28
Naopu etu Ishak nompokio Yakub pade niganena iꞌa. Nitewaina iweꞌi: “Neꞌe iko momporongo randoo nggari Tana Kanaan eꞌi. 2 Tapi kalaumo iko masalisa mpaka ri Tana Padam-Aram ri jaꞌi puemu i Betuel, pade porongomo sambaꞌa nggari ana-ana besi manggemu i Laban. 3 Perapi Pue Alatala to Neliu Nggakuasa mombagane porongomu pade mombawai ka iko ana bo makumpumu to madea-dea, sampe iko majadi totuꞌa nu ngata-ngata bete. 4 Perapi Iꞌa mombagane iko bo mulimu nasimbayu ewa Iꞌa nombagane Abraham, ala komi mamala majadi pue ntana to nipetoꞌomu eꞌi to niwai Alatala ka Abraham!” 5 Iwetumo tesa tewai Ishak nombakabasaka Yakub malau. Jadi nalaumo Yakub mpaka ri Tana Padam-Aram ri jaꞌi Laban, ana i Betuel to Aram etu. Laban etu tuaka i Ribka, indo Yakub bo Esau.Esau norongo woꞌumo
6 Esau nangepe lele to nanguli Ishak nombagane Yakub pade nompakau iꞌa mpaka ri Tana Padam-Aram ala mangelo rongo nggari setu. Pade niepena woꞌu tesa to nanguli tempo Ishak nombagane Yakub iꞌa nombatagi Yakub momporongo randoo to Kanaan. 7 Pade ninjani Esau woꞌu Yakub nompangala tesa indo umana pade nalau mpaka ri Tana Padam-Aram. 8 Jadi nanotomo ka Esau umana Ishak daꞌa nompokono besi nto Kanaan etu. 9 Sabana etu nalaumo Esau mpaka ri jaꞌi Ismael, ana Abraham, pade nomporongo sambaꞌa ana Ismael to nosanga ka i Mahalat, tuaꞌi i Nebayot. Mahalat etu najadi rongona katolumbaꞌana.
Pangipi Yakub ri Betel
10 Nanggaliwomo Yakub nggari ngata Bersyeba malau mpaka ri ngata Haran. 11 Tempo iꞌa narata ri saongu petoꞌo, naturumo iꞌa ri setu sabana nasolomo eo. Nialana saongu watu rapolunana pade naturumo iꞌa. 12 Pade nangipimo iꞌa nanggita saongu tangga nekanggore ri dunia, wuntu kaopuna sampe ri suruga. Pade nikitana malaeka-malaeka Alatala nanaꞌu bo nepone ri tangga etu.a 13 Pade nekanggoremo i PUE ri sabinggana ante nanguli, “Akumo i PUE, Alatala to nisomba puemu Abraham bo umamu Ishak. Aku kana mombawai ka iko bo mulimu tana to nipoturumu eꞌi. 14 Mulimu kana madea-dea ewa kadea sowu ri tana. Ira kana mantambai madea sampe metoꞌo ri bagia ri sabingga kasolona bo kamataeona, pade ri sabingga tasina bo puluna. Pade nggari iko bo mulimu banepia pura-pura manusia ri dunia kana mombarata rasi nggari jaꞌiku. 15 Toramo, Aku kana mosanggani-nggani ante iko bo manggalendu iko ri umbapa iko malau. Pade Aku eꞌi kana manggeni iko manjili mpaka ri tana eꞌi. Aku daꞌa mompalasi iko sampe madupa pura-pura nuapa to nijanjiku ri jaꞌimu etu.”
16 Sangga nembangupa Yakub nangulimo iꞌa, “PUE mpuꞌu-mpuꞌu naria ri petoꞌo eꞌi! Dako weꞌi-weꞌi pade ninjaniku!” 17 Jadi naekamo rarana pade niulina, “Nakarampua mpuꞌu petoꞌo eꞌi! Natantu eꞌimo Sapo nu Alatala, eꞌimo bobaa bete suruga!”
18 To naile mpadondona nembangumo Yakub, nialana watu to nipolunana pade nipatindana najadi popatora. Pade nijunjuna lana zaitun ri bunggu watu etu ka Alatala. 19 Petoꞌo etu nipoposangana Betel.b Nokolu sanga petoꞌo etu Lus. 20 Naopu etu nojanjimo Yakub iweꞌi: “Ane Alatala mosanggani-nggani ante aku bo manggalendu aku riara mpolumakoku eꞌi pade mombawai ka aku panggoni bo pakea 21 sampe aku mamala manjili mpaka ri sapo umaku ante masalama, i PUE kana majadi Alatalaku. 22 Watu eꞌi to nipatindaku majadi popatora eꞌi, kana majadi Sapo nu Alatala. Pade aku kana mompopanjili ka Komi sabagia nggari sampulu bagia nggari mpengele-ngele to kurata nggari jaꞌimu.”