30
Tempo i Rahel nanggita iꞌa daꞌa namala mangote ngana ka Yakub, nasiriatimo rarana ka tuakana i Lea. Niulina ka Yakub, “Popoana woꞌu aku! Ane daꞌa aku kana mamate!”2 Nangepe tesa etu naraumo rara Yakub ka i Rahel pade niulina, “Aku eꞌi daꞌa Alatala! Iꞌamo to nompowia iko nagampa!”
3 Jadi nangulimo i Rahel, “Eꞌimo batuaku i Bilha. Posampaturumo ante iꞌa ala iꞌa moana. Ante iwetu aku mamala majadi indo ngana etu nggari jaꞌina.”
4 Pade niwainamo i Bilha ka Yakub majadi rongona, pade nosampaturumo Yakub ante batua etu. 5 Naopu etu natianamo i Bilha pade iꞌa nangote sambaꞌa ngana langgai. 6 Pade nangulimo i Rahel, “Alatala nombatangara parakaraku ante nanoa. Niepenamo pomperapiku pade niwainamo ka aku sambaꞌa ngana langgai.” Jadi nipoposangana ngana etu i Dan.a
7 Naopu etu natiana woꞌumo i Bilha pade niotena ngana langgai karombaꞌana ka Yakub. 8 Pade nangulimo i Rahel, “Aku nosiewa ntotomo ante tuakaku pade akumo padagi!” Sabana etu nipoposangana ngana etu i Naftali.b
9 Sangga nanotomo ka i Lea iꞌa mana nompakule moana, niwaina batuana i Zilpa ka Yakub majadi rongona. 10 Pade i Zilpa noanaka sambaꞌa ngana langgai. 11 Pade nangulimo i Lea, “Nauntumo aku!” Jadi nipoposangana ngana etu i Gad.c
12 Naopu etu i Zilpa noana woꞌumo ngana langgai karombaꞌana ka Yakub. 13 Pade nangulimo i Lea, “O ranga, neliu mpuꞌu kadambaku! Weꞌi-weꞌi pura-pura besi kana manguli aku nadamba.” Jadi nipoposangana ngana etu Asyer.d
14 Naopu etu naratamo tempo mokato gando. Nalaumo i Ruben ri pampana pade ri setu niratana sangele pakuli to namala mantulungi besi moana. Pade nikenina pakuli etu ka indona i Lea.
Tempo i Rahel nanggita pakuli etu niulina ka i Lea, “Waimo ka aku sakedi nggari pakuli to nirata anamu etu.”
15 Tapi nesonomo i Lea, “Daꞌapa nagana iko nangala rongoku! Weꞌi-weꞌi iko madota woꞌu mangala pakuli to nirata anaku eꞌi!”
Nangulimo i Rahel, “Ane iko mombawai ka aku pakuli to nirata anamu etu, iko mamala maturu ante Yakub wengina eꞌi.”
16 Jadi tempo Yakub nanjili nggari pampana ngguwiana iꞌa nitomunaka i Lea to nanguli ka iꞌa, “Iko kana mosampaturu ante aku wengina eꞌi sabana iko nibayarikumo ante pakuli to nirata anaku.” Pade nosampaturumo Yakub ante i Lea wengina etu. 17 Posambaya i Lea nipoiyo Alatala pade sangganipa iꞌa natianamo pade nangote ngana langgai kalimambaꞌana ka Yakub. 18 Nangulimo i Lea, “Alatala nombawai ka aku tamboku sabana aku nombawai i Zilpa ka rongoku.” Sabana etu nipoposangana anana etu Isakhar.e
19 Naopu etu natiana woꞌumo i Lea pade niotena ngana langgai kaonombaꞌana ka Yakub. 20 Niulina, “Alatala nombawai ka aku hadia to nabelo mpuꞌu. Weꞌi-weꞌi rongoku kana mombabila aku f sabana aku noana onombaꞌa ngana langgai ka iꞌa.” Sabana etu nipoposangana anana etu i Zebulon.g
21 Naopu etu bara sakuya kasaena i Lea nangote woꞌumo sambaꞌa ngana besi pade ngana etu nipoposangana i Dina.
22 Pade Alatala nantora i Rahel. Nipoiyona pomperapi i Rahel pade niwaina ka iꞌa pompakule moana. 23 Naopu etu natianamo i Rahel pade niotena sambaꞌa ngana langgai. Nangulimo iꞌa, “Alatala nompakalipo eya mataku. 24 Perapi i PUE mantambai ka aku sambaꞌapa ngana langgai.” Sabana etu nipoposangana anana etu Yusuf.h
Kakalumana Yakub nantambai kadeana
25 Naopu i Rahel noana ka Yusuf nangulimo Yakub ka i Laban, “Palogamo aku manjili mpaka ri ngataku mboto. 26 Palogamo aku manggeni rongoku bo ana-anaku to nirataku ante mokarajaa ka komi. Palogamo kami malau mpaka ri ngataku, sabana ninjanimu mboto aku nokarajaa ntomo ka komi.”
27 Tapi nangulimo i Laban ka iꞌa, “Ane aku nipotowemu neꞌepa ruru malai. Nanotomo ka aku i PUE nombawai rasi ka aku sabana iko. 28 Ulimo sakuya gaji muperapi pade aku mombabayari etu ka iko.”
29 Nesonomo Yakub, “Mangge, ninjanimu mboto iwenu aku nokarajaa ntomo ka komi pade iwenu binata-binata komi nantambai nadea sabana pompiaraku. 30 Daꞌapa aku narata, to naria ante komi daꞌa sakuya kadeana. Tapi weꞌi-weꞌi nakalumanamo komi. Pade i PUE nombagane komi sabana aku. Tapi weꞌi-weꞌi naratamo tempona aku mokarajaa ka rongo bo anaku mboto.”
31 Pade nekutanamo i Laban, “Jadi nuapa to masipato kuwai ka iko?”
Nesonomo Yakub, “Neꞌe rawai nuapa-nuapa ka aku. Tapi ane komi masituju ante tesaku eꞌi aku kana maroo mompoewu bo mompiara binata-binata komi. 32 Palogamo aku eo eꞌi malau ri tatongo pura-pura lunu towau bo bimba komi pade mompatani nggari roana butu-butu bimba to narido bo naloba, pade butu-butu ana bimba to nawurina bo butu-butu towau to narido bo naloba. Etumo to majadi gajiku. 33 Pade ante iwetu ri eo nggapurina kana manoto rakita komi kanoaku. Ane komi marata momparesa binata kuala majadi gajiku etu, ane maria towau daꞌa narido bara naloba atau bimba daꞌa nawuri, kana ranjani komi binata etu nipanganggaku.”
34 Nesonomo i Laban, “Aku nasituju! Kana majadimo ewa to nitesamu etu!” 35 Tapi ri eo etu woꞌu i Laban nompatani ka iꞌa mboto pura-pura towau tuamana to narido bo naloba, pade pura-pura towau tinana to narido atau naloba. Nipatanina woꞌu pura-pura bimba to nawurina. Naopu etu nipakauna anana mboto mombaewu binata-binata etu. 36 Pade nalaumo ira nangiri binata-binata etu nakawao nggari jaꞌi Yakub, kakawaona tolu eo polumako. Pade labi lunu towau bimba i Laban to naboli nipoewu Yakub.
37 Naopu etu Yakub nangala rangga-rangga kayu dananggamata nggari kayu hawar, kayu badam bo kayu berangan, pade nilepana kuli rangga kayu etu najadi naloba-loba sampe natikita isi kayu naputi. 38 Pade nibolina rangga-rangga kayu to nilepana etu ri petoꞌo panginu binata ala binata-binata kana mantingayo rangga-rangga etu tempo manginu. Nipowiana iwetu sabana binata-binata etu nompokono nosirasi tempo nanginu. 39 Jadi tempo towau bo bimba nosirasi ri ngayo rangga kayu etu ana-anana naloba bo narido pura wulu ira. 40 Naopu etu nipatanina ana-ana binata etu nggari binata ntanina. Pade tempo nerasi binata-binata ntanina to naputi nggari binata i Laban niposintingayona ka binata-binata to narido bo nawuri ala binata etu moana narido bo nawuri. Ante iwetu iꞌa nombarata bimba bo towauna mboto. Pade nipatanina binata etu nggari binata i Laban. 41 Ane binata tinana to naroso nerasi Yakub nombaboli rangga-rangga kayu to nilepana etu ri ngayo ira ri petoꞌo panginu. 42 Tapi daꞌa nibolina rangga-rangga kayu etu ri ngayo binata to nalentena tempo nerasi. Jadi nasae-sae pura-pura binata to nabula wuluna nalente. Etumo bagia i Laban. Tapi pura-pura binata to nawuri bo naloba bo narido nesuwu nggari binata to naroso, pade etumo bagia Yakub. 43 Ante akala iwetu nantambai eo nantambai nakalumana Yakub. Nadea mpuꞌumo towau bo bimbana, untana, keledaina bo batuana, nabeloka langgai nabeloka besi.