Dina nipogau i Sikhem
34
Naria saeo i Dina ana besi Yakub njambokona i Lea nalau nanggita bara sakuya mbaꞌa besi to Kanaan. 2 Ri setu naria i Sikhem, ana i Hemor tau to Hewi to najadi magau ri bagia etu. Tempo i Sikhem nanggita i Dina, nikenimpalaina randoo etu pade nipogauna. 3 Tapi nabete mpuꞌu rarana mosanggani-nggani ante i Dina, ana Yakub etu. Nipotowena i Dina pade nipasimbukuna mangala rarana. 4 Niuli i Sikhem ka umana i Hemor, “Uma, ala ka aku randoo etu ala majadi rongoku.”5 Tempo Yakub nangepe lele nanguli anana besi nipogaumo, anana langgai danoewu pompatuwu ira ranggarawana. Jadi iꞌa aga nekalino nompopea karata ira.
6 Pade naratamo i Hemor uma i Sikhem nolibu ante Yakub. 7 Ewa nisuka tempo etu naratamo ana-ana Yakub nggari karawana. Sangga nangepe kajadia etu najuꞌa bo narau mpuꞌu rara ira, sabana i Sikhem nompakajaꞌa sanga nto Israel ante nompogau ana besi Yakub, sangele to daꞌa ntoto masipato rapowiana.
8 Tempo etu nangulimo i Hemor, “Anaku i Sikhem nabete mpuꞌu rarana momporongo anamu. Kuperapi ala komi mombawai anamu etu raporongo anaku. 9 Kamaimo mosiporongo ante kami. Waimo ana-ana besi komi ka kami bo alamo ana-ana besi kami majadi rongo anamu. 10 Petoꞌomo komi ri tatongo kami. Natebukamo tana eꞌi ri ngayo komi. Petoꞌomo ri seꞌi pade modaga bo mangoli tana.”
11 Naopu etu nangulimo i Sikhem ka uma i Dina bo tuaka-tuakana, “Kuperapi, rapoiyomo pomperapiku eꞌi pade aku kana mombawai ka komi nuapa-nuapa raperapi komi. 12 Naupa rapakadea ada nu besi etu bo pewai-pewai ntanina, kana kubayari pura-pura nuapa to raperapi komi. Aga waimo aku momporongo randoo etu.”
13 Pade nesonomo ana-ana Yakub ante bagiu ka i Sikhem bo umana i Hemor, sabana i Sikhem nompogau tuaꞌi ira i Dina. 14 Niuli ira, “Daꞌa namala kami mombawai tuaꞌi kami raporongo ntau daꞌa nisuna. Etu sangaya to mompakaeya kami. 15 Kami eꞌi aga mamala momposituju pomperapimu ane komi mantuki atura eꞌi: pura-pura langgai ri tatongo komi kana rasuna nasimbayu ewa kami. 16 Maopu etu pade kami mamala mombawai randoo-randoo kami raporongo komi, pade kami mamala momporongo randoo-randoo komi. Pade kami mamala metoꞌo ri tatongo komi bo majadi sangata ante komi. 17 Tapi ane komi daꞌa madota mantarima atura kami eꞌi, pade daꞌa madota rasuna, kami kana mangala mpanjili randoo etu pade malai nggari jaꞌi komi.”
18 Tesa-tesa ira etu nitarima i Hemor bo anana i Sikhem. 19 Jadi kabilasa etu nasadia mompowia ada etu, sabana iꞌa mpuꞌu-mpuꞌu nompokono i Dina. Nggari pura-pura ananjapo Magau Hemor etu i Sikhemmo to neliu nibila. 20 Jadi nalaumo i Hemor bo anana i Sikhem mpaka ri bobaa bete ngata etu ala motesa ka pue ngata etu. 21 Nangulimo ira, “Tau-tau to Israel etu madota matuwu mosinggabelo ante kita. Rapalambata ira metoꞌo ri tana eꞌi bo modaga ri seꞌi. Tana eꞌi nagana luona ka ira woꞌu. Pade kita mamala momporongo randoo-randoo ira bo ira mamala momporongo randoo-randoota. 22 Tapi ira aga nasadia metoꞌo mpasanggani-nggani ante kita pade majadi sangata ante kita ane aga kita mantuki sangaya ada ira, etumo pura-pura langgai ri tatongota kana rasuna nasimbayu ewa ira. 23 Tapi pekirimo, ane kita mowia etu natantu pura-pura pompatuwu ira, mbara-mbara ira kana majadi bagiata. Jadi kamaimo kita mompoiyo pomperapi ira ala ira madota metoꞌo mpasanggani-nggani ante kita.”
24 Pura-pura tau to nasiromu ri bobaa bete etu nasituju ante tesa i Hemor bo i Sikhem. Pade pura-pura totuꞌa langgai bo kabilasa riara ngata ira nisuna.
25 Tolueo kaliuna langgai-langgai danompainjo juꞌana. Tempo etu rombaꞌa ana Yakub, etumo tuaka i Dina to nosanga ka i Simeon bo i Lewi, nangala guma ira pade nesua nggalino-lino riara ngata. Pade nipatesi iramo pura-pura langgai riara ngata etu, 26 nawela woꞌu i Hemor bo i Sikhem. Niala ira i Dina nggari sapo i Sikhem pade nalai. 27 Naopu etu naratamo ana-ana Yakub to ntanina nangago mbara-mbara ntomate etu, sabana tuaꞌi ira nipogau ri setu. 28 Pura-pura towau, bimba, japi, keledai, bo mpengaya-ngaya to naria riara ngata pade to naria ri karawana woꞌu niala ira puramo. 29 Pura-pura kakalumana ngata etu pade pura-pura ngana bo besi niago ira nosanggani-nggani ante mbara-mbara nggariara sapo-sapo ngata etu.
30 Nanggita powia ira etu nangulimo Yakub ka i Simeon bo i Lewi, “Komi nompakandasa aku eꞌi ante nompakawau sangaku ri tatongo nto Kanaan bo to Feris to netoꞌo ri tana eꞌi! Kita eꞌi daꞌa nadea. Ane ira pura-pura masintuwu mangewa aku pade marata mosibali ante aku, natantumo kita pura-pura saongu njapo kana rapakaropu ira!”
31 Tapi nesonomo ira, “Daꞌa namala kami mompalamba tuaꞌi kami rapowia ira ewa bajinga!”