Yakub nalai nggari jaꞌi Laban
31
Naria lele niepe Yakub to nanguli ana-ana langgai i Laban notesa iweꞌi: “Yakub nangala pura-pura kakalumana nu umata. Pura-pura kakalumana Yakub niratana nggari jaꞌi umata.” 2 Pade nikita Yakub woꞌu i Laban mana najole gaga ri jaꞌina ewa bopia.3 Naopu etu nangulimo i PUE ka Yakub, “Panjilimo mpaka ri ngata umamu bo sampesuwumu. Aku kana mosanggani-nggani ante iko.”
4 Nangepe etu Yakub nompakau tau lau nanguli ka i Rahel bo i Lea ala mosintomu ante iꞌa ri karawana ri petoꞌo lunu towau bo bimbana. 5 Narata ira ri setu nangulimo Yakub ka ira, “Nikitaku umamu mana najole gaga ri jaꞌiku ewa bopia. Tapi Alatala to nisomba umaku batena nosanggani ante aku. 6 Ninjani komi mboto woꞌu aku eꞌi nokarajaa ri jaꞌi umamu ante njumaongu karosoku. 7 Naupa damo iwetu aku kana nibagiuna, pade gajiku nibalina sampe sampulu nggani. Tapi Alatala daꞌa nompalamba iꞌa nowia kajaꞌana ri jaꞌiku. 8 Tempo umamu nanguli binata to narido kana majadi gajiku, njumaongu lunu binata noana narido pura. Pade tempo iꞌa nanguli binata to nariko kana majadi gajiku, njumaongu binatana etu noana nariko pura. 9 Iwetumo Alatala nangala lunu binata bagia umamu pade niwaina ka aku.
10 Bopia tempo binata-binata etu nerasi, aku nangipi pade riara mpangipiku nikitaku towau tuamana to nerasi etu nariko bo narido bo naloba puramo. 11 Pade malaeka Alatala notesa ka aku riara mpangipiku etu iweꞌi: ‘Yakub!’ Nesonomo aku, ‘Iyo, Pue!’ 12 Pade nangulimo malaeka etu, ‘Kitamo, njumaongu towau tuama to nerasi etu nariko bo narido bo naloba. Nitunggaiku nompowia etu sabana nikitaku pura-pura nuapa to nipowia i Laban ka iko. 13 Akumo Alatala to nompopokita koroku ka iko ri Betel. Ri setu iko nompatinda saongu watu popatora pade nijunjumu lana zaitun ri bungguna. Ri setu woꞌu iko nojanji ka aku. Jadi weꞌi-weꞌi pakasadiamo. Palaimo nggari tana eꞌi pade panjilimo mpaka ri ngata pesuwumu.’ ”
14 Nangepe tesa Yakub etu nesonomo i Rahel bo i Lea, “Mana ntoto naria kakalumana uma kami maboli ka kami. 15 Kami eꞌi nirekena ewa to sangatana. Kami nipobaluna pade nuapa to nitarimana etu nipakaopuna woꞌu. 16 Njumaongu kakalumana to niala Alatala nggari jaꞌi uma kami kakonona bagia kami bo ana-ana kami. Jadi powiamo nuapa to niparenta Alatala ka iko.”
17-18 Nangepe tesa nu rongona etu Yakub nompakasadia manjili mpaka ri jaꞌi umana Ishak ri Tana Kanaan. Nipopesawina untamo rongona bo ana-anana pade niirina njumaongu lunu towau bimba bo njumaongu nuapa-nuapa to niratana ri Tana Padam-Aram.
19 Tempo etu i Laban naria ri karawana nombagunji wulu bimba-bimbana. Pade tempo etumo i Rahel lau nangangga parantau nu umana to nombajagai ira saongu njapo. 20 Yakub nombabagiu i Laban to Aram etu ante daꞌa nompopanjani ka iꞌa ira nalai. 21 Nialana njumaongu kakalumanana pade nalai nasalisa-lisa. Iꞌa newote binangga Efrat pade napola mpaka ri bagia buluna Gilead.
Laban nombaraga Yakub
22 Damo katolueo kaliuna palai Yakub njamboko ntaliana pade nipopanjani ka i Laban. 23 Nangepe kareba etu i Laban nompasiromu sampesuwu-sampesuwuna pade nosanggani-nggani ante ira lau nombaraga Yakub. Pitu eo ira neraga sampe nantuntumaka iꞌa ri bagia buluna Gilead. 24 Wengina etu naratamo Alatala ri jaꞌi Laban to Aram etu riara mpangipina, pade niulina ka iꞌa, “Pakabelo-belo! Neꞌe ntoto iko motesa momparangga Yakub!”
25 Tempo i Laban nantuntumaka iꞌa, Yakub notenda ri bagia buluna Gilead. Pade i Laban ante sampesuwuna woꞌu notenda ri setu. 26 Naopu etu nangulimo i Laban ka Yakub, “Nokuya iko nombabagiu aku ante nanggeni mpalai ana-anaku ewa tau nitawani? 27 Nokuya iko nombabagiu aku ante nalai nggalino, daꞌa nopasabi ka kami? Nokuya iko daꞌa nanguli ka aku iko madota malai ala aku mamala mombakabasaka komi malai mpakadamba-damba ante musi tamburen bo kacapi? 28 Iko daꞌa nombawai loga ka aku mombaeki makumpuku bo anaku! Nadoyo mpuꞌu pokainggumu etu! 29 Kakonona nakuasa aku mompandasa iko, tapi iwengi Alatala to nisomba umamu nanguli ka aku iweꞌi: ‘Neꞌe iko motesa momparangga Yakub!’ 30 Ninjaniku iko nalai sabana nalentora manjili mpaka ri jaꞌi umamu. Tapi nokuya iko nompangangga parantau to nombajagai kami saongu njapo?”
31 Nesonomo Yakub, “Aku nalai nggalino-lino sabana naeka raraku komi mantaꞌamaka ana-anamu. 32 Tapi nosinggawela ante parantaumu etu ane komi mombarata tau ri seꞌi to nangangga parantau etu, iꞌa kana rapatesi! Paresamo ri ngayo sampesuwu-sampesuwuta eꞌi ane maria anu komi ri seꞌi! Ane maria, mamala raala komi!” Daꞌa ninjani Yakub i Rahel nangangga parantau i Laban etu.
33 Jadi nalaumo i Laban ri tenda Yakub pade niparesana. Naopu etu iꞌa nalau nomparesa ri tenda i Lea bo tenda rombaꞌa batua besi etu, tapi parantau etu daꞌa niratana. Kaopuna iꞌa nesua riara tenda i Rahel. 34 Daꞌapa umana nesua ri tendana i Rahel nangala parantau etu nisuarakana riara polampi nu untana pade iꞌa mboto nekatoko ri bunggu polampi etu. Laban nomparesa njumaongu tenda i Rahel tapi daꞌa niratana parantau-parantau etu.
35 Tempo etu nangulimo i Rahel ka umana, “Neꞌe marau, Uma, aku daꞌa namala mekanggore mantotoaka komi sabana aku nirata wulana.” Laban nangelo mpakabelo-belo tapi daꞌa niratana parantau-parantau etu.
36 Kaopuna naraumo rara Yakub pade niulina ka i Laban, “Kajaꞌa nuapa ntoto to nipowiaku? Nuapa silakaku sampe komi nombaraga-raga aku? 37 Paneꞌa naopumo niparesamu pura-pura parewaku. Nuapa to niratamu nggari sapomu mboto? Suwurakamo parewa etu ri seꞌi ala sampesuwumu bo sampesuwuku mamala manggita bo mompakatantu isema ri olota eꞌi to nasala!
38 Rompulu mpaemo kasaena aku netoꞌo ri jaꞌimu. Riara rompulu mpae etu daꞌa ria sanggani binatamu nalonju anana, pade daꞌapa ria sanggani aku nanggoni towau tuamana nggari pompatuwu komi! 39 To namate nisoko binata nggakayu daꞌa sanggani nikeniku ri jaꞌi komi, tapi damo aku mbotomo nanjambei binata to namate etu. To nipangangga tempo eona bara nggawengina kana nituntu komi ala aku manjambeina. 40 Aku napane tempo eo pade niburu leni nggawengina, pade nadea nggani aku daꞌa nakapo naturu. 41 Iwetumo katuwuku tempo aku netoꞌo ri jaꞌi komi rompulu mpae kasaena! Sampulu patampae kasaena aku nokarajaa ala mombarata ana komi rombaꞌa etu, pade onompaepa woꞌumo aku nombaewu lunu towau bimba komi. Pade riara tempo etu komi nombabali gajiku sampe sampulu ngganina! 42 Ane aku daꞌa nitulungi Alatala to nisomba umaku, etumo Alatala to nisomba Abraham pade nipokaeka Ishak, natantumo aku rapopalai komi ante pale sampulu! Tapi Alatala nompariara kasusaku pade pokarajaaku, pade iwengi Iꞌa nombabutusi parakaraku riara mpangipimu!”
Pojanji Yakub bo Laban
43 Naopu etu nesonomo i Laban ka Yakub, “Rombaꞌa besi etu anaku, bo ana-ana ira etu makumpuku, pade lunu bimba etu anuku woꞌu. Kakonona pura-pura to nikitamu ri seꞌi akumo puena. Tapi aku daꞌa mamala mompowia nuapa-nuapa ala mantaꞌamaka ana makumpuku mantuki iko. 44 Sabana etu kamaimo kita mowia pojanji bo mombasunju watu majadi tandai pojanjita etu.”
45 Jadi Yakub nangala saongu watu pade nipatindana majadi watu popatora. 46 Pade nipakauna roa-roana nompasiromu watu pade mombasunju watu-watu etu. Naopu etu ira nanggoni mpasanggani ri sinjori watu nisunju ira etu. 47 Laban nompoposanga watu-watu etu Yegar-Sahaduta,a tapi Yakub nompoposangana Galed.b
48 Pade nangulimo i Laban ka Yakub, “Watu nisunjuta eꞌi majadi tandaina mompopatora kita rombaꞌa.” Etumo sabana sunju watu etu nipoposanga Galed. 49 Pade nipoposanga woꞌu Mizpa,c sabana i Laban nanguli woꞌu, “Perapi PUE mombajagai aku bo iko sakuya kasaena kita nosinggakawao. 50 Ane iko mowia kajaꞌana ri jaꞌi ana-anaku eꞌi atau momporongo besi-besi ntanina, toramo, naupa daꞌa maria tau to mangginjanina, Alatala manggita kita.”
51 Pade niuli Laban woꞌumo ka Yakub, “Kitamo watu to nisunjuta bo watu popatora to nipatindaku ri olota. 52 Watu to nisunjuta bo watu nipatinda eꞌi kana majadi popatora ala aku daꞌa mamala mombaliunaka watu eꞌi mpaka ri jaꞌimu ala mompakajaꞌa iko, pade iko daꞌa mamala mombaliunaka watu eꞌi mpaka ri jaꞌiku ala mompakajaꞌa aku. 53 Perapi Pue Alatala to nisomba Abraham bo i Nahor, Alatala to nisomba uma ira mombatangara kita.”
Jadi nojanjimo Yakub ante sanga Alatala to nipokaeka umana Ishak ala mompakaroso pojanjina etu. 54 Pade nisambalena saongu binata nipesombana ri bunggu bulu etu. Pade nigagana roa-roana manggoni mpasanggani-nggani. Naopu nanggoni naturumo ira sambengi ri setu.
55 Kaeo mpadondona i Laban nombaeki makumpu bo anana pade niganena ira. Naopu etu nanggaliwomo iꞌa manjili mpaka ri petoꞌona mboto.