Yakub nanjili mpaka ri Betel
35
Naopu etu nangulimo Alatala ka Yakub, “Akumo Alatala to nompopokita koroku ri jaꞌimu tempo iko nalai nggari jaꞌi ntuakamu Esau. Kalaumo iko masalisa mpaka ri Betel pade petoꞌomo ri setu. Pade powiamo saongu petoꞌo mpesomba ka Aku ri setu.”2 Naopu etu nangulimo Yakub ka ira saongu njapo bo ka pura-pura tau to nosanggani-nggani ante ira, “Tajiakamo parantau-parantau wiata to naria ri jaꞌimu. Kawiamo ada mompakagasa koro pade pasuamo pakea to nagasana, 3 sabana kita kana malai nggari seꞌi mpaka ri Betel. Ri setu aku kana mompowia saongu petoꞌo mpesomba ka Alatala to nantulungi aku tempo ri kapariku pade to nosanggani-nggani ante aku ri umba-umba nikalauku.”
4 Jadi ira nombawai ka Yakub pura-pura parantau wiata to naria ri jaꞌi ira pade woꞌu jali-jali ira.a Njumaongu parewa etu nitana Yakub ri wayo kayu bete namosu ngata Sikhem. 5 Naopu etu nanggaliwomo ira. Pade Alatala nompakawiora rara pura-pura tau riara ngata-ngata ri ntalili ira sampe Yakub bo roa-roana daꞌa niraga ira.
6 Pade naratamo Yakub ante roa-roana ri ngata Lus ri Tana Kanaan, to niuli woꞌu ngata Betel. 7 Ri setumo Yakub nompowia saongu petoꞌo mpesomba ka Alatala pade nipoposangana petoꞌo etu “El Betel,”b sabana ri petoꞌo etumo Alatala nompopokita korona ka iꞌa tempo iꞌa nalai nggari tuakana.
8 Ri setu woꞌu i Debora batua i Ribka namate. Pade iꞌa nitana ri wayo kayu bete ri sabingga puluna ngata etu. Jadi kayu etu nipoposanga “Kayu Tumangi.”
Alatala nombagane Yakub ri Betel
9 Sangga nanjilipa Yakub nggari Tana Padan-Aram Alatala nompopokita korona woꞌumo ka iꞌa pade nombagane iꞌa. 10 Niuli Alatala ka iꞌa, “Sangamu Yakub.c Tapi weꞌi-weꞌi iko mana rauli Yakub, tapi iko kana rapoposanga Israel.”d Jadi iwetumo Alatala nompoposanga iꞌa Israel.
11 Pade niuli Alatala woꞌumo ka iꞌa, “Akumo Alatala to Neliu Nggakuasa. Iko kana moana momakumpu mpakadea-dea. Mulimu kana majadi saongu ngata bete bo saongu kasiromu ngata-ngata bete. Pade maria mulimu banepia majadi magau. 12 Tana eꞌi to niwaiku ka Abraham bo Ishak kuwai woꞌu ka iko bo ka mulimu.” 13 Naopu notesa ka Yakub nalaimo Alatala nompalasi iꞌa ri setu.
14 Naliu etu Yakub nompatinda saongu watu popatora ri petoꞌo etu. Pade nijunjuna watu etu ante ue anggur bo lana tandaina watu etu najadi popatora ante Alatala. 15 Petoꞌo etu nipoposangana “Betel.”e
Tesa kamate Rahel
16 Naopu etu Yakub ante roa-roana nompalasi Betel. Tempo ira danakawao ante ngata Efrata naratamo ntoana i Rahel moana. Tapi ana to niotena etu nakaja pesuwuna. 17 Tempo nandasa mpuꞌumo iꞌa noana notesamo sando ka iꞌa, “Neꞌe maeka, Rahel, anamu langgai.” 18 Tapi namosumo janji i Rahel, pade tempo iꞌa nanggabasaka nosa kaopuna, nipoposangana ana etu i Ben-Oni.f Tapi umana nompoposanga iꞌa Benyamin.g
19 Jadi namatemo i Rahel pade iꞌa nitana ri wiwi jala to napola mpaka ri ngata Efrata, to niuli weꞌi-weꞌi ngata Betlehem. 20 Yakub nompatinda saongu watu popatora ri dayona ri setu, pade sampe ri eo eꞌi woꞌu dayo i Rahel danitandai nu watu etu.
21 Naopu etu Yakub nompapola polumakona, pade nipatakana tendana ri saongu petoꞌo ri sambote nggari Migdal-Eder. 22 Tempo Yakub netoꞌo ri bagia etu i Ruben nesua nosampaturu ante i Bilha, rongo piara nu umana. Pade kajadia etu niepe Yakubmo.
Ana-ana Yakub
1 Taw. 2:1-2
Yakub noana ka sampulu rombaꞌa ngana langgai. 23 Ana-ana i Lea etumo: i Ruben ana ulumbua Yakub, i Simeon, i Lewi, Yehuda, Isakhar bo i Zebulon. 24 Ana-ana i Rahel etumo: Yusuf bo i Benyamin. 25 Ana-ana i Bilha batua i Rahel etumo: i Dan bo i Naftali. 26 Pade ana-ana i Zilpa batua i Lea etumo: i Gad bo Asyer. Etu puramo ana-ana langgai Yakub to niote ri Tana Padan-Aram.
Tesa kamate Ishak
27 Naopu etu naratamo Yakub ri jaꞌi umana Ishak ri ngata Mamre namosu ngata Kiryat-Arba, to niuli woꞌu ngata Hebron. Etumo bagia to nipetoꞌo Abraham bo Ishak nokolu. 28 Umuru Ishak naganamo satu walumpulu mpae kasaena 29 pade iꞌa namate. Tempo kamatena etu neliu nggatuꞌamo iꞌa, nasae mpuꞌumo umuruna. Naopu namate iꞌa nitana anana Esau bo Yakub.