Yusuf ante sampesuwu-sampesuwuna
Tempo Yusuf noumuru sampulu pitumpae iꞌa nombaewu towau bo bimba nosanggani-nggani ante tuaka-tuakana, etumo ana-ana nggari i Bilha bo i Zilpa, rongo piara nu umana. Yusuf nombatesa ka umana powia-powia to najaꞌa to nipowia ntuakana etu.
3 Yakub neliu towena ka Yusuf pade ana-anana ntanina, sabana Yusuf nipoana indona tempo umana natuꞌamo. Jadi iꞌa nekipowia baju to neliu mpuꞌu kagayana ka Yusuf. 4 Sangga nanotomo ka tuaka-tuaka Yusuf uma ira neliu towena ka Yusuf pade ira, nompamulamo ira nomporau rara iꞌa pade mana madota ira motesa ka iꞌa ante nabelo.
5 Naria sambengi Yusuf nangipi, pade nitesana ka tuakana pangipina etu. Nangepe pangipi etu ira nantambai nomporau rara iꞌa. 6 Sabana iweꞌimo tesa Yusuf ka ira: “Epe komi pangipiku iwengi. 7 Aku nangipi kita pura-pura nokato ri tinalu. Pae nikato nipoꞌuta. Pae to nipoꞌuku nekanggore nanoa pade pae to nipoꞌu komi narata nantatiku pade nekadede ri ngayo pae to nipoꞌuku.”
8 Nangepe etu nesonomo tuaka-tuakana ka Yusuf, “Iwenumo? Nipekirimu iko kana majadi magau momparenta kami?” Jadi nantambai woꞌumo ira nomporau rara Yusuf sabana nangepe pangipi bo tesa to nitesana etu.
9 Naliu etu Yusuf nangipi woꞌumo pade nitesana woꞌumo pangipi etu ka tuaka-tuakana. Niulina, “Epemo! Nangipi woꞌumo aku, pade riara pangipiku nikitaku mata eo bo wula pade sampulu saongu betuꞌe narata nekadede ri ngayoku.”
10 Tempo pangipina etu nitesa Yusuf woꞌu ka umana, umana nangontiaka iꞌa. Niulina, “Pangipi nuapa etu? Nipekirimu aku bo indomu pade tuaka-tuakamu marata mekadede ri ngayomu?” 11 Naopu etu nasiriatimo rara ntuakana nanggita Yusuf, tapi umana tunggai nantondoaka pangipi nu anana etu.
Yusuf nipobalu bo nikeni mpaka ri Tana Masir
12 Naria sanggani tuaka-tuaka Yusuf nalau nompoewu towau bo bimba uma ira namosu ngata Sikhem. 13 Pade nangulimo Yakub ka Yusuf, “Kalaumo iko manggita tuaka-tuakamu noewu bimba bo towau namosu ngata Sikhem.”
Nesonomo Yusuf, “Iyo, Uma.”
14 Nangulimo umana, “Kalaumo iko manggita iwenumo tuakamu bo pompatuwu ri setu. Naopu etu panjilimo iko mopakilu ka aku kareba ira.” Pade nalaumo Yusuf nggari bagia lemba Hebron.
Nalaimo iꞌa sampe narata ri ngata Sikhem. 15 Ri setu iꞌa nalau gusaꞌa guseꞌi nangelo tuakana riara karawa baina. Tempo etu niposintomuna sambaꞌa totuꞌa langgai. Nekutanamo tau etu, “Nuapa nielomu?”
16 Nesonomo Yusuf, “Aku eꞌi nangelo tuaka-tuakaku to nombaewu bimba bo towau. Tulungi uli ka aku bara ri umbamo ira?”
17 Nesonomo tau etu, “Nalaimo ira nggari seꞌi. Niepeku ira nanguli, ‘Mai kita malau mpaka ri ngata Dotan.’ ”
Nangepe tesa etu nalaumo Yusuf nantuntumaka tuakana sampe niratana ira namosu ngata Dotan.
18 Tempo Yusuf danakawaopa iꞌa nikita ntuakanamo. Pade daꞌapa iꞌa nompakamosu ira, nipowia iramo kasintuwu mompatesi iꞌa. 19 Nosimpotesamo ira sambaꞌa bo sambaꞌa, “Kitamo! Etumo topangipi marata! 20 Kamaimo kita mompatesi iꞌa, pade mantajiaka watabakuna riara saongu buwu to nangau eꞌi. Pade kita mamala manguli iꞌa nisoko bo nipatesi binata nasoa. Naopu etu rakitata iwenu ngina jadina pangipina etu!”
21 Tempo i Ruben nangepe patuju etu iꞌa nompasimbuku mompakasalama Yusuf. Niulina, “Neꞌe rapatesi iꞌa. 22 Agina kita manjoko iꞌa pade mantajiaka iꞌa riara buwu ri karawa baina seꞌi. Tapi neꞌe kita mombaboba iꞌa sampe mabaka mesuwu leina.” Niuli i Ruben iwetu sabana iꞌa madota mompakasalama Yusuf nggari jaꞌi ira pade manggeni iꞌa mpanjili mpaka ri jaꞌi umana.
23 Sangga naratapa Yusuf ri jaꞌi ntuakana, iꞌa nisoko ira pade baju nagaya to nipakena etu niwonju iramo nggari korona. 24 Pade iꞌa niumbunjai ira nitajiaka riara buwu to nangau ri setu.
25 Naopu etu nekatokomo tuaka-tuakana nanggoni mpasanggani-nggani. Tempo ira nanggoni nikita ira topodaga nadea mpuꞌu nosipanuntu noliu. Ira etu tau to Midian, muli Ismael to nalau nggari Bagia Gilead mpaka ri Tana Masir. Unta-unta ira nanggeni rampa-rampa, pakuli bo dama to nawongina.
26 Jadi nangulimo Yehuda ka sampesuwu-sampesuwuna, “Nuapa gunana kita mompatesi tuaꞌita pade mantabuniaka powiata etu? 27 Agina kita mompobalu iꞌa ka tau-tau muli Ismael etu. Neꞌe kita mombakuya-kuya iꞌa. Toramo! Iꞌa sampesuwuta, tuaꞌita mboto.”
Nangepe etu nasitujumo sampesuwu-sampesuwuna ante pantesa Yehuda etu.
28 Jadi tempo topodaga-topodaga to Midian etu noliu, nalaumo tuaka-tuakana nombasoreaka Yusuf nggariara buwu nangau etu pade nipobalu iramo iꞌa ka topodaga to Midian etu ante olina rompulu mpeka doi salaka. Naopu etu Yusuf nikeni ntopodaga mapola mpaka ri Tana Masir.
29 Tempo Yusuf nipobalu ntuakana, i Ruben daꞌa nosanggani-nggani ante ira. Jadi tempo iꞌa nanjili ri buwu etu nikitana mana ria Yusuf riarana. Nanggita etu niserina bajuna ante nasusa rara, 30 pade nanjilimo iꞌa ri jaꞌi sampesuwu-sampesuwuna. Narata ri setu niulina, “Ngana etu mana naria nirataku! Nuapamo kupowia weꞌi-weꞌi?”
31 Naopu etu ira nanjambale saongu towau pade baju nagaya Yusuf nitome ira riara lei ntowau etu. 32 Pade nipakau ira tau nanggeni baju etu ka umana ante tewai, “Baju eꞌi nirata kami. Bara baju anamu Yusuf, uma?”
33 Ninjani Yakub baju etu, pade niulina, “Nakono mpuꞌu! Eꞌi mpuꞌu-mpuꞌu baju anaku Yusuf! Natantu iꞌa namate nipama binata nasoamo!” 34 Naopu etu niseri-serina bajuna pade nipasuana pakea nipowia nggari karu, tandaina nabuku mpuꞌumo rarana. Pade nadea mbengi iꞌa nageo-geo nombatete anana Yusuf. 35 Anana pura-pura, nabeloka besi, nabeloka langgai narata mompakawoe rarana, tapi iꞌa daꞌa madota rapakawoe rarana. Niulina ka ira, “Sampe mamate kana kutangi anaku etu.” Jadi iwetumo kasusa rarana nantangi anana.
36 Ri tempo etu ri Tana Masir Yusuf nipobalu topodaga to Midian ka i Potifar, sambaꞌa tadulako magau to najadi balengga topanggatono sapo magau nto Masir.