Tamar. 19 Naopu nosampaturu ante Yehuda nanjilimo i Tamar mpaka ri sapona pade niwonjuna pakea bo salibumbuna pade nipakena woꞌumo pakea ntobalu.
20 Daꞌa nasae kaliuna etu, Yehuda nompakau roana i Hira to Adulam etu manggeni saongu towau ka besi bajinga etu pade momperapi bali pura-pura parewa to niwaina majadi panjoko besi etu. Tapi besi etu daꞌa ria niratana. 21 Jadi nipekutanana ka pue ngata Enaim etu, “Ri umba petoꞌo besi bajinga to nabiasa nekatoko ri wiwi jala eꞌi?”
Nesonomo ira, “Daꞌa naria besi bajinga ri ngata eꞌi.”
22 Jadi nanjilimo i Hira mpaka ri jaꞌi Yehuda pade niulina ka iꞌa, “Daꞌa nirataku besi etu. Pade pue ngata etu nanguli ka aku, ‘Daꞌa naria besi bajinga ri ngata eꞌi.’ ”
23 Pade nangulimo Yehuda, “Palambamo parewa-parewa etu rasoko besi etu ala neꞌe kita rapongei-ngei ntau. Aku nompakatu towau eꞌi, tapi besi etu daꞌa niposiratamu.”
24 Kira-kira tolumbula kaliuna, Yehuda nangepe lele to nanguli i Tamar maniana etu nogau salamo ewa besi bajinga sampe natianamo iꞌa. Jadi nangulimo Yehuda, “Alamo besi etu pade palabumo iꞌa sampe mamate!”
25 Tempo i Tamar nikeni ri sawaliku nipakauna tau lau notesa ka matuꞌana iweꞌi: “Aku eꞌi nipakatiana tau to nombawai ka aku parewa-parewa to naria ri jaꞌiku eꞌi. Paresamo bara isema pue stempel ante luina pade lembau to naria ri jaꞌiku eꞌi.”
26 Tempo Yehuda nanggita parewa etu ninjanina parewana mbotomo. Pade nangulimo iꞌa, “Besi eꞌi daꞌa nasala. Akumo to nasala ri jaꞌina, sabana aku daꞌa nombawai anaku i Syela majadi rongona ewa nijanjiku.” Naopu etu Yehuda mana nosampaturu ante i Tamar.
27 Tempo naratamo ntoana i Tamar moana nanotomo naria ngana norapi riara ntaꞌina. 28 Tempona iꞌa noana ngana pamulana nompopesuwu palena. Jadi pale etu nipoꞌu sando ante bana nalei pade niulina, “Ngana etu nesuwu nokolu.” 29 Tapi ngana to nipoꞌu palena etu nombadii palena mpanjili, pade ngana ntanina nesuwu nokolu. Nanggita etu nangulimo sando, “Naroso mpuꞌu iko nompasimbuku mesuwu ri sawalikuna.” Jadi ngana to nesuwu nokolu etu nipoposanga i Peres.b 30 Naopu etu nesuwumo ngana to nipoꞌu palena ante bana nalei. Pade iꞌa nipoposanga i Zerah.c