Yakub nigane Ishak
27
Naria saeo tempo Ishak natuꞌamo pade naburo woꞌumo matana, nipokiona Esau anana ulumbua pade niulina ka iꞌa, “Anaku!”Nesonomo Esau, “Iyo, Uma.”
2 Nangulimo Ishak, “Ninjanimumo aku eꞌi natuꞌamo pade daꞌa ninjaniku nepia aku mamate. 3 Jadi weꞌi-weꞌi alamo parewa mpoasumu, etumo pana bo ana-ana panamu, pade kalaumo iko moasu ka aku saongu binata ranggarawana. 4 Poriapumo mpakawongi ewa pompokonoku, pade kenimo ka aku ala kukoni. Maopu aku manggoni aku mombagane iko daꞌapa aku mamate.”
5 Pantesa Ishak bo Esau etu niepe i Ribka. Naopu notesa ante umana nalaumo Esau moasu ka umana. 6 Sangga nalaipa Esau nangulimo i Ribka ka anana Yakub, “Lako niepeku umamu notesa ka tuakamu iweꞌi: 7 ‘Kalaumo moasu ka aku. Ane mamalamo binata ka iko panjilimo pade poriapumo mpakawongi-wongi bau etu mukeni ka aku. Maopu aku manggoni aku mombagane iko ri ngayo i PUE daꞌapa aku mamate.’ 8 Jadi weꞌi-weꞌi anaku, epemo tesaku pade powiamu nuapa to kuparenta ka iko eꞌi. 9 Kalaumo iko ri gimputa, pade pelisimo rongu ana towau to naboya-boyana ala kuporiapu panggoni to nawongi ewa to nipokono umamu. 10 Pade mukeni ka umamu ala rakonina pade maopu manggoni iꞌa mombagane iko daꞌapa iꞌa mamate.”
11 Tapi nangulimo Yakub ka indona, “Iwenumo, nindo? Tuakaku Esau tau nowulu korona, tapi koroku eꞌi daꞌa nowulu. 12 Neꞌe-neꞌe ngina umaku etu mombaleme koroku pade ranjanina tanu aga aku topebagiu. Ane iwetu daꞌa ngina iꞌa mombagane aku tanu aga mombajanjiaka aku.”
13 Tapi nesonomo indona, “Anaku, damo aku mombatanggu pejanjiakana etu. Powiamo nuapa to niuliku, kalaumo mangala ka aku towau-towau ritu.”
14 Jadi nalaumo Yakub nangala towau-towau etu nikenina ka indona. Pade i Ribka noriapu panggoni to nawongi ewa to nipokono Ishak. 15 Naopu etu nialanamo pakea Esau to neliu nggabelona to nibolina ri tenda, pade nipopasuana ka Yakub, ana kaopuna etu. 16 Pade nialana kulimba ana towau etu niwewena ri pale Yakub ntimali pade ri tambolona to daꞌa nowulu etu. 17 Naopu etu niwainamo ka Yakub pomporiapu to nawongi etu ante roti to nipowiana.
18 Nalaumo Yakub mpaka ri jaꞌi umana pade niulina, “Yuma!”
Nesonomo Ishak, “Iyo, anaku. Isema iko?”
19 Nesonomo Yakub, “Aku eꞌi Esau anamu to ulumbua. Tewai uma nipowiakumo. Pekatokomo bo panggonimo bau poasuku to nikeniku eꞌi ala uma mamala mombagane aku.”
20 Nangulimo Ishak, “Iwenu sampe nasalisa mpuꞌu iko nombarata bau, anaku?”
Nesonomo Yakub, “PUE Alatala to nisombamu nantulungi aku.”
21 Pade nangulimo Ishak ka Yakub, “Kamaimo pakamosu ri jaꞌiku seꞌi ala aku mamala mombaleme koromu ala kunjani ane nakono mpuꞌu iko etu anaku Esau bara daꞌa.”
22 Jadi Yakub nompakamosu umana. Umana nombaleme iꞌa pade nanguli, “Suaramu ewa suara Yakub, tapi palemu ewa pale Esau.” 23 Ishak daꞌa ninjanina Yakub sabana palena nowulu ewa pale ntuakana Esau. Tapi daꞌapa Yakub niganena, 24 sangganipa woꞌu nipekutanana, “Nakono mpuꞌu iko eꞌi Esau?”
Nesonomo Yakub, “Nakono.”
25 Pade nangulimo Ishak, “Anaku, waimo ka aku bau etu ala maopu aku manggoni aku mombagane iko.”
Yakub nombawai bau etu ka umana pade niwaina woꞌu sakedi anggur rainu umana. 26 Pade nangulimo umana ka iꞌa, “Kamaimo pakamosu aku ri seꞌi anaku, bo ekimo aku.”
27 Jadi Yakub nompakamosu pade nombaeki umana. Tempo Ishak nangenga soa pakea Esau to nipasua Yakub etu niganenamo iꞌa. Niulina,
“Anaku, soamu nawongi ewa soa karawa to nigane i PUE.
28 Perapi Pue Alatala mombawai ka iko loi nu betuꞌe nggari langi
pade mompakaboya tinalumu bo mombawai ka iko gando bo anggur madea-dea!
29 Perapi pue ngata nggari umba-umba majadi batuamu
bo tau dea mekou ri jaꞌimu.
Perapi iko mombakuasai sampesuwumu
pade muli nu indomu mekadede ri ngayomu.
Isema-sema mombajanjiaka iko kana rajanjiaka,
pade isema-sema mombagane iko kana ragane.”
Esau nekigane ka Ishak
30 Naopupa Yakub nigane Ishak pade lako nalai nggari jaꞌi umana etu, nanjilimo tuakana Esau nggari poasuna. 31 Iꞌa woꞌu noriapu panggoni to nawongina pade nikenina ka umana. Niulina ka umana, “Pekatokomo, uma, bo konimo bau poasuku eꞌi ala komi mamala mombagane aku.”
32 Nangepe etu nekutanamo umana Ishak, “Isema iko?”
Nesonomo Esau, “Aku eꞌi anamu Esau, anamu to ulumbua.”
33 Nangepe pesono Esau etu nompamulamo Ishak nolete njumanggoro, pade nipekutanana, “Ane iwetu, isema tanu noasu binata pade nanggeni ka aku paneꞌa? Nanggonimo aku paneꞌa daꞌapa iko narata. Pade niganekumo iꞌa. Weꞌi-weꞌi rasi etu najadi bagiana sampe ri kasae-saena!”
34 Sangga nangepe tesa nu umana etu, nongaremo Esau mpakagai ante nasusa mpuꞌu rarana, pade niulina ka umana, “Gane woꞌu aku eꞌi, uma!”
35 Tapi nangulimo Ishak, “Tuaꞌimu nomai nombabagiu aku. Nialana puramo rasi to masipato kuwai ka iko.”
36 Nangepe etu nangulimo Esau, “Masipato sangana Yakub! Eꞌimo karongganina iꞌa nombabagiu aku. Iꞌa nangala kuasaku ewa ana ulumbua, pade weꞌi-weꞌi niagona rasi to masipato rawai ka aku!” Pade niuli Esau woꞌumo ka umana, “Iwenu, uma? Mana ria rasi ntanina raboli uma ka aku?”
37 Nesonomo Ishak, “Aku nojanji iꞌa kana majadi madikamu, pade pura-pura sampesuwuna majadi batuana. Nijanjikumo ka iꞌa gando bo anggur. Jadi weꞌi-weꞌi mana ria ntanina nuapa-nuapa kuwai ka iko, anaku!”
38 Daꞌa nenonto-nonto Esau nerapi rasi nggari jaꞌi umana. Niulina, “Aga sangele lau rasimu, uma? Gane woꞌu aku, uma!” Pade notumangi woꞌumo iꞌa ante suara namangga.
39 Pade nangulimo umana ka iꞌa,
“Petoꞌomu kana makawao nggari tana to naboya to nawela loi nu betuꞌe nggari langi.
40 Iko aga matuwu nggari gumamu,
pade iko majadi batua ntuaꞌimu.
Tapi ane iko menggarawemba,
iko makabasaka nggari kuasana.”
41 Jadi Esau nomboli rau rarana ka tuaꞌina Yakub, sabana umana nombagane tuaꞌina etu. Nipekiri Esau, “Mana masae woꞌu umaku mamate, pade ane maopumo posusa kamatena tuaꞌiku Yakub kana kupatesi!”
Yakub nipakau mpaka ri jaꞌi manggena i Laban
42 Tempo i Ribka nangepe nia Esau etu, iꞌa nompakau tau mompokio Yakub, pade niulina ka iꞌa, “Epemo! Tuakamu Esau nonia mombabalasi juꞌa rarana ante mompatesi iko. 43 Jadi weꞌi-weꞌi, anaku, powiamo ngina anu kuuli eꞌi. Kalaumo iko ante masalisa ri jaꞌi ntuakaku i Laban ri ngata Haran. 44 Pade petoꞌomo iko mosanggani ante iꞌa bara sakuya kasaena sampe rau rara nu tuakamu maopu, 45 pade iꞌa manggalinga nuapa to nipowiamu ri jaꞌina. Maopu etu aku kana mompakau tau manggeni iko manjili ri seꞌi. Aku daꞌa madota anaku rombaꞌa matonto sanggani aga riara saeo!”
46 Naopu etu nalaumo i Ribka mpaka ri jaꞌi Ishak pade niulina, “Nabasamo raraku matuwu nanggita pokainggu rongo-rongo Esau tau-tau to Het etu. Ane Yakub woꞌu momporongo randoo nggari tana nto Het eꞌi nasimbayu ewa ira rombaꞌa, aginapa aku eꞌi mamatemo!”