Yakub nosintomu ka Esau
33
Yakub nantongoaka nikitana Esau narata ante patatu mbaꞌa roana. Sabana etu nibagina ana-anana ri olo i Lea bo i Rahel bo rombaꞌa rongo piarana. 2 Nipopokoluna rombaꞌa rongo piarana ntaliana nisunju i Lea ntaliana. Pade nisunjuna i Rahel bo Yusuf ri purina. 3 Yakub mboto nolumako ri kolu ira nompakamosu tuakana Esau. Tempo nompakamosu tuakana notimbakotumo iꞌa sampe ri tana pitu nggani ala mekou ri jaꞌina.4 Tapi Esau nangowa nantomunaka Yakub pade nikalipuina bo niekina. Pade ira rombaꞌa notumangi sanggani-nggani. 5 Tempo Esau nanggita besi-besi bo ngana-ngana etu nipekutanana ka Yakub, “Isema ira to naria nosanggani-nggani ante iko eꞌi?”
Nesonomo Yakub, “Ira eꞌimo ana-anaku to niwai Alatala ka aku nggari kabelo nu rarana.”
6 Naopu etu rombaꞌa rongo piarana ntaliana nompakamosu pade notimbakotu ri ngayo Esau. 7 Pade ira nisunju i Lea ntaliana pade kaopuna Yusuf bo i Rahel, pade ira woꞌu notimbakotu ri setu.
8 Nekutanamo Esau ka Yakub, “Nuapa patujumu ante lunu-lunu binata to niposintomuku paneꞌa etu?”
Nesonomo Yakub, “Ala mompakasana raramu, madika.”
9 Tapi nangulimo Esau, “Naganamo kakalumanaku, tuaꞌi. Bolimo ri jaꞌimu mboto anumu etu.”
10 Tapi nangulimo Yakub, “Neꞌe! Kuperapi ane aku nikonoa raramu, tarimamo pewaiku eꞌi. Ane aku, nanggita lenje komi nasimbayu ewa nanggita lenje Alatala, sabana komi nantarima aku ante nabelo. 11 Jadi kuperapi tarimamo pewai to nikeni ka komi etu, sabana Alatala neliu nggabelo rarana ri jaꞌiku sampe nariamo mpengaya to niparaluuku.” Yakub bate-batena nangala rara ntuakana sampe kaopuna Esau nantarima pewaina etu.
12 Pade nangulimo Esau, “Kamaimo kita mompakasadia malai. Aku kana mosanggani-nggani ante iko.”
13 Tapi nesonomo Yakub, “Natantu ninjani komi mboto ngana-ngana eꞌi danalente, bo aku kana mombajagai japi bo bimba to danantomi. Ane rairi magasi-gasi nau aga saeo, mamate puramo binata etu. 14 Agina komi mokolu, damo aku metuki mompaenje jala. Aku kana molumako mantuki kagasi nu pompatuwuku bo ana-anaku eꞌi sampe mantuntumaka komi ri Bagia Seir.”a
15 Nangepe etu nangulimo Esau, “Ane iwetu nabelopa aku mombaboli ka iko bara sakuya mbaꞌa anabuaku.”
Tapi nesonomo Yakub, “Neꞌe masusa-susa iwetu. Naganamo ane aku eꞌi nikonoa raramu.”
16 Jadi eo etu nanggaliwomo Esau nanjili mpaka ri Bagia Seir. 17 Tapi Yakub nalau mpaka ri ngata Sukot pade nombabangu sapo petoꞌona bo petoꞌo pekaulu pompatuwuna. Etumo sabana petoꞌo etu nipoposanga Sukot.b
18 Riara mpolumakona nggari Tana Padam-Aram naratamo Yakub ante nasalama ri ngata Sikhem ri Tana Kanaan. Pade nipatakana tendana ri saongu karawa namosu ngata etu. 19 Karawa petoꞌo tendana etu niolina nggari tau muli i Hemor, uma i Sikhem ante olina satu mpeka doi salaka. 20 Ri setumo Yakub nompowia petoꞌo mpesomba, pade nipoposangana, “El, Alatala Israel.”