Yakub nompakasadia mosintomu ante Esau
32
Naliu etu Yakub nompapola polumakona. Pade naria malaeka-malaeka Alatala nosintomu ka iꞌa. 2 Sangga nanggita ira nangulimo Yakub, “Eꞌimo petoꞌo tenda Alatala!” Sabana etu nipoposangana petoꞌo etu Mahanaim.a3 Naopu etu Yakub nompakau bara sakuya mbaꞌa surona mokolu ka iꞌa mpaka ri jaꞌi ntuakana Esau ri Tana Seir, etumo ri Bagia Edom. 4 Nitewaina ira, “Tesamo ka madikaku Esau iweꞌi: ‘Batuamu Yakub nanguli ka komi iweꞌi: Nasaemo aku netoꞌo ri jaꞌi Laban. 5 Nariamo japiku, keledaiku, bimbaku, towauku bo batua-batuaku, nabeloka langgai, nabeloka besi. Weꞌi-weꞌi aku nompakatu kareba eꞌi ri jaꞌimu ante panjarumakaku ala mompakasana raramu.’ ”
6 Sangga nanjilipa suro-suro etu ri jaꞌi Yakub, nangulimo ira, “Nalaumo kami mpaka ri jaꞌi ntuakamu Esau. Weꞌi-weꞌi iꞌa momai ante patatu mbaꞌa tau ala mosintomu ante komi.”
7 Nangepe tesa etu naeka mpuꞌumo rara Yakub pade nandasamo pekirina. Jadi nibagina pura-pura tau to nosanggani-nggani ante iꞌa najadi rongo lunu. Waꞌa woꞌu ante bimbana, towauna, japina bo untana. 8 Nipekirina, “Ane Esau marata mombasuaki lunu pamulana, tantu lunu karonguna danariapa loga malai mompakasalama koro ira.”
9 Naopu etu nosambayamo Yakub, “O Pue Alatala to nisomba pueku Abraham bo umaku Ishak. PUE to nompakau aku manjili bali ri ngataku mboto ri jaꞌi sampesuwuku. Pade i PUE nojanji mompowia to nabelo ri jaꞌiku. 10 Kakonona aku daꞌa masipato mantarima belo bo towe to nipopokitamu ka aku. Tempo aku nanggaliwo nggari ngataku mboto nombawote binangga Yordan eꞌi daꞌa nikeniku nuapa-nuapa ntanina, aga sampeka lembau. Tapi weꞌi-weꞌi aku nanjili ante rongu lunu eꞌi. 11 Aku merapi ante mpuꞌu-mpuꞌu ka Komi, pakasalamamo aku nggari tuakaku Esau. Sabana aku naeka neꞌe-neꞌe iꞌa marata mompatesi kami njamboko ntaliana. 12 Toramo! Pue nojanji mompowia kabelona ka aku bo mompakadea muliku sampe kadeana masimbayu ewa bone ri wiwi ntasi to daꞌa namala rabila kadeana.” 13 Naopu nosambaya iwetu noturumo Yakub ri setu sambengi.
Naopu etu nialana sabagia nggari binata-binatana ala rawaina ka tuakana Esau, 14 etumo roatu ongu towau tinana, rompulu ongu towau tuamana, roatu ongu bimba tinana, rompulu ongu bimba tuamana, 15 tolumpulu ongu unta tinana to danompatomi nosanggani-nggani ante ana-anana, patampulu ongu japi tinana, sampulu ongu japi tuamana, rompulu ongu keledai tinana bo sampulu ongu keledai tuamana. 16 Nibagi-bagina binata etu najadi bara sakuya lunu pade butu-butu lunu niwaina ka sambaꞌa batua. Pade niulina ka ira etu, “Polumakomo komi mokolu ka aku bo jagaimo ala maria olona ri olo butu-butu lunu etu.” 17 Pade niulina ka batua ri koluna etu, “Ane tuakaku Esau mosintomu ante iko, pade iꞌa mekutana, ‘Isema madikamu? Mpaka ri umba iko? Isema pue binata-binata to niirimu etu?’ 18 sonomo iꞌa iweꞌi: ‘Eꞌi anu batuamu Yakub. Iꞌa nompakatu pura-pura etu ewa pewai pombabilana ka madikana Esau. Batuamu Yakub mboto da ri purina mombatuntumaka kami.’ ”
19-20 Pade iwetu woꞌu to nitewaina ka batua karombaꞌana bo katolumbaꞌana bo pura-pura batua ntanina to nanggeni binata-binata etu. Sabana nipekirina iꞌa mamala mombabuju Esau ante pewaina etu ala ane mosintomu ante iꞌa ngina, Esau kana mantarima iꞌa ante mabelo. 21 Jadi pewai-pewaina etu nipakatuna nokolu ka iꞌa, tapi iꞌa mboto danaboli sambengipa ri petoꞌo tendana.
Yakub nosibaga ante Alatala ri Peniel
22 Ri wengina etu Yakub nembangu pade nikenina rombaꞌa rongona ante rombaꞌa rongo piarana bo sampulu sambaꞌa anana, pade nombawote Binangga Yabok. 23 Naopu ira nibotesakana nanjili balimo Yakub nompakatu mbara-mbarana mpaka ri sambotena. 24 Tapi iꞌa mboto naboli ri setu njambaꞌana. Pade naratamo sambaꞌa langgai nosibaga ka iꞌa sampe ntora naeo. 25 Tempo ninjani ntau etu daꞌa mamala iꞌa mombadagi Yakub, nibobana ri puꞌu ntimpu Yakub sampe oyu wuku puꞌu ntimpuna etu nasalangei tempo ira nosibaga ri setu. 26 Pade niuli ntau etu, “Kabasakamo aku, sampalaipa meongamo eo!”
Tapi nesonomo Yakub, “Aku daꞌa mombakabasaka komi ane komi daꞌapa mombagane aku.”
27 Nekutanamo tau etu, “Isema sangamu?”
Nesonomo iꞌa, “Yakub.”
28 Pade nangulimo tau etu, “Sangamu mana rauli Yakub,b tapi Israel,c sabana komi nosibaga ka Alatala bo manusia, pade ikomo padagi.”
29 Nangulimo Yakub, “Uli ka aku woꞌu sangamu.”
Tapi nesonomo tau etu, “Daꞌa paraluu iko mekutana isema sangaku!” Pade niganenamo Yakub.
30 Naopu etu nangulimo Yakub, “Aku nosinggita lenje ante Alatala, tapi aku danatuwupa.” Sabana etu nipoposangana petoꞌo etu Peniel.d